الرباعيات رجع ابن آدم للعدم قلت : ياه تراب بيحيا ... وحى بيصير تراب الأصل هو الموت و الا الحياه ؟ عجبى !!! ضريح رخام فيه السعيد اندفن و حفره فيها الشريد من غير كفن مريت عليهم .. قلت يا للعجب لاتنين ريحتهم لها نفس العفن عجبى !!! ياما صادفت صحاب و ما صاحبتهمش و كاسات خمور و شراب و ما شربتهمش أندم على الفرص اللى انا سبتهم و الا على الفرص اللى ما سبتهمش عجبى !! و الكون ده كيف موجود من غير حدود و فيه عقارب ليه و تعابين ودود عالم مجرب فات و قال سلامات ده ياما فيه سؤالات من غير ردود عجبى !!! أنا شاب لكن عمرى ألف عام وحيد لكن بين ضلوعى زحام خايف و لكن خوفى منى أنا أخرس و لكن قلبى مليان كلام عجبى !!!! يا باب يا مقفول ... إمتى الدخول صبرت ياما و اللى يصبر ينول دقيت سنين ... و الرد يرجع لى : مين ؟ لو كنت عارف مين أنا كنت أقول عجبى !!! أحب أعيش ولو فى الغابات أصحى كما ولدتنى أمى و ابات طائر .. حوان.. حشرة .. بشر ..بس أعيش محلا الحياة.. حتى فى هيئة نبات عجبى !! سهير ليالى و ياما لفيت و طفت و ف ليه راجع فى الضلام قمت شفت الخوف ... كأنه كلب سد الطريق و كنت عاوز أقتله .. بس خفت عجبى !! كان فيه زمان سحليه طول فرسخين كهفين عيونها و خشمها بربخين ماتت لكين الرعب لم عمره مات مع إنه فات بدل التاريخ تاريخين عجبى !! عجبتنى كلمة من كلام الورق النور شرق من بين حروفها و برق حبيت أشيلها ف قلبى .. قالت حرام ده أنا كل قلب دخلت فيه اتحرق عجبى !!! رقبه قزازة و قلبى فيها انحشر شربت كاس و اتنين و خامس عشر صاحبت ناس م الخمرة ترجع وحوش و صاحبت ناس م الخمرة ترجع بشر عجبى !!!! ليه يا حبيبتى ما بيننا دايما سفر ده البعد ذنب كبير لا يغتفر ليه يا حبيبتى ما بيننا دايما بحور أعدى بحر ألاقى غيره اتحفر عجبى !!! ورا كل شباك ألف عين مفتوحين و انا وانتى ماشيين يا غرامى الحزين لو التصقنا نموت بضربة حجر و لو افترقنا نموت متحسرين عجبى !!! نوح راح لحاله و الطوفان استمر مركبنا تايهه لسه مش لاقيه بر آه م الطوفان وآهين يا بر الأمان إزاى تبان و الدنيا غرقانه شر عجبى !! على رجلى دم .. نظرت له ما احتملت على إيدى دم.. سألت ليه ؟ لم وصلت على كتفى دم.. و حتى على رأسى دم أنا كلى دم .. قتلت ؟ ..... والا اتقتلت عجبى !! انا كل يوم أسمع ........ فلان عذبوه أسرح فى بغداد و الجزاير واتوه ما أعجبش م اللى يطيق بجسمه العذاب و اعجب من اللى يطيق يعذب أخوه عجبى !!! ينبوع و فى الحواديت أنا سمعت عنه إنه عجيب .. و ف وسط لهاليب لكنه شقيت كما الفرسان طريقى .. لقيت حتى الخنازير و الكلاب شربوا منه عجبى !!!! يا قرص شمس ما لهش قبة سما يا ورد من غير أرض شب و نما يا أى معنى جميل سمعنا عليه الخلق ليه عايشين حياه مؤلمة عجبى !!! منين أجيبها كلمه متألمة لعيبه فايره حايره و مصممه منين اجيبها كلمه تكون بنت ارض تشفى اللى ما شافهوش كلام السما عجبى !!! أنا قلت كلمة و كان لها معنيين كما بطن واحده و توأمين زى وشين لو دنيا شر.. التوأم الخير يموت لو دنيا خير .. الشر