مذكرات رجل من الجنوب هريدى ولد الشيخ عبدالرحيم همام..الجزء الأول من القصه الزجليه باللهجه الصعيديه

الجزء الأول من رحلة هريدى من الصعيد إلى القاهره
أنا هريدى راجل جد ودوغرى . أصلى أنا صعيدى من جنوب الوادى .
من قبلى يعنى سوهاج بلدى بعديها جرجا وقنا والأقصر وأسوان كلها بلاد جنوب الوادى .
السمار عنوان . العمامه فوج الطاجيه زينة الراجل . عبايه على الأكتاف فوج جلبيه
بكمام واسعه مهويه . والصدر جبه واسع الشعر منبت زى الزرع اليافع تجول شوك طالع .
ما تجرب عليه غير بالحلال وليه . أراضى بلادنا عفيه . الطمى مغطيها خيرها فيها .
أصلها من مية النيل مرويه .
أبهاتنا وجدودنا رجاله. علمونا كيف متتكسرش فى إدينا العصايه . حتى لو كانت عصايه
من البوص خايخه . المهم إللى يمسكها يبجى كديها . يحميها ويكون بين الرجال راجل .
ناس كانوا رجاله . علمونا من الحكم كتير . جالولنا لما نصاحب . نصاحب الأصيل وسيبك
من الغجرى . الأصيل زى النخل جزوره فى الأرض سارحه .حتى طرحه فوج شواشى النخل بلح
عسلى صالح . أما الغجر ناس ملهاش آمان ولا وتدد فى الأرض كمان . النهارده فى بلد
وبكره فى بلد تانى . ما تجدر تفرج ولا تعرف فيهم الحرمه من الراجل . لما يحطوا فى
بلد .يخلصوا على خيرها من الوتدد . و يرحلوا على بلد غيرها زى البلح الصيص من غير
نوايه ولا عسل يغذى ولا يشفى . سيبك يا ولدى الراجل فى النهايه برضه راجل . علمونا
كمان منخافش . نجولوا الحج ولا نهاب مخلوج واصل. كانوا ناس معيحبوش غير الكلام
الدوغرى . عادات وتجاليد ورثناها عنهم أب عن جد من زمان بدرى . كانوا يجولوا الحج
حتى لو السيف على الرجاب يجرى .
. إسمى هريدى ولد الحاج عبدالرحيم الصعيدى . وسوهاج بلدى جبل الجنوب بشويه .
طلعنى أبوى وربانى على الجد من صغرى . الله يرحمك يا بوى . لو كنت أعرف فراجك كان
هيبجى بدرى . وهتسيبنى فى الدنيا وحيد وهتهملنى . وأنى لسه صغير ما كنت فرحت فى يوم
عمرى . ولا هملتك دجيجه علشان أتعلم منك الحج والحجيجه . الدنيا يا بايا ظلمتنى .
عماله تشيل وتحط فيا خلاص هتموتنى . الله يرحمك إنت أخدت حجك وأنا لسه هاخد بإذن
الله منها حجى .
فى صبحيه روحت الغيط بدرى . جابلت محمود وكان صاحبى . كان جاعد فى السهرايه .
والحريم والبنته جاعدين تحت النخلايه . عيدشوا الغله تحت الرحايه . والنورج حولين
الجرن . عتدور بالبجرتين وتلف . عتدرس جتاية الجمح . وعيدروها بالمدرايه . محمود من
عيله تانيه غير عيلتنا . بس كنا صحاب جوى جوى . كان ولد زين راجل من عيله إسميها
عيلة أبو كامل . ناس زنين عيله كبيره فيهم ناس متعلمين . حافظين القرآن وعيتكلموا
كلام زين . كان حداهم شيخ عامل كتاب بيعلم فيه العيال . ويحفظهم القرآن حتى النهايه
. وفيهم راجل زين متعلم علام زين . مسافر مصر بجاله سنين . وعيجولوا كمان عيكتب فى
الجرانين . وبيكتب فى الأدب الروايه . وعيجولوا كمان سافر بره . بس مشعارف البلد
إللى هو دلوكيتى عايش فيها . إسميها أيه الله أعلم . وصاحبى ده برده عيفك الخط .
وعيجرا الجرانين زى اللبلب. كان وهو صغير . عيروح الكتاب ومتعلم وعيجرا الجواب.
أصلى بلدنا على كديها . من البيت للغيط ومن الغيط للبيت . ولا جهوه نسهروا فيها .
