يقال ..أن النجاح سهل ،لكن الاستمرار فيه هو.. الصعب كله. وعادل إمام .. يقترب عمره الفني من 50 عاماًًً نصف قرن .. تنقل فيها من دور لآخر ،كان يصعد بهدوء شديد إلي القمة ، وبهدوء أشد إحتفظ بها علي مدي 30 عاماًًً، زعيماً .. حوله الاضواء، وفي يده النجاح، وخلفه جماهير عريضه تحبه وتنتظره دائما لتصفق له . تري من آخر شخص سأل عادل إمام ..»فين بطاقتك«؟ منذ متي حدث ذلك علي وجه الدقة ؟ الثانية عشرة..منتصف الليل ..المنصورية ،فيللا "آل إمام " والسؤال الموجه للزعيم هو.."بطاقتك"؟ أو بالأدق آخر مرة سمع فيها هذه الكلمة؟ يبتسم : والله ماأنا فاكر ،كل اللي فاكره انه كان مكتوب في بطاقتي الشخصيه "طالب" بكلية الزراعة جامعة القاهرة .. وبعدين كنت بأطلع شهادات ميلاد لولادي كنت أكتب المهنه "مهندس زراعي " قلت لنفسي الله ..بس أنا ما بشتغلش مهندس زراعي ، أنا باشتغل ممثل ،دي المهنه اللي أنا بربي ولادي منها ،فقررت أغير المهنه . وغيرتها ؟ غيرت المهنة خليتها ممثل لما جبت محمد ،أنما في بيانات الأب بتاعه شهاده ميلاد رامي مكتوب "مهندس زراعي ". محدش سألك فين بطاقتك قبل كده ؟ يضحك: لا مابتحصلش ،الناس لما بتشوفني بالاقي سعاده في وشها ، ولما بكون ماشي بعربيتي ناس كتير تيجي جنبي عشان تقوللي "احنا بنحبك يا أستاذ عادل" . فاكر أول عربيه اشترتها ؟ آه طبعا ،عربيه هيلمان موديل 49 معدل 50 . اشترتها بكام ؟ ب150 جنيه ،كنت باعمل وقتها فيلم مراتي مدير عام ، وغلبت من ركوب التاكسي لأن كان زمان فيه أزمه ، متلاقيش تاكسي بسهولة ،ولما كنت أركب أتوبيس ،الناس عشان عرفاني .. كانت تقعد تتريق عليا . أول شقه اشترتها في حياتك؟ أول شقة اشترتها كانت في العمرانية ،بالتحديد علي ترعة العمرانية، إشترتها لإخواتي وبعدين لما شفت هالة ،وهي كانت جارة سمير خفاجي، واتجوزتني"يضحك" ..خدت شقة في شارع النخيل في المهندسين ، اتجوزنا فيها ،وبعدين إديت الشقة دي لرامي، وأنا نقلت في شارع سليمان أباظة ، وبعدها علي المنصورية ،وكله بالراحة ..وخطوة خطوة ، وبالتقسيط ، خلي بالك ..أنا حدوتة صعود بالراحة وعلي مهلي من الحلمية للمنصورية . وأول مره تغير فيها العربية؟ بعد ما اتجوزت ،اشتريت عربية"رمسيس" بالقسط كان قسطها 14 جنيه في الشهر ،وكنا فرحانين بيها فرحة لا تتخيلها . وأول سفرية ليك خارج مصر ؟ كانت شغل ، رحت لبنان ، بلد جميلة. كنت بتحلم بالشقة والعربية والعروسة والسفر ولاّّّ كنت سايب المسألة كده .. زي ما تيجي ؟ كنت باحلم طبعا ، كان نفسي اتجوز وكان نفسي يبقي عندي شقة ويبقي معايا عربية وربنا كرمني ، لازم تحلم ،ومن حقك انك تحلم وتجري ورا حلمك . فاكر أول مرة حد عرفك فيها انك ممثل ؟ وعمري ما هانساها كنت وقتها باعمل مسرحية "أنا وهو وهي" دور دسوقي أفندي، وبعدين كنت راكب الأتوبيس ورايح جامعة القاهرة، قلت أروح أقعد في كافيتريا كلية الحقوق، وأنا في الاتوبيس بقي لقيت واحد ..