موازنة المواطن .. ووعود لن تتحقق

* * حسنين : هنشارك .. هنشارك .. هنشارك
= = = محمدين : خير .. إِيه إللى حصل ؟
* * حسنين : خلاص ياعم الحكومه ها تخلينا نشارك فى عمل الموازنه بِتاعتها . وإحنا إللى ها نحدد الأولويات بتاعِت الموازنه . إحنا نقول زودوا مصاريف الصحة . زودوا مصاريف الطرق . وهما ها ينفذوا على طُول .
= = = محمدين : دا إحنا لسه طالعين من الإنتخابات . كانت خليتكوا تشاركوا فى إختيار النواب إللى إنتوا عايزنهم . بسرعه كدا الغوله بقت حمامه ؟
* * حسنين : بص . أنا جايب لك معايا الدليل . آهُو .. كُتيب معتبر بالألوان وزعوه علينا . كُل إللى يشترى جورنال حكومى ياخد معاه الكتيب ومجانا . تعرف منه تفاصيل الموازنه .
= = = محمدين : وإنت بقى فهمت إللى مكتوب فيه ؟ أصل أنا لىّ زمايل محررين فى الإقتصاد ما فهموش حاجه منه .
* * حسنين : فوت بقى السؤال دِه . وخليك حلو . ما تضيعش علىّ الفرحه . وخلينا نشوف وزير الماليه قال إيه فى الكتيب . ياااه .. من زمان كان نفسى أعرف موازنة بلدنا .
= = = محمدين : صحيح شعب طيب .. موش هُوا دَا الوزير إللى كان مترشح لمجلس الشعب من أسابيع . وقال إنه جاب 88 % من الأصوات فى الدائره . رغم إنه كان مترشح معاه تلاته تانيين ساكنين فى الدائره .
* * حسنين : إحنا ولاد النهارده . سيبك بقى م السياسه وخلينا فى موازنة المواطن . الله .. عنوان جميل . أخيرا زى ما بأدفع الضرائب ها يكون من حقى أعرف تفاصيل الموازنه . وموش على مستوى الدوله بس . دا حتى على مستوى المحافظة إللى أنا ساكن فيها . وكمان على مستوى المركز الإدارى إللى أنا ساكن فيه . وأعرف أخد أد إيه مركزنا فى التعليم ولا فى الصحه .
= = = محمدين : طالما مُصمم تعرف . تعالى نشوف موضوع الموازنه ده . واحده واحده .
الموازنه لأى جهه سواء دوله أو حتى شركة . معناها إنك بتعمل تقديرات للإيرادات والمصروفات بتاعت الدوله أو الشركة لمدة سنه جايه .
وطبعا لو الايرادات ها تكون أكبر من المصروفات . ها تكون الموازنه فيها فايض . ولو المصروفات هى الأكبر ها تكون الموازنه فيها عجز .
* * حسنين : يعنى لازم تعقدوها . ما تقول الميزانيه وخلاص .
= = = محمدين : لأ ياسيدى . الميزانيه دى بتعبر عن الوضع المالى الحقيقى لشركة أو مؤسسه فى فتره سابقه . يعنى نقول مثلا موازنة الشركة أو البنك الفلانى يوم 31 ديسمبر سنة 2009 . لكن الموازنة تقديرات لفترة لسه جايه .
* * حسنين : يعنى موازنة المواطن إللى معايا . فيها تقديرات لإيرادات ومصروفات الدوله فى السنه إللى جايه .
= = = محمدين : شوف الحكومه لها سنه مختلفه بنسميها السنه الماليه . دى غير السنه الميلاديه اللى بتبدأ من شهر يناير لحد شهر ديسمبر ومدتها 12 شهر . السنه الماليه بتاع الحكومه بتبدأ من أول شهر يوليو وتنتهى فى نهاية شهر يونيو . يعنى مدتها 12 شهر برضه .
وطبعا الحكومه كانت عملت الموازنه دى من شهر مارس إللى فات . علشان كدا أرقامها عباره عن تقديرات للمصاريف والإيرادات بتاعِت الحكومه . فى السنة الماليه إللى بدأت من شهر سبعه إللى فات .
* * حسنين : إنت قلت مصاريف وإيرادات الحكومه خلال سنه . والحكومه دى طبعا حكومة الدكتور أحمد نظيف يعنى هو والوزارات إللى معاه .
