استثمار أجنبى ..ضرره أكثر من نفعه

* * حسنين : إيه رأيك ياسيدى آهى استثمارات الأجانب فى مصر فى ست سنين . وصلت أكتر من 49 مليار دولار . شوف بقى دى وفرت فرص عمل أد إيه ؟ وزودت الإنتاج أد إيه ؟
= = = محمدين : هو حضرتك قاعد معانا فى البلد ولا كنت مسافر ؟
* * حسنين : مسافر ! ياريت .. ما كنش دا بقى حالى . ما أنت عارف البير وغطاه .
= = = محمدين : طيب .. ماهُو لو كانت الاستثمارات دى دخلت فعلا كان حالنا إتغير . لأنها لو حصلت فعلا كانت زودت إنتاج السلع والخدمات . ودا كان لابد ها يهبط الأسعار . ولو كان الاستثمار دا حصل كان ها يوفر فرص عمل .. سمعت إن البطاله نقصت ؟ . يعنى حالة البلد أكبر دليل الفشر المستمر .
* * حسنين : ( بصوت منخفض ) . لكن رئيس الوزراء هو اللى قال الكلام ده . وقبله قاله وزير الاستثمار اللى فات . وكرره الوزير الحالى .
= = = محمدين : لو كنت صدقتهم لما اتكملوا عن نتائج انتخابات مجلس الشورى . ولا نتائج مجلس الشعب . إبقى صدق كلامهم عن الإستثمار الأجنبى .
* * حسنين : لكن دا فيه مؤسسات اقتصاديه دوليه بتابع وبتطلع تقارير كل شويه .
= = = محمدين : ما قلنا لك قبل كده . إن المؤسسات دى كلها بتاخد البيانات إللى بتطلعها الدول . وتحطها زى ما هىّ . يعنى لو رجعت للتقرير السنوى بتاع منظمة الأونكتاد . المسؤله عن بيانات استثمارات الأجانب بالعالم . لسنة 2005 .
حتلاقى رقم مصر سنتها ضعيف جدا . لما جه وزير الاستثمار ونفخ الرقم . السنه إللى بعدها الأونكتاد عدلت بيانات مصر عن سنة 2005 زى ما الوزير قال . وفضلت تاخد أرقامه المنفوخه لحد النهارده .
* * حسنين : كلامك غريب شويه أنا أعرف عجلة عربيه منفوخه . كره منفوخه . لكن يعنى إيه بيانات منفوخه ؟
= = = محمدين : طالما عايز تعرف . إصبر علىّ شويه وخلينى أشرح لك الحكايه . .
الاستثمار بتاع الأجانب فى أى بلد بياخد شكلين : حاجه بيسموها استثمار أجنبى مباشر . وحاجه بيسموها استثمار أجنبى غير مباشر .
الإستثمار المباشر يعنى الأجانب يدخلوا يعملوا مشروعات على طول . يعملوا مصانع . يستصلحوا أراضى . يعملوا بنوك . يعملوا فنادق . المهم بيعملوا حاجه ما كنتش موجوده قبل كده .
* * حسنين : أمال إيه بقى الاستثمار الأجنبى غير المباشر ؟
= = = محمدين : دا ياسيدى بدل الأجانب ما يعملوا مشروعات جديده . يدخلوا يشتروا جزء من المشروعات الموجوده فعلا . . وطبعا أى مشروع رأسماله موزع على أسهم . علشان كدا بيشترورا كمية من أسهم المشروع تخليهم مُلاك لجزء من المشروع .
علشان كدا النوع دا من الإستثمار بيسموه استثمار المحفظة أو الحافظه . يعنى الأجانب بيشتروا جزء من محفظة أسهم المشروع الموجود . أو حتى كل أسهمه . زى ماعملوا مع بنوك كتيره . زى بنك مصر الدولى و بنك مصر رومانيا وشركات أسمنت كتيره .