ولا كهربه نعرفوها بس عنسمعوا عليها . لما نروحوا البندر عنشفوها . عتخلى الليل زى
النهار سبحان الله . حاجه ولا فى الخيال . ياما لسه هنشوفوا من الدنيا العجايب .
لكن إحنا ناس على كدينا لا نعرفوا كهربه ولا زينه . هى لنده عويل .حج سلموا إصغير
وجواه فتيل . عنعملوها بإدينا وعنوروها من المغربيه . لجرب نص الليل وعتطفى وحديها
. لما يخلصوا شوية الجاز إللى فيها . ولا حدانا رداوى ولا تلفزيونات ولا مصانع تدور
بيها . ناس كده على الفطره عايشين النهارده زى بكره . فطورنا زى غدانا . واللمه
الحلوه ساعة عشانا . وعنحمدوا ربنا على النعمه إللى إحنا عليها . عندينا بحرى البلد
بجال إصغير . بتاع عم عباس . راجل على كده بس راجل دوجرم . عارف كل حاجه . عشان
عيروح السوج يتسوج . وعيجيب من البندر كل حاجه . زيت وشاى وسكر . وحلاوه طحينيه
ودجيج فاخر متكرر . خالى من الرده ومزهر . عيجولوا عليه دجيج زيرو . وسجاير سمسون
أرضى . من غير فلتر بس للغرض عتجضى . المهم الدخان غللى فيها . وكمون وشطه وملح .
وبواكى دخان معسل وورج بفره لللف . يعنى عنده حاجات كتيره . ومهاود جوى جوى . معاك
شوية غلة دره ولا شوية جمح . تشترى إللى إنت عايزه بيها . ولا كام بيضه . شوية جطن
أى حاجه . تشترى من عنده كل حاجه بيها . معاك فلوس تشترى . ممعاكش برضه تشترى . بأى
حاجه من إللى جولت عليها . والحال على كيفك ماشى . والكل عيجضيها . وعنده راديو خشب
كبير . بعد المغرب الناس الكبيره تجعد حداه وتسمع عيجول أيه .على المصاطب إللى فى
وش الدكان جاعدين حواليه . ويسمعوا النشره والقرآن وسواعى خطاب الريس عبد الناصر .
لما كان عيخطب الناس تبجى واجفه ولا تجعدشى . وكل شهر . وبالخاصه يوم الخميس . أم
كلثوم عتعمل حفله عتغنى فيها . فى اليوم ده من كل شهر عنسهروا سهره زينه . برضه
عنتلموا كبير وصغير معنى الطرب الأصيل منيها . ونجعدوا نسمعوها . ولما ما يكنش فى
الراديو حاجه نسمعوها . تجعد الناس الكبيره تجول حكاوى . عن زمان . حكاوى الشجاعه
والبطوله . وكان يجيى عندينا فى الأفراح . واحد إسمه عم جابر شاعر ربابه . من البلد
إللى جنبينا . يجعد طول الليل يشعر ويحكى حكاية أبو زيد والزناتى خليفه . وميخلصهاش
غير بعد للتين تلاته . ومن حبى فى حكاية أبو زيد والزناتى خليفه وخضره الشريفه .
حبيت الشعر بتاعه وسواعى أتعلم منه . لما أكون فى الغيط ومدور الساجيه . تلاجينى
أجول أشعار تطلع كده وحديها . الناس فى بلدنا باجى الليالى عتنام بدرى . علشان تجوم
تروح الغيطان فى الفجر تسجى . أكون أنى خلصت ساجيه جبليها . فى الصبحيه تلاجى كل
حاجه صحيت . من بدرى الناس رايحه على الغيطان . جاره البهايم بالحبال . إللى ماشى
وإللى راكب حمار . حاطه عليه حوايجها إللى تكفيها . طوره يعزجوا بيها الأرض . منجل
يحشوا البرسيم بيها . والحريم تكون حلبت البهايم وماسكه الجربه عتخض فيها . وإللى
جايده الكنون وعتطبخ طبخه سخنه تدفيها . إللى تطبخ رشده وإللى تطبخ عصيده . وإللى
تطبخ حريره على كديها . وإللى عجنت الدجيج وجرصت الخبيز وراحت تلم وجيد للفرن
تولعها وتحميها . الفروج والديوك تكاكى . والبط والوز يحاحى . المعزه كتير عيمأمأ
والخرفان عتنطح العيال وتبأبأ . والحمير عتنهج وتبرطع وترفص إللى يهوب نواحيها .