= = = محمدين : كلمة الحكومه دى يا سيدى بتشمل كل الجهات الحكوميه . يعنى رئاسة الجمهوريه . مجلس الوزرا . الوزارات الخمسة والتلاتين إللى عندنا . الجهات الرقابيه . الجامعات . دواوين عموم المحافظات التسعه والعشرين .
مديريات الخدمات بالمحافظات زى مديريه التعليم ومديرية الصحة ومديرية الزراعه وغيرها . وكمان الهيئات الخدميه . يعنى بنوصل لحد 655 جهه حكوميه .
* * حسنين : الوزارات وعارفينها زى وزارة التعليم والاسكان والداخليه والدفاع . والمحافظات عارفينها زى مرسى مطروح والشرقيه والغربيه والاسماعيليه . لكن إيه الهيئات الخدميه ؟ .
= = = محمدين : دى يا سيدى هيئات تابعه للحكومه . لكن هدفها تقدم خدمه فى مجال تخصصها . موش هدفها الربح . يعنى هيئة النظافه . هيئة الصرف الصحى . هيئة المواصفات والجوده . هيئة الطرق والكبارى . هيئة الأرصاد الجويه . هيئة الرقابه على الصادرات والواردات . هيئة الرقابة الماليه . جهاز حماية المستهلك . جهاز حماية المنافسه . صندوق تحسين الأقطان المصريه .
* * حسنين : يعنى موش شرط يكون إسمها هيئة .. لكن ساعات بنقول موازنة الدوله . دا يعنى إن فيها كل أجهزة الدوله ؟ .
= = = محمدين : تقدر تقول كل أجهزة الدوله الحكوميه . لكن أى حاجة يملكها القطاع الخاص موش داخله فى الموازنه الحكوميه. يعنى شركات ساويرس أو فريد خميس أو ابو العنين موش داخله فى الموازنه . البنوك الخاصة برضه موش داخله .
* * حسنين : موش شايف إن إحنا بعدنا شويه عن موضوع موازنة المواطن . عايزين نعرف حكاية المصروفات والايرادات .
= = = محمدين : أنا جايلك فى الكلام . زى ما شفت إن الحكومه بتتكون من وزارات ودواوين عموم محافظات ومديريات خدمات وهيئات خدميه . طبعا فيه موظفين بيشتغلوا فى المصالح الحكوميه دى . دول يقربوا على السته مليون موظف . يبقى أول مصاريف الحكومه ها تكون أجور الموظفين دول .
وطبعا فيه ناس على المعاش لابد الحكومه تصرف لهم معاشات شهريه . وطبعا الجيش والشرطة علشان نحمى البلد عايزين مصاريف . والموظفين علشان يقوموا بعملهم عايزين ورق ودفاتر وميا وكهربا . وبنزين علشان العربيات اللى بتوصلهم الشغل . والمبانى الحكوميه طبعا عايزه صيانه .
والحكومه كمان بتعمل مدارس ومستشفيات وطرق وكبارى . وعلشان تخفف على الناس بتدى دعم للعيش وللسكر والزيت . بدل ما الناس تشتريها بأسعار السوق العاليه . تاخدها بسعر أقل على البطاقة التموينيه والحكومه تدفع الفرق ودا بنسميه الدعم .
* * حسنين : بس كنت أسمع من والدى الله يرحمه وهو كان موظف. الباب الثالث الباب الأول .
= = = محمدين : لما الحكومه بتحط الموزانه لمصاريفها . عملت 8 أقسام ليها وسمت كل قسم باب . يعنى لو شفت الموازنة . حتلاقى الباب الأول دا فيه الأجور بتاع الموظفين . الباب الثانى دا فيه المواد الخام اللى بتستعملها الجهات الحكوميه والميا والنور والورق والوقود والصيانه .
الباب الثالث دا بتاع الفوائد إللى على الديون إللى الحكومه مستلفاها من جوا أو من برا . الباب الرابع دا فيه مصاريف الدعم سواء للأكل أو للبنزين أو للبتوجاز أو للبن الأطفال أو للمواصلات أو للصادرات .
الباب الخامس بيسموه المصروفات الأخرى ودى بيدخل فيه إعتمادات مجلس الشعب والشورى وجهاز المحاسبات وغيره . الباب السادس بيسموه الاستثمارات يعنى المصاريف إللى بيعملوا بيها مشروعات خدميه فى الصحه والتعليم والميا والصرف والكهربا والطرق .
الباب السابع عباره عن مساهمات الحكومه فى بعض الهيئات الاقتصاديه خلال السنه . والباب الثامن فيه الأقساط بتاع الديون إللى على الحكومه سواء لجهات داخل مصر أو خارج مصر .
