= = = محمدين : يعنى سألتنى عن التصدير . وعن السياحه وعن الإستثمار الأجنبى وناسى أهم مورد بيفيد الغلابه المصريين . * * حسنين : إن كان ع الغلابه فأنا عضو قديم قوى فيهم . إيه بقى إن شاء الله ؟ = = = محمدين : التحويلات إللى المصريين المسافرين برا بيبعتوها لأهاليهم فى مصر . * * حسنين : ياراجل .. يعنى الحاج اسماعيل لما بيعت لأهله كل شهر 300- 400 دولار من السعوديه . دول ها يحلوا مشاكل البلد ؟. لكن التصدير والسياحة والإستثمار الأجنبى دول بيدخلوا مليارات من الدولارات . مليارات واضح ؟ . = = = محمدين : صحيح السنه الماليه إللى فاتت 2009 /2010. الصادرات السلعيه جابت لمصر حوالى 14 مليار دولار . والسياحه جابت أقل من 12 مليار وصادرات البترول جابت 10 مليار . لكن برضُه التحويلات إللى إنت مستهتر بيها دخلت تسعة ونص مليار دولار . ولو قارنتها بالمساعدات إللى دخلت مصر من كل الدول الأجنبيه والعربيه . وإللى وصلت 954 مليون دولار يعنى ما كملتش المليار . حتلاقى التحويلات دى مهمه . * * حسنين : كام ! تسعة ونص مليار دولار . اللهم صلى على النبى . أُمال ما حدش واخد باله من الناس الغلابه دُول ليه ؟ . يعنى شوية عمال معظمهم ما بيعرفش يقرا أو يكتب يجيبوا لمصر تسعه ونص مليار دولار فى سنه واحده . = = = محمدين : موش كدا وبس . الرقم الحقيقى لتحويلات المصريين إللى برا لأهاليهم هنا أكبر من كدا بكتير . * * حسنين : إزاى يعنى ؟ أنا عارف إنك دايما بتجيب الأرقام من البنك المركزى بتاع مصر . = = = محمدين : الرقم إللى قاله البنك المركزى اللى هوا تسعه ونص مليار . دا بيخص التحويلات إللى جايه عن طريق البنوك . لكن زى ما أنت عارف فيه مصريين كتير بيبعتُوا فلوس مع أصحابهم . أو مع بلدياتهم إللى نازلين أجازه . وطبعا دى البنك المركزى ما يعرفش عنها حاجه . كمان فيه مصريين بيحوشوا الفلوس بحيث يجيبوها معاهم وهُمَا نازلين فى الأجازه . وطبعا دى كمان موش محسوبه عند البنك المركزى . وأنت كمان عارف أنه لما واحد مصرى بيعت فلوس مع واحد صاحبه . غالبا بيبعت معاه شوية هدايا لأهله قول : هدوم أجهزة كهربيه موبيلات بطانيه . طبعا دى بفلوس . وكلنا بنشوف المصريين إللى شغالين فى دول الخليج لما بينزلوا أجازات بيجيوا معاهم حاجات أد إيه . ساعات تلاقى الشنط على العربيه إللى جايه من المطار عِلو متر . ولو جايه من المينا حتلاقيها أعلى . وأظنك عارف الخُرج إللى بيشيل حمولة ست زكايب . دى أحسن حاجه للحاجة اللى جايه بالمركب بدل الشنط إللى ممكن تتكسر من الرزع ومتكفيش . يعنى الشنطه هتاخد كام بطانيه ؟ لو حِسبت دا كله ممكن تلاقى التحويلات بتاع المصريين إللى برا. أكبر من أى مورد تانى بِيدَخل عمله أجنبيه للبلد . * * حسنين : واضح المسائل كبيره فعلا . = = = محمدين : المهم إن إللى بيميز التحويلات دى إنها كلها رايحه للناس المستوره . يعنى الحاج ابراهيم بيعت لأهله 400 دولار يوصلوا زى ماهُما 400 دولار . يادوبك يدفعوا رسوم التحويل . لكن شوف بقى حصيلة الصادرات السلعيه لمصر . لو المُصدرِين مصريين حتلاقى الفلوس داخله جيب أصحاب المصنع . يادوب إللى شغالين فى المصنع ياخدوا أجورهم منها. ولو كان إللى صدر البضاعه شركات أجنبيه شغاله فى مصر . فالحصيله رايحه للأجانب . والمصريين إللى شغالين عندهم يادوب ياخدوا مرتباتهم . نفس الكلام لو جت حصيلة صادرات بتروليه . لو كان إللى مصدرها شركات مصريه الحصيله حتروح لهيئة البترول . ولو كان إللى مِصَدرها شركات أجنبيه فهى إللى هتاخد الحصيله . وعموم المصريين إللى شغالين معاهم ها يخدوا يا دوب مرتباتهم . نفس الكلام لو فيه حصيله من قناة السويس ها تخدها الحكومه . ولو فيه فوائد على ودائع لبنوك مصريه حطاها بالخارج جايه من برا . قيمة الفوائد ها تروح للبنوك . وإذا كانت ايرادات السياحه تقديريه موش حقيقيه . فإيرادات التحويلات حقيقيه . ولو شركة سياحيه عملت ايراد هتلاقى شركات الطيران الأجنبى بتاخد نصيبها منه . والفنادق الأجنبيه بتاخد نصيبها منه وأصحاب الشركات المصريه بتاخد نصيبها . يعنى الإيراد متوزع على كذا فئه . لكن شوف التحويلات كلها رايحه للأسر البسيطه . كلها . عشان تصرف على عيالها فى الأكل والشرب والتعليم والصحه والمواصلات والإتصالات وتجهيز البنات وغيره . * * حسنين : عندك حق . لأنه فعلا لما الحاج ابراهيم بيبعت الحواله لأهله . تبص تلاقيهم بيشتروا حاجات من البقال وحاجات من بياع الخضر . ومن بياع الملابس . وبيدوا دروس خصوصيه لأولادهم . يعنى هما وإللى زيهم لما بتجيلهم فلوس بيعملوا حركه فى السوق . وفى المواسم والأعياد تلاقى التحويلات بتزيد شويه . وشوف لما بيرجعوا المصريين إللى برا فى الصيف . تلاقيهم بيعملوا رواج فى المصايف وسوق الشقق بينتعش . وحركة البُنا . وحالات الزواج بتزيد . وموسم بيع الموبيليا بيشد حيله . حتى مبيعات العربيات وودايع البنوك بتزيد . يعنى بصراحه لولا التحويلات كانت ناس كتيره ما كملتش تعليمها ولا عرفت تتعالج ولاعرفت تسكن . = = = محمدين : ميزه تانيه للتحويلات محدش واخد باله منها . إنهم بيسموها تحويلات بدون مقابل . * * حسنين : تقصد إيه يعنى ؟ = = = محمدين : يعنى لو عايز تصدر سلعه . لابد تعمل مصنع وتجيب خامات وعماله ونقل . والتيشيرت إللى ها تصنعه وتبيعه بعشره دولار يكون متكلف سبعه دولار . وعلشان تعمل إيراد من السياحه . لابد يكون عندك فنادق ومطارات وطرق وعماله . ودى كلها مكلفه . وعلشان تعمل عائد من قناة السويس . لابد يكون عند قاطرات ومرشدين وأجهزه . وكل شويه تعَمق المجرى الملاحى . يعنى أى مورد علشان يجيلك منه فلوس . لابد تصرف عليه فى الأول . والربح ها يكون هو الفرق بين إللى إتكلفته . وبين إللى جالك منه . لكن التحويلات كلفتنا إيه ؟ . ولا حاجه . ناس بتبعت فلوس من غير ما يكلفونا أى شىء . دا حتى هما إللى دفعوا فلوس الفيزا وتذاكر الطيران لما سافروا . وكل سنه بتاخد منهم رسوم تصريح العمل . * * حسنين : أنا أسمع إن دول عربيه كتيره زينا بيجيلها فلوس من عمالها إللى برا . زى لبنان و الأردن والسودان واليمن والمغرب وتونس والجزائر وسوريا وفلسطين . = = = محمدين : المسألة دى منتشره على مستوى العالم . يعنى سنة 2009 . الهند جالها 49 مليار دولار من الهنود إللى شغالين برا . الصين جالها حوالى 48 مليار . المكسيك 22 مليار . الفلبين 20 مليار دولار ودول كتيره زى نيجيريا وبنجلاديش وفيتنام وباكستان . وأندونسيا . * * حسنين : موش ملاحظ إن معظم الدول إللى قلتها دول ناميه . هى الدول الناميه متخصصه فى تصدير العماله ؟ = = = محمدين : وهى المكسيك دوله ناميه ؟. بلاش . فرنسا جالها 16 مليار دولار من الفرنسيين إللى شغالين برا البلد . ألمانيا جالها 12 مليار دولار. بلجيكا وأسبانيا أكثر من 10 مليار لكل واحده فيهم . لكن الفرق بين الدول الناميه والمتقدمه إنك تلاقى الهند ليها أكتر من 11 مليون هندى شغالين برا . دول بعتوا ليها 49 مليار دولار . لأن معظمهم عماله بسيطه وفيه شويه منهم شغالين فى برامج الكمبيوتر فى أوربا . لكن فرنسا إللى ليها 7ر1 مليون واحد شغالين برا دول بعتوا ليها 16 مليار دولار فى السنه . بنجلاديس ليها أكثر من 5 مليون شخص شغالين برا . بعتوا ليها أقل من 11 مليار دولار . لكن ألمانيا إللى ليها 5ر3 مليون شخص شغالين برا بعتوا ليها 12 مليار دولار. لأنه فيه فرق بين دخل واحد بنجلاديشى شغال عامل نظافه فى دول الخليج . وبين دخل فنى ألمانى شغال فى شركة فى دوله فى شرق أوربا . * * حسنين : يعنى عايز تقول أنه كل ما العماله كانت فنيه أو متخصصه ها تبعت تحويلات أكتر . = = = محمدين : مؤكد . يعنى المصرى إللى شغال جناينى فى فيلا فى السعوديه . دخله وتحويلاته غير المصرى إللى فاتح ورشة ميكانيكا فى الأردن . غير المصرى إللى شغال فى بنك فى الكويت . وخلى بالك الغلابه هما إللى بيحولوا فلوس أكثر .يعنى حتلاقيهم بيحولوا معظم دخلهم . وبيصرفوا على الأد هناك . يعنى تلاقيهم ساكنين أربعه فى أوضه علشان يوفروا . لكن فيه مصريين شغالين فى مهن راقيه شويه . هتلاقيهم بيستثمروا جزء كبير من فلوسهم فى نفس البلد إللى هما قاعدين فيه أو فى بلاد تانيه حواليها . ولو معاهم أسرهم ها يصرفوا معظم دخلهم على المعيشه هناك . مشكلتنا إن إحنا قاعدين وفرحانين بفلوس التحويلات إللى جايه . تعرف لو إن إحنا لو صرفنا على الناس دول شويه ممكن نستفيد منهم أكتر . يعنى لو عملنا ليهم دورات تثقيفيه مصرفيه البنوك ها تستفيد . لو زودنا ثقافتهم السلعيه ها نستفيد أكثر . * * حسنين : استنى ياسيدى . إيه بقى الثقافه السلعيه دى ؟. = = = محمدين : مره كنت فى عُمره با تفرج على أدوات مطبخ فى مول جنب الحرم . كانت جنبى واحده مصريه كبيره قلت أستفيد من خبرتها المنزليه . سألتها عن حاجات المطبخ دى . قالت لى : دا إحنا عندنا فى مصر مصانع فى عشره رمضان بتعمل حاجات أحسن منها وأرخص كمان . علشان كدا المصريين بالخارج مطلوب نعرفهم بمنتجات بلدهم . بحيث بدل ما المصرى يشترى كل حاجه من برا ويتحمل تكلفة الوزن الزيادة . يأجل بعض المشتريات لحد ما يرجع ويشتريها من