م الآخر| حياتك محطات.. متزعلش على اللي ينزل في أولها

كتير من الناس بيدخلوا في حياتنا، وفي الغالب بيكون دخولهم برغبتنا، لكن ساعات بيكون ليهم وقت معين في حياتنا، أو مهمة معينة هيقضوها ومع ألف سلامة، كأنهم مدخلوش!.. وكتير، بيخرج من حياتنا ناس بنحبهم، بس بيبقى قدرنا مع الناس دي إنهم ميكملوش في حياتنا.
حياتنا دي عاملة زي القطر، ليه محطات بيقف فيها، لو البنى آدم ده نصيبك معاه خلص هينزل في أول محطة، بس اللي يوجع أوي لو الشخص ده غالي عندك، وساعات بيجي سؤال بيحير!، "هو مين اللي هيكمل معايا لآخر محطة؟".
أكيد الإجابة، هتكون اللي هيكمل معاك مش هيعرف يعيش، ولا يستحمل الدنيا من غيرك، شايف أن من غيرك هتبقى مستحيلة، ما بيعرفش يفرح من غيرك، وأي حاجة حلوة بيبقى عايزك تتقاسمها معاه، من الآخر كده، هو حد شايفك إنت "الحياة"، يبقى مينفعش تزعل على حد سابك ونزل في أقرب محطة.