* * حسنين : كل واحد مسؤل عايز يطمنا على إقتصاد بلدنا .. يقول ميزان المدفوعات بقى كويس . ومره يقولوا ميزان المدفوعات عامل فايض . ومره يقولوا ميزان المدفوعات مستقر . هَرونا ميزان مدفوعات .. ميزان مدفوعات . هُما بيوزنوه فين ؟ = = = محمدين : وإنت يهمك فى إيه الموضوع ده ؟. * * حسنين : بينى وبينك عايز أعرف هو صحيح موزون .. ولا بيلعبوا فى الوزن برضه ؟ ولا بيدوا رشوه للراجل إللى بيوزنوا عنده ؟ . = = = محمدين : شوف ياسيدى ميزان المدفوعات دا بتعمله الدول . علشان تحسب بيه أد إيه الفلوس إللى طالعه منها . وأد إيه الفلوس إللى داخله ليها .. لو لقت الفلوس إللى داخله أكتر من إللى طالعه . يبقى الميزان بتاعها فيه فايض . لو لقت الفلوس إللى خارجه منها أكتر من إللى داخله ليها . يبقى الميزان عامل عجز .. لو الإتنين أد بعض يبقى فيه توازن . * * حسنين : والفلوس إللى طالعه برا البلد . دى طبعا الفلوس إللى الناس المسافرين برا وخداها معاها . إللى رايح يحج ولا يعمل عُمره . موش كدا ؟ = = = محمدين : شوف العمليه أوسع من كدا بكتير . هنا بنشوف أى عمله أجنبيه دفعتها البلد لدول تانيه . يعنى إستورنا قمح ولا دُره ولازيت . موش بندفع تمنها . هنا بنحسب تكلفة أى سلعه استوردناها . مصريين سافروا برا : يحجوا . يصيفوا . يتفسحوا . يتعالجوا . يتعلموا . برضه بنحسب هما إتكلفوا أد إيه .. طياره مصريه نزلت فى مطار فى أى بلد ومونت بنزين بتاع طيارات . سفينه مصرية رست فى مينا أجنبى ودفعت رسوم . . بنك مصرى حط وديعه فى بنك موجود فى دوله تانيه . رجال أعمال مصريين حطوا فلوس فى بورصات فى دول تانيه .. كله يتحسب علشان نشوف بلدنا خرجت منها فلوس أد إيه . * * حسنين : دى الفلوس إللى خارجه من بلدنا . وطب الفلوس إللى داخله بلدنا ؟ = = = محمدين : نفس الكلام . موش إحنا زى ما نستورد بنصدر . علشان كدا لما بنصدر قطن و رز وبطاطس وخضر وموكيت وسيراميك . نشوف إحنا صدرنا بضايع بأد إيه . طبعا فيه سياح أجانب بيوصلوا بلدنا بيصرفوا فى الفنادق وفى المطاعم وفى المتاحف وفى الملاهى . نحسب السياح دول صرفوا كام عندنا . المراكب إللى بتعدى قناة السويس موش بتدفع رسوم . نحسبها .. المصريين إللى شغالين فى الخارج إللى بيبعتوا فلوس لأهاليهم . نحسب بعتوا كام .. طياره أجنبيه هبطت فى مطار القاهره مونت وقود نحسب الفلوس إللى دفعتها . باخره أجنبيه رِست فى مينا اسكندريه اشترت وقود . أجانب جابوا فلوس علشان يعملوا بيها مشروع فى بلدنا .. أجانب حاطين ودايع فى بنوك مصريه . مصريين لهم ودايع ولا استثمارات برا مصر جالهم عوايد عليها . * * حسنين : لما كلمتنى عن الموازنه قلت دى خاصة بس بالحكومه . هوا برضه ميزان المدفوعات بيحسب الفلوس إللى خارجه من الحكومه بس زى الموازنه . = = = محمدين : لأ الوضع مختلف . ميزان المدفوعات بيحسب كل الفلوس إللى خارجه أو داخله البلد . سواء إللى خَرَجْها أو إللى دَخَلْها : حكومه أو قطاع خاص أو شركات .. أفراد .. مصريين .. أجانب .. عرب .. يهود ..هندوس .. رجال أعمال .. سياح حناكيح .. أى حد . المهم الفلوس إللى خارجه من البلد على بعضها بأى وسيله وصلوا كام . ونفس الكلام مع الفلوس إللى داخله البلد وصلوا كام . * * حسنين : فى الموازنه كنت بتقول بنحسبنها بعملة البلد . هى هنا كدا برضه ؟ . = = = محمدين : لأ طبعا . لأن هنا زى ما أنت عارف البلد ممكن تستورد من خمسين بلد . وكل بلد لها عملتها الخاصة بيها . وممكن يدخل لينا سواح من ثلاثين دوله كل دوله منهم ليها عملتها الخاصة بيها . علشان كدا بنوحد العمله فى ميزان المدفوعات . وخَلَنَاها الدولار الأمريكى . فلو كان السايح إللى دفع ثمن إقامته بالفندق دفعها بالدولار خير وبركه . لكنه إفرض إنه جاى من أوربا ودفع باليورو . ناخد اليورو منه وإحنا بنحسب المبلغ نشوف يساوى كام بالدولار ساعتها . ونفس الكلام لو كان سايح سعودى ودفع بالريال السعودى . أو سائح كويتى ودفع بالدينار الكويتى . أو سايح يابانى ودفع بالين اليابانى . أو سايح انجليزى ودفع بالجنيه الإسترلينى . يعنى نقبل أى عمله ونحسب قيمتها بالدولار ساعتها فى الدفاتر . ونفس الكلام لو بِنْصَدر لبلاد كتيره كل واحده لها عملتها . وحبت تدفع تمن البضاعه بعُملتها . . ونفس الكلام لو مصريين فى الخارج باعتِين لأهاليهم هنا فلوس بعملة البلد إللى شغالين فيها . ناخدها ونكتب قيمتها تساوى كام بالدولار ساعة وصولها . * حسنين : وبنحسبه كل أد إيه الميزان ده ؟ = = = محمدين : شوف ميزان المدفوعات علشان عايز جهد كبير أقل حاجه كل تلت شهور . لكن الحساب بتاع السنه كلها بيبقى واقعى أكتر . ليه ؟ ممكن دوله بعتمد على السياحة الشتويه مثلا . تلاقيها فى موسم الشتا عامله فايض فى ميزانها . لكن فى باقى فصول السنه عندها عجز . ممكن دوله بتعمد على تصدير سلعه معينه فى موسم الصيف . ودوله بتعمد على تصدير سلعه فى موسم الشتا . وطبعا ميزان باقى مواسم السنه ها يكون مختلف عند كل واحده فيهم . علشان كدا الأفضل نحسبه كل سنه . بحيث كل المواسم تكون داخله فيه . وزى ما أنت شفت مفيش دوله فى العالم تقدر تستغنى عن باقى الدول . يعنى زى ماهى بتصدر سلع لابد تستورد سلع تانيه . وزى ما يوصل ليها سياح من بلاد تانيه . ناس من أهلها بيخرجوا يعملوا سياحه فى بلاد تانيه . وزى ما ليها ناس بيشتغلوا فى دول تانيه بيبعتوا فلوس لأسرهم فيها . فى نفس الوقت هتلاقى أجانب شغالين فى البلد دى وبيبعتوا فلوس لأهاليهم فى بلادهم الأصليه . يعنى كل لحظه فيه فلوس داخله وفيه فلوس خارجه . * * حسنين : ندخل بقى فى الموضوع إللى أنا جايلك علشانه . ميزان المدفوعات بتاع مصر أخباره إيه ؟. = = = محمدين : شوف البنك المركزى إللى بيحسب ميزان المدفوعات فى الدول . علشان يبسط الحساب . قام عمل أقسام أو قول قطاعات أو بنود . يعنى بند التصدير بند السياحه بند تحويلات العاملين بند الودايع إللى برا البلد . وبعدين علشان موش كل دوله تعمل تقسيمه للبنود على مزاجها . صندوق النقد الدولى عمل تقسيمه لبنود ميزان المدفوعات . بحيث الدول تلتزم بيها . ودا يسهل لأى باحث ولا شركة ولا رجل أعمال ولا مركز بحوث . لما يحب يقارن بين ميزان مدفوعات دوله ودوله تانيه . وعلى فكره مصر بتحسب ميزان المدفوعات حسب السنه الماليه إللى بتبدأ أول يوليو وتنتهى آخر يونيو . * * حسنين : زى السنه الماليه بتاع الموازنة الحكوميه ؟ = = = محمدين : تمام .. شوف يا سيدى البنك المركزى المصرى مشى على التقسِيمه إللى عملها صندوق النقد الدولى . وقسم الموارد بتاع النقد الأجنبى إللى داخله مصر لبنود . أولها الصادرات السلعيه وبعدين الصادرات الخدميه . * * حسنين : ( مقاطعا) وإيه الفرق بينهم ؟ = = = محمدين : بص . الصادرات السلعيه دى زى الرز والملابس والحديد والسجاد . يعنى الحاجات إللى تقدر توزنها أو تقيسها . يعنى لما بتصدر رز بتقول صدرنا كذا ألف طن . كذا ألف طن حديد . كذا ألف قنطار قطن . كذا ألف دستة بنطلون . كذا مليون متر سيراميك . لكن الخدمات دى ساعات بيسموها الصادرات غير المنظوره . يعنى لو بتعمل إتصال تليفونى مع أخوك إللى فى الخليج . بتشوف الموجات إللى طالعه من التليفون وإنت بتكلمه ؟ . ودى أنواعها كتيره زى : السياحه . وخدمات النقل بأنواعه بحرى جوى برى . طياره داخله المطار بيتعمل لها خدمات توجيه للهبوط بتدفع تمنها . وخدمات تشييد وبناء : يعنى شركة مقاولات مصرية بتعمل طريق ولا فندق فى الخليج . خدمات تعليميه : طلبة جايين يتعلموا . خدمات صحيه : ناس جاية تتعالج هنا . خدمات مالية بتعملها البنوك أو فى البورصه . خدمات تأمين . خدمات استشارات ودى برضه أنواع ممكن تكون استشارات قانونيه أواستشارات محاسبيه أو استشارات هندسيه . كمان فيه خدمات رياضيه . خدمات بيئيه . خدمات ثقافية : الأفلام وبرامج الكمبيوتر . * * حسنين : غير الصادرات السلعيه والخدميه . إيه تانى بيجيب عملات أجنبية لمصر ؟ . = = = محمدين : الإستثمارات إللى الأجانب بيدخلُوها . سواء كانوا ها يعملوا مشروعات هنا أو ها يدخلُوا يشتروا فى البورصه . كمان الفلوس إللى المصريين الشغالين فى الدول العربيه والأجنبيه بيبعتوها لأهاليهم هنا . والمعونات والمنح والهبات إللى بتديها حكومات أو مؤسسات اجنبيه لمصر . سواء للحكومه أو لجمعيات أهليه . كمان لو شركات مصرية بتقترض فلوس من برا . برضه لو رسوم بيدفعها المصريين إللى فى الخارج فى القنصليات المصريه لما يطلعوا شهادات معينه هناك . * * حسنين : ما تيجى بقى نعرف كدا كله على بعضه جاب لينا كام ؟ = = = محمدين : فى السنه الماليه 2009/ 2010 إللى انتهت فى آخر يونيو إللى فات . كل دا جاب 72 مليار ونص لمصر . لو حبيت تفنطهم . التصدير بتاع السلع جاب حوالى 24 مليار. السياحه جابت أقل من 12 مليار دولار . التحويلات بتاع المصريين الشغالين برا جابت تسعة ونصف مليار . اجمالى مشتريات الأجانب فى البورصة وفى أذون الخزانه حوالى 8 مليار . الإستثمارات المباشره إللى عملها الأجانب فى مصر حوالى 7 مليار دولار . القروض والتسهيلات إللى قدمها الموردِين لينا 5 مليار . وقناة السويس دخلت 5ر4 مليار . وكل أنواع الصادرات الخدميه إللى قلنا عليها بخلاف السياحه وخدمات والنقل عملوا حوالى 4 مليار . والفوائد إللى عملتها البنوك على ودايعها برا 2 مليار . والمعونات الأجنبيه جابت 1 مليار , والحصيله بتاع الخدمات اللى عملتها القنصليات المصريه برا حوالى ربع مليار دولار . * * حسنين : ننقل بقى على الفرده التانيه . ونعرف الفلوس إللى خرجت من مصر . صرفناها على إيه ؟. = = = محمدين : طبعا إحنا بلد