كنباوى وكنباوية.. حلقة رقم (12) .. الانتخابات البرلمانية!!

كنباوية تجلس فى فسحة منزلها تفترش الأرض أمامها حلل وسكين وكومة من البصل تقوم بتخريط البصل ودموعها تسيل من عينيها، يراها كنباوى فينزعج من منظرها هكذا فيبادرها القول :
كنباوى: إيه يا كنباوية بتعملى إيه؟ وكل ده بصل بتخرطيه؟ انتى ناوية تطبخى بصل وتأكلينا بصل؟
كنباوية: سبنى فى حالى يا كنباوى أنا مش طايقة نفسى
كنباوى: ليه كفى الله الشر مالك؟ إيه اللى مضايقك؟حاجة حصلت للعيال؟ مصروف البيت خلص منك كالعادة؟
كنباوية: العيال بخير يا خويا وحتى المصروف لو خلص مش ده اللى حيزعلنى ما كل شهر على دا الحال والمصروف بيخلص قبل نهاية الشهر عمرك شوفتنى زعلانة كدة؟
كنباوى: ما هو ده اللى محيرنى امال إيه اللى مزعلك كدة يا كنباوية يا كنبتى؟
كنباوية: أنا مش فايقة لهزارك يا كنباوى أنا من ساعة ما سمعت الخبر المنيل ده وأنا لا على حامى ولا على بارد.
كنباوى: خير اللهم اجعله خير حد مات فى العيلة؟
كنباوية: مفيش حد مات ولا اتهبب البعيد مرسى.
كنباوى: ماله مزعلك فى إيه تانى؟
كنباوية: مزعلنى دى شوية قول ناقطنى، قول فارسنى، الراجل ده مش حيجبها لبر، ده افترى وبيعمل نفس اللى كان بيعمله مبارك واكتر شوية، همه إيه اشترونا؟ واشتروا البلد، ده مابقاش خايف من حد، لا معارضة هماه ولا ثوار خايف منهم ولا قانون ولاأى حاجة خالص.
كنباوى: الظالم له يوم والمفترى عليه ربنا.
كنباوية: الراجل بعد المحكمة الدستورية ما قالت إن قانون الانتخابات فيه مواد مخالفة للدستور والقانون ومش مظبوطة والمفروض يروح للشورى علشان يتعدل ويرجع تانى للدستورية تبت فى التعديل صح ولا غلط وتم ولا ما تمش، يقرر إنه يعمل الانتخابات آخر أبريل وينزل بيها قرار رسمى زى ما يكون بيقولنا يا مصريين اضربوا راسكم فى الحيطة واشربوا من البحر.
كنباوى: وده غلط يا كنباوية؟
كنباوية: طبعا غلط يا كنباوى، من حق الناس كدة الطعن على قانون الانتخابات بس الأفضل إن الأحزاب تتحد والمعارضة كلها ويرفضوا الانتخابات دى، أصل الانتخابات دى حتتزور حتتزور ومصر كلها حتقعد تقشر بصل، بصل زى اللى أنا بقشره ده كدة لو الإخوان خدوا المجلس وكدة حياخدوه.
كنباوى: والحل إيه يا كنباوية؟
كنباوية: الحل هو الرفض، الرفض التام.. الراجل اللى اسمه مرسى ده اتجنن اكنه مش عايش فى البلد دى، ده غباء مستحكم يا كنباوى وجهل بعيد عنك أكيد همه قالواله اعمل كدة.
كنباوى: همه مين يا كنباوية ؟
كنباوية : الشلة بتاعته، ألاضيشه،بديع والكتاتنى والشاطر والعريان، عرفت ليه يا كنباوى همه مش راضين يغيروا الحكومة المقندلة الزفت دى ما هى ليها حق تتقندل مش رئيسها اسمه قنديل، مستنيين لحد ما تخلص الانتخابات علشان يحطوا إيدهم على المجلس، والنبى رجالة مصر مايبقوا رجالة ويلبسوا طرح ويحلقوا شنباتهم لو سكتوا على اللى بيعملوه الإخوان فينا ده، هو كان مرسى أجدع من مبارك؟ ولا الإخوان قد الفلول؟ والنظام السابق ما احنا قدرنا نخلع مبارك وأعوانه إيه مش حنقدر نخلع مرسى والإخوان؟
كنباوى: انتى عايزة إيه يا كنباوية؟ عايزة ثورة تانية؟
كنباوية: وماله يا كنباوى ثورة ثورة بس نشيل الهم اللى جبناه لنفسنا ده، الله يلعن الجهل وأبو الجهل اللى خلى الناس تدى صوتها للإخوان ومرسى
كنباوى: همه ادوه له قال الله وقال الرسول يا كنباوية.
كنباوية: على راسى من فوق كلام الله وكلام الرسول، بس دول لا يعرفوا الله ولا الرسول دول بينتقموا مننا على اللى شافوه زمان، خايفين يرجعوا منبوذين تانى زى الأول دول راجعين ينتقموا مننا والبلد حتضيع واحنا لازم نتصرف مانقفش ساكتين كدة.
كنباوى: إزاى يا كنباوية؟
كنباوية: عصيان مدنى تام يا كنباوى
كنباوى: هى ناقصة وقف حال ما كفاية الحال اللى مش ولابد ده.
كنباوية: نستحمل شوية يا كنباوى الأكل والشرب مقدور عليهم لكن اللى حيحصل فينا بعد كدة مش مقدور عليه أنا زهقت خلاص من رجالة مصر حاسة إنها رجالة ورق مش فالحين غير فى الكلام لكن فعل مفيش.
كنباوى : طيب اهدى اهدى ووحدى الله وقوليلى حتطبخيلنا إيه النهاردة ؟
كنباوية : لا إله إلا الله، حطبخلكوا لحمة بالبصل
كنباوى : لحمة حتة واحدة منين يا كنباوية؟
كنباوية: دول قرشين كنت عيناهم اعمل بيهم نظارة علشان نظرى ضعف وماعدش زى زمان بس من غيظى من مرسى قلت أأجل النظارة واشترى حتت لحمة اعض فيها واطلع فيها غيظى من الإخوان بدل ما اعض فى لسانى
كنباوى : طيب يا كنباوية عضى براحتك أنا نازل اقعد على القهوة شوية عقبال ما تخلصى الأكل بس اوعى من غيظك تجرحى إيدك بالسكينة خدى بالك، مش دايمة لهم يا كنباوية مش دايمة لهم وبكره تقولى كنباوى قال، سلام يا كنباوية..
كنباوية : سلام يا كنباوى ساعتين كدة واطلع ياخويا يكون الأكل خلص
كنباوى: حاضر يا كنباوية وروقى، روقى بكرة تتعدل
كنباوية : يسمع منك ربنا يا كنباوى ...