ايرادات سياحيه تقديريه !

o o حسنين : ربنا يسترك الواد إبن أختى عايزين نشغله فى السياحه . وإنت معارفك كتير بدل ما يهاجر . وأنت عارف الظروف . ها يجيب منين أهله 30 ألف جنيه علشان السماسره اللى بيسفروا الشبان .
* * محمدين : ومين قالك إن السياحه طالبه ناس .
o o حسنين : بيانات السياحه إللى أعلنها البنك المركزى من أسابيع . موش قالت إن الإيرادات السياحيه عدت الحداشر مليار دولار فى السنة الماليه إللى فاتت . دا حتى بالأماره السياحه هى الوحيده اللى زادت إيرادتها بأكتر من 10 % عن السنة اللى قبلها .
يعنى أحسن من إيرادات حاجات كتير نقصت . زى التصدير والبترول وقناة السويس والاستثمار بتاع الأجانب وخدمات النقل والايرادات اللى جايه من فوائد ودايع البنوك برا اللى كلهم نقصوا .
* * محمدين : طب ياخويا لما أنت متابع قوى كدا . وعرفت إن الأزمه الاقتصاديه العالميه قللت إيراداتنا من التصدير والبترول وقناة السويس والاستثمار والفوائد . عارف بقى السياح اللى بيدخلوا مصر جايين منين .
o o حسنين : طبعا عارف ماهو فيه قسم للسياحه فى نشرة البنك المركزى كل شهر . بص ياسيدى : 75 % من السياح اللى وصلوا السنه إللى فاتت جايين من أوربا . و13 % من دول الشرق الأوسط والدول العربيه . و5 % من الدول الآسيويه . و4 % من أمريكا الشماليه وأمريكا الجنوبيه مع بعض وأقل من 4 % من دول أفريقيا .
* * محمدين : عظيم أهو إنت قلت إن بيانات البنك المركزى بتقول إن 75 % من السياحه جايه من أوربا . وإن كل دول آسيا يعنى : اليابان والصين والهند وكوريا وماليزيا وأندونسيا وغيرها وصل منها 5 % من العدد الاجمالى للسياح . وإن كل دول أمريكا الشماليه والجنوبيه يعنى أمريكا وكندا والمكسيك والبرازيل وغيرها نصيبهم 4 % من اجمالى السياح .
o o حسنين : ياعم إنت ها تدخلنى فى متاهات ليه . بقولك عايز أشغل إبن أختى فى السياحه تقوللى أوربا وآسيا .
* * محمدين : ياسيدى إصبر علشان تقتنع . أنا عارف إنك متابع نشرات الأخبار فى التلفزيون . ما سمعتش إن نسبة البطاله فى دول الاتحاد الأوربى فى شهر أغسطس اللى فات كانت 10 % . طبعا دا رقم متوسط لدول الاتحاد الأوربى المتكون من 27 دوله . يعنى فيه دول زى أسبانيا وصلت البطاله فيها أكثر 20 % واليونان 12 % .
o o حسنين : برضه موش فاهم إيه علاقة دا بموضوعنا . أنا عايز أشغل الواد .
* * محمدين : ياسيدى ما هى أوربا أكثر من أربعين دوله . لكن أكتر الدول اللى بتبعت سياح لمصر هى : ألمانيا وبريطانيا وفرنسا وايطاليا . لما تبقى نسبة البطاله فى ألمانيا 7 % وفى ايطاليا وانجلترا 8 % وفرنسا 10 % . معنى كدا إن السياحة اللى طالعه من البلاد دى ها تقل . مسمعتش عن أزمة الديون الحكوميه فى اليونان وأسبانيا وايطاليا والبرتغال . مسمعتش إن كل دول الاتحاد الأوربى فيها عجز بالموازنة السنه إللى فاتت . ماسمعتش إن كل الدول الكبيره فى أوربا وأمريكا الشماليه كان فيها انكماش السنة اللى فاتت . ما مستمعتش معدلات النمو الضعيفه اللى موجوده فى الدول الأوربيه السنا الحاليه .
o o حسنين : ياعم دا البنك المركزى المصرى هو اللى قال بالنص : بلغت ايرادات السياحة بالعام المالى 2009 / 2010 حداشر مليار و591 مليون دولار . يعنى أكتر من السنه اللى قبلها بواحد مليار دولار .
* * محمدين : ( مبتسما ) ما هو إنت موش عارف الفوله . بص يا سيدى لحد سنة 1993 كنا بنحسب إيرادات السياحة . عن طريق الفلوس اللى بيغيرها السياح من البنوك . يعنى نحصر الفلوس اللى غيروها فى مكاتب البنوك بالمطارات والموانى والفنادق . لكن من سنة 93 جه وزير سياحه قال لأ إحنا نحسب ايرادات السياحة بالتقدير .
o o حسنين : يعنى إيه بالتقدير .
* * محمدين : يعنى ياسيدى عملوا معادلة من تلت مكونات . قالك إحنا نحسب : عدد السياح الواصلين لمصر x عدد الليالى إللى قعدها كل واحد منهم فى مصر . x مبلغ متوسط صرفه السائح فى كل ليله قضاها فى مصر .
يعنى الحداشر ونص مليار اللى قال عليهم البنك المركزى . جا يين من حاصل ضرب 13 مليون و640 ألف سائح وصلوا مصر . x متوسط عشر ليالى قضاها كل واحد منهم فى بلدنا . ودا اللى بيسموه عدد الليالى السياحه . وطبعا قريت إن البنك المركزى قال إنها وصلت 136 مليون ليله سياحيه .
