صباح الفل يا كبير

صباح الفل يا مواطن
صباح الفل سيدى الرئيس القادم الآن فقط يمكننى أن أقول سيدى الرئيس بفخر أصل إللى كان قبلك كان إيدك منه والأرض المهم يا ريس بلاش نجيب فى سيرة الناس منهم للقضاء وربنا ينتقم منهم.
بص بقى يا ريس أنا المواطن يعنى أنا إللى معينك فى المكان ده يعنى أكيد مش معينك علشان توقفنى فى الشارع بالساعات قال إيه تشريفة أصلى فى الآخر مش كان ده هدفى وإلا كنت خليت اللى قبلك وخلاص وأهو اللى نعرفه أحسن من اللى منعرفوش.
بص بقى يا ريس أنا عايز أطمن على أهلى ومستقبل عيالى أصلى من الآخر كده مش طماع بس على الأقل بقى عارف إن بكره أحسن.
والنبى يا ريس بدل ما بنصرف مليارات علشان الناس تتعالج بره طب منجيب العلاج هنا هو لازم الشحططة ووجع القلب.
آه وصحيح يا ريس بلاش المدام تطلع كل كام يوم تعملنا مشروع جديد أصلى بصراحة مش فاكر إنى انتخبتها معاك أنا يا عمى معرفش غيرك ومنتخبتش غيرك أنت بقى اتجوزتها تبقى حاجة بتعتك أنا مليش دعوة تطلع عين أمى ليه.
وصحيح يا ريس نفسى أسمعك كده وانت بتجلجل و بتقول إن قناة السويس بقت بالجنيه المصرى مش عارف ليه بس والله حتى ده لو كان هيخسر البلد فى الاقتصاد كفاية إنه حيحسسنى بقيمة بلدى أصل إحنا يا ريس بعيد عنك بقالنا سنين مش حاسين بقيمتنا، بقولك إيه يا ريس لو عايزنى أصدقك يبقى بالصلاة على النبى كده تمشى شوية العوالم اللى كانوا بيرقصوا لكل واحد شوية فى التليفزيون ويا جدع كفاية بقى كل يوم نشرة إنجازاتك وكلمتين بتوع حسب توجيهات السيد الرئيس أصل أكيد البلد فيها ناس تانية بردوا بتفكر وتعرف تاخد قرار وإن كنت ناسى أفكرك على رأى الست بس المرة دى حفكرك بميدان التحرير.
يا ريس أنا فى خدمة بلدى بس أنا مش فى خدمتك جايز أحبك وجايز لأ بس مضطر أتعاون معاك علشان بلدى يعنى من الآخر كده حد الله بينى وبينك غير حب الوطن يا حكومة. يا ريس هو ليه بيأخذوا منتجاتنا الزراعية ويصدروها وانا باكل البواقى هو أنا بنى آدم درجة تانية ليه أزرع وغيرى هو اللى ياكل.
وصحيح يا ريس أنا الفترة اللى فاتت عملت لنفسى كرامة بس محتاج منك إنك تساعدنى أحافظ عليها يعنى متسبنيش أتبهدل وأنا برة.
صحيح المثل بيقول من خرج من داره بس بردوا فى مثل تانى بيقول اللى جوزها يقولها ياعورة الناس تلعب بيها الكورة، ألا صحيح ليه الناس لما تجلنا بنعاملهم أحسن معاملة ولما نروح لهم بيعاملونا أنيل معاملة؟!
ياريس نفسى اكل رغيف عيش بلدى عارف يعنى إيه بلدى؟ يعنى مزروع فى أرض بلدى ومروى بدم وعرق ولدها أصل بصراحة القمح التانى ده مبيجيش الا بكسره العين وأنا نفسى تبقى عينى مرفوعة فى التخين.
يا ريس أنا فى ناس سرقت فلوسى عارف أنك أنت كمان اتسرقت معايا بس انت الكبير دلوقتى يبقى بقى جيبلى حقى ولو مش عارف يبقى اعدمهم أو أقولك ارميهملى فى الميدان واحنا نعدمهم يإما يعدوا معانا ويدو لكل واحد حقه ما أنت عارف المصرى بيجيب حقه بدراعه.
والنبى يا ريس بلاش قلة قيمة وبلاش نبيع أرضنا للغريب ده أنت لو سافرت أى حته محدش حيرضى يبعلك ده الأرض عرض يا كبير.
والنبى يا ريس أنا نفسى أركب الأوتوبيس أنا عندى عربية بس والله لو لقيت مواصلات محترمة لاركنها ده حتى أوفر الواحد يقعد باشا فى الأوتوبيس والسواق يوصله لأقرب حته.
عارف يا ريس أنا كنت عايز أجيبلك هدية تنور طريقك بس للأسف ملقتش غير فوانيس رمضان صينى كان نفسى أجبلك حاجة بلدى بس حتى ديه بقت عزيزة دلوقتى.
أصل بعيد عنك إحنا معندناش صناعة خلاص آخر حاجة مصرى افتكرها كانت البيجامات الكستور والجل أصلى كنت صغير ويمكن أفتكر العربية بتاعة شركة النصر والله كنت بحبها علشان بجد بتاعة بلدى.
ياريس ليه متعملش وزارة الاقتصاد دى معاها وزارة التصدير والاستيراد يعنى علشان محدش الشيطان يوزه ويستورد أى كلام فارغ واهو بردوا تكون هى بقى اللى مسئولة عن تصريف منتجاتنا بره أصل إحنا حتى لما بننتج يا حد بيستورد حاجة زيها ويضربنا يا إما مبنعرفش نصدرها ياريس أنا لسة عايز حاجات تانية كتير بس مش عايز أعطلك بس والنبى أفتكر لو مرة بلاش كل أسبوع بس كل شهر تقعد معايا وتفهمنى والله حقعد ساكت أسمعك وبس ولو عندى حاجة حقولها بعد لما تخلص أصلى متربى ومتعلم أحترم الكبير.
وبعدين يا ريس حتى لو بنحبك وحياة أبوك متطولش معانا أصل بردو المثل بيقول يابخت من زار وخفف ومش عايز اضطر أجيلك تانى عشان أمشيك من هناك. أنا معاك يا ريس علشان مصلحة البلد دى بس مش علشان مصلحتك أنت.
وصباح الفل يا كبير.