بنستورد تلت تربع أكلنا : قمح دره لحمه سمك منتجات ألبان . أظن مفيش صنف أكل إلا وفيه منه أنواع مستورده . وآلات وعربيات وكيماويات ومعادن وسولار وبوتوجار وموبايلات وملابس . وحاجات كتير قوى علشان كدا الواردات السلعيه أكبر بند . تانى حاجة الواردات الخدميه وهى نفس البنود بتاع الخدمات يعنى : سياحه وخدمات نقل وإتصالات وخدمات تعليميه وصحيه وثقافيه وبيئيه وماليه وإستشارات وخلافه . يعنى سياح مصريين طالعين يصيفوا برا . مصريين خارجين يتعالجوا برا . مصريين مسافرين يتعلموا برا . ونفس البنود إللى فاتت . يعنى مصريين ها يعملوا إستثمار برا مصر . مصريين بيستثمروا فى بورصات فى دول تانيه . أجانب شغالين فى مصر وبيبعتوا فلوس لأهاليهم خارج مصر . * * حسنين : ممكن نفنطهم فلوس . دولارات زى ما قلت . = = = محمدين : الاجمالى بتاع الفلوس اللى دفعناها حوالى 69 مليار دولار . متوزعين زى ما قلت لك : أكبر بند الواردات السلعيه ودى عملت 49 مليار دولار . الفوائد إللى عملها الأجانب على مشترياتهم من أذون الخزانه ومن ودايعهم جوا مصر 5 مليار دولار . السياحه إللى خارجه برا مصر 2 مليار بما فيهم الحج والعمره . خدمات النقل للطيارات والسفن المصريه برا 1 مليار دولار . مصاريف خدمات غير السياحه الخارجه وغير خدمات النقل. زى ما قلنا فيها اتصالات وتعليم وتدريب وعلاج وخدمات مالية واستشارات 3 مليار . وكمان سفريات حكوميه واحد ونص مليار دولار . ومصريين عملوا مشروعات بالخارج 1 مليار دولار . ومصريين استثمروا فى بورصات أجنبيه نص مليار دولار . * * حسنين : بس أنا ساعات أسمع يقولوا الميزان التجارى . حضرتك ما جبتش سيرته . = = = محمدين : زى ما شفت البنود بتاعت الإيرادات أو المصروفات متجمعين فى حوالى 12 بند . لكن طبعا كل بند جواه أنواع كتيره . يعنى زى ما شفت أجزاء ميزان المدفوعات مغطية كل قطاعات الاقتصاد . ساعات نبقى عايزين نركز على حته معينه عايزين نعرف وضعها إيه بالتفصيل . فجينا عند الصادرات السلعيه وحبينا نقارنها بالواردات السلعيه ونشوف الفرق بينهم إيه . ودا بقى سَمناه الميزان التجارى . يعنى الميزان التجارى بيحسب جالنا كام من الصادرات السلعيه . ودفعنا كام فى الواردات السلعيه .. ونفس الكلام لو حصيلة الصادرات أكبر يبقى فيه فايض فى الميزان التجارى . ولو الواردات أكبر يبقى عندنا عجز بالميزان التجارى . * * حسنين : والميزان التجارى بتاع مصر عامل ايه ؟ = = = محمدين : حصيلة الصادرات زى ما شفت أقل من 24 مليار دولار . ودفعنا فى الواردات السلعيه 49 مليار دولار . يعنى عندنا عجز فى الميزان التجارى أكتر من 25 مليار دولار فى سنه . وعلى فكره إحنا عندنا عجز فى الميزان التجارى من حوالى خمسين سنه. وبيزيد مع الوقت . وطبعا دا أهم ميزان لأنه واخد الجزء الأكبر من ميزان المدفوعات زى ما شفت . * * حسنين : هو فيه موازين تانيه غيره ؟. = = = محمدين : كتير . بس لو قلناها ها تتلخبط . لكن فيه حاجات مهم تعرفها حاجه إسمها ميزان الخدمات . هنا ها نجيب الصادرات الخدميه والواردات الخدميه. ونشوف الفرق بيهم بنفس الطريقه . وممكن كل بند تانى تعمل له ميزان خاص بيه . يعنى ممكن تيجى على