بيقول : دسوقي اهووه .."عادل إمام" كانت أول مرة أسمع اسمي من حد ما أعرفوش ، لأنهم ماكنوش يكتبوا اسمي في المسرحية ، كانوا يكتبوا ..فؤاد المهندس ، شويكار ومتهيألي نظيم شعراوي ، وبعد كده بالاشتراك مع نجوم مسرح التليفزيون . فرحت لما الراجل قال عادل إمام؟ فرحت، أنا حسيت أن فيه حاجات سخنة طالعة من كل حتة في جسمي، كأني واخد حقنة كالسيوم، وبعدها عملت نفسي مش واخد بالي..لحد بقي ما الايام تمر وألاقي الناس شايلاني بالعربية بتاعتي في سوريا . إزاي دخلت مسرح التليفزيون ؟ قدمت صدفة ،لقيت صلاح السعدني وواحد اسمه سمير الطحاوي معاهم ورق ورايحين يقدموا ،قابلتهم ..قولتلهم :طب ما قولتوليش ليه ، قالولي انت مش مهتم ،الله مش مهتم إزاي مع اني رئيس فريق التمثيل في الكلية.المهم صلاح السعدني طلعلي ورقة كده معفنة ، ورحت جايب صورة ليا من بتوع ثانوي ،كان شكلي فيها عامل زي الكتكوت الغرقان، لزقتها وقدمت ،وبعتولي امتحنت ،وبعدها بفترة لقيت الدكتور حسن عبد الحميد الله يرحمه ،قاللي مبروك ..قبلوك . فاكر المشهد اللي دخلت بيه الامتحان؟ كان مشهد تراجيديا ، وكانت لجنة التحكيم، عبدالمنعم مدبولي، ومحمود السباعي والسيد بدير ومحمد توفيق وحمدي غيث وأمين حماد اللي كان وقتها رئيس الإذاعة وكنت باعمل دور "ديب" من رواية "ثورة الموتي " والرواية عبارة عن جنود بعد ما ماتوا مش عايزين يدفنوا وكل واحد بيحكي ليه مش عايز يموت، رواية تدعو للسلام ،وأنا فاكر حتي كان معانا زميل أسود ،جبتله من الكلية زميلة لونها أسود علشان تعمل دور مراته، وعملت أنا دور "ديب" محمد توفيق قاللي :أنزل يا عادل ..قول ديب تاني، رحت عاملة تاني، قاللي انت كويس ،عارف يعني أيه كويس .يعني معناها انت نجحت في الامتحان ،السباعي بقي قاللي خد بالك من القاف ، قولتله مالها القاف ، قاللي بقولك خد بالك ، قولتله آه طبعا ...طبعا . ودخلت مسرح التليفزيون؟ بعتولي أعمل عقد الاتفاق، رحت في أوضه كدة قابلت واحد اسمه حاجه وجدي، اللي اتسمي أنور وجدي علي اسمه ،كان ريجيسير كبير ،قاللي العقد أهوه حتاخد مرتب 20 جنيه في الشهر ،ماكنش معايا ولا مليم ، قولتله لأماينفعش ،قاللي طيب بلاش ، قولتله بلاش أيه ..مفيش فصال عندكم، 20 جنيه كويسين برضه ،ومضيت العقد وانا لسه طالب في الجامعة الكلام ده كان سنة 1963قبضت أول شهر وبعد كده رفدوني! رفدوك... ليه ؟ لعدم استكمال مسوغات التعيين ،كانوا عايزين شهادة الجيش ، قولتلهم أنا طالب لسة في الجامعة ،أجيب شهادة الجيش إزاي .. فرفدوني ،وقفت تحت شوية لقيت فايزة عبد السلام كانت مديرة مسرح ،بيعملوا رواية "أنا وهو وهي " قالتلي ..فيه دور في المسرحية ،عايزين ممثل يعمل سكرتير ،قولتلها ..