* * حسنين : آدى المصروفات وعرفناها . منين بقى الحكومه بتجيب الإيرادات ؟.
= = = محمدين : أهم وأكبر بند فى إيرادات الحكومه . الضرائب إللى بتفرضها على الأفراد والشركات . يعنى ضريبه على الدخل زى إللى بيدفعها الموظفين على مرتباتهم . ضريبه على الأرباح . لو شركة عملت أرباح تاخد 20 % من صافى ربحها .
ضريبة مبيعات : يعنى لو بتاكل فى مطعم حتلاقى الفاتوره فيها زياده عباره عن ضريبة مبيعات . ضريبة الجمارك : لو واحد ولا شركة شاريه حاجه من برا بتدفع عليها جمارك . ضريبة الدمغه : رايح تقدم طلب لجهه حكوميه تحط على الطلب طابع دمغه . ورسوم تانيه كتير فى الموانى ومع تصاريح السفر وفى القنصليات وغيرها من الرسوم .
تانى بند فى الإيرادات الأرباح إللى بتعملها جهات مملوكه للحكومه . يعنى فيه هيئات اقتصاديه زى هيئة قناة السويس . هيئة البترول . هيئة البريد . هيئة المجتمعات العمرانيه الجديده . الحكومه بتاخد أرباحها لأنها مملوكه ليها . نفس الكلام مع البنوك العامه زى البنك الأهلى ومصر والقاهره . لكن البنوك الخاصة ملهاش دعوه بأرباحها لأنها موش ملكها .
ثالث بند المنح . يعنى هبات من دوله أو من مؤسسة أجنبيه . وايرادات تانيه لو الحكومه باعت أرض أو مبنى ملكها . . وإيرادات تانيه عباره عن سلف من البنوك إللى جوا أو برا أو سلف من السوق .
* * حسنين : والايرادات دى برضه عباره عن أبواب زى المصروفات ؟.
= = = محمدين : برضه الإيرادات عباره عن أبواب . ولكن خمسة موش ثمانيه زى المصاريف . الباب الأول فى الايرادات . هو الضرائب بأنواعها سواء على المرتبات أو على الأرباح أو على الأراضى . أوعلى المبانى أوعلى السلع المستورده أو على المهن الحره زى الأطباء والمحاسبين والمحامين .
الباب التانى دا بتاع المنح إللى هى الهبات .. الباب التالت الإيرادات غير الضريبيه يعنى إللى جايه من أرباح الجهات إللى الحكومه بتملكها . يعنى من البنوك العامه . من البنك المركزى . من الهيئات الاقتصاديه . من صناديق المحافظات .
الباب الرابع دا ايرادات الحاجات إللى الحكومه بتبيعها .أو الأقساط اللى بتحصلها لو كانت مسلفه جهة معينه . . الباب الخامس : السَلف إللى الحكوهه بتعمله علشان تغطى العجز بين الإيرادات والمصروفات بتاعتها . يعنى ممكن تطّلع سندات خزانه أو أذون خزانه تستلف بيها فلوس . أو تاخد قرض من بنك محلى او من جهه أجنبيه .
* * حسنين : بعد ما عرفنا الأنواع . دَخّلنا بَقى فى المسائل نشفت رِيئِى . يعنى عايزين نترجم بقى البنود دى لأرقام . علشان نعرف موازنة المواطن ونعرف راسنا من رجلينا .
= = = محمدين : شوف ياسيدى الموازنة بتاعِتْ العام المالى 2010 / 2011 إللى قلنا إنه بدأ من أول يوليو إللى فات وها يستمر لحد آخر يونيو إللى جاى .
المصروفات فيها 490 مليار جنيه . والإيرادات بتاعتها 299 مليار . يعنى فيها عجز 191 مليار جنيه . وطبعا دول الحكومه ها تستلفهم علشان تقدر تغطى المصاريف إللى عليها . ودايما الموازنه بتبقى بعملة البلد . يعنى موازنة مصر تبقى بالجنيه المصرى .
* * حسنين : وال 490 مليار جنيه بتوع المصروفات راحوا فين ؟.
= = = محمدين : أكبر بند فى المصروفات : الدعم للسلع والخدمات والمعاشات ودا حوالى 117 مليار جنيه . تانى بند الأجور بتاع الموظفين ودا 95 مليار جنيه . وبعدين فوائد القروض إللى على الحكومه جوا وبرا خلال السنه 91 مليار جنيه . وأقساط القروض إللى من جوا ومن برا خلال السنه 82 مليار .