لما تضرب ال 136 ليله سياحيه xمتوسط المبلغ اللى بيصرفه السايح فى الليله وهو 85 دولار . يطلع المجموع الحداشر ونص مليار دولار . إللى قال عليهم البنك المركزى ووزير السياحه .
o o حسنين : طيب ما هى الحسبه مضبوطه أهى . أمال عمال تلففنى حوالين نفسى . وتهرب من الموضوع الأساسى ليه .
* * محمدين : ياسيدى إصبر . عارف مين هو السائح .
o o حسنين : بالذمه دا سؤال . ما أنا محتاجلك يعنى لازم أطاوعك . السايح ياسيدى الراجل أو الست اللى جايين يتفسحوا فى بلادنا . يشوفوا الآثار فى الأقصر . الأهرامات .. أبو الهول .. المتحف . ينزلوا يعوموا فى الغردقه .. يغوصوا فى شرم الشيخ . موش هما دول السياح .. خلصنى بقى .
* * محمدين : المفروض يكونوا هما دول السياح . لكن السايح فى تعريف وزارة السياحة المصريه . هو كل أجنبى دخل مصر وقعد فيها أكثر من 24 ساعه . يعنى الثلاتشر مليون سائح وشويه اللى بيقول عليهم وزير السياحه . داخل فيهم ناس كتير ملهمش دعوه بالسياحه إللى فى بالك .
o o حسنين : حيرتنى .. زى مين يعنى .
* * محمدين : يعنى لو واحد غلبان من جنوب السودان جه سكن فى منطقة عزبة الهجانه فى مدينه نصر . لحد ما يشوف له سفريه برا . دا سائح داخل فى العدد . الليبى اللى جاى يزور ناس من قبيلته فى مرسى مطروح دا سايح . السودانى اللى جاى يزور أقارب له فى عابدين سايح . الأثيوبى اللى بيبيع مراهم على الرصيف فى ميدان العتبه سايح .
o o حسنين : دى وفهمناها إن مش كل السياح سياح . طب وحكاية العشر ليالى مدة إقامة السايح فى مصر . أظن دى حاجه عاديه .
* * محمدين : بص .. معظم السياح اللى فى الغردقه وشرم الشيخ دول جايين فى رحلات شارتر . يعنى طياره تنزلهم المطار والأسبوع إللى بعده تاخدهم وتجيب غيرهم . يعنى ببقضوا كام ليه ليليه . سته موش عشره . نادر جدا إن سايح أوربى يقعد عشر أيام . دا أحيانا جروب أمريكى تكون رحلته فى 3 بلاد . 3 أيام فى اسرائيل ويوم بالأردن ويومين فى مصر .
السياح اللى بييجوا على المراكب إللى معديه قناة السويس بينزلوا فى السويس يركبوا الأتوبيس يشوفوا الأهرامات ويلحقوا المركب فى بورسعيد . نفس الكلام اللى بينزلوا فى بورسعيد ويزورا الأهرامات ويلحقوا المركب فى السويس . يعنى دول ودول يادوب يقضوا فى مصر 24 ساعه .
o o حسنين : طيب لما هى السياحة الأوربيه اللى هى صاحبة الغالبيه فى مصر ما بتطولش . أمال العشر ليالى دى جت منين .
* * محمدين : متوسط مدة إقامة السايح فى مصر . بتيجى من جواز سفره بحساب الفرق بين يوم دخوله ويوم خروجه . الشغاله الفلبينيه على الأقل تاخد ست شهور لحد لما تاخد أجازه وتسافر . البياعات الى جايين من الصين نفس الشىء . وطبعا الفلسطينيين اللى جايين يتعالجوا فى مصر بيطولوا . شوف العراقيين فى مدينة سته أكتوبر لهم كام سنه .
o o حسنين : لكن بقى حكاية إن السايح يصرف فى الليله 85 دولار دى معقوله .
* * محمدين : طيب إسأل فى نويبع وغيرها عن سعر الليله الهاف بورد يعنى بالفطار . حتلاقى المنافسه بين أصحاب الفنادق خلت الليله بعشرين دولار . إسأل عن السياحة الاسرائيليه فى طابا ونويبع ودهب وشرم الشيخ . تلاقى الواحد منهم جايب فى عربيته معاه أكله وشربه ولبسه بحيث ما يصرفش شيكل واحد . السايح بتاع الشارتر من المطار للقريه السياحيه للمطار ما فيش صرف .. يعنى لو اشترى تشيرت تذكار يبقى كويس .
جروب روسى حضر لجنوب سينا قضى أسبوع فى طابا وأسبوع فى شرم الشيخ . عارف ثمن الرحله بالطيران بالاقامه فول بورد بالمشروبات الروحيه الفودا الروسى كام . ب 800 دولار . عارف السائح الأجنبى بالنت بيحجز فى فندق الماريوت الليله بكام ب 25 و 30 دولار .
وطبعا الحسابات السياحيه بتفترض إن الإخوه الصوماليين وغيرهم من الأفارقه اللى واقفين على الرصيف . فى ميادين كتيره كل واحد منهم بيصرف كل ليله 85 دولار ماهم سياح !
o o حسنين : يعنى عايز تقول إن بيانات البنك المركزى موش صحيحه .
* * محمدين : روح إسأل حد شغال فى السياحه : مرشد سياحى . طباخ .. بياع فى محل أنتيكات . سواق سياحى .. موظف .. وهو يقولك إن كان فيه انتعاش سياحى ولا مفيش . إسأل بتوع السياحة الدينيه أو بتوع السياحة الداخليه أو السياحة الأجنبيه . هتعرف إن فيه أقل من عشر شركات هما إللى محتكرين السوق . فيهم الشركة بتاع الوزير طبعا . وشركات رؤساء الغرف السياحيه . أما باقى الشركات البالغ عددها 1900 فأحوالها تغم .
mamdouhec@maktoob.com