قصيدة "نموت وتحيا مصر"

بيقول أموت وتحيا مصر أنا مش لازم
أموت لأجل مايتربى ولادى فى ظل حاكم

يعاملهم معاملة بشر, مش بقر
واللا اكوام غنم............
نموت وتحيا مصر أم الأمم

حمامة سلام وغصن زتون
المصرى قضى كتير فى كان
نفسه بقى مرة يكون
حمامة سلام وغصن زتون

اضرب بسوط المستحيل
مش ماشى غير بعد الرحيل
لارحيل رئيس ولاوزير
ده رحيل الليل الطويل
رحيل فقر وجهل ومرض
ورأى غصب عنك يتفرض
ناوى تعيش هتعيش ذليل

والصبح المستخبى سنين أهه ظهر وبان
وبكره جاى رئيس جديد هيمسك بإيده الزمام

تمشى عدل شعبك حبيبك راح يستقيم
هتميل نميل واهه لسه موجود الميدان
وصوت الشعوب حى ليوم القيامة
حتى لو هو اتهدم....................
نموت وتحيى مصر أم الأمم

وسن قلم كان اتقصف
ايام ماشارع كرامتنا اترصف
وداسوا عليه بالجزم
نموت وتحيى مصر أم الأمم


وهجرة غير شرعية
ورصاص وبندقية
وعلى الحدود هناك
فيه عساكر مستنية
تصطاد يمام الوطن
نموت وتحيا مصر أم الأمم

شباب كتير هنا ياما فى الصخر حفر
وفى الآخر مالقاش تمن جواز السفر
هو العمر كان ببلاش ؟!!
علشان يرميه فى وسط الخطر
وكله قال الشباب بنعيم بلاده كفر

ولاحد فى يوم رحم
لو كان البعيد ابن باشا
كانت أشيك تايتانك
لأجل عنيه تتشحن
نموت وتحيا مصر أم الأمم

عزبة وقالوا مصر كانت
وملوك فراعنه هيورثوها
ماخلاص على ولادها هانت
وفى أقرب مزاد على راس البلاد
راح يبيعوها....................



قال المصرى للقدر روح قلهم
مش كل المصريين عواد
وبعمرنا لو يورثوها
وبدمنا لو يوم طالوها
مصر العزيزة الأبية
مش تكية, ولاعمرها كات أبعدية

واللى قلبها مستوطنة أو سلطنة
بالطمع لبس نفسه السلطنية

تلاتين سنة متمرطين فيك ياهنا
وكان نفسه كمان يتموا مِيًة
يعنى المهم أنا...أنا
مش المهم شعبها ولاإيه تكون هى

وسطر ياتاريخ واحكى
واكتب فى دفاتر الزمن
اننا كلنا هنموت
وتحيا مصر أم الأمم



------------------------------------------------------------------------
التعليقات
gamalmohammed
الثلاثاء, 20 سبتمبر 2011 - 02:54 am
اه يامصر كل يوم وكل ثانية بحبك
نموت نموت وتحيا مصر