ح يعيش منين عجبى !! أنا اللى بالأمر المحال اغتوي شفت القمر نطيت لفوق فى الهوا طلته ما طلتوش إيه انا يهمني و ليه .. ما دام بالنشوة قلبى ارتوي عجبى !! بره القزاز كان غيم و أمطار و برق ما يهمنيش – أنا قلت – و لا عندى فرق غيرت رأيى بعد ساعة زمان و كنت فى الشارع .. و فى الجزمة خرق عجبى !!! عينى رأت مولود على كتف أمه يصرخ تهنن فيه يصرخ تضمه يصرخ تقول يا بنى ما تنطق كلام ده اللى ما يتكلمش يكتر همه عجبى !!!! يا عندليب ما تخافش من غنوتك قول شكوتك و احكى على بلوتك الغنوه مش ح تموتك إنما كتم الغنا هو اللى ح يموتك عجبى !!! عجبى على العجب العجيب العجاب لما الحقيقة تطل بعد احتجاب و تروح و تحلا وفجأة تصبح مفيش كمثل طراطيش بحر ياما خد و جاب عجبى !!! فى الهو ماشى يا بهلوان إش إِش يا فراشة منقوشة على كل وش شقلبت عقلى و عقلى شقلبني و كنت باحسبنى بقيت ما اندهش عجبى !! وقفت ساعة الصبح باغسل سناني قالت لى شايف قوتى و لمعانى ؟ إيش تطلب اليوم منى ضحكة أسد ؟ والا ابتسامة اعلانات أمريكانى ؟ عجبى !! الحلو يم اليم صابح رايح سارح فى حضن الميه سابح سايح الحلو داب فى البحر , قلت أدوقه وجدت لسه البحر برضك مالح عجبى !!! يا كل كلمة للعجب فى قاموس انسكلوبيديا لسان العرب أو لا لاروس تعالوا نجدة . ده لسه فى عصرنا الشمس و البحر العريض بالفلوس عجبى !!!! الموج تلول تهبط وتطلع تلول يا بحر خدنى الشط صاحبك ملول و الا بلاش الشط ح اعمل به أيه ده ريحته طحلب مهرى و ام الخلول عجبى !!! ما آنتاش بتلعب ليه يا روح بابا ؟ و لا عسكرى و لا لص فى عصابة ؟ إلعب أسد أو ديب رهيب أو غزال دى الدنيا فى نهاية المطاف غابة عجبى !!! ورد فى ورق سلوفان يا حلوة اهديلك ؟ و الا انقله بالطين فى الشتلة و اجيلك الأولانى لو وحا بحناني عجبى على التانى بإيه يوحيلك عجبى !! أنا قلبى كوكب و انطلق فى المدار حواليكى يا محبوبتى يا نور ونار يلف مهما يلف ما بيكتففيش وتمللى نصه ليل و نصه نهار عجبى !! الأرض شوك أيوه لكين هايش و الحمرة مش يعنى الطريق حايش دى دمنا السيال .. وبشرة خير ان انتى عايشة و ان كنت أنا عايش عجبى !!! إيه اللى خدته من مرور السنين يا قلبى الا دمعتك و النيين بتئن و ترجع و بتفرح و ترجع تحن مع إن مش كل البشر فرحانين عجبى !!!! اوقات أفوق و يحل عنى غبايا واشعر كأنى فهمت كل الخبايا و افتح شفايفى علشان اقول الدرر ما أقولش غير حبة غزل فى الصبايا عجبى !!! يا ملونين البيض فى شم النسيم لون الحنين و الشوق و خمر النديم ما تعرفوش سايق عليكو النبي تلونوا الأيام بلون النعيم ؟ عجبي!! الدنيا صندوق دنيا .. دور بعد دور الدكة هى .. و هى كل الديكور يمشى اللى شاف ويسيب لغيره مكان كان عربجى أو كان امبراطور عجبى ! قطى العزيز راقد على الكنبات فى نوم لذيذ .. و بيلحس الشنبات و انا كل عين فنجان مدلدق قلق صدق اللى قال إن الحياة منابات عجبى !! قالوا السياسة مهلكة بشكل عام و بحورها يا بنى خشنة مش ريش نعام غوص فيها تلقى الغرقانين كلهم شايلين غنايم .. و الخفيف اللى عام