مصر . وبكدا هو يستفيد ومصانع بلده تستفيد . عارف المصريين برا دول ممكن يساعدونا فى زيادة السياح إللى بييجوا بلدنا . . حتى فى الحاجات السياسيه ممكن يفيدونا . لما تلاقى مصريين معاهم الجنسية الأمريكيه مثلا . دول ممكن يأثروا على إتجاهات النواب . فى الولايات إللى ساكنين فيها فى المسائل الخاصة بالقضايا العربيه . دول ممكن يساعدونا حتى فى التصدير . تعرف إن الهند بتخلى كل واحد هندى كان شغال فى الخارج . لما بيرجع البلد بيكتب تقرير عن أحوال البلد إللى كان شغال فيها . حتى لو كانت واحده شغاله فى الدعاره . تكتب برضه . لأن إللى شغالين جوا البيوت مثلا يقدروا يعرفوا عادات البلد دى . بحيث لما الهند تحب تصدر ليها ملابس مثلا. تبقى عارفه أذواقها . بتحب إيه وما بتحبش إيه . سواء فى الألوان ولا المقاسات ولا الموديلات . ومواسم الشراء . يعنى معلومات تفصيليه من بطن المجتمع . * * حسنين : وإحنا بقى بندرب المصريين إللى طالعين يشتغلوا برا علشان مستوى شغلهم يكون كويس ؟ = = = محمدين : آهو دا الملف إللى مالوش صاحب . تصور مورد بيدخل تسعة ونص مليار دولار فى السنه على الأقل . مفيش حد مسؤل عنه . لا حد بيدرب. ولا حد حتى بياخد بخاطرهم لما بتحصل حادثه لحد فيهم . إحنا بنعاملهم على إنهم حنفيه بتنزل فلوس وبس . مفروض وزارة القوى العامله والتشغيل هى المسؤله عنهم . لكن الموضوع أكبر من إمكانيات الوزيره والناس إللى شغالها معاها . هى صحيح ست طيبه . لكن المسألة عايزه تخطيط ودراسات وتدريب ومتابعه وترابط مع المصريين إللى برا . وهى طبعا مشغوله على طول . يادوبك تعرف تحل مشاكل الإعتصامات والإضرابات المستمره فى الشركات . * * حسنين : والمصريين بالخارج دول يطلعوا كام ؟ = = = محمدين : آخر بيانات بتقول 6 مليون وسُبعميت ألف .يعنى أكتر من سكان الكويت وقطر والبحرين مع بعض . لكن العبره موش بالعدد لأن فيه مصريين فى أوربا وأمريكا شغالين فى تخصصات مهمه ودخولهم عاليه . وبعضهم بقوا أصحاب ثروات . يعنى فى أمريكا 750 ألف مصرى . فى كندا 330 ألف . فيه 200 ألف فى فرنسا وزيهم فى انجلترا وزيهم فى استراليا وأقل منهم فى ايطاليا . * * حسنين : متزعلش منى . هوا إحنا كنا عِرفنا نستفيد من قدرات المصريين إللى جوا البلد . لما ها نستفيد من قدرات المصريين إللى برا ؟. = = = محمدين : صحيح هو فشل . ومقدرش يحل مشكله مجتمعيه واحده طول التلاتين سنه إللى فاتوا . لكن دا يخلينا ندور بِنَفسنا على حل لمشاكلنا . بدل ما ننتظر من الفاشلين إنهم يحلوها . موش معقول إللى فشل تلاتين سنه ها يتصلح بعد كِدا . المصريين إللى برا دول ثروه . وممكن يساعدونا فى حل مشاكلنا . وإحنا نستفيد وهما يستفيدوا . يعنى لو إتعملت شركات فى القرى والمراكز وهما يساهموا فى رأسمالها . دا ها يوفر فرص عمل وها يزود الإنتاج . وفى نفس الوقت هما ها يكسبوا بدل ما بيخسروا لما بيحطوا فلوسهم فى البنوك . * * حسنين : بيخسروا لما يحطوا فلوسهم فى البنوك ! تيجى إزاى ؟ = = = محمدين : لما سعر الفائده بتاع البنك يكون أقل من معدل التضخم يبقى إللى بيحط فلوسه فى البنك بيخسر . يعنى حاليا سعر الفائده على الودائع 5ر5 – 6 % . والتضخم بيقولوا إنه 11 % رغم إنه أكبر من كدا بكتير . يبقى إللى بيحط فلوسه فلوسه فى البنك . بيخسر من قيمتها الشرائيه الحقيقيه حوالى 5 % فى السنه . يعنى لو معاك ألف جنيه وكيلو اللحمه بخمسين جنيه . الألف جنيه ها يجيبوا عشرين كيلو لحمه . لو بعد سنه اللحمه بقى سعرها 60 جنيه . الألف جنيه زائد ال60 جنيه فايدة البنك . موش ممكن نشترى بِيهم نفس العشرين كيلو لحمه . يعنى القيمة الشرائيه للفلوس قلت مع زيادة الأسعار . علشان كدا لابد الواعى يحط فلوسه فى حاجة تجيب عائد أكبر من معدل التضخم . وطبعا المشروعات التجاريه والإنتاجيه والزراعيه والثروه الحيوانيه بتجيب عوائد كويسه . وبعدين تعالى ناخدها من زاويه تانيه . لما يتعمل مشغل ولا ورشة كبيره فى القريه والشباب يشتغل فيها فى القريه . وكل واحد يبقى له دخل ويركز فى شغله . ولا نسِيب الشباب عطلان . يتجه للجريمه والإدمان . وطبعا عمايل الشباب العطلان الوحشه أكيد أسرة المصرى المتغرب إللى ساكنه فى القريه . ها ينوبها منه جانب . يعنى ممكن يعاكسوا بناته وزوجته . يغوُوا عياله على الحاجات إللى موش كويسه . * * حسنين : يعنى هو ها يستفيد دخل دورى لفلوسه من المشروع إللى ساهم فيه . ويطمئن أكتر على عياله . أمال دا ليه ما يحصلش ؟ . = = = محمدين : ها أقولك حاجه فى سرك . مره واحد مصرى شغال فى السعوديه دخل مع ناس فى شركة هِنا . وبعدين صفُوا الشركة وهُما بيدُوه فلوسه . قال كلمه موش ناسيها من يومها . قال : أول مره أدخل مع مصريين فى مشروع وآخد فلوسى . موقف تانى إتعرضت له . كان لىّ صديق له نشاط مع الجاليه المصريه فى أمريكا . طلب يعمل دراسه علميه عن الجاليه . رشحت له الدكتور حامد زهران إللى كان عميد تربية عين شمس يعملها . طلبت الدكتور ع التليفون وإحنا بينا ود قديم وبلديات كمان . سلامُو عليكم يادكتور . فيه إسمه فلان الفلانى شغال فى أمريكا عايز يعمل دراسه عن موضوع كذا . وفوجئت بالدكتور بينفعل ويقول : أنا لا عايز أشوفه ولا أعرفه . . قلت يمكن الدكتور له تجربه سيئه سابقه معاه . فسألته وإنت تعرفه قبل كدا يا دكتور ؟ . فرد علىّ : لا أعرفه ولاعمرى سمعت إسمه . . وتبين لىّ أن فيه تجارب سلبيه تعرض ليها الدكتور وزملاؤه من مصريين بالخارج . خلاهم معندهُمْش ثقه فيهم بالمره . وزى ما إنت شايف التجارب الأليمه وحالات النصب إللى إتعرض ليها المصريين إللى برا من المصريين إللى جوا . والتجارب الأليمه إللى إتعرض ليها المصريين إللى جوا من المصريين إللى برا . خلت كل طرف موش واثق فى التانى . يعنى تفتكر لو ناس من إللى كانوا داخلين شركات توظيف الأموال قبل الحكومه ما تضربها . وطلعت عينهم سنين علشان ياخدوا حقهم . ممكن دول يفكروا يستثمروا فى مصر تانى ؟ * * حسنين : يعنى المسأله معقده . = = = محمدين : بص. زى ما الحكايات السلبيه دى منتشره . فيه كمان تجارب كويسه . يعنى عندك كذا قريه فى الدقهليه . المصريين بالخارج من ولادها عملوا فيها مشروعات انتاجيه ناجحه . دى لازم الناس تعرفها علشان تتطمن وتحاول تقلدها فى باقى المحافظات . فيه مشروع اسمه التوكتن عَمْلاه الأممالمتحده . بحيث إولاد البلد إللى فى تخصصات نادره فى الخارج . يرجعوا يفيدوا بلدهم كذا شهر فى تخصصهم والأممالمتحده تتحمل التكاليف . عندك الجمعية إللى عاملِينها النوبيين بالخارج وليها كذا فرع فى كذا دوله . يعنى فى الفرع بتاع السعوديه لما شاب من النوبه يتخرج يسافر السعوديه . يروح على الجمعيه ويفضل واكل شارب نايم فيها لحد ما يوفروا له شغل . وطبعا الشاب يفضل يدفع اشتراك الجمعيه طول ماهو شغال هناك . عارف ناس كتير من أعضاء الجمعيه دى . كل واحد فيهم بيكْفُل طفل يتيم فى بلده . من ساعة ما يدخل ابتدائى لحد ما يتخرج من الجامعه . وياما مصريين فى الخارج ساهموا فى إنشاء مدارس ومعاهد أزهريه وجوامع ومستوصفات فى بلادهم . وبيتبرعوا للجمعيات الخيريه فيها . * * حسنين : طب والدول الأجنبيه إللى بجيلها تحويلات زينا . عملت إيه ؟. = = = محمدين : فيه تجارب ممتازه للهند والمكسيك بحيث إن جزء كبير من التحويلات إللى بتدخلها . التحويلات بتتجه لعمل مشروعات انتاجيه . موش تروح كلها لحاجات استهلاكيه . يعنى موش كلها زينا رايحه على الأكل والشرب واللبس والمواصلات والتليفونات . يعنى هناك شويه تحويلات تروح لحاجات اجتماعيه وشويه تروح لحاجات استثماريه . تخيل بقى الحاجات إللى جايبها المصرى وهو راجع ومعاه كذا شنطة . لو وجهنا جزء من قيمتها لعمل مشروعات صغيره أو متوسطه فى الأرياف والأقاليم . ها نستفيد أد إيه ؟ * * حسنين : بس أنا سامع إن سمعة العماله المصريه فى الخارج قلت شويه . = = = محمدين : شوف .. فيه وفيه . يعنى كان لىّ صديق كويتى قاعد فى مصر أيام الغزو العراقى . لما بدأوا التعمير وجابوا شركات إنجليزيه وأمريكيه تعمر . با أعاتبه : يعنى إحنا نبعت لكم قوات . ونرجع ليكم بلدكم . وإنتم تجيبوا شركات أجنبيه هى إللى تعمر . فحكى لى حكايه إنه كان بين الكناسين إللى بيكنسوا الشارع إللى جنب بيته كناس مصرى . ينزل مع الكناسين الصبح . كل واحد منهم ماسك حته شغال فيها . إلا الكناس المصرى يفضل يعمل غاغه جنب البيت .. صباح الخير أبو عبد الله . صباح الزهور والرياحين . صباح الفل والياسمين . يطول عمرك . يبارك فيك . لحد صاحب البيت ما يعطيه الفطار . يقعد على الرصيف يفطر . ويعمل نفس الموضوع مع بيت تاتى لحد ما يعطوه الشاى وحاجه حلوه . وهو قاعد ياكل تلاقيه يقول لزميله البنجلاديشى يا فلان : نضف كويس جنب بيت أبوعبد الله . دا راجل حبيبنا وصاحب فضل علينا .. رغم إنه كناس زيهم . وقال لى الصديق أنه مع تكرار حاجات مشابهه من بعض الصنايعيه المصريين . معدش بيجيب مصريين فى أى شغل . . وفضل يقارن دا بالإنضباط الشديد للعماله الفلبينيه وتفانيها فى العمل . حتى أنه كان ها يدمع لما الشغالة الفلبينيه إللى كانت عندهم جت تسافر . لكن زى ما قلت لك . فيه