عتاب لأهالينا بالمناطق الشعبية ممدوح الولى

= = = محمدين : ياريت تبلغ أصحابك إللى ساكنين فى المناطق الشعبيه والعشوائيات . إن أنا واخد على خاطرى منهم .
* * حسنين : خير إن شاء الله ؟
= = = محمدين : بقى ياراجل الناس إللى ساكنين فى مصر الجديده ومدينة نصر . يروحوا يباتوا فى ميدان التحرير رغم البرد . علشان يطالبوا بتحسين أحوال سكان المناطق الشعبيه . وبتوع المناطق الشعبيه قاعدين يتفرجوا .
وياريت على أد كده . دول جابوا ناس منهم علشان يضربوا إخواتهم إللى فى ميدان التحرير وفى حتت تانيه فى المحافظات . عمرك شفت المصرى بيقتل أخوه ؟ وعلشان مين علشان حاكم ظالم ورانا الويل 30 سنه .
* * حسنين : أصل الناس دى غلبانه ومعظمهم شغالين باليوميه . وإنت شايف الحكاية قربت على الأسبوعين من غير شغل .
= = = محمدين : يا أخى هوا فيه حلاوه من غير نار . يعنى عايزين أحوالهم تتحسن كدا ببلاش . ما هو لو الناس فى ميدان التحرير وإللى زيهم فى المحافظات إللى بيعملوا المظاهرات . بطلوا المظاهرات ها يفضل حال بتوع المناطق الشعبيه والعشوائيه زى ما هوا .
إنت ناسى لما قلنا إن المبلغ إللى حطوه فى الموازنة بتاع السنا دى لتطوير المناطق العشوائيه 150 مليون جنيه . وقلنا إنه لو كان عدد المناطق العشوائيه 1279 منطقه . رغم إن العدد أكبر من كدا . يبقى نصيب المنطقة للتطوير طول السنه 117 ألف جنيه . يعلموا إيه دول علشان الميا ولا الكهربا ولا الصرف ولا الطرق . دا حتى المبلغ دا يادوب يكفى شرا شقتين .
تخيل لو كل سنه أسرتين بس أخدوا شقتين فى كل منطقة . ها نحل مشاكل سكان العشش والصفيح فى كام سنه ؟
* * حسنين : هما أكيد موش عارفين الحكايه دى . لكن فيه بيوت موش لايقه تاكل علشان مفيش شغل .
= = = محمدين : يارجل دا لو واحد بيصلح شقته بياخد أكتر من شهرين . عايز تصلح بلد فى أسبوعين ؟ هو فيه ثورة بتنجح فى أسبوعين . دا التلميذ علشان ينجح فى الإمتحان بيذاكر ويسهر وبيحرم نفسه من كل حاجه كذا شهر علشان ينجح . عايز تغير بلد كلها فساد كدا ببلاش ومن غير دفع تمن .
وبعيدين الناس تصحى بقى . هو مين إللى عمل حظر التجول وخلاه ساعات طويله ؟ موش الحكومه ؟ . مين إللى عطل القطارات فى كل المحافظات وعطل مصالح الناس . مين طلع المساجين والمجرمين من الأقسام علشان يرعب الناس ويخوفها . كل دا نسوه وفاكرين بس الناس إللى ميدان التحرير . وبتوع المظاهرات .
لو الحكومه يهمها مصالح الناس كانت لغت حظر التجول . وحاصرت ميدان التحرير وخلت كل حاجة ماشيه زى ما كانت . لكن هى بتضغط بالحاجات دى علشان تفرق بينا وتخلينا موش إيد واحده . وتفضل راكبه على نفسنا .
* * حسنين : برضه ما تناس الناس تعبت . سهر بالليل بتحرس بيوتها ومفيش شغل .