الجاموس والبجر عينعر عايز ياكل ويشرب . تروح البنات الصبايا تملى الزلع والبلاليص
من الترعه وتسجيها . حتى الزرازير تهمل عشها من فوج شواشى النخل وتطير . وتسيب
صغارها تزجزج خايفه من الحدايه تختلى بيها . الطير حاطط على الأرض . فى الغيطان
عيلجط الحب لجط . يملى الشوجله ويرجع تانى ليها . سبحان الله حتى الطير والبهايم
عارفين كيف يبروا صغارهم . أرزاج مجسمها ربك العالم بيها .
فى السهرايه جالى محمود صاحبى . كيف حال عتمان ولد عمك لساه جاعد فى مصر بحرى .
عيجولوا شغال شغله زينه . عيجبض منها فلوس كتيره . هو شغال أيه هناك يا هريدى ؟
جولتله والله يا صاحبى . معارفشى بالظبط . نفسى يا محمود أبحر على مصر . زى عتمان
ولد عمى وأشوف الدنيا . عيجولوا يا صاحبى مصر دى كبيره . وفيها فلوس كتيره . لما
عيجى وتشوفه متعرفهوش من نضافته وخلجاته الزينه . حتى كلامه متغير مش زيينا عيتكلم
. عيشتغل هناك شغلانه زينه عيكسب منها كتير . و ربنا فاتح عليه من أوسع الأبواب .
عيجولى هناك كل الناس عرفاه . نفسى يا محمود أهمل البلد دى . وأدلى مصر وأشتغل
شغلانه . زى عتمان زينه . وأشوف الدنيا إللى عيحكوا ويتحاكوا عليها . بس خايف أسيب
أمايتى وحديها . وليه كبيره متجدرش على خدمة البيت والغيط وحديها . سكت محمود شويه
. وبعدين بعنيه بص عليا . وجالى إتوكل على الله يا هريدى ربك معينساش حد . ممكن
تكرى للزرعيات أى حد . بصراحه كلام محمود خبط فى راسى خبط . جولت فى سرى يخرب بيتك
يا هريدى . كيف مفكرتش من زمان يا واكل ناسك . تروح مصر زى ولد عمك عتمان علشان
يتعدل حالك . وبعد ما خلصنا جعدتنا سلمت عليه وجولتله سلام . أنى مروح بيتنا أجول
لأمايتى وأعيد عليها الكلام .. وروحت البيت وأنى راسى مندار متحير ومحتار . كيف
أجول لأمى على إللى صاير فى راسى ودار . أمى ست كبيره وملهاش غيرى ونيس فى الدنيا
الكبيره . كيف أهملها وأبحر مين من بعدى هيراعيها . شافتنى أمايتى وبصت فى عنيه
وجالتلتى . يا ولدى شايفه فى عنيك حيره . بس معرفاش أيه إللى عتفكر فيه ومحيرك
ومحيرنى . جولتلها مفيش حاجه يا ماى . جالتلى كداب يا هريدى . أنى أمك عجناك وخبزاك
. يا ولدى إنت ولا عتعرف تدارى ولا تخبى . لو حنكك صام عن الكلام عنيك فضحاك يا
ولدى . تعالى وجعمز جارى وجولى بصراحه . على إللى جواك صاير . جولتلها مجدرش يا ماى
. خايف أجولك تجولى عليا إتجننت . وعايز أسيبك وأهمل الدار . إبتسمت بسمتها الحلوه
وجالتلى . متجولش حاجه يا ولدى . فى عنيك باين عليك جلجان . نفسك تبحر على مصر
وتهملنى . أنى عشوف ده فى عنيك كل ميجى عتمان ولد عمك . خلجاته عتزغلل عنيك . إللى
تشوفه يا ولدى . زى ما تحب يا هريدى بس يصعب عليا فراجك هتوحشنى . وهليك فى غيابك
جلبى هياكلنى . مين هناك من البرد يغطيك ويخاف عليك . إنت وحيد يا ولدى وملياش غيرك
. ونفسى مفيش حاجه تضرك ولا تصيبك . وتحرج جلبى عليك . جربت عليا ومسكت بأديها
الحنينه إيديا . وطبطبت على كتفى وجالتلى . إسمع لما أجولك يا هريدى . إنت ضنايا
مالياش غيرك . ونور عينى يا ولدى وسندى من بعد أبوك إنت راجلى وولدى . ملياش غيرك
فى الدنيا يا هريدى . عايزه أجولك على كلام فى النجع داير وعيجرى . فى الصبحيه كنت
جاعده ويا الحريم بدرى . كانت السهرايه حاميه عليك يا ولدى . سمعت حديت ومكنتش
مصدجاه ودانى . وأديك جيت علشان تجولهولى بنفسك . كلام إيه ده يا مايا . أيه إللى
كان صاير وداير فى السهرايه . خلاص هريدى سيرته بجت فى حنك الحريم لبانه وسلايه .