الكويس وفيه الوحش . يعنى مجموعة مصرفيين أردنيين كنا مع بعض فى دورة تدريبيه . وجدت منهم إشاده بالميكانيكى المصرى فى بلدهم ووصفوه بأنه أستاذ فى شغله . * * حسنين : ما هو المشكله إن إللى بيهمل بيسَوَأ سُمعة العمالة المصريه . يعنى أكيد صاحبك الكويتى خلا كذا واحد من إصحابه يعملوا زيه . ويبعدوا عن العماله المصريه لما يكونوا عايزين عمال . = = = محمدين : صحيح . لكن الكويس أكيد بيدى إنطباع كويس . لو جناينى مصرى فى فيلا بتاع واحد فى سلطنة عمان قايم بشغله تمام . مؤكد لو حد من أصحابه عايز جناينى لفيلته . ها يطلب منه يجيب له جناينى مصرى . وبكدا ها يكون إنضباطه فى عمله سبب فى فتح باب رزق لغيره وغيره . وطبعا دا ينطبق على أى تخصص سواء محاسب طبيب صحفى مهندس .يعنى المدرس إللى جه أمير قطر مخصوص لحد بيته فى المهندسين يعزى أسرته فى وفاته . أكيد كان مثال مُشرف فى عمله . * * حسنين : بصراحه حكاية الأمير والمدرس ما عرفناش نسوقها كويس . دا إحنا كان ممكن على حسها نعمل سمعه ممتازه للمدرسين المصريين فى بلاد الخليج . = = = محمدين : الناس دى عايزه رعايه . حتى من قبل ما يسافروا بحيث ندربهم ونحسن مستواهم . ونفضل على إتصال بيهم وهُما هناك . وبعد ما يرجعوا نشوف مشاكلهم . موش نطلع عِنين إللى خلفوهم . لما يروحوا يعلموا حاجه فى مصلحة حكوميه . حضرت ندوه فى المركز الثقافى المصرى بالأردن وبعد ما خُلصت الندوه . وإحنا خارجين خادنى واحد من المصريين البسطاء من إيدى وقالى عايزك فى موضوع . إفتكرت عنده مشكله مع السفاره ولا مع شغله عايزنى أساعده فى حلها . قالى : قلهُم فى مصر لما يبعتُوا فريق كوره يلعب فى الأردن . يبعتُوا فريق جامد . علشان بيبعتوا فرق سََكَه . والأردنيين بيغلبُوهُم ويفضلُوا يِذْلُوا فينا بعدها . علشان كدا محتاجين نعمل دراسات على العماله المصريه بالخارج . من النواحى الإقتصاديه والإجتماعيه حتى النفسيه . ونعرف إزاى بيفكروا والعادات السيئه إللى عندهم . زى الفشخره لما بيرجعوا . ويصرفوا معظم فلوسهم على المظاهر الكدابه . يبقى الواحد فى الغربه بيحوش الدولار على الدولار وييجى هنا يعمل أبو على . تعرف إنه فيه مصريين فى الخليج عائلاتهم بالصعيد داخله فى مشاكل تار . دول لازم يبعتُوا فلوس لكبير العيله علشان يشترى بِيها سلاح . وطبعا العائلات المنافسه لما بتعرف كدا . بتبعت لأولادها إللى برا يبعتوا فلوس علشان هُما كمان يزودوا السلاح إللى عندهم . * * حسنين : موش شايف إنك زودتها شويتين . أحوال نفسية مين ياعم إللى الحكومه ها تهتم بيها ؟ = = = محمدين : شوف . كان فيه شغاله فلبينيه إتهموا العيله إللى كانت بتشتغل عندهم فى الخليج إنها عذبتها . جت وزيرة العمل فى الفلبين على طول للخليج مخصوص . وخدتها معاها على نفس الطياره ترجعها لبلدها بعد ما جابت ليها حقها . لو درسنا أحوال المصريين برا هانلاقيهم بيعضوا فى بعض . يعنى زميل صحفى كان شغال فى الإمارات . بيقولى إن مدير تحرير الجريده لما حدد مرتب محترم لصحفى مصرى هناك . تلاقى زميله المصرى يدخل لمدير التحرير يقوله : دا كتير قوى المرتب ده عليه . دا كان فى بلده موش لاقى ياكل . لكن شوف اللبنانى . لو صحفى لبنانى معاه حتى ثانويه عامه جاى يشتغل فى الإمارات . وكان بياخد فى بلده قول أقل من ألف دولار . تلاقى إبن بلده اللبنانى يقول لمدير التحرير دا كان بياخد خمس تلاف دولار فى بلده . ويحاول يرفع مرتبه على أد ما يقدر . كمان بيقولوا المصرى معندوش طموح . يعنى ثلاثه عرب : مصرى وسورى ولبنانى شغالين فى مصنع سعودى . قاعدين يتغدوا مع بعض . بيسألوا بعض عن أقصى طموح ليهم . المصرى قال : أقصى طموحى إنى أكون مدير عام المصنع ده . السورى قال طموحى أكون شريك صاحب المصنع . اللبنانى قال طموحى أكون صاحب المصنع ده . علشان كدا لما بنغير سلوكياتهم ها نستفيد منهم أكتر . ونخليهم يساهموا فى الإنتاج والتجاره والزراعه . ويكونوا أصحاب مشروعات . بدل ما بعضهم بعد ما بيرجع بيحط فلوسه فى البنك أو البورصه . ويفضل قاعد ع القهوه يشد فى الشيشه . * * حسنين : صحيح التحويلات بتاع المصريين ثروه متبعتره . بس دا حالنا فى كل حاجه . ما إحنا عندنا النيل والأرض الزراعيه وموش عارفين نأكل نفسنا . عندنا ثروه معدنيه . عندنا آثار وشواطىء الشمس فيها طول السنه . حوالينا بحار وعندنا نيل وبحيرات وبنستورد سمك . عندنا أكبر ثروه 80 مليون إنسان فيهم العلماء والخبراء . دا حتى الرمله بتاع سينا بيعملوا منها برا مكونات إلكترونيه . عارف إللى بيقول سبع صنايع والبخت ضايع . = = = محمدين : موش معنى إن فيه شله فاشله ماسكه البلد . إن إحنا نيأس . لأننا إللى بندفع التمن . هما لما بيفشلوا فى الإنتاج . والأسعار بتولع . مين إللى بينكوى ؟ موش إحنا . علشان كدا خلينا نحلم . ونحط قدامنا تحدى كبير . إزاى نحول جزء من فلوس التحويلات المتبعره على شكل ملابس وأجهزة كاسيت وموبلايات وخراطيش سجاير وبطاطين ولعب أطفال وكراكيب . فى شكل مشروعات تنميه . خصوصا إنهم عندهم رغبه فى الإستثمار . وبيدورُوا على حاجة يستثمروا فيها فلوسهم . لكن على رأى المثل إللى إتلسع م الشوربه بينفخ فى الزبادى . لو حسوا بالأمان ها نشوف منهم خير كتير . عايزين جهاز رسمى على شعبى . تشارك فيه جمعيات المستثمرين والبنوك . يتخصص فى موضوع : إزاى البلد تستفيد أكتر من التحويلات دى . وإزاى نحولها من شكلها الإستهلاكى لشكل تنموى . يعنى موش معقول فرنسا إللى ليها 7ر1 مليون شغالين برا . يكون فيها وزارة للهجره . وإحنا إللى لينا 7ر6 مليون برا معندناش وزارة للهجره . حتى لو الحكومه ها تفضل فى الطراوه . صعب يعنى إن مجموعة شباب فى قريه يرصدوا إولاد القريه إللى شغالين فى الخارج . فى مناصب كويسه ويعملوا معاهم صله تفيد القريه . وأظن الإنترنت سهل الأمور . صعب إن نقابة العلميين وغيرها من النقابات والجمعيات العلميه المتخصصه . تتصل بالعلماء المصريين فى الخارج وتعمل معاهم صله . خلينا نتحرك ولو فى حاجات صغيره . أحسن ما نفضل حاطين إيدنا على خدنا . [email protected]