السياحه وتشوف السياح الداخلين دخلوا فلوس كام . والسياح إللى خرجوا صرفوا كام برا . وتعمل ميزان للدخل السياحى . نفس الكلام تشوف حصيلة خدمات النقل ومن الناحية التانيه مصروفات خدمات النقل . ممكن نحسب جالنا كام من الفوايد على الودايع والاستثمارات بتاعتنا برا . ودفعنا كام فوائد فى نفس الوقت على ودايع الأجانب الموجوده فى مصر وعلى الفوائد إللى خدوها على استثماراتهم إللى فى مصر . يعنى كل بند ممكن يتعمل له ميزان خاص بيه . * * حسنين : وليه دا كله ؟ كفايه علينا نجمع كل الموارد إللى دخلت فلوس . ونجمع كل المصروفات إللى خرجت فلوس ونعرف الفرق بينها . ويبقى عندنا ميزان واحد ونريح دماغنا . = = = محمدين : زى ما شفت بنود ميزان المدفوعات شامله كل قطاعات الإقتصاد بتاع البلد . بتبقى عايز تعرف مين القطاع القوى ومين القطاع التعبان علشان تصلحه . زى جسم الإنسان متكون من كذا عضو ممكن واحد يقولك إن صحته كويسه بس عنده متاعب فى الأسنان . دا غير واحد عنده تليف فى الكبد . وزى العلاج الطبى ما أصبح بيعمل تخصصات فرعيه كتيره . يعنى بدل ما يقول طبيب عيون وخلاص . بقى يقول دا طبيب متخصص فى الحول ودا متخصص فى قصر النظر ودا متخصص فى الشبكيه . التحليلات فى ميزان المدفوعات كل يوم بتتشعب . يعنى ممكن أعمل ميزان تجارى لسلعه واحده . أشوف حصيلة صادراتنا من الملابس كام ومدفوعاتنا لإستيراد الملابس كام . وأشوف عندنا عجز ولا فائض فى الملابس .. وممكن أدقق شويه وأعمل ميزان لنوع واحد من الملابس يعنى مثلا ملابس الأطفال بس . ممكن أعمل ميزان تجارى لعلاقتنا التجاريه مع دوله تانيه زى السعوديه لوحدها . يعنى أشوف قيمة صادراتنا ليها وقيمة وارداتنا منها وإحنا عاملين معاها فائض ولا عجز .. و ممكن أعمل ميزان تجارى مع الدول العربيه كلها بس . أو مع دول افريقيا بس . نفس الكلام ممكن أعمل ميزان خدمى مع دوله تانيه . أو ميزان فى خدمه واحده مع دوله تانيه . يعنى بيدخل لينا من سياحها كام فلوس وسياحنا بيصرفوا فيها كام . * * حسنين : وليه دا كله . العمليه وسعت قوى . = = = محمدين : دا شغل الدول المحترفه تتابع وتشوف تطور الأمور . لأنها لما ها تصدر ها تشغل ناسها . ولو ما صدرتش البضايع بتاعتها ها تروح المخازن. وممكن المصانع تستغنى عن بعض العمال وممكن المصنع يقفل ويسرح العمال . وتحصل اضطرابات اجتماعيه . أو تدفع تعويضات بطاله زيادة . تأثر على ميزانيتها . علشان كدا بتابع ليه الصادرات قلت فى البلد الفلانيه . ومين البلد المنافسه إللى أخدت مكانها هناك . وإيه السبب فى إللى حصل هل السعر ولا الجوده ولا الموضه . وتحاول تعالج الموضوع بسرعه . نفس الكلام فى السياحه ليه سياح الدوله الفلانيه قل عددهم .أو ليه قل إنفاقهم عندنا . أو قلت عدد الليالى السياحيه إللى بيقضوها هنا .وإيه البلاد اللى راحوها بدل مصر . نفس التحليل فى الإستثمارات إللى جايه من بلد معين قلت ليه أو زادت ليه . وحصتنا من اجمالى الاستثمارات إللى خرجت من البلد دى .