= = = محمدين : وهو دا يخلى بعضهم علشان ميت جنيه ووجبه يروح ميدان التحرير يضرب إخواته هناك . إللى سايبين بيوتهم وكتير منهم جاى من المحافظات علشان يطالبوا بحقوهم . يعنى رجال الأعمال دول اشتروا الواحد منهم بميت جنيه . علشان يفضلوا ينهبوا البلد . ياخساره دا الرجاله سعرها بقى رخيص قوى .
وبعيد فين النخوه والشهامه بتاعت ولاد البلد . لما يمنعوا الناس تدخل ميدان التحرير ويمنعوا أى أكل يوصل ليهم . ولا حتى الدوا . وبعضهم يرمى طوب على الناس إللى رايحه ميدان التحرير . وبعضهم يرمى أزايز فيها بنزين علشان تعمل حرايق .
* * حسنين : ما تنساش التلفزيون عمال يشعلل الدنيا ويقلوهم دول عّملا وبياخدوا باليورو وبياكلوا وجبات من كنتاكى .
= = = محمدين : وفين عقولهم موش هوا دا التلفزيون إللى قالهم ان الانتخابات إللى فاتت كانت نزيهه . وبعيدين ماهم عارفين إن محلات كنتاكى قافله من ساعة ما إبتدت المظاهرات .
لكن توصل إنهم يفتشوا العربيات وإللى يلاقوا فيها أكل رايج للناس إللى فى ميدان التحرير يكسروها . أنا أعرف ناس من أصحاب العربيات دول ياما راحوا المناطق الشعبيه يوزعوا لحمه وفلوس على الغلابه هناك . طول السنه موش فى رمضان بس .
* * حسنين : أصل الجماعة بتوع مجلس الشعب سخنوهم شويه .
= = = محمدين : هما لسه بيصدقوا بتوع مجلس الشعب ؟ خدوا إيه منهم فى الدورات إللى فاتت ؟ فين نباهة المصريين ؟ . هما موش عارفين إنهم بيعموا كدا علشان يستمر المجلس الباطل . وإن العضو لو كان بيدفع للواحد منهم علشان يضرب ميت جنيه بيعوضها آلافات من أراضى الدوله والتوكيلات والتأشيرات .
وبعدين موش خايفين من ربنا . ماهوا دم الناس إللى ماتت فى رقبتهم طول ماهما عايشين . قادر ربك ينتقم من أى واحد منهم . وكما تدين تدان . ممكن يفضل يعلم إبنه ولا بنته وفى لحظة ييجى القصاص الإلهى بعد الثمره ما تقرب تتقطف . ويجرب ساعتها حرقة أهالى إللى ماتوا على ولادهم .
* * حسنين : ناس منهم بيقولوا ياما سمعنا عن التغيير من سنين طويله وحالنا زى ماهوا .
= = = محمدين : ياسيدى دا لو بنتكلم عن تغيير وزارة جوا نظام فاسد . أو بنتكلم عن تغيير برلمان جوا نفس النظام . المره دى حاجه تانيه خالص . المره دى ثوره شعبيه حاجه ماحصلتش من سنين طويله .
علشان كدا زى ما انت شايف فى 12 يوم حاجات ولا فى الأجلام . يوم وزارة جديده ويوم نائب للرئيس . يوم قبول الطعن فى انتخابات البرلمان . يوم تعديل فى الدستور . يوم مفيش تانى للرئيس . يوم تغيير فى قيادات الحزب الفاسد .
بالذمه لولا الناس إللى ماتت واللى إنجرحت . وإللى ضحت بوقتها وباتت فى الميدان وإللى طلعت فى المظاهرات . كنا سمعنا حاجه من دى ؟
* * حسنين : أنا سمعت ناس منهم بيقولوا إحنا موش عايزين البرادعى .
= = = محمدين : إنت بتفكرنى بواحد عايز يصطاد تعلب . وقبل ما يصطاده قعد يفكر إزاى ها يسلخ جلده . وهو غرقان فى التفكير جا التعلب وهجم عليه .