عجبى !!! سلام سلام سلام سلام ... سلام كلام كلام كلام كلام ... كلام هز الورق يا صاحبى كدهوه يطلع كلام سلام .. و سلام كلام عجبى !!!! فوق تحت . ورا قدام . يمين شمال فى الجو . تحت الميه . أو فى الرمال طلب الكمال يحرم على الممكن و الممكنات دول محرومين م الكمال عجبى !!! يا حبيبتى ما بيننا دايما سفر ده البعد ذنب كبير لا يغتفر ليه يا حبيبتى ما بيننا دايما بحور أعدى بحر ألاقى غيره اتحفر عجبى !!! ضريح رخام فيه السعيد اندفن و حفره فيها الشريد من غير كفن مريت عليهم .. قلت يا للعجب لاتنين ريحتهم لها نفس العفن عجبى !!! إنسان أيا إنسان ما أجهلك ما أتفهك فى الكون و ما أضألك شمس وقمر و سدوم و ملايين نجوم و فاكرها يا موهوم مخلوقه لك عجبى !! أوصيك يابنى بالقمر و الزهور أوصيك بليل القاهرة المسحور و إن جيت فى بالك .. إشترى عقد فل لأى سمرا.. وقبرى إوعك تزور عجبى !!!! يأسك و صبرك بين إيديك و انت حر تيأس ما تيأس الحياه راح تمر أنا دقت مندا ومندا عجبى لقيت الصبر مر و برضك اليأس مر عجبى !! ولدى نصحتك لما صوتى اتنبح ما تخفش من جنى و لا من شبح و ان هب فيك عفريت قتيل إسأله ما دافعش ليه عن نفسه يوم ما اندبح عجبى !! ولدى إليك بدل البالون ميت بالون انفخ وطرقع فيه على كل لون عساك تشوف بعينك مصيرالرجال المنفوخين فى السترة و البنطلون عجبى! زى الفلاحين القمح زى حسين يعيش ياكل فى طين اما اللى فى القصر الكبير يلبس حرير والسنبلة يبعت رجالة يحصدها من على عود الفقير 2-الزباين كنت بشرب عصير قصب من مده والمعلم واقف قصاد العده ينشف العود ده ويلتفت للعود ده شفت تفل العيدان تلول خدت عبره ناس كتير فى البلد دى زيك وزيى كلنا مولودين فى احوال تعيسة الفرق مشترك فى حيك وحيى فى الحسين والامام وغمرة وشبرا 3- دموع فى البراقع انا لوحدى مفيش حاجة مجرد اسم متشخبط على ورقة فى ايد واحد مدير اصله قومسيونجى يقدمها لتركى ولا لخواجه لا يعرف عربى ولا شفقه يروح ماضى بقلم باركر افرنجى اروح مرفوت 4 - طول حياتنا نعرق على رغيف عيشنا طول ما عشنا ماعمرناش حوشنا المساكن والاكل ناتفين ريشنا والملابس جايين لنا بالقدرة 5 - بعنا روحنا بالجملة والقطاعى للشيطان والخواجه والاقطاعى واشترينا بصحتك ودراعى يوم زيادة برا القبور الغبره 6- وتر من الكمنجة وتر واحد وحيد نوح عشان جميلة فى اول النشيد والاوتار اللى باقية صرخت من غير دموع وامتدت م الكمنجة لحناجر الجموع على باب المحكمة والعالم كله واقف على باب المحكمة بيغنى غنوة واحدة راعدة ومرمرمة تزلزل السما وقضاة المحكمة العصبة المجرمة بقلوب مطلسمة وعلى عينيهم غما وفى ايديهم دما بيسمعوا الاغانى وهما فى وادى تانى وايش تعمل المعانى فى عقول مضلمة 7- من بين ايديك خدت الدواية والقلم من بين ايديك خدت الورق والكتب اللى قصادى وانا بكتب عليك صنعت ايديك كلى اللى عينى تشوفه من صنع ايديك فستان حبيبتى .. والهرم 8- دقيت على الباب بالايدين رد الصدى وقالى يا زين بينك وبينها بلدين انا قلت لو بينى وبينها السما مغرم بها وهى كمان