والاستثمارات إللى ها نعمل بها مدارس ومستشفيات وطرق ومرافق 40 مليار . والمصروفات الأخرى إللى فيها الإشتراكات فى الهيئات الدوليه ومصاريف البرلمان والجهات الرقابيه 31 مليار . وشرا الخامات والمطبوعات والمَيا والنور والصيانه فى المصالح الحكوميه 29 مليار جنيه .
* * حسنين : إستنى . إستنى .. إنت قولت إيه ؟ فوائد القروض بتاخد 91 مليار جنيه فى السنه . وأقساط الديون بتاخد 82 مليار . يعنى الفوائد والأقساط للديون بتاعِت الحكومه مع بعض بتاخد 173 مليار .
فى حين الإستثمارات إللى ها نعمل بيها الطرق والكبارى والمَيا والصرف الصحى والمدارس والمستشفيات ونحسن بيها المعيشه . بتاخد 40 مليار جنيه بس . ياخبر إسود .
وطبعا الفوائد والأقساط ها تزيد فى موازنة السنه إللى بعدها . ما أنت لسه قايل إننا ها نستلف 191 مليار جنيه جديده . علشان نسد العجز فى موازنة السنا دى .
= = = محمدين : أخيرا صحيت يا حسنين . هدِى أعصابك . خلينا نشوف بنود الإيرادات علشان الصوره تكمل . بقى يا سيدى إل 299 مليار بتوع الايرادات ها يجيوا منين ؟ .
أكبر حاجة من الضرائب . ودى ها تجيب 200 مليار . والجهات إللى الحكومه بتملكها وبتاخد أرباحها زى الهيئات الاقتصاديه والبنوك العامه ها تجيب 80 مليار . والحاجات إللى الحكومه ها تبيعها سواء خصخصة أو غير خصخصة ها تجيب 13 مليار . والمنح إللى هى الهبات ها تجيب 5 مليار جنيه .
* * حسنين : يعنى الضرائب ها تجيب تلتين الايرادات ؟
= = = محمدين : ولو تحب تعرف كل نوع من الضرائب ها يجيب كام أقولك . الضرائب العامه على المرتبات وعلى النشاط التجارى والصناعى وعلى الهيئات الاقتصاديه وضريبة الدمغه ها تجيب 107 مليار .
والضرائب على المبيعات 66 مليار . والجمارك خمستاشر مليار ونص . وأنواع تانيه من الضرئب ها تجيب 11 مليار زى رسم تنمية الموارد والرسوم المختلفه .
* * حسنين : والعجز فى الموازنه دا قديم ولا دى أول مره . والتقديرات بتاع العجز إللى قلت إنه 191 مليار جنيه . ممكن تقل يعنى .
= = = محمدين : إحنا عندنا عجز بالموازنة بقالنا سنين طويله . علشان كدا زى ما شفت الفوائد والأقساط بتاعته بتاخد أكبر نصيب من المصروفات فى الموازنه .
وتقديرات العجز السنا دى ممكن تقل وممكن تزيد . حسب الظروف الاقتصاديه الدوليه والمحليه . يعنى لو السوق المحلية تعبانه الشركات موش ها تقدر تدفع الضرائب المتوقعه منها . زى ما حصل أيام الأزمة الماليه العالميه وبكدا الايرادات ها تقل . والعجز طبعا ها يزيد عن الرقم الموجود .
من ناحيه تانيه المصروفات إللى إحنا مخصصنها للدعم . لو الأسعار العالميه للسلع إللى بنستوردها زى الزيت والسكر والقمح زادت . لابد نزود الدعم . يعنى نزود المصروفات . يعنى العجز فى الموازنه ها يزيد .
ونفس الكلام لو سعر البترول زاد برا لأننا بنستورد من البترول أكثر من إللى بنصدره . ولو متابع نشرات الأخبار هتلاقى السلع فى العالم أسعارها بتزيد . يعنى الموازنة كانت عامله حسابها إنها ها تستورد القمح فى حدود 200 دولار للطن طول السنه الماليه . فى حين إنه وصل 274 دولار للطن فى نوفمبر إللى فات دا غير تكاليف النقل .
وكمان البترول عدا التسعين دولار للبرميل . والموازنة كانت عامله حسابها على إنه ها يكون 84 دولار . ونفس الكلام فى الدره إللى سعر ه زاد عن إللى كنا عاملين حسابنا عليه فى تقديرات الموازنه .