يالابينا ، رحت المسرح أنا معرفش فؤاد المهندس شخصياً ،لكن لقيته بيستقبلني كأنه يعرفني من 30 سنة ،و"عدول وبتاع ،أتاريه عارفني من الجامعة ،لأني كل سنة كنت باخد الكاس علي مستوي الجامعة وأحسن ممثل وأحسن فريق تمثيل ،وكان أيامها بنتعافي من دفع المصروفات ،كانت 24 جنيه ،كان اللي يشيل حربة في فريق التمثيل ما يدفعش مصروفات شفت تشجيع الفن اللي بجد . وعملت دسوقي أفندي و..بلد شهادات بصحيح؟ عبد المنعم مدبولي قاللي روح المخزن شوفلك بدلة علشان الدور، رحت .. جبت بدلة متبهدلة وجبت قميص قطعت أكمامه وطربوش ،وجزمة معفنة ،والألاطة اللي في الدنيا بقي، المهم.. أول فصل في المسرحية كان شغال وطبعا فؤاد المهندس ..كوميديان زي الفل ،وشويكار بنت زي القشطة كسّّروا الدنيا في الفصل الأول ،دخلت الفصل التاني وفي دماغي حاجة واحده بس أن أنا بطل الرواية دي ،ماليش دعوة الدور صغير بس أنا برضه البطل ،دخلت المسرح ،الناس كانت يادوب بتقعد علي الكراسي بعد الاستراحة، ومسكت التليفون ،ولسه باقول ألووو، لقيت الناس بدأت تضحك ..سحت بقي مع الناس وانا خارج تصفيق رهيب، وكان الدور الركيزة اللي الناس عرفتني منه. أنت البطل ؟ أنا البطل ماليش دعوة، انشاله حتي أعمل كلمتين ..أنا البطل. نقدر نقول ان مسرحية انا وهو وهي كانت البداية الحقيقية اللي عرفت الناس بيك؟ طبعا وانا فاكر مرة رحت مع فؤاد المهندس لمصر للطيران، كان رايح يتوسط لمراته في شغل هناك تقريبا رحنا الشركة في شارع عدلي ،ولقيت واحد كده مدير في الشركة، بيقوللي: يا أستاذ عادل انت أحلي حاجة في "اناوهو وهي" وأنا واقف جنب فؤاد المهندس.. لما سألوا بقي فؤاد المهندس بعدها ..كنت تتوقع لعادل امام النجاح ده، قالهم.. آه طبعا دا ابني البكري. وبعد »أنا وهو وهي« بدأت تروح لسكة الكوميديا؟ عملت أفلام كتير أدوار صغيرة من سنة 64 لحد أوائل السبعينات ،وكان في الفترة دي ثلاث لصوص، أجازة بالعافية، مراتي مدير عام ،7أيام في الجنة، لصوص لكن ظرفاء، نص ساعة جواز. وأول بطولة ليك ؟ كانت مع نيازي مصطفي ، بطولة مشتركة مع ميرفت أمين وسمير صبري فيلم »البحث عن فضيحة« وأفتكر وقتها كنت باعمل مسرحية .."قصة الحي الغربي" ولقيت نيازي مصطفي واقف بالبايب بتاعة ،قاللي الفيلم ناجح ياعبقري ، الفيلم مكسر الدنيا في السينمات ، وبعده جت أفلام تانية "شياطين إلي الأبد" "البحث عن المتاعب" و"رجب فوق صفيح ساخن" ،وأفتكر ان وقت نزول "رجب" كان المنتجين بتوع السينما عايزين ينزلوا افلام كبار النجوم ،زي محمود ياسين وقتها وقالولك بقي مش مشكلة ننزل ب" رجب" ياخد الأسبوع بتاعه وبعد كده ننزل بأفلامنا ، نزل رجب ياأستاذ قعد 43 أسبوع ، كان مكسر الدنيا، والفيلم كان بداية سلسلة أفلام من النوعية دي ،وأنا وقتها كنت شفت فيلم اسمه midnight cawboy كان بتاع أبو انجلينا جولي ، قلت لماهر عبد الحميد أنا عايز أعمل قصة لواحد جاي من الريف لأول مرة وعملنا رجب. وشعبان تحت الصفر بعد كده؟ آه ، إصطادني وقتها سمير عبد العظيم ،واتكلمنا علي تيمة الفلوس ،وعملنا »شعبان تحت الصفر« وبعدها عملت »رمضان فوق بركان« و »المتسول« و«عنتر شايل سيفه« ،أنا مسمي الأفلام دي بقي .. أفلام الفلاحين ..وكسّّرت الدنيا.. ومن الأفلام اللي انا بحبها برضه فيلم »أذكياء لكن أغبياء«،اللي عملت فيه دور واحدة ست بس اتكلمت بصوت راجل في الفيلم ده دور ست وإتكلمت راجل ،ماهو صعيدي مش فاهم ..»نضحك جميعا« وجت النقلة في تاريخك الفني من الكوميديا الي التراجيديا مع فيلم »المشبوه «؟ أهو المشبوه ده كان وقتها تقريبا معروض علي نور الشريف مارديش يعمله ،جابوهولي، وافقت عليه ،وكان سمير سيف مقلق مني ،لحد ماشاف ليّّ صورة منشورة في مجلة ،كان واخدهالي عادل مبارز ،المهم بعد التصوير بأسبوعين ،قاللي أنا كنت متشائم جدا ًً لما قالولي عادل إمام ،لكن دلوقتي أنا بقولك كنت هازعل جداًَََ لو حد غيرك عمل الدور ده . كان فيه نقلات تانية ؟ أحلام الفتي الطائر .. مافيهوش كوميديا ورغم انه كان 14 حلقة بس، بس عمل شغل جامد، وأفتكر ان مشهد الموت اللي هو بالمطواة ،كان صعب جدا ًًًً، لأن الواحد مامتش قبل كده، عملت المشهد ده، والحلقة اتذاعت، لقيت ممدوح عباس بيكلمني ،قاللي ..يلعن أبوك ،العيال مموتين نفسهم من العياط. وعملت في التليفزيون برضه "دموع في عيون وقحة " ؟ ماكنش برضه 30 حلقة كان 22 حلقة بس ونجح نجاح مذهل. مش هاترجع تاني للتليفزيون ؟ بفكر اليومين دول أعمل فرقة ناجي عطاالله مسلسل بس لسة ماقررتش. نرجع لتاريخك الفني تاني ،حضرتك عملت 5 أفلام مع شريف عرفه ووحيد حامد ،ليه انتهي التعاون عند الخماسيه دي ،رغم أننا كنا متوقعين الاستمرار ؟ ماجمعناش موضوع تاني وبعدين 5 أفلام كويس أوي . ليه رفضت تشتغل مع الراحل يوسف شاهين ؟ جابلي مرة فيلم »حدوتة مصرية« وسألني أنت صحيح ما بتشتغلش غير 8 ساعات قولتله آه ،ولو عندي مسرح ما بعملش حاجة جنبه ووافق علي كل الشروط بس لما قريت السيناريو ماعجبنيش . ليه ؟ وأنا بقرأ أي سيناريو بابقي قاعد علي كرسي في صالة عرض يعني باتخيل الناس هتشوفني ازاي ،إحساسهم بالفيلم ، وزي ما بحب أعمل فيلم حلو ،بحب كمان أنه يكون جماهيري . رفضت أفلام تانية؟ رفضت أفلام كتير ،وأنا في بداياتي ،كان عندي قوة الرفض، أني أقول »لأ« ده مش عاجبني حتي لو هاتجيبلي فلوس وفيه ناس بتعتبر أن الفلوس دي رزق، بس أنا بقول إن الرزق الحقيقي يجي من موضوع أنا مقتنع بيه كويس. حتي لو ماكنش معاك فلوس؟ حتي وأنا مش معايا فلوس، أنا قعدت سنتين مش معايا فلوس، بالمناسبة بس كنت ألبس كويس. أمتي السنتين دول ؟ بعد ما عملت مراتي مدير عام ،محدش وقتها قاللي تعالي اشتغل حتي إذاعة، وأنا ماكنش ليّّّ في منتديات المخرجين، وماكنش معايا ولا مليم وقتها وكنت مسئول عن أسرة . مره واحد بعتلي اسمه زهير بكير مخرج ،قاللي بص بقي عايزين نعمل شويه شغل مع بعضينا ،وماكنش عندي شغل قولتله لأ ..عندي شغل تاني لأني ما أقتنعتش. ومرة تانية جالي حلمي رفلة ، كنت في اسكندرية ،جابلي سيناريو ،قولتله ..