* * حسنين : ومين فيهم بقى أفيد للبلد المباشر . ولا الغير مباشر ؟
= = = محمدين : شوف إنت .. بلد فيها عجز تجارى من سنين طويله . وبتستورد تلت تربع أكلها . وفيها بطاله . وعليها ديون . الأحسن ليها تزود الإنتاج وتوفر فرص عمل . ولا تفرح لمجرد تغيير شكل الملكيه للشركة .
* * حسنين : يعنى إيه تغير شكل الملكيه للشركة ؟
= = = محمدين : ما هو الأجانب لما اشتروا شركة اسمنت اسكندريه واسمنت أسيوط ولا اسمنت بنى سويف . ولما اشتروا بنك الاسكندريه . كل إللى حصل إنهم غيروا شكل الملكيه بس . يعنى المشروع هو هو . نفس العماله . نفس الفروع . بس الملكيه بدل ما كانت للمصريين بقت للأجانب .
* * حسنين : يعنى أحوال بلدنا تخلينا عايزين الإستثمار المباشر موش الغير مباشر .
= = = محمدين : طبعا . ولأسباب كتيره . لأن الاستثمار الغير مباشر ده . إللى بيسموه استثمار الحافظه . بيضرنا أكتر ما بينفعنا .
* * حسنين : بيضرنا ليه ؟ . ناس جايه تحط فلوسها فى بلدنا كتر خيرهم . ما كان قدامهم بلاد تانيه . والعالم بقى مفتوح .
= = = محمدين : لأن استثمار الحافظة دا معناه إنه جاى يتعامل فى البورصه المصريه . يبيع ويشترى .
* * حسنين : كويس . دا حتى بيكبر السوق بتاعنا . أقصد البورصه بتاعتنا . ويخلى إللى عنده سهم موش عارف يبيعه يلاقى حد يشتريه منه .
= = = محمدين : جميل . دا المفروض يحصل . لكن إللى بيحصل إن الأجانب دول ما بيطولوش عندنا . لدرجة إنهم بيسموهم العصفور الطائر . زى العصفور يفضل يتحرك من شجره للتانيه .
ودا حالهم يترصدوا لبورصة فى بلد ناميه . يدخلوا فيها ويولعوا الأسعار . ويخرجوا بهدوء كسبانين . وإحنا ندفع التمن . يعنى يشربها مصريين راجعين من بالخارج . أو تجار معندهمش خبره .
بص كدا لأرقام تعاملات الأجانب فى البورصة المصريه . آهى منشوره فى تقارير البنك المركزى . هتلاقى من أربع سنين صافى تعاملاتهم . عاملين فلوس خارجه برا 937 مليون دولار فى السنه .
* * حسنين : يعنى إيه فلوس خارجه برا .
= = = محمدين : يعنى لو مستثمر أجنبى شارى سهم شركة مصريه بحوالى 50 جنيه . وفضلوا يسخنوا السوق لحد ما وصل السعر 70 جنيه . يروح خارج م البورصه وخارج بفلوسه من البلد . فالعشرين جنيه المكسب فى سهم . إضربها فى آلاف الأسهم فى شركات كتير تعمل لهم مكاسب هايله .
علشان كدا من 3 سنين الصافى إللى طلعوا بيه وخرجوه برا وصل 1 مليار و374 مليون دولار . والطامة الكبيره من سنتين عارف كسبوا كام مننا وطلعوه برا مصر : 9 مليار و211 مليون دولار .
* * حسنين : بتقول إيه .. طلعوا أكتر من 9 مليار دولار فى سنه واحده من تعاملاتهم فى البورصة المصريه !.
= = = محمدين : الكارثه إن المبلغ دا أكتر من حصيلة قناة السويس فى نفس السنه اللى وصلت فيها أقل من 5 مليار دولار . وأكثر من تحويلات المصريين الشغالين برا واللى كانت سنتها أقل من 8 مليار دولار .
