رامى محمد زين يكتب: عم يا بتاع الوظايف

عم يا بتاع الوظايف شوفلى وظيفة
تكون عليها القيمة وتكون شريفة
تكون فلوسها كتيرة ومهامها خفيفة
وأكسب منها بالحلال
عم يا بتاع الوظايف شوفلى ف القطاع العام
وظيفة تكون على درجة تمام
تخلينى أفتح بيت ويكونلى مدام
وتتحسن الأحوال
عم يا بتاع الوظايف شوفلى ف الشركات الخاصة
وظيفة ف شركة ما تكونش لدمى ماصة
زى ما هديها تكون بيّا حاسة
وما تكونش مفترية
عم يا بتاع الوظايف كفاياك اهتمام بالحريم
كل ما أدور فى جرنان ألاقيهم هما اللى مطلوبين
وبصراحة الموضوع مضايقنى وقديم
يعنى من قلة الرجالة العواطلية
عم يا بتاع الوظايف ياريت بلاش اشتغالات
ف إعلانات الجرايد بخصوص المرتبات
بتقول بمرتب مجزى وأروح ألاقى فتات
ما تخلى إيدك سخية
عم يا بتاع الوظايف عايزك تقولى بصراحة
كل حاجة عن الوظيفة عشان تكون نفسيتى مرتاحة
وبلاش تستخدم معايا أسلوب النصاحة
وياريتك تحس بيّا