كنباوى وكنباوية.. حلقة رقم (21).. الظبطية القضائية والطريق للحرب الأهلية

أكثر من ثلاثة أيام مرا وكنباوى فى خصام مفتوح مع زوجته كنباوية بسبب دروس محو الأمية السياسية التى تعطيها كنباوية لنساء الحوارى الشعبية فى منزل الزوجية مما جعل البيت دائمًا فى هرج ومرج وازعاج وضجيج بات معه كنباوى لايستطيع أخذ راحته فى بيته فأعلن عصيانه على كنباوية وصار لا يحدثها مطلقًا وممتنعًا عن الكلام معها وهى تحاول ارضائه دون جدوى.
كنباويه: وحياة العشرة اللى بينا ياسة كنباوى خصيمك النبى كفاية زعل منى أنا محقوقالك وحعمل اللى أنت عايزه ومش حزعلك تانى بس كلمنى ورد عليا.
كنباوى: دروس فى البيت ياكنباوية؟ هى حصلت ما اعرفش اخد راحتى وأنام فى بيتى.
كنباوية: خلاص وحياة غلاوتك من النهاردة مفيش دروس فى البيت تانى أنا حنضف السطوح وأفرشه وادى الستات الدروس فوق السطح وفى مواعيد شغلك علشان ماتحسش انى مقصرة معاك فى حاجة.
كنباوى: ولما أرجع من شغلى ما ألاقيش الأكل جاهز أعمل معاكى وفيكى إيه؟
كنباوية عمره لا يحصل ولا يكون قبل ما أطلع على السطوح أكلك وأكل العيال حيكون جاهز هو أنا ليا بركة إلا انتوا.
كنباوى: رجالة الحارة والحوارى اللى جنبينا كلوا وشى زعلانين من قعاد نسوانهم عندك وكل واحد فيهم بيرجع من شغله مابيلاقيش أكله جاهز ولما بيسأل مراته بتقوله أصلى كنت مشغولة فى درس الست كنباوية.
كنباوية: أنا حنبه عليهم اللى عايزة تحضر درسى تطبخ لجوزها ولعيالها قبل ماتيجى وأى شكوى من جوز ست فيهم حمنعها من حضور الدرس
كنباوى: لما نشوف وخليك مع كنباوية لحد باب الدار.
كنباوية: هو أنا كنت كدبت عليك فى حاجة ياخويا قبل كده؟
كنباوى: لا ياكنباوية ماكدبتيش.
كنباوية: طيب فكها بقى وروق ده أنا عملالك النهارده دكر بط.. دكر ياكنباوى دكر.
كنباوى: ماخلاص ياكنباوية أنت علقتى ما عرفنا إنه دكر ولا أنت ناوية تغنيها.
كنباوية: بهزر معاك ياخويا.
كنباوى: بتهزرى ولا بتتنقورى وبتلقحى الكلام؟
كنباوية يقطعنى لو كنت أقصد كده ده أنت دكر وسيد الرجالة.
كنباوى: لما تفتحى نفسى بعمايلك الحلوة أنا حبقى افتح نفسك فاهمة ياكنباوية؟ ولا مش فاهمة؟
كنباويه: فاهمة ياسبعى فاهمة.
كنباوى: قوليلى البلد عاملة إيه على حسك لا أسكت الله لكى حسًا.
كنباوية: ما أنت آه بتحب السياسة.
كنباوى: مضطر وحياتك مضطر مش بخطرى إذا كان علىّ مش بطيقها بس عاوز أعرف حال البلد واحنا رايحين على فين؟
كنباوية: رايحين على حرب أهلية ياخويا.
كنباوى: ياساتر استر يارب ليه خير كفى الله الشر.
كنباوية: الراجل اللى اسمه النائب العام منح حق الظبطية القضائية للشعب.
كنباوى: يعنى إيه ده ياكنباوية فسرى ما انتى عارفة إن فهمى على قدى.
كنباوية: يعنى من حق أى مواطن يقبض على أى مواطن آخر يكون بيخرب فى البلد أو بيتلف ممتلكاتها أو بيحاول يحرقها أو يسرقها أو يتلفها أو يتعدى عليها.
كنباوى: وده ينفع هو عاوز الناس تمسك فى بعض؟ أمال الشرطة فايدتها إيه؟
كنباوية: أديك أنت قولت بنفسك الناس حتمسك فى بعض وغير كده ده حيدى فرصة للإخوان يشكلوا لجانًا شعبية ويقوموا بدور الشرطة ويعملوا ما بدالهم وخصوصًا مع المعترضين على حكم مرسى ومش الإخوان بس ده الجماعات الإسلامية كمان واسمه إيه ده طارق الزمر وغيره وطبعًا الثوار مش حيسكتوا ولا البلاك بلوك ولا المعارضة وكده الدنيا حتولع وتبقى حرب أهلية وكل اللى عاوز يقبض على واحد ومتغاظ منه حيقبض عليه ماهى كده خلاص بقت سايبه.
كنباوى: ده عاقل ده ولا مجنون.
كنباوية: ده مزقوق ومُسيس ومأمور من مكتب الإرشاد ومرسى.
كنباوى: عليه العوض فى البلد واللى بيجرى فيها.
كنباوية: شوفت بقى إن مفيش حاجة تفرح ده غير زعلك منى يا راجل أنا مابستحملش زعلك ده أنت الحب والعشرة والحنية وليالى جميلة هنية
كنباوى: بكشى عليا بكشى وأم كلثوم كمان؟
كنباوية: فاكر ياكنباوى أم كلثوم وأغنيه الساعة 5 كل يوم اللى كنا بنتغده ونعمل شاى ونقعد فى أوضة النوم نسمعها مع بعض؟
كنباوى: وهى دى أيام تتنسى طبعًا فاكر هى الساعه كام دلوقتى؟
كنباوية: الساعة أربعة ونص.
كنباوى: طيب هاتى الأكل فى أوضة النوم واعملى براد شاى كمان وحصلينى حنرجع نسمعها زى زمان.
كنباوية: الله ياكنباوى دى كانت أحلى أيام أيام الصفا وراحة البال والروقان ياترى حترجع تانى؟
كنباوى: حترجع وملعون أبو اللى بيحصل فى البلد اللى بيحصل فى البلد ده كله أطماع ناس بتحب نفسها اوعى تصدقى أنهم بيحبوا البلد دى دول خونة وانتهازيين والجشع ماليهم والطمع ساكن فيهم ملعون أبوهم يلا أنت هاتى الأكل وتعالى بسرعة علشان وحشانى أوى
كنباوية: وأنت كمان وحشتنى أكتر دقايق وأكون معاك.
_ وبعد قليل كانت تشدو أم كلثوم فى الشقة أغنية أمل حياتى وضحكات كنباوية ترج الشقة رج _