تشابه تام بين أحوال مصر وتونس

* * حسنين : سمعت إللى قاله رئيس مجلس إداره الأهرام . بأن الأحوال فى مصر غير الأحوال فى تونس . وإنه موش ممكن إللى حصل هناك يتكرر عندنا . بدليل إننا موش كلنا غضبانين من النظام .
= = = محمدين : إنت لو مكانه موش ها تغضب من النظام . وها تسبح بحمده كمان .
* * حسنين : ليه إن شاء الله ؟
= = = محمدين : يعنى لما تاخد كل شهر أكثر من مليون جنيه .
* * حسنين : مليون جنيه فى السنه ؟
= = = محمدين : بقولك فى الشهر . صحصح شويه . دا غير عمولة الاعلانات ودى بيقولوا إنها أكثر من المرتب . وبعدين ماهو قال قبل كدا إن انتخابات مجلس الشعب الأخيره نزيهه . إيه الجديد . تصور إنه نفسه من سنه فى نفس البرنامج قال إن زيادة عدد إللى عندهم بطاقات تموين دا دليل على زيادة الفقر . وإنه المفروض التعامل مع الفقر موش مع أعراضه . كل دا نَساه .
* * حسنين : ( ممسكا بآله حاسبه ومتمتما ) . يعنى كاف ألف فى الساعه . دا ولا مدير الكوره الجديد بتاع الأهلى .
= = = محمدين : ورغم إنه متعين رئيس مجلس اداره . يعنى يشوف التوزيع .الاعلانات .المطابع . الورق .الشركات بتاع المؤسسه . يعنى الإداريات . تلاقى جزء كبير من وقته رايح للمقالات . مقالين فى الجورنال فى الأسبوع كل واحد نص صفحه . ومقال فى الأهرام المسائى برضه كل أسبوع .
ومقال فى جريدة الشرق الأوسط إللى بتطلع من لندن . دا غير مجلة الأهرام الاقتصادى . وبيعمل برنامج فى التلفزيون . وعضو بمجلس الشورى . وعضو لجنة السياسات . دا غير المجالس التانيه إللى هو عضو فيها زى المجلس المصرى للشؤن الخارجيه وغيرها . يعنى الحاجات دى لوحدها عايزه تفرغ تام .
* * حسنين : بس أنا سمعت إنه ما عندوش خبره فى الإداره . يعنى مثلا مفروض يكون عنده خبره فى المحاسبه فى المراجعه فى التكاليف . دا إحنا نسمع إنه أيام الاشتراكيه كان إللى ماسك الإداره فى الأهرام واحد اسمه سيد أبو النجا بتاع إداره .
نيجى فى عصر التخصص والعولمه . نمَسِك مؤسسه فيها 14 ألف واحد لشخص معندوش خبره فى الإداره .
= = = محمدين : وهو يعنى لوحده . ما كل المؤسسات الصحفيه ماسكِنْها صحفيين . ما يعرفوش حاجه عن الإداره ولا حتى حد عطاهم دوره تدريبيه . شوف كدا دار التحرير ولا روزا اليوسف ولا دار الهلال ولا دار المعارف . وعلشان تكْمَل آهم جابو صحفى يمسك إدارة أخبار اليوم . المهم الولاء دا عندهم أهم من الخبره .
علشان كدا الناس دى شايفه شغلها . مثلا أهم حاجه فى أخبار تونس هى الفوضى والنهب والسلب . يعنى خلوا بالكوا آدى نتيجة إللى حصل . وطبعا هما موش بيدافعوا عن النظام . دول بيدافعوا عن مصالحهم . لأن أى تغيير معناه المحاسبه ليهم .
* * حسنين : طيب سيبنا من الجماعه دول وخلينا فى الموضوع الأصلى . هو صحيح الأحوال فى مصر مختلفه عن الأوضاع فى تونس . وزى ما قال وزير الخارجيه . إن تكرار إللى حصل هناك عندنا دا كلام فارغ .
= = = محمدين : لو كان كلام فارغ ما كناش شُفنا الإرتباك إللى حصل ليهم . دا أحمد عز كان بيجهز لرفع أسعار بعض المنتجات البتروليه . يا دوبك الراجل هرب يوم الجمعه بالليل . كله بعدها عمل للخلف دّور . والنغمه إتغيرت 360 درجه .
إسأل أى واحد عنده شوية فهم . قل له إيه الفرق بين طريقة حكم رئيس تونس وطريقة رئيس مصر ؟ . طب الثانى مشى بعد 23 سنه . إحنا عدينا الثلاتين سنه ولسه يا عالم. فى دستور تونس حد أقصى لسن الرئيس 75 سنه إحنا معندناش حد أقصى .
* * حسنين : بس بيقولوا إن مراته إى اللى وقعته وإنها كانت بتدخل فى تعيين الوزراء . وإن إخواتها كانوا فارضين إتاوة على الشركات ومتحكمين فى البنوك والتعليم الخاص والطيران واستيراد العربيات .