طب سيبني أسبوع ،أصل بحب أقرأ السيناريو كويس براحتي وأدرس الشخصية كويس ، قاللي لأ أنا هستني تحت علي القهوة ، قولتله طيب ..تعالي بكرة ،خدت السيناريو ،سهرت عليه ،وجاني تاني يوم قولتله ..آسف مش هاقدر أعمل الدورده ، كان وقتها طالع جديد محمد صبحي ، طب ما أنت لو رفضت ،أنا هاجيب محمد صبحي، كان بيهددني قولتله أنا ليا رأي تاني .. هات نجيب الريحاني. عملت كام فيلم ؟ تقريبا 120 فيلم. كان فيه أفلام منهم كتير لم توفق؟ أنا الحمد لله ،مفيش فيلم لي وقع ، فيه أفلام كتير عملتها الأول، كانت بتقعد في السينما 4 أسابيع، وكان ده بقي فيلم ناجح لأن السينما وقتها كانت كلها كده، لكن لما ابتديت أحط هموم الوطن جوايا، حصلت نجاحات أكبر وابتديت أركز كمان في الأدوار الانسانية زي مثلا فيلم »عريس من جهه امنية« أنا مرة قابلت احد السفراء في برلين ،قاللي انا حاطط الفيلم ده في أوضة النوم عندي، أنا معنديش غير بنت واحدة ومش متصور واحد ابن كلب يجي ياخدها مني. عادل إمام أكتر نجم من أبناء جيله مستمر وفيه مساحة كبيرة بينك وبينهم ، مشكلتهم فين؟ جيلي موجود ، وكلهم بيشتغلوا وناجحين .محمود عبد العزيز ، محمود ياسين بيشتغلوا وكلهم زي الفل . طيب ..ازاي عادل إمام بينجح وبيستمر في النجاح ؟ المسألة، مسألة إدارة ،إزاي تدير نفسك . وإنت إزاي بتدير نفسك ؟ المسألة دي أصلها مش بالكراسة ، المسألة دي مسألة إحساس في أوقات كتير، الناس توقعت سقوطك ؟ طول الوقت كده ،وكل ما يطلع حد جديد يقولك هيضيع عادل إمام أشمعني عادل إمام ماتعرفش ،مايضيعش أحمد بدير ليه ؟.. متعرفش ،أول ما طلع محمد صبحي ..قالك ده اللي هيدغدغ عادل إمام وبعد كده طلع هنيدي ..قالك ده اللي هيكسر عادل إمام ،هو مفيش غيري ولا أيه . بتتضايق من المقارنة ؟ شوف أنا عمري ما بصيت حواليا ،أنا بشتغل وماليش دعوة بحد وعمري ماحسدت حد أنا مرة كنت ماشي مع حد صاحبي علي كوبري قصر النيل ،ماشيين من ميدان التحرير لغاية الجيزة ،مفيش فلوس في جيبنا وفي الطريق لقينا عربية فخمة وفيها واحد لابس بدله جميلة ومعاه واحدة حلوة ومزيكا طالعة من العربية ، كنت باتفرج علي الحالة الجميلة دي وفجأه لقيت صاحبي بيقوللي ..بغل كده ،شفت ولاد ال.... صاحبي ده دخل السجن واتمرمط مرمطة ،وانتهي نهايه وحشة . عايز تقول أيه ؟ عايز أقول ان عمري ما حملت كراهية لحد ،أنا قلبي مليان حب، وبص بقي مفيش واحد قلبه اسود يعرف يضحك أو يضّّّّحك حد ،أنا دايما بوصي ولادي وأقولهم حبوا بعض ، وأوعوا لما أموت حد يتخانق مع أخوه . بس انت ليك أعداء كتير ؟ زي مين ؟. زي مثلا خيرية البشلاوي اللي رفضت تتكرم معاها ؟ شوف السيدة خيرية البشلاوي قبل ما تدخل الحمام الصبح ، تشتم عادل إمام مفيش مره فيلم ليَّ عاجبها حتي من باب الغلط قالولي وقتها ..