كنباوي وكنباوية .. حلقة رقم (69) .. أبو إسماعيل حامي حمى مرسي من الثوار والمعارضين

دخل كنباوي على كنباوية حاملا كيسا من العنب الأحمر وبطيخة كبيرة وكيسا آخر من الفراولة
كنباوية: إيه ياراجل مالك النهارده بطيخ أحمر! وعنب أحمر! وفراولة حمرة! إيه الحكاية؟ كله أحمر في أحمر!
كنباوي: أصل طلع أحمر مني مفيش افتكرت إن الإخوان والسلفية خلاص مبقاش فيه بينهم عمار وطلع المثل اللي بيقول أنا وأخويا على ابن عمي وأنا وابن عمي على الغريب مثل صح.
كنباوية: ومين الغريب ده ياكنباوي اللي انت قصدك عليه؟
كنباوي: الغريب ده احنا الشعب ياكنباوية الشعب الغلبان اللي لا ليه في الطور ولا في الطحين اللي هو لا سلفي ولا هو إخواني اللي هو مسلم مسلم وبس.
كنباوية: وضح ياكنباوي انا مش فاهمة انت تقصد إيه بكلامك ده وألغازك دي؟
كنباوي: اقصد اني اكتشفت أن الإخوان والسلفية مهما حصل بينهم راسين في طاقية.
كنباوية: قصدك اللي بالي بالك انا فاهمة انت عاوز تقول إيه كمل كلامك.
كنباوي: الراجل الشايب أبو إسماعيل طالع يقول ويصرح تاني أن أي حد حيمس مرسي بسوء الإسلاميين حيتعرضوا له وتاني يوم بعد يوم 30 حينزلوا الشوارع والميادين يتصدوا للثوار والمعارضين والمتمردين بيقولها عيني عينك ومش خايف ما هو قبل كده قال كتير وما حدش عمل له أي حاجة همه إيه حيفرضوا علينا مرسي بضرب الجزم والله لا يحصل ولا يكون ده على جثثنا وياروح ما بعدك روح.
كنباوية: الراجل ده عياره فلت وبقى يخرف في الكلام معنى كلامه ده أن المصريين حيتقاتلوا مع بعض أي إسلام بيقول كده إننا نوافق على رئيس فاشل بالتلاتة.
كنباوي: إسلام الإخوان وأبو إسماعيل ياكنباوية.
كنباوية: ومن نب النبي نبي لا يحصل ولا يكون، مرسي لازم يرحل لازم يمشي هو لوي دراع ويورونا بقى تجرد حتعمل إيه؟
كنباوي: الجيش قال إنه حينزل مع أول نقطة دم تنزل من مواطن مصري.
كنباوية: ياريته ينزل قبل نقطة الدم دي هو لسه حيستني لما الدم يسيح ويبقى للركب.
كنباوي: لازم علشان يكون فيه مبرر لوجوده ونزوله ما ينفعش ينزل كده من تلقاء نفسه علشان ماحدش يقول إنه طمعان في الحكم.
كنباوية: عندك حق بس ياريته يطمع بجد ويريحنا من قرف الإخوان والسيسي لايق عليه أنه يبقي رئيس، راجل ملو هدومه وبدلته مش مرسي اللي لا نافع طبلة ولا تار ده.
كنباوي: أنا كرهي للإخوان ولأبو إسماعيل وأنصاره بقى مالهوش حدود بقيت أقرف اسمع سيرتهم أو اشوف حتي صورهم في الجرايد علمونا نكره علمونا الكره الله ينتقم منهم ولاد الهرمة دول .
كنباوية: أمين يارب أمين .
كنباوي: الإخوان بيحاولوا يستميلوا عمرو موسى والشاطر قعد معاه بيلطف من درجة حرارة الجو العام عاوز يكسب حد في صفه بس موسى مش أهبل ولا بريالة علشان يصدق وعود الإخوان.
كنباوية: موسي ده تربية السادات تعلب مكار في الحق والمستحق مايتخافش عليه ولا منه ده بيحب مصر وبيحب نفسه كمان.
كنباوي: كل مابيقرب يوم 30 كل ما بقول ربنا يسترها معانا مصر لازم ترجع من تاني، مبارك كان حرامي بس ماعملش فينا كده ماقسمناش ومافرقناش مادخلناش عش الدبابير ولا جحر التعابين .
كنباوية: أفاعي عايزين رفاعي يصرفهم .
كنباوي: لو نتحد وننسى خلافاتنا حنمشيهم لو ننسي اطماعنا حنمشيهم وحنقدر عليهم .
كنباوية: الناس وعيت ومش حينضحك عليهم تاني باسم الدين، الدين لله والوطن للأصلح والأقدر على حكمه ومرسي الفشل بعينه كفاية عليه إنه انكتب له أن التاريخ حيقول إنه في يوم من الأيام كان رئيس لمصر ودي كبيرة أوي عليه وحلم ما كانش يحلم بيه.
كنباوي: عايز إيه تاني اكتر من كده؟
كنباوية: عايز الأمان.
كنباوي: ياخد الأمان هو وجماعته ويغوروا في ستين داهية مطرح ماجم ويسيبونا في حالنا.
كنباوية: انت جايب الفاكهة حمرة ليه ماقولتليش؟
كنباوي: علشان نتعود على اللون الأحمر من دلوقتي علشان لما نشوف دم المصريين في الشوارع والميادين عن قريب مانتخضش منه.
كنباوية: ياراجل فال الله ولا فالك اتفائل خير.
كنباوي: ماشي ياكنباوية حتفائل خير لما اشوف أخرة التفاؤل ده إيه؟
كنباوية؟ أخرته خير بإذن الله قول يارب.
كنباوي: يارب ياكنباوية، يارب، يارب.