= = = محمدين : صح النوم يا حبيبى . إنت موش من البلد دى ولا إيه ؟ عارف المثل إللى بيقول لا تعايرنى ولا أعايرك الهم طايلنى وطايلك .
* * حسنين : بس وزير التجاره بتاعنا بيقول إن إحنا عندنا الدعم . ودا بيخلى الناس بعيده عن التأثر بالأسعار العالميه . دا حتى كمان قال إحنا ها نزود الدعم 7 مليار .
= = = محمدين : إنت ناسى إن السلع إللى على البطاقه التموينيه يا دوبك زيت وسكر ورز وشاى . مين قال إن الكميات إللى الناس بتاخدها على البطاقه بتكفيها حتى أسبوعين من الشهر . يعنى الناس بتشترى معظم إحتياجاتها من السوق بالأسعار العاديه .
أما حكاية إنهم ها يزودوا الدعم . فهما مضطرين لأنهم كانوا عاملين حسابهم فى الموازنه . إن متوسط سعر طن القمح ها يكون 200 دولار فى السنه الماليه إللى إحنا فيها . سعر القمح وصل 316 فى آخر ديسمبر إللى فات .
وكانوا عاملين حسابهم على 238 دولار لطن الدره سعر الطن وصل 262 دولار . وكانوا عاملين حسابهم إن سعر برميل البترول ها يكون 84 دولار السعر وصل 5ر93 دولار . فاهُما لازم يزودوا قيمة الدعم علشان نفس الكميات إللى بتتوزع على البطاقه .
وخلى بالك كل إللى بنعمله مُسكنات . يعنى تقول دعم . خفض جمارك على الغِذا . مجمعات استهلاكيه . السكه الوحيده إللى تخلى الأسعار تستقر زيادة الانتاج . ودى سكه لسه ما بتدناش فيها .
وبعدين مظاهرات تونس كانت علشان البطاله موش علشان تمن الأكل . وأظن يعنى حالة البطاله عندنا موش عايزه كلام .
* * حسنين : بس بيقولوا أحوالنا أحسن من أحوال تونس .
= = = محمدين : بص زى ما عندنا وزير إسمه عثمان متخصص إنه يطلع بيانات متفبركه عن معدل النمو . وعن تراجع البطاله . وعن تراجع معدلات الفقر عندنا . برضه فى تونس كان عندهم عثمان تانى بس إسمه النورى الجوينى .
برضه كان عامل معدل بطاله لطيف هناك خلاه 13 % ومعدل فقر أقل من 4 % ومعدل تضخم 5ر3 % السنه إللى فاتت .
وزى ما قلنا قبل كذا إن المؤسسات الدوليه بتاخد المؤشرات الإقتصاديه من الدول وتحطها فى تقاريرها زى ماهى . علشان كده سمتها المعجزة الاقتصاديه التونسيه .
* * حسنين : يعنى الخلاصه إحنا شبههم ولا مختلفين عنهم ؟
= = = محمدين : شوف على بلاطه فى السياسه تقدر تقول نسخه واحده . بس النسخه بتاعنا غامقه شويه عن نسختهم . يعنى : انتخابات مزوره . بصره . . حزب حاكم مالوش شريك . صورة طبق الأصل . . وخد من دا : أحزاب كرتونيه . برلمان صورى . فساد . قمع . إعتقالات . رجال أعمال بيجمعوا بين السلطة والثروه . شبهات فى الخصخصة .
تصور إننا حتى فى الإقتصاد برضه زى بعض . مثلا عندهم عجز تجارى من سنين . يعنى الصادرات أقل من الواردات إحنا زيهم بالضبط .. عندهم عجز فى الموازنه من سنين .نفس الحال عندنا . .
عندهم إهتمام بالمناطق إللى على الساحل وإهمال للمناطق فى الغرب وفى الجنوب . زي أحوال الصعيد عندنا .. نسبة البطاله العاليه . العجز التجارى الغذائى . هجرة الكفاءات . والشباب إللى بيغرقوا فى البحر وهما عايزين يهاجروا لأوربا . الديون الخارجيه العاليه . كله بصره .
لكن للأمانه مستواهم فى السكن أحسن مننا . تصور إن 80 % منهم ساكنين فى بيوت ملك موش حتى شقق . نسبة التعليم أحسن . الأميه أقل . المستوى الصحى أفضل . المرافق . حتى بيسموها تونس الخضرا .
* * حسنين ) بصوت هامس ) يعنى ممكن تقوم عندنا مظاهرات زَيهُم ؟
= = = محمدين : العلم عند الله . لكن خليك فاكر . مين قبل يوم 17 ديسمبر إللى فات كان يصدق إن اللى حصل فى تونس ممكن يحصل ولا حتى بنسبة واحد فى الألف .
mamdouhec@maktoob.com