* * حسنين : يعنى إللى نحصله من قناة السويس ولا من التحويلات . يطلعوا الأجانب إللى بيستثمروا فى البورصه أكتر منه .
= = = محمدين : هى دى الحقيقه . والأنكى من كدا إنهم ما دفعوش أى ضرائب على الأرباح دى ؟
* * حسنين : ما انت قلت قبل كدا إن الحكومه الرشيده عفت الأرباح إللى بتيجى من البورصة من الضرائب .
= = = محمدين : لكن الدول الكبيره زى أمريكا وفرنسا وغيرها . لأنها عارفه إنها استثمارات بتتحرك بسرعه . عملت ضرائب متناقصه على أرباح استثمارات الأجانب فى بورصتها . كل ما تقعد أكثر تقل نسبة الضرائب عليها .
يعنى لو عمل أرباح وعايز يخرج خلال شهر من دخوله . يدفع نسبة ضرائب أكثر من إللى عمل أرباح وخرج بعد 3 شهور .
* * حسنين : يعنى إحنا أغنى من أمريكا وفرنسا .. ما شاء الله .. فالحين بس يفرضوا علينا ضرائب عقاريه وضرائب مبيعات وضرائب دخل وضرائب دمغه .
= = = محمدين : الخطير فى استثمارات الأجانب فى الحافظه . إنها عامله زى ماتش كوره بين فريق البرازيل وفريق كفر البطيخ . وإحنا متصورين إنه ممكن فريق كفر البطيخ يكسب .
* * حسنين : موش فاهم تقصد إيه ؟
= = = محمدين : المستثمرين الأجانب لما بيدخوا بورصة بلد . بيكونوا جاهزين قبلها بدراسات وأبحاث عن الشركات إللى ها يدخلوا فيها . وطبعا عندهم فلوس كتيره يقدروا يشتروا كميات كبيره . وبيستعينوا بكل البيانات إللى بتوفرها لهم مراكز الأبحاث والدراسات وسفارات بلدهم .
قدامهم مستثمر محلى غالبا بيبقى فرد . واحد راجع من برا معاه قرشين . موظف فى بنك . رجل أعمال صغير . طبعا دول معلوماتهم وفلوسهم على أدهم . يدخل الطرفين فى منافسه سعريه . من الطبيعى إن إللى عنده معلومات أكتر وسيوله أكتر فرصته فى الكسب أكتر .
* * حسنين : يعنى استثمارات الحافظة لا بتضيف إنتاج ولافرص عمل . وبتطلع فلوسها برا . وبتسيب كوارث بين المسثمرين الوطنيين إللى خسروا بعد الأجانب ما يخرجوا والأسعار تنزل مره تانيه .
ياريت ترجعنا للاستثمار المباشر إللى قلت إنه أكثر إفاده للبلد . ولاحظ إنك لحد دى الوقت ما فهمتنيش مسألة البيانات المنفوخه .
= = = محمدين : شوف يا سيدى .. إنت عرفت إن الاستثمار المباشر دا معناه ناس جايه تعمل مشروعات جديده . وصندوق النقد الدولى أضاف ليها كمان إنه لو الأجانب اشتروا أسهم فى شركة بنسبة 10 % أو أكتر . بيعتبر قيمة الصفقه دى استثمار مباشر .
* * حسنين : يعنى ما أصبحتش كلها مشروعات جديده . شوية مشروعات جديده وشويه إمتلاك لشركات موجوده قبل كدا .
= = = محمدين : عليك نور . وفضلنا ما شيين على كدا سنين . وطبعا أحوال البلد بتأثر على استثمارات الأجانب . علشان كدا بيانات الاستثمار الأجنبى المباشر قبل الوزاره الموجوده حاليا بخمس سنين .
فضلت تنقص من أكثر من 1 مليار دولار . لفوق السُبْعمِيت مليون دولار . وبعدين نزلت لفوق الخُمسمِيت مليون دولار . لحد ما وصلت 407 مليون دولار فى آخر سنه قبل الوزاره ما تيجى .