والمجالات إللى الاستثمارات دخلت فيها عندنا. واستفدنا منا أد إيه عماله وانتاج وتصدير . يعنى بحث مستمر على طول . لو عايزين يبقى لينا مكان على خريطة العالم . موش مجرد إننا ننشر بيانات ميزان المدفوعات والسلام . * * حسنين : بس أنا شايف كدا بعد كلامك إن ميزان المدفوعات بتاعنا كويس . موش قلت إن اجمالى الموارد 72 ونص مليار . واجمالى المصروفات 69 مليار دولار . يعنى عندنا فائض والحمد لله . = = = محمدين : دا على الورق . عندنا فايض أكتر من 3 مليار دولار . لكن الحقيقه غير كدا . ليه ؟. البيانات إللى بينشرها البنك المركزى عن بنود الفلوس الداخله والفلوس الخارجه . موش هى الحقيقيه . فاكر لما كنا بنتكلم عن الإيرادات السياحيه . وقلنا إن إللى بيتقال هى ايرادات تقديريه موش حقيقيه . لما عملوا معادله حساب الإيرادات السياحيه = عدد السياح X متوسط عدد الليالى السياحيه إللى بيقضيها السايح X متوسط إنفاق السايح فى الليله . وقلنا إنهم بيضخموا عدد السياح لما بيدخلوا فيه كل الأجانب الواصلين مصر . وإن عدد الليالى بيكبر لما بيحسبوا الشهور الطويله إللى بيقضيها الأفارقه وغيرهم من الأجانب الغلابه فى مصر . وإنهم عملوا متوسط إنفاق للسايح فى مصر 85 دولار فى الليله . ولما قلنا إنهم قالوا إن الايرادات السياحيه زادت بنسبة 11 % خلال سنه . رغم إنها سنة الأزمة العالميه ورغم مشكلة البطالة والإنكماش فى أوربا إللى مفروض بييجى منها حوالى تلتين السياح . * * حسنين : خلى ايرادات السياحة تقديريه .ما عندنا حوالى 11 بند تانين زى ما قلت . = = = محمدين : فاكر لما قلنا إن وزير الاستثمار إللى مشوه بحركه لطيفه . نفخ أرقام الإستثمار الأجنبى المباشر . ولأنه كان مسنود أو إللى عمله كان على الهوى . البنك المركزى عدل البيانات وزودها زى ما الوزير عايز . * * حسنين : بناقص بندين باقى عشر بنود = = = محمدين : إسأل أى مستورد أو راجل أعمال أو شركة لها تعامل مع الخارج . قل له ايه رأيك فى بيانات الواردات الرسميه . ها يضحك . ليه ؟ . لو المستورد قال على القيمة الحقيقيه للحاجات إللى إستوردها ها يدفع جمارك أكتر . يبقى من مصلحته يعمل فواتير بقيمة أقل علشان يدفع جمارك أقل . الحاجة التانيه قيمة الواردات دى خاصة بالسلع إللى مرت على الجمارك . لكن ياما السوق فيه سلع متهربه . روح شارع الأزهر وشوف كميات الأقمشه وغيرها . طبعا كل السلع المتهربه ما بتتحسبش ضمن البيانات الرسميه بتاع الواردات . هل البضاعه إللى بتتهرب فى الأنفاق إللى رايحه غزه متسجله ؟ . والبضايع إللى بتتهرب على الحدود مع السودان سواء داخله ولا خارجه. متسجله ؟ طبعا لأ . والناس إللى بتستورد مخدرات بمليارات . وغيرها من الممنوعات . بلاش التهريب.. الناس إللى راجعه من برا وجايبه معاها سلع من كل الأصناف دى كمان موش محسوبه ضمن بيانات الواردات . فاكر لما إتكلمنا عن تحويلات المصريين الشغالين بالخارج . وقلنا إن رقم التحويلات بتاعهم دا خاص بالحاجات إللى إتحولت عن طريق البنوك بس . وإن فيه فلوس بيبعتوها مع أصحابهم أو بيجبوها معاهم وهما راجعين . ودى ما تدخلش ضمن الحسابات الرسميه . * * حسنين : يعنى شككتنى فى بيانات السياحة والإستثمار الأجنبى المباشر والواردات والصادرات والتحويلات . طب ما كنت رحتنى م الأول . = = = محمدين : صحيح الحقيقه مره . بس ساعات بتريح . [email protected]