مغرمة 9- من اول ما شفت عيونه انا قلت الليالى يهونوا تحميه السما وتصونه انا شفت اللى مستنينى وعرفت اللى ح يهنينى من اول ما بان وعيون الحليوة يا عينى بحر من الحنان 10-اعياد كتير يبتدوا ويفرغوا وبيفضل العالم كده مكبوس ودمه تقيل .. تقيل ياربنا ياللى خلقت لنا الايادى للهزار وللعمل ادينى قوة الف مليون ايد عشان ازغزغه 11- يا حلاوة عيون البقر شعرا شبهوا عيون حريمهم بها وانا شاعر وله وحدة بيحبها انما يستحيل سيبنا م الشعرا احنا ناس فقرا واللى يعشق فتاه فيها م البقرة يبقى لمؤاخذة تور 12-فى البدء خالص كنا سردين فى البحور لقيناها بايخة فى حقنا صرنا سحالى بجناحات زى الطيور دايرين نلقط رزقنا طحلب ودود كل يوم فى بقنا شىء مش تمام؟ قلنا نبقى قرود اصبحنا يا .... قرود 13-ده كان حديد العين وقليه عفى واضح كمثل الشمس ما يختفى جار الزمن عليه يتنفى يا دفيانين الليل وقلبى حفى 14-امانة ياللى باب الانتخابات داخل من قبل مسك القلم والخط تتماهل اسأل ولادك فى سرك بكرة عاوزين ايه؟ الحكم يظهر وتلقى الحل بالساهل 15- يا صلاة الزين يا صلاة الزين على دى مشية يا صلاة الزين مشية غزلان ... فى رقصتها جنيه وجبان بيتعاركوا جوه بستان بيتخاطفوا فحلين رمان بيتسابقوا على غصن البان عشان يسقوا ورد الخدين يا صلاة الزين 16-الجنة هى بلادنا وجهنم هى حدودنا اللى يخطيها راح يهلك فيها ويشوف الموت على ايدينا الليلة الكبيرة بنات: قبة سيدنا الولى دول نوروها محلا البيارق والناس بيزوروها قبة سيدنا الولى فى الجو عاليه محلا البيارق لما دوروها بائع: حمص حمص تل ما ينقص ع النار يرقص يرقص يرقص. ويقول: اللى شاف حمص ولا كلش حب واتلوع ولا طالش فتاة: يسترك هات حبة بقرش الجميع: ها ها ها ها ها ها ها ! بائع: فريرة للعيل .. يابو العيال ميل .. خد لك سبع فرارير آخر: زمارة شخليلة .. عصفورة يا حليلة .. طراطير ياواد طراطير الجميع: طراطير طراطير طراطير شحاذ: يا مسلمين يا مؤمنين لله ده كل مين يفعل جميل يلقاه شحاذ:بركة ولى له فى الشفاعه جاه لله .. لله .. لله .. المعلن: الليلة الليلة السيرك تعالوا دى فرجة تساوى جنيه قولوا هيه بمناسبة هذا المولد يوجد برنامج سواريه قولوا هيه فى السيرك شجيع يهجم ع السبع ويركب دغرى عليه قولوا هيه وبنات قمرات زى الشربات حلوين مش عارف ليه قولوا هيه الجميع: الله حى .. الله حى المنشد: شفت ف منام صاحب المقام ده أبهه الجميع: الله حى المنشد: ويمامه حايمه عليه تسبح ربها الجميع: الله حى المنشد: ميلت فوق يده وجيت أحبها الجميع: الله حى المنشد: صحونى م النوم خدت بعضى وتنى جى الجميع: الله حى .. الله حى .. لاعب البخت: فتح عينك .. تاكل ملبن فينك فينك .. تاكل ملبن أوع لجيبك .. لا العيب عيبك قرب جرب .. تاكل ملبن نشن .. وسطن إيدك وسطن .. إضرب .. البندقية: طاخ ...... اللاعب: يحميك يابنى تبقى غالبنى قرب خد لك حتة ملبن نداءات: طعميه . أراجوز . عجميه باللوز الجميع: ى الليلة الكبيرة يا عمى والعالم كتيره ماليين الشوادر يابا م الريف والبنادر دول