* * حسنين : ( بهدوء وبأدب ) طيب لو سمحت أنا إزاى ممكن أشارك فى وضع اولويات الإنفاق بالموازنة زى الحكومه ما بتقول ؟.
= = = محمدين : ياسيدى أولا الموازنة فيها عجز كبير زى ما شفت . والأسعار العالميه زادت عن إللى كنا متوقعينه . يعنى العجز محتمل يزيد عن كدا .
ولو متابع أحوال بلاد أوربا إللى بنصدر ليها معظم صادراتنا وبيجِينا منها معظم السياح . هتلاقى معدلات النمو فيها لسه منخفضه . والبطاله لسه عاليه . يعنى دا ها يأثر على صادراتنا لِيها . وبالتالى ها يأثر على الضرائب إللى ممكن تدفعها الشركات إللى بتصدر لأوربا أو بتشتغل فى السياحه .
وبعدين فيه سبب تانى مهم أنه فيه حتميات لابد الموازنه تصرف عليها .
* * حسنين : ( مقاطعا ) إيه حكاية الحتميات دى ؟.
= = = محمدين : فيه مصروفات متقدرش الحكومه تقرب منها . يعنى بند الأجور ما تقدرش الحكومه تخفضه . الدعم نفس الكلام . مصاريف الجيش والشرطه . المعاشات . فوائد وأقساط الديون .
يتبقى ايه الاستثمارات رغم إنها هى إللى بتحسن حياة الناس وبتوفر فرص العمل . لكن الحكومه خفضتها ل 40 مليار السنا دى . رغم إنها كانت 48 مليار السنه إللى قبلها . والكلام دا عندك فى موازنة المواطن فى الجدول إللى فى صفحة أربعه .
* * حسنين : برضه ما جاوبتنيش إِزاى أقدر أشارك فى تحديد أولويات الموازنه زى ما قالوا ؟.
= = = محمدين : يا سيدى زى ما قلت لك ما عندهمش إلا بند الاستثمارات . ممكن يلعبوا فيه . وطبعا زى ما أنت شايف كلها 40 مليار جنيه مخصصنها لتحسين تعليم وصحة وطرق ومرافق 80 مليون مصرى فى سنه .
يعنى لو فيه مستشفى عايزه نص مليون علشان تخلص . ممكن يدوها ميت ألف جنيه كل سنه . وبدل ما تخلص فى سنه تخلص فى خمسة أوأكتر لأن أسعار مواد البنا ممكن تزيد خلال الخمس سنين . نفس الكلام لو محطة صرف صحى ناقصها مليون جنيه وتخلص . ها يخدوها على كذا سنه . يعنى أولويات الناس دى آخر حاجه تهمهم .
وبعدين إنت ناسى تدخلات أصحاب النفوذ . يعنى لو الطريق بتاع بلدكم إللى عايز مبلغ علشان يخلص . وجه طلب من وزير ولا واحد مسنود عايز فلوس لطريق فى بلده أو فى دايرته . وزير الماليه ها يفضل طريق مين إنت ولا الوزير ؟.
وبعدين إنت ناسى مصاريف الهانم والمحروس إبنها على المؤتمرات والمهرجانات والندوات والسفريات . مين إللى له الأولويه ؟ طريق بلدكم ولا طلبات الهانم والمحروس إبنها والحاشيه بتاعته ؟ . تعرف وزراة الثقافه واخده كام فى الموازنه ؟. 7ر3 مليار جنيه و وزارة الخارجيه 7ر1 مليار جنيه .
شوف بقى أمور الغلابه واخده أد إيه . صندوق تطوير المناطق العشوائيه إللى فيها 18 مليون شخص 163 مليون جنيه . جهاز بناء وتنمية القريه المسؤل عن 4621 قريه 11 مليون جنيه . لكن دار الأوبرا تاخد 90 مليون . ومكتبة اسكندريه 157 مليون وهيئة الاستعلامات 194 مليون ونص .
* * حسنين : ( بصوت منكسر ) يعنى أنا موش ها أشارك فى تحديد أوليات الإنفاق فى الموازنه . زى موازنة المواطن ما قالت ؟ .
= = = محمدين : لما تشارك فى إختيار أعضاء المجلس المحليه موش ها أقولك أعضاء مجلس الشعب .. لما تدخل قسم الشرطة وتلاقى أمين الشرطة موش الضابط بيحترمك . لما تختار عمدة بلدكم . ساعتها ها تشارك فى تحديد أولويات الإنفاق بالموازنه .
* * حسنين : موت ياحمار !