جالوا أيه يا مايه شغلتينى وحيرتى راسى كفايه . متجلجش يا ولدى . كانوا عيتحدتوا فى
نفس الحكايه . عيجولوا هريدى عايز يدلى على بحرى . كان جاعد ومعاه محمود وسمعوك
وإنت عتحكى . عن مصر وعن عتمان ولد عمك . بلاش يا ولدى خليك هنا جاعد جنبى متجل بيا
ومونسنى . شيفاك وشايفنى . وأدينا عنونسوا بعض . ولما ربنا يرزجكك ببت الحلال .
جلبى هيفرح يا ولدى . نفسى أشوفك عريس ومخلف عيال كتير . وبعينى أشوفهم وهمه
عيلعبوا وعيتنططوا جدام المندره . رايحين جايين مالين البيت علينا . وتعوضنى عن
أبوك يا ولدى . إللى إتخطف منينا بدرى . عايز كيف دلوكيتى تهملنى وتسيبنى فى البيت
وحدى . عايز تبحر على مصر جبل الجواز وتهملنى . مين إللى هيفرح جلبى ويطمنى .
إسمعنى زين يا هريدى . مصر يا ولدى عيجولوا كبيره . وخايفه تروح وتاخدك الغربه منى
. كيف تروحها وتهملنى . وتسيبنى كيف يا ولدى . طاوعك جلبك يا هريدى . ولسانك ناطجها
وفكرت فيها يا ولدى . ما سألتش نفسك هيجينى نوم كيف وانت بعيد فى الغربه عنى . مين
هيشجر عليك ويغطيك لما تتعرى رجليك . وانت نايم يا ولدى . فى عزنومى وفى نصاص
الليالى . حاجه تيجى تصحينى .وأجوم أطمن عليك . ألاجيك عريان . عتتنفض من البرد .
والغطى مش عليك . بسرعه أغطيك بيدى يا ولدى . كيف يجينى نوم وحنكى يدوج الزاد وانت
بعيد ومفارجنى . مين هيراعى الزرعيات فى غيابك . و مين هيسجى الغيط والبهايم يا
ولدى . مين هيدرس الجمحيات بالنورج يا هريدى . مين هيعلج البجره فى الساجيه ويسهر
طول الليل يسجى . مين هيجيب البرسيم من الغيط يا ولدى مين هيجنى القطنيات ويكبسهم
فى الشوالات ويوديه الجمعيه ويجيب الفلوسات يا هريدى . خايفه الأرض تبور يا ولدى .
وتزعل أبوك فى ترابه ويجول الدنيا خربت فى غيابه . خليك فى دارك يا ولدى . إنت
مسمعتش عيجولوا فى المثل أيه . إللى يسيب داره يتجل مجداره . وإنت مجدارك كبير يا
ولدى . كلامها فى ودانى زى خبط الحجر الصوانى . بس الفكره وجعانى . وعجلى مصمم
عليها . جالتلى مفيش فايده فيك . إللى جواك غالب عليك . زى ما إنت عاوز يا ولدى .
بس أوعدنى يا وليدى . وهات إيدك وحطها فى إيدى . لو بحرت على مصر ومهما شوفت وحصل .
ما تنسى انك صعيدى . بصيت عليها لمحت الدموع من عنيها . نازله على الخدود تجرى .
إتلفيت خلجاتى وحاجاتى وطلعت من البيت أجرى . وركبت ركوبه وهميت على المحطه . لجيت
رصيف الجطر مزحوم والخلج عليه حاطه . ناس شايله جوفف وناس معاها زكايب . وجليل من
الناس إللى معاه شنطه . ساعه ساعتين تلاته يفوتوا ويعدوا . كل شويه نبصوا على الجطر
الفجرى ولا فيه فايده . ولا حس ولا خبر . مفيش حد تسأله يجولك هيوصل الجطر ميتى .