خلينا نفكر إزاى نخلص من راس الحيه الأول . وبعدين نفكر مين إللى يمسك .
وبعدين لو فيه عندك حريقه . وناس ماشيين جم يطفوا معاك . تقبل ولا تقول ليهم لأ . أى واحد عايز يطفى معانا دى الوقت أهلا وسهلا . إسمه البرادعى إسمه زويل إسمه فنان إسمه عمرو موسى . إسمه لعيب كوره . إسمهم لجنة الحكماء . إسمهم شيوعيين . اسمهم إخوان . إسمهم نصارى .إسمهم التراس . لأن كل دول ولاد البلد .
وبعدين لما نعمل انتخابات من حق كل طرف يرشح نفسه . وتتعمل ندوات فى التلفزيون يعرض فيها البرنامج بتاعه . والناس تختار . إللى ياخد الأغلبيه يتحمل المسؤليه . ولو كان كويس ها نختاره تانى . ما كانش كويس مع السلامه ونشوف غيره .
* * حسنين : بيقولوا أمريكا معاه . وإحنا موش أد أمريكا .
= = = محمدين : أمريكا مع مصالحها . لا معاه ولا معانا . وهى يهمها مصلحتها بصرف النظر عن إسم الشخص إللى ماسك .
أمريكا والغرب مع القوى . لو حسوا إنه هو القوى ها يساندوه . خصوصا إنه بقاله 30 سنه موش ها يلاقوا زيه . كل أهدافهم لتخريب بلدنا فى الإقتصاد والأخلاق والتعليم والصحه والضياع . أخد فيها درجة ممتاز .
لكن لو شافونا صامدين ها يقفوا معانا . وطبعا ساعتها هايقولوا إنهم بيساندوا الديموقراطيه . إللى نسوها 30 سنه . ناس عينها بجحه .
* * حسنين : لكن إنت ليه حاطط بتوع المناطق الشعبيه فى دماغك . ما فيه موظفين فى شركات كانوا فى المسيرات. إللى ضربت الناس إللى فى التحرير وإللى فى المظاهرات فى المحافظات . ولا بتوع الأمن إللى كانوا لابسين مدنى .
= = = محمدين : ما هو دا مزعلنى منهم أكتر .لما يشوفوا أمناء الشرطه والعساكر إللى لابسين مدنى . موش دا كان كفاية إنهم يسألوا نفسهم ليه دول بيضروا دول . هّما نِسوا أمناء الشرطة فى الإقسام كانوا بيعملوا معاهم إيه ؟ . نسوا تلفيق التّهم لأولادهم .
دا الواحد منهم كانوا يمسكوه من غير بطاقه فى الشارع . يدخل على الظابط يقوله عدى على التلات زكايب دول وإختارك حاجه منهم . زكيبه فيها بانجو . والتانيه طبنجات . والتالته فلوس مزوه . ويلبسوه تهمه ياخد فيها كذا شهر فى الحبس . دا غير مصاريف المحامى . دى الوقت بقى أمناء الشرطة خايفين على مصلحتهم . فين المفومهيه بتاع أولاد البلد .
علشان كدا عشمى فى ولاد البلد أكتر لأننا طبقه واحده مطحونه . لكن كتير من أمناء الشرطة طبعا زعلانين على العز إللى كانوا فيه . لما كان الواحد منهم بيعمل باكو ولا أكتر فى اليوم من الإتاوات . وعايش بلوشى .
* * حسنين : يا سيدى هما بيقولوا كفاية كدا . وإدوا للراجل سبع شهور كمان وخلاص .
= = = محمدين : صحيح شعب يساهل ال 0000 ياراجل وهما شافوا منه خير طول السنين إللى فاتت . بقى إللى فشل 30 سنه ممكن ينجح فى سبع شهور يغير حاجه . ومتقولش ليه إنه ممكن ينتقم من الناس فى الشهور دى .