أنت هتتكرم مع يسرا وسمير سيف ،قلت كويس سافرت فرنسا ،جيت لقيت مضاف للمكرمين اسم خيرية البشلاوي ،قولتلهم ..كرموها بس أنا وهي »لأ« مانركبش علي بعض ،رفضت الحقيقة ،وبعدين جاتلي حاله من التطهر في رمضان اللي فات، رحت مكلم السيدة خيرية البشلاوي، وقولتلها أنا أسف ،انتي قيمة كبيرة ،وأنا أسف إني رفضت أتكرم معاكي ،فرحت أوي وإنبسطت ،بس بيتهيألي أنها هتشتمني تاني . أيه اللي خلاك تعتذر لها ؟ أنا ساعات بتجيلي حالة كده ،أسأل نفسي ..هو أنا اللي عملته صح ولا غلط ؟ فبقول ...ماتطهّّّر نفسك وقلبك .علشان تتخلص من الهاجس اللي جواك . عملت كده مع حد تاني غير خيرية البشلاوي ؟ عملت كده مع حد تاني بدون أسماء ،بس برضه بيشتمني، بس أنا ببقي خلّّّصت اللي جوايا وطهرت نفسي . حسيت قبل كده انك مظلوم في موضوع الجوايز ؟ حسيت بكده ،لكن طالما يبقي ليك إيد في انك تاخد جايزه ،يبقي الاكرم ليك ان ما تاخدهاش ،لأنك طلبتها يبقي مالهاش لازمة وبعدين مش مهم الجايزة ، المهم مين اللي هيديك الجايزة ،أنا عندي ميداليات من جمعيات بسيطة جداًًً ، بس فرحان بيها جدا لأنها حقيقية ، وعندي ميداليات محتفظ بيها من كلية الزراعة وعندي أوسمة من ملوك ورؤساء. عادل إمام بيشتغل كام ساعة؟ باشتغل في البرد وفي الحر ،باشتغل كتير وشغلنا متعب جدا ، فلازم تحبه ، لو كل بني آدم حب شغله هينجح فيه . طب بتنام كام ساعة ؟ بص أنا أتعودت اصحي بدري ،ومؤخرا بأصحي الصبح أفطر وأنام ساعتين تلاتة وبالليل بانام متأخر . بتشارك في حفلات إجتماعية ..بتحب السهر ؟ من زمان وأنا راجل بيتي، ما تلاقينيش سهران مش عارف فين، وبارقص مش عارف مع مين ،بحب أقعد في بيتي مع أسرتي ،والناس كمان بتعتبرني قدوة ،فلازم أحافظ علي المسأله دي . عادل إمام بيسمع مين من مطربي الجيل الموجود حاليا ؟ باسمع محمد منير وإيهاب توفيق بيغني كويس ،وفي عربيتي دايما مشغل إذاعة الأغاني وبالاقي أغاني هايلة ..شهرزاد، وسعاد محمد ..أيه الجمال ده ،إزاي الناس دي ناسينهم كده. مين بيضحك عادل إمام ؟ العيال اللي بيعملوا ستاند أب كوميدي اللي كل واحد منهم بيطلع لوحده وبيقول شوية اللي بيجوا علي موجة كوميدي ،والعيال بتوع "قهوة سادة " فكرهم عالي وبدون قلة أدب . ومن نجوم السينما ؟ بيعجبني محمد سعد ،الناس كلها بتشتمه ومش عارف ليه ، لكن أنا شايف إنه جديد في الكوميديا ،يعني اسماعيل يس في الكوميديا خايف ، لكن محمد سعد أول مرة أشوف واحد كدة داخل بصدره ،واحد بلطجي في الكوميديا . فيه ممثلين كتير بتبقي بداياتهم معاك وبعدين بيبقوا نجوم بتضايق من المسألة دي ؟ بالعكس ببقي حريص أني أطّّّلع ناس جديدة معايا ،وأنا بتفرج علي التليفزيون كويس ولما بلاقي حد كويس ملائم للدور ، بسأل عليه ،يعني كنت بتفرج علي الست كوم بتاع »تامر وشوقية« فعجبني مكي وأنا بختار أدوار مرجان كان في دماغي الدور بتاعة وطلبته لقيته جايلي تاني يوم من غير باروكة قولتله انت مين ؟ قاللي انا احمد مكي قولتله لا تعالي بالباروكه علشان أعرفك ،وعمل دبور ..وعمل دور كويس وبعدها بقي بطل ،ومش بس ممثلين علي فكرة فيه كمان مطربين . مطربين زي مين ؟ زي أمال ماهر ،جه مرة أشرف زكي ،قاللي فيه بنت بتغني في شادر في السيدة زينب زي أم كلثوم، صوتها جميل جدا ، كان عيد ميلاد سمير خفاجي ، قولتله هاتها ، البنت غنت ..كلنا بقينا في حاله نشوة ،وابتدت من هنا ، كان فيه مخرجين في الحفلة ومؤلفين وملحنين وعمار الشريعي ،وشقت طريقها . عادل إمام أهلاوي ولا زملكاوي ؟ أصلا أنا أهلاوي بس مؤخرا قررت أشجع الزمالك علشان إجتهاد حسام حسن وأنا بحب المجتهدين، ومن ساعة ما جه والزمالك بينافس علي الدوري بعد ما كان في ديل القائمة بينافس علي البطولة. زي انت مادخلت »أنا وهو وهي« وفي دماغك ان انت البطل؟ حسام حسن قاللي يا استاذ عادل أنت القدوة بتاعتنا. صحيح أيه حكاية التمثالين اللي عندك في المكتب ..المهاتما غاندي وشارلي شابلن ؟ ياسلام علي حجم الاتنين دول اللي أثروا في الانسانية تأثير كبير جدا، غاندي بدأ من جنوب افريقيا لغاية ما راح الهند. وطرد الانجليز من غير رصاصة واحدة قال للهنود محدش يشتري الصوف الانجليزي، مصانع »الشابدل« بتاعة النسيج في لندن قفلت لما راح زار المصانع دي هناك ،استقبلوه العمال استقبال الابطال، وقابل هناك شارلي شابلن وشابلن تأثيره الانساني خلال السينما كان كبير جدا ،لأنه كان دايما في صف البسطاء، وقصة حياته مليانة عذاب يعني أمه اتجننت وهو نجح نجاح مذهل وأنا بفرح بالنجاح . مساحة صمت ثم يواصل الزعيم: التطرف قتل غاندي وهو كان عارف انه حيموت كده ،وكان معاه محمد علي جناح كان من ضمن تلامذته هو ونهرو وجناح لما كان عايز ينفصل قاله غاندي تعالي خد الرياسة والزعامة خد الوزارة انا مش عايز حاجة بس بلاش الانفصال. غاندي كان زاهد إلي أقصي درجة وكان لما بيضرب عن الطعام ..كانوا بيخافوا عليه ليموت أنا فيه مشهد اتعمل في الفيلم بتاعه ،لما دخل غاندي احدي المحاكمات راح القاضي واقف، وقال ..أقف احتراما لهذا الرجل . عندك تماثيل لأشخاص تانية غير غاندي وشابلن ؟ عندي تمثالين أهداهم لي المفوض السامي للأمم المتحدة لشئون اللاجئين ،منهم تمثال اسمه "اللاجيء العالمي " تحس انه فيه كل الاشكال والاجناس بتاعة العالم . ايه اللي أضافوه لك منصب سفير النوايا الحسنة؟ في الاول كنت فاكر أن المسألة شرفية لكن لما دخلت في الموضوع أتعرفت علي حاجات كتير وعلي ناس أكتر. ناس زي مين ؟ ناس كتير وكنت كل ما أروح أحضر إجتماع ،أخد حد من ولادي معايا ومرة لقيت واحد كده شعره أصفر وأخضر وأحمر وشكله ياباني ، قلت لرامي ..مين ده ؟ قاللي يانهار اسود .. ده سوكو ماكاكاكا... »يضحك« وقابلت »السير بيتر« و»مايكل دوجلاس« وملكات جمال العالم والفوركاتس بتوع انجلترا ومحمد علي كلاي، اللي لما قابلته.. قولتله.. أنا عادل إمام من مصر، وهو عنده شلل رعاش، قام واخدني في حضنه ومطبطب عليا، وانجلينا جولي، وهي صديقتي وطلعت قبل كده في قناةfox واتكلمت عليا كويس وبعتلها تلغراف لما أمها ماتت. أصحاب بقي وميسدات وكده؟ »يضحك«. مش هتكتب مذكراتك ؟ مش متحمس للموضوع ده ،وقولت قبل كده اني لو هاعملها يبقي يكتبها رجاء النقاش الله يرحمه، لأني كنت قريتله كتاب عن نجيب محفوظ، حسيت ان نجيب محفوظ هو اللي بيتكلم. انت بتحب نجيب محفوظ؟ جدا أنا من عشاقه ،ولما ضربوه بكيت ..ورحت المستشفي، كان فيه ناس كتير راحت تتصّّّور معاه، أنا رحت وحدي بالراحة كده ،لقيته مسك ايدي وطبطب علياّّّ. فكرت تسجل قصة حياتك ..كفيلم وثائقي؟ فكرت في المسألة دي، بدل اللي بيعملوه دلوقتي، زي اللي حصل في عبد الحليم وسعاد حسني جابوا مدحت صالح، مع احترامي لمدحت، عملوه عبد الحليم مينفعش، نجوم مصر مضيئة في العالم العربي كله، لازم لما نيجي نعمل حاجة عن الناس دي نراعي قدرهم ومكانتهم ،مايعملوا عنهم برامج وثائقية يسجلوا مع الناس اللي عاشوا معاهم، لكن دراما وتدخل في حاجات شخصية.. الموضوع صعب. وهل رأيك ده ينطبق علي الفنانين فقط ولاّّّّ بيشمل السياسيين برضه يعني ينطبق علي شخصيه زي الملك فاروق؟ وهو اللي اتعمل ده كان الملك فاروق دا دلوقتي بيتخانقوا علي الملكة "نازلي" اللي هي اصلا كانت مشكله فاروق، وأفعالها كانت أحد أسباب قيام الثورة ،لأنه كان محبوب في فترة عند الناس، ولعلمك الاسرة الخديوية عملت حاجات كتير كويسة لمصر، كفاية الخصخصة والجمال اللي حصل في عهدهم، وفاروق ماكنش بيحب الانجليز، بص يعملوا تاريخ .. لكن ما يجيبوش كلام من علي القهوة ،أنا خايف بعد ما أموت يجيبوا عيدعبد ربه يعمل عادل إمام. رامي عرض عليك انه يعمل عنك فيلم وثائقي وانت رفضت ؟ قاللي هاجيب كاميرا وكل يوم تقعد تتكلم شويه، قولتله لأ استني شوية. ليه ؟ ماليش نفس أعمل كده، مش عايز دلوقتي . عادل امام بيحلم بجائزة نوبل؟ ونفسي في الاوسكار كمان . شايف انك تستحق .. نوبل وأوسكار ؟ يكفي أني بسعد الناس ،بأموت الناس من الضحك في المسرح، علميا الضحك ده موضوع كبير ،فيه كتابين اتعملوا في مصر عن الضحك ،واحد للدكتور أحمد مستجير والتاني للدكتور عبد الهادي مصباح اللي قال فيه ..انتوا لازم تدوا وسام لعادل امام وتحافظوا عليه ،لأن الضحك يحمي من أمراض القلب والمعدة ويدعو المخ لافراز مادة تدعو للتسامح أنت مش ممكن وانت بتضحك وسعيد تطلق مراتك . وانت طول عمرك بتسعد الناس ..بتضحكهم ؟ وطول عمري مهموم ببلدي . الساعة تقترب من الثانية صباحاً، سرقنا الوقت والاسئلة لم تنته بعد ،علي العكس إنها تزيد مع كل إجابة للزعيم ولانها تزيد ولأن الإرهاق بدا يتسلل الي ملامح الزعيم .. كان لابد من الانتهاء. سؤال أخير .. تحب تضيف حاجة ؟ آه ، أحب أقول انكم تعبتوني جدا . »يضحك ونضحك معه«.. ونقف جميعا ليودعنا الزعيم ..مبتسما ،ونحن مازلنا نضحك ونتحدث عنه .