فلاحين .. ودول صعايده دول م الكنال .. ودول رشايده دى الليلة الكبيرة يا عمى والعالم كتيره عجوز: إسعى .. إسعى .. إسعى .. إسعى مصوراتى: خدلك صورة سته ف تسعه العجوز: إسعى .. إسعى .. إسعى .. إسعى قهوجى: ياسى عجوره .. النار خسعه فلاح: ناس من بلدنا هناك أهم روح يابراهيم انده لهم .. "يتعانقون" سلامات سلامات سلامات سلامات ع البلديات فلاح: دى الحضرة والذكر انجلى يالله بنا نذكر ياوله المدرب: أنا شجيع السيما أبو شنب بريمه أول ما أقول "عالى هب" واصرخ لى صرخة السبع يتكهرب ويبقى فرخة حالا بالا سأصارع أسد إنما إيه .. متوحش وح اخلى وجهه شوارع تسقيفه ياناس مايصحش أهه جاه .. أهه جه تسقيفه بأه تسقيفه امال تشجيعه امال بائع: السمك مقلى كل وبرق لى صنف زى الفل بائع:استخار واختار فشة أو ممبار يالله سمى وكل نساء: يام المطاهر رشى الملح سبع مرات فى مقامه الطاهر خشى وقيدى سبع شمعات أطفال: ياعريس ياصغير علقة تفوت ولا حد يموت لابس ومغير وح تشرب مرقة كتكوت المعلم: بالذمة ده سابع عيل مزفوف من وقت قليل القهوجى: مولد شيللاه يامعلم عقبال أولادك المعلم: كلم.. نداءات: واحد مضبوط واتنين مصرى القهوجى: ع النار حاضر جاى لك دغرى مسا التماسى مسا التماسى ياورد قاعد على الكراسى نداءات: هات شاى يا دقدق القهوجى: عينى وراسى "يدخل الريس حنتيرة مغنى القهوة الصعيدى" الجميع: سمعنا ياريس حنتيرة للصبح معاك السهيرة سمعنا ... سمعنا المغنى: يا غزال ياغزال ده العشق حلال دوبتنى .. دوب خلتنى خيال يا شفتك فص فراولة وأنا لا قوة ولا حوله شقلبتلى عقلى علاولة ياغزال .. ياغزال يا رب ياعالم بالحال تهدى حبيبى ويصبح عال وأغنى وأرقع بالموال وأقول يا غزال "لعبة زق الطارة" صاحب اللعبة: ورينا القوه .. يابنى انت وهو مين عنده مروه .. وعامللى فتوه يقدر بقداره على زق الطاره ويفرقع بمبه ؟ شاب: وسع .. وسع .. وسع .. وسع .. أنا ازق الطاره واضرب ميت بمبه دنا الاسطى عماره من درب شكمبه صيتى من القلعة لسويقة اللالا أنا واخد السمعه الجميع: طب يالله تعالى الشاب: لا ياعم سعيده .. دى البدله جديده الجميع: هاها هأ سعيده .. يابو بدله جديده المعلم: وقف ياريس حنتيرة فيه ناس هنا قاعدة كتيره ولاحد قال هات تعميره ولا واحد شاى اللى ح يطلب راح يقعد واللى ما يطلبشى يبعد زبون: ياللا بنا نخرج يا مسعد شارع الترماى الآخر: أوعد يا رب أوعد آدى كمان قهوة الأول: ياللا بنا يامسعد ندخل على سهوه الغازية: طار فى الهوا شاشى وانت ماتدراشى طرفه شاورلى عليك حكم الهوا ماشى هوا العصارى ياواد على سطح دارى .. ياواد خدنى ورمانى عليك ولا أنت دارى آهين يا نارى .. آهين منك يا جارى .. آهين خدنى ورمانى عليك هوا العصارى صاحب القهوة: اللى ح يطلب راح يقعد واللى ما يطلبشى يبعد الزبون: ياللا بنا نخرج يامسعد شارع الترماى سيده: ياولاد الحلال بنت تايهه طول كده رجلها الشمال فيها خلخال زى ده رجل: زحمه ياولداه كام عيل تاه الجميع: دى الليلة الكبيرة ياعمى والعالم كتيره ماليين الشوادر يابا م الريف والبنادر..
