«عمر» أصغر متظاهر فى مصر: النظام «وحِش» ولازم يتغير

«النظام» وحش ولازم يتغير.. ولو قبضوا علىّ فى مظاهرة وسألونى بتعمل كده ليه، هقول لهم عشان الوضع فى مصر مش حلو».. بهذه الكلمات لخص الطفل عمر محمد يوسف طعيمة، 8 سنوات، تلميذ فى الصف الثالث الابتدائى، موقفه من المشاركة فى المظاهرات، وانضمامه لحركة «أطفال من أجل التغيير» مع 65 طفلاً آخرين يطالبون بإصلاح الأوضاع.
■ عمر.. بتشارك فى مظاهرات ليه؟
- لأن الحكومة مش حاسة بالناس وهمومهم، خصوصاً أن معظم الناس عايشين تحت خط الفقر.
■ مش خايف يقبضوا عليك؟
- أنا مش مبسوط من الأوضاع الموجودة فى مصر من مدة، والنظام لازم يتغير، لأنه «وحش»، ولو قبضوا علىّ هقول لهم كده ومش هاخاف.
■ وهل مظاهرتك ستغير الأوضاع؟
- واحد مع واحد، ومظاهرة بعد مظاهرة واحتجاج بعده احتجاج، ممكن معاهم الأوضاع تتغير.
■ لما تكبر، نفسك تبقى إيه؟
- نفسى أدخل كلية الشرطة وأبقى ضابط عشان آخد للغلابة حقوقهم، وأدافع عنهم وما اسيبش حد مظلوم، وأحمى الناس من الحرامية، وأمنع تحكم الشرطة فى سواقين الميكروباص والتاكسى، ونفسى كمان أمنع التعذيب فى أقسام الشرطة، والضرب فى المدارس، لأن الوزير لغاه من زمان، ورغم ذلك لسه بيضربوا التلاميذ.
■ والدك ووالدتك، مابيخافوش عليك من الاشتراك فى مظاهرات؟
- بيخافوا طبعاً، لكن مابيمنعونيش، ولو كل واحد خاف، مافيش حاجة هتتغير، وأنا عن نفسى بدأت أنتبه للسياسة بعد ما سمعت عن حركة كفاية، وبابا حكالى يعنى إيه كلمة كفاية.
■ نفسك توجه رسالة للرئيس مبارك؟
- أقول له ياخد باله من الكلام اللى أنا قلته، وإن فيه ناس كتير ظروفها صعبة وتعبانين، الحكومة مش حاسة بيهم وعايز أقول له كمان إن الوضع عايز «ينظبط».
■ كنتم كام طفل لما تأسست حركة أطفال من أجل التغيير؟
- كنا تلاتة.. وطلعنا فى برنامج العاشرة مساء.
■ وبقيتوا كام دلوقت؟
- حوالى 65.
■ وإيه أهداف الحركة؟
- التغيير.
■ تغيير إيه بالضبط؟
- كل حاجة وأولها نظام الحكم، ويبقى فيه نظام جديد.
■ وإيه اللى مش عاجبك فى النظام ده؟
- كل حاجة وآخرها مقر حزب الغد اللى اتحرق.
■ ومين اللى حرقه؟
- الحكومة اللى اتفقت مع أعداء أيمن نور.
■ إنت من أول الأطفال فى حركة أطفال من أجل التغيير.. انت بتحب مصر؟
- آه طبعاً.. بس الناس بتقول إن النظام مش حيتغير.
■ وعشان كده بتطلع فى مظاهرات؟
- آه.. من أجل التغيير.
■ إيه اللى مش عاجبك؟
- إن الناس اللى بتغلط مش بتتحاسب زى حكاية العبارة اللى غرقت، وكمان فيه ناس بتاكل من صناديق الزبالة، والناس اللى ماتوا فى الدويقة، أنا باحلم إن مصر تكون أحسن بلد فى العالم، والناس اللى بتسرق فلوس مصر وتطلعها برة نفسى يتمسكوا، وكمان عندنا صحرا كبيرة ليه ما نزرعهاش علشان الناس تلاقى عيش.. إحنا عايزين نعدى الحالة اللى إحنا فيها.
■ إزاى انضميت للحركة؟
- همه عرضوا علىّ وأنا وافقت.