شوية ضمير

كتب : مجدى إبراهيم .. لو كل واحد فينا عنده شوية ضمير بس هتبقى بلدنا دى من أحسن بلاد الدنيا، إحنا مش ناقصنا حاجة خالص علشان نكون دولة كويسة واقفة على رجليها.. عندنا موارد كانت بشرية أو مادية أوطبيعية، الناس فى بلدى طيبة لسه فيهم الأصل الطيب والمعدن الأصيل اللى بيطلع وقت الشدة، وعندنا فلوس كتير بدليل إننا لسه عايشين لغايه دلوقتى رغم إننا بنتسرق بقالنا على الأقل 3000 سنة، وبدليل كمان أن الافلام فى العيد حققت لغاية دلوقتى 32 مليوناً، ولو نزلت المحلات والمولات ما شاء الله الصرف على ودنه، يبقى متقولش البلد لا يوجد فيها فلوس، وإن جينا للموارد الطبيعية خد عندك أهرام وأبو الهول والأقصر ثلث آثار العالم، والبحران الأبيض والأحمر بما فيهم من مدن الغردقة شرم الاسكندريه مطروح بورسعيد، والله بلدنا حلوه يبقى إيه اللى ناقصنا.. كلمه السر (الضمير) آه وألف آه من الضمير، لو كل واحد ينمى ضميره شويه بشويه مش هنلاقى حد بيرمى زباله فى الشارع، ومحدش هيفتح حنفية الميه على الفاضى والمليان، ومش هنلاقى الناس اللى مزوغة من الشغل وماشيه فى الشارع بهدف ومن غير هدف، ومش هنلاقى سواقين التاكسى بيلعبوا فى العداد، تخيلوا حتى التاكسى الأبيض الجديد اتلعب فى العداد بتاعه، ومش هنلاقى المرور والأحياء والكهرباء والمياه إلخ كله ماشى بالرشوة، وهنلاقى كل واحد بيشتغل بكل ما أوتى من قوة، والإنتاج يزيد، والصادرات تزيد، والدخل يزيد، ومستوى الفرد يرتفع.. يارب كل أحلامى دى تتحقق.