فين وفين جه الجطر . الناس ماعندهاش صبر . من الشبابيك لما وجف الجطر .راحت هلبت من
الشبابيك و ناطه . اللى معاه جفص حمام وجفاص فروج . وإللى ماسك فى إيده بطه .
بعافيه هلبت كأنى دخلت . فى شج . لجيت روحى وجعت . على ناس وجفاص وجفف . حسيت براسى
فى الكراسى إتخبطت . جومت زعجت وجولت يا دلى عشان أروح مصر . أركب الجطر الفجرى
وأتبهدل . باين عليه جطر مجندل . الغربه تبهدلنى وتودر كرامتى . حتى العمه من فوج
راسى إتفكت . فين وفين لما الجطر طلج زمارته . ساعتين تلاته والجطر تاته تاته ماشى
براحته . بعد ما نور إخضر طلج تانى زمارته ونور كشفاته وغشارته . سمعنا صوت عجلاته
. عتددج زى دج الطبل على جدبانه . عتخبط وتدجدج عجلاته . عيجرى والنخل جباله يجرى .
النخل عيرجع ورا وهو عمال يجرى . جولت يا ربى . معجول النخل زى الجطر عيجرى . ولا
أنا متهياجلى . جولت يمكن راسى إندارت من الخبط . الليل جه علينا و حط . نام الحمام
والبط ز و الناس نايمه فوج بعض . الواحد مش شايف من الضلمه خلاجاته . فات وجت كتير
سمعنا زعيط ومعيط . الجطر وصل المحطه ووجف بينا على المحطه . هرج ومرج الناس زى
الجرود . اللى عينط وإللى عيفط من فوج . من البيبان والشبابيك رمينا حوايجنا
وإدلينا . بزعيط ومعيط فى المحطه حاجه كبيره . الدنيا زايطه زحمه كتيره . والخلج
عتدور على حد متلجيها . أو حد يكون فهمان يجرا العلوان ويورينا . طلعت بره المحطه
شوفت ناس اشكال وناس الوان وأشكال . ناس كتيره بس مش زيينا . ولا جلبيه ولا جفطان .
أفنديه لابسين مناطيل وجمصان . رجاله وحريم ماشين لاخشى ولا كسوف . الشعر مكشوف
وعيبصوا علينا . البنات والحريم لابسين إجصير . ولا خشى ولا كسوف ولا مستحيين منينا
. عيلجحوا بالكلام ويدحكوا علينا . وجفت مستنى عتمان ولد عمى . غاب عليا كتير .
جولت يبجى الجواب إللى كتبه محمود لسه مجاش . بس الحمد لله محمود كتبلى عنوانه . بس
مش لاجى حد يعرف مكانه . بجيت زى المجنون طايح فى الخلج أفتش فى الوشوش . عبص على
الناس وأنا مندار الراس . ولا عارف راسى من المداس . جعت أخبط على راسى . وجوات يا
ناس أيه !للى خبطها فى راسى . وخلانى محتاس ومش عارف رجليا من راسى . مبسوط يا
هريدى يا واكل ناسك . مين شار عليك وطجها فى راسك . منك لله يا محمود يا واكل أهلك
وناسك . فى عز غلبى و همى شوفت واحده جد أمى . ماشيه عتتمخطر من جنبى . لابسه إجصير
وجالعه براسها حاطه أحمر وأخضر . و من غير طرحه ولا هاممها بصات عنينا . جولت يا
سلام هى دى مصر أم الدنيا . الناس ولا حداها حيا ولا خشى زينا . فينك يا مه تشوفى
غضب ربنا علينا . خبطت على راسى وسكت جولت فى نفسى وأنى مالى . سيب الخلج للخالج هو
وحده إللى هيحاسب . وإنت يا هريدى مالك مش عاجبك حالهم خليك فى حالك إنت إللى هتغير
الكون . باين عليا هشوف من الأصناف دى كتير . وبكره أتعود عليها . حوالين منى
عربيات أشكال وألوان . عتجرى بسرعه وعماله تزمر يا جدعان . جعدت على التلتوار وجسمى
جايد نار . ولو معايا بندقيه كنت ضربت فى الخلج دى كلها النار . جولت فى نفسى إهدى
يا هريدى . دور على خيبتك وشوف واحد يكون زين من أصلك . يجرالك العنوان وعلى ولد
عمك يدلك . بس الشيطان راكب راسى ومتربع . وعيوسوس وعيدلع . مش سايبنى فى حالى