* * حسنين : عملت إيه بقى الوزاره الحاليه ؟
= = = محمدين : عملت إعجاز عالمى ! . شوف يا سيدى أول سنه للوزاره وصلت الاستثمارات المباشره 3 مليار و873 مليون دولار . يعنى حوالى عشرة أضعاف حجمها فى السنه إللى قبل ما تيجى .
فى السنه التانيه رفعت الرقم ل 6 مليار و 111 مليون دولار . طفره بقى . السنه الثالثه عدت ال 11 مليار دولار . السنه الرابعه عدت ال 13 مليار دولار . وعلشان يبقى كدب مساوى . قالوا إنها فى السنه الخامسه نزلت بسبب الأزمة العالميه لفوق ال 8 مليار دولار وفى السنه الساته نزلت لأقل من 7 مليار دولار .
لما تجمع أرقام السنين السته تعدى ال 49 مليار دولار . إللى إنت قلت عليهم فى أول الكلام .
* * حسنين : ودى عملوها إزاى الطفره دى ؟
= = = محمدين : لما يكون واحد مرتبه تعبان قاعد وسط إصحابه ع القهوه . وبعدين واحد سأله مرتبك كام ؟ . الراجل لقى نفسه محرج . راح حاسب مرتبه ومرتبه أخوه الشغال فى البترول . وأخته إللى شغاله فى بنك وإبن أخوه اللى شغال فى شركة اتصالات .
وراح قايل : مرتبنا حوالى تسع تلاف جنيه فى الشهر .
* * حسنين : يعنى بيعمل جو علشان يخرج من المطب . لكن دا إيه علاقته بموضوعنا .
= = = محمدين : ما هو دا إللى عمله وزير الاستثمار إللى مشى . بص لقى أرقام الإستثمار الأجنبى المباشر قليله . راح مغير التعريف . بدل ما كان طول عمره من حاجتين : المشروعات الجديده . وصفقات الأجانب إللى أكثر من 10 % من أسهم الشركات إللى دخلوا فيها .
راح مِدّخل استثمارات قطاع البترول ودى ما كانتش بتدخل لأنه ثروه بتنضب . وراح مدخل شرا الأجانب للأراضى والعقارات . ودَخّل مشتريات الأجانب فى برنامج الخصخصة . وبص على الشركات الأجنبيه الموجوده فى مصر وعملت أرباح ولكن ما وزعتهاش . إعتبر قيمة الأرباح دى كأنها استثمار جديد . وبكذا بدل مالرقم كان متكون من عنصرين . خلاه متكون من ست عناصر . فأصبح رقم كبير يملا العين .
* * حسنين : علشان كدا سألتنى فى الأول . هل حسيت إن ال 49 مليار دولار زودوا الإنتاج ؟ .
= = = محمدين : شوف يا حسنين . سيبك من رقم الاستثمار المباشر . المهم نوعيته . يعنى جاى يستثمر فى إيه . يعنى لما ييجى يشترى أراضى ما هو بيولع أسعار الأراضى فلا إللى عاوز يبنى سكن يعرف يشترى أرض . ولا إللى عاوز يعمل مصنع يعرف يشترى أرض .
* * حسنين : تقصد إنه معاه فلوس يقدر يستحمل سعر الأرض العالي . بعكس المصريين . يادوب العمليه على الأد .
= = = محمدين : أهم من حجم الاستثمار المباشر المجالات إللى بدخل فيها . يعنى تفرق إنه يعمل لى مولات تجاريه وقرى سياحيه . عن إنه يعمل مصانع . منها تزود الإنتاج ومنها تشغل الناس .
لو بصيت فى الاستثمار المباشر الموجود عندنا . هتلاقيه غالبيته خدمات سياحيه . بنوك . بورصة . وأقل حاجه الصناعه . وطبعا الزراعه دى فين وفنين لما حد يفتكرها منهم .