يعنى واحد يخلى إبنه يختار شوية وزرا . ومراته تختار شويه وزرا . يعنى خلاها عزبه . واحد ما كانش له خير فى أهله . فى بلده إللى إتولد فيها . وهو إللى كان بيحمى أحمد عز وإللى زيه . ولا عِرف يحل لا مشكلة بطاله ولا إسكان ولا أسعار عاليه ولا أميه . ولا أيتها مشكلة . وبعتر الميزانيه على السفريات والاحتفالات والمظاهر الكدابه . تقوللى يفضل كمان سبع شهور ؟ .
مين السبب فى العنوسه اللى بين البنات ؟. مين السبب فى العيال المتشردين فى الشوارع ؟. مين السبب إللى خلا الشباب يسافروا حتى لاسرائيل ؟ . ويعرضوا نفسهم للغرق فى البحر علشان يشتغلوا . كل دا نسيناه . سمعت عن حجم ثروته إللى فى الخارج .
حتى بعد الناس إللى ماتوا إللى عدوا إل 311 نفر . وإللى انجرحوا وإللى عدوا الخمس تلاف نفر . مفروض نحاكمه على العمايل دى . ما هو لو إللى مات أو إنجرح دا كان واحد منهم . إبن واحد فيهم أو أخوه أو إبن عمه . ما كانوش قالوا كدا .
* * حسنين : بس إنت دايما تقول كل واحد حر فى رأيه .
= = = محمدين : ما حدش قال حاجه فى كدا . ماهم خصصوا منطقة المنصه للى عايزينه يقفوا هناك . وكمان ميدان مصطفى محمود فى المهندسين . حد اتعرض ليهم هناك ؟
* * حسنين : بيقولوا موش معقول مليون واحد فى ميدان التحرير . يمشوا كلامهم على 80 مليون .
= = = محمدين : إنت ناسى إن فيه ملايين تانيه طلعت فى المحافظات . عارف يوم جمعة الرحيل . أنا عديت عند المنصه الساعه إتنين إلا ربع . عارف كان كام واحد هناك . لو جم 150 نفر يبقى كويس ومعظمهم شكلهم تلامذه مدارس . وكلهم شايلين أعلام . أظن موش ممكن يكونوا كلهم اشتروا أعلام على حسابهم خصوصا إنى شفت واحد قدامهم زى ما يكون هوا إللى جايبهم .
قلت أروح أشوف بتوع ميدان مصطفى محمود . لقيت أقل من ألفين واحد غالبيتهم شبان صغيرين واضح إنهم من مناطق شعبيه عمالين يطبلوا . والتلفزيون جانب عربيه مخصوص والكاميرا متسلطه على الشباب إللى بيهتفوا . سألت واحدة ست شايله يافطه بلاسيك غاليه زى غيرها من إللى واقفين . قالت لى إنهم وزعوا عليهم اليفط دى .
يعنى إللى واقفين فى المنطقتين ما يجوش قد إللى واقفين فى مدخل واحد من مداخل ميدان التحرير . ما بالك باللى واقفين جوا الميدان .
* * حسنين : يعنى عايزنى أقول ليهم إيه .
= = = محمدين : يأخى المثل بيقول أنا وإبن عمى على الغريب .
البلد دى بلدنا . خلينا نكون يد واحده . محدش يوقع بينا . ونستحمل شويه . وما ننظرش تحت رجلينا . وكل ما ها نصمد . هو ها يقع لوحده . وبعدين فات الكتير وباقى القليل . بس شوية صبر .
mamdouhec@maktoob.com
------------
نظرا لإرتفاع معدلات الأميه بالمناطق الشعبيه . وقلة المتعاملين مع الإنترنت بها .
أود من قراء المقال المعاونه فى تبليغ مضمون تلك الرساله الى المستهدفين منها بتلك المناطق .