وعيبرطع . ويجولى شوف يا هريدى الفرج بين هنا وهناك . أنفض فى شعرايتى وأجوله إدلى
يا فجرى وروح بعيد هناك . شوف حد غيرى من إللى جالعين ومش لابسين هناك . شويه وشوفت
واد وبت ماسكين إدين بعض . وعيجرص بأديده التانيه فيها والبت عنيها واسعه ومش شايفه
حد حواليها زى البهيمه لما تكون سرجاها السكينه . يا دلى فى النجع حدانه الناس
غلبانه . لو واحده بس بانت من خلاجاتها رجليها . يبجى يوم أكحل ومتمرر على إللى
خلفتها . وكمان إحنا غلابه . ياما رجلينا حفيت من المشى عليها . مش لاجين ركوبه غير
الحمار هو إللى حيلتنا . مستحملنا ومجضى الغرض لينا . وعمدتنا علينا عيتكبر . لما
يجى يشج علينا يجينا راكب حصان وعيتمخطر . على أيه يا عمده عتتغندر . وعلينا يا
فجرى عتتكبر . تعالى هنا شوف اللى حصلان . أنا واجف أكلم نفسى غتبدل حالى وعجلى من
راسى . شوفت حواليه نور كهربه كتير . مش شويه حاجه تخلى العجل يطير . فوج وتحت وفى
كل مكان . كهربه منوره بالألوان . سألت أيه كل النور ده .جالولى دى كهربه جايه من
أسوان . جولت زى البندر حدانه . يا مثبت العجل فى الراس . كيف تجيلكم الكهربه وإحنا
بعدينا أسوان . كيف الكهربه تعدى علينا ومتنورش لينا .وكمان وواخدين ألارض منينا
وزارعين فيها العمدان . وإحنا فى الصعيد على لنده عويل عنور . وأنتوا عدوسوا على
الحيطه تنور بالألوان . عليه العوض ومنه العوض الغلبان غلبان . وأنا جاعد متحير
وراسى من الدوار عتغير . شويه جانى ولد عمى عتمان . بالباط يا واد عمى مشفتكش من
زمان . والله وحشنى وعرفت تيجى غهنهاتى كمان . جولتله أسكت يا ولد عمى . تعالى حط
همك على همى . كيف حالك يا عتمان . جالى زين وآخر تمام . أيه يا هريدى مش باين عليا
ولا إنت إعميت ومعتشوفش كمان . زعلت من كلامه فى نفسى وجولتله عتعيرنى على الجلبيه
العبك يا عتمان . بخاطره يا واد عمى . إللى على على . علشان جاعد إنت هنا من زمان .
خلجاتك إنضاف وشالك إبيض شفاف . سبحان العاطى يا عتمان . ركبنا تكس وجال للسواج
فسحنا هريدى ولد عمى لسه جاى من الصعيد وزهجان . جولت ياسطه إوعاك تسمع الكلام .
وروح فى الطريج اللى هيروحنا أنا بجالى يومين ما نمتش و تعبان . ضحك السواج ضحكه
عاليه وجال . أفسحكم شويه ولا أنت زى أريبك عايز تنام . جولت يا سطى إوعاك تتملجت
علينا . ومتهزيرش وتلخبط فى الكلام . جالى السواج خلاص يا بلدينا . مالك كده زعلان
. جولتله فينا إللى مكفينا ومش ناجصاك إنت كمان . وصيلنا البيت وإدلينا . السواج
مشى وخد الزياره وطار . وإحنا نسينا إللى كان معانا . وجولناله سلام . ولما إفتكرت
البطايه وجوز الحمام . وجفة البلح والرغفان . جولت إلحج يا واد عمى السواج سرج
الزياره وطار . ضحكوا علينا ناس مصر يا واد عمى يا عتمان . الخلجات والزياره كانوا
جنبى . إنسيناهم يا واد عمى . جالىأسكت يا هريدى . إللى عيروح فى البلد دى ما عادش
يجى . وجفل يا ولد عمى على الكلام . دخلنا البيت وجعدنا وريحنا . وكلنا وشربنا شاى
صعيدى تجيل تمام . وضيفنى وجالى يالا يا ولد عمى نام . الصباح رباح ريح من السفر
دلوكيتى . وبكره من بدرى نتوكلوا على الفتاح إللى ولا عيغفل ولا عينام . إنتظرونى
فى الجزء التانى لسه فيه كتير كلام .
مع تحيات هريدى ولد الشيخ عبد الرحيم همام