* * حسنين : بس أنا سمعت إنه الاستثمار الأجنبى بيحسن المنافسه فى البلد . وممكن يعرفنا على التكنولوجيا إللى برا .
= = = محمدين : دا المفترض . لكن هو حاسب العمليه كويس . لأنه لو إنت عرفت السر التكنولوجى موش ها يعرف يبيع لك بعد كدا . علشان كدا تلاقى غالبية المصانع اللى بيعملها الأجانب بتكون تسليم مفتاح .
يعنى المصنع جاى جاهز بالكامل . ويا دوب يدرب العماله المصريه على التشغيل وبس . ولو جصل عطل يبعت يجيب خبير من برا يصلحه .
* * حسنين : بس موش معقول كلهم كدا . دا احنا عندنا شركات أجنبيه كتيره فى المدن الصناعيه .
= = = محمدين : ما إحنا قلنا العبره موش بعدد الشركات . العبره أنا استفدت منه أد إيه . يعنى لما يكون عندك كذا مصنع سيارات . وطبعا كلها تجميع موش تصنيع . ولحد دى الوقت متعرفش تصنع الموتور .
لما يكون عندك مصانع ملابس . ويكون القماش مستورد والحشو مستورد . كأنك مجرد ترزى . علشان كدا الشركات التركيه وغيرها الموجوده فى برج العرب وغيرها . عملتنا كوبرى علشان تصدر لأمريكا من غير جمارك .
* * حسنين : يعنى إيه عملتنا كوبرى ؟
= = = محمدين : يعنى لما دخلنا اتفاقية الكويز . أمريكا قالت لو فيه نسبة من الإنتاج جاية من اسرائيل . ها تعفى المنتج دا لما يدخل أمريكا من الجمارك . جت الشركات دى خصوصا بتاعة الملابس . عايزه تصدر لأمريكا من غير جمارك .
لكن بتستورد القماش من خارج مصر . وتستورد جزء من الخامات من اسرائيل علشان تستوفى النسبه المطلويه . وبعدين تستورد العماله من بنجلاديش أو غيرها من دول آسيا . وطبعا بتحول أرباحها للخارج . قوللى بقى إحنا إستفدنا إيه ؟
* * حسنين : بس بيكتبوا على البضاعه صنع فى مصر .
= = = محمدين : البضاعه بيبقى عليها ماركة الشركة الأجنبيه . يعنى لو ليها ماركه دوليه بتحط عليها الإسم التجارى بتاعها . وإحنا ما عندناش علامات تجاريه دوليه كتيره .
الأخطر من كدا إن الشركة الأجنبية أحيانا بتدخل علشان تدمر صناعة محلية بتنافسها . فاكر زمان لما كان عندنا شركة بتصنع البطاريات . ودخلت شركة أجنبيه تصنع البطاريات . كان إيه مصير الشركة المصريه ؟ إتصفت من زمان .
* * حسنين : حيرتنى !
= = = محمدين : شوف لو البلد محدِدَا هى عايزه إيه . ممكن تستفيد أكثر من الاستثمار الأجنبى المباشر . يعنى لو عندنا نقص فى صناعات معينه أو فى محاصيل معينه . نعطى أولويه للحاجات دى . ونخلى حوافر الإستثمار مركزه عليها . نفس الكلام لو فيه منطقة عايزين ننميها زى الصعيد . نقوم نركز حوافز الإستثمار عليها .
هنا بقى نكون عارفين إحنا عايزين إيه من الاسثمار الأجنبى . ونخليه يتجه للاجات اللى إحنا محتاجنها أكتر . بحيث زى ما هو بيستفيد إحنا برضه نستفيد .
لكن طالما إحنا تايهين والأمور ماشيه عشوائي . الأجنبى هو إللى ها يحدد المجالات إللى ها يدخل فيها . والأماكن إللى هو عايزها . بحيث تقل إستفادتنا منه . ويمكن يسبب ضرر لصناعتنا المحليه .
mamdouhec@maktoob.com