كنباوى يخرج من غرفة النوم مرتديًا ملابسه، بلوفر أسود وبنطلون أسود، وما أن رأته كنباوية يهل عليها فى الصالة حتى رقعت بالصوت الحيَّانى. كنباوية: انت اتجننت يا راجل؟ - كنباوى: جنان لما يشيلك انت وأهلك، فيه إيه يا ولية؟ ما تتلمِّى إيه الصباح ده بتصوَّطى ع الصبح؟ كنباوية: أعملّك إيه ما انت عاوز تشلّنى يا راجل، لابس لى أسود فى أسود. - كنباوى: وماله الأسود يا ولية؟ ما هو شكل أيامنا السوده اللى دايرة فى البلد أيام الإخوان. كنباوية: يا راجل انت ما سمعتش إن النيابة قررت القبض على جماعة ال"بلاك بلوك"؟ - كنباوى: "بلاك بلوك" إيه يا كنباوية، ومين دول؟ كنباوية: إيه يا خويا انت مش عايش فى البلد دى، انت ماسمعتش عن العيال اللى بتلبس أسود فى أسود ولابسة وشوش سوده وبتبعت جوابات لمرسى تهدده فيها؟ - كنباوى: لا ماسمعتش، هو انا حجرى على أكل عيشى وطلباتكم ولا حقعد قُدام التليفزيون أشوف ال"بلاك بلوك" بتوعك دول، خليها تولع، على الله الإخوان ترتاح. كنباوية: أنا كنت فاكراك متابع السياسة يا خويا. - كنباوى: سياسة إيه يا ولية هىّ ناقصة سياسة، كفاية علىَّ أسايسكم انتو وأجيب لكم أكلكم، وبعدين من إمته يا كنباوية وانتِ ليكِ فى السياسة؟ كنباوية: حطّيت غلبى فيها من يوم ما بسلامتك بقيت ترجع بالليل تنكفى على السرير، واندهلك ما تردش علىَّ زى ما تكون شغّال بره فى الفاعل بدل ما اقعد بالليل أحط إيدى على خدى واهرى وانكت، بقيت اتفرَّج على التليفزيون وأتابع السياسة، حرمانى من حقوقى الشرعية خلَّانى أهتم بالبلد واللى بيحصل فيها. - كنباوى: كده، يارتنى كنت حرمتك منها من زمان كان زمانك دلوقتى مرشحة نفسك فى مجلس الشعب، أنا نازل يا كنباوية. كنباوية: يا راجل خش غيَّر هدومك السوده دى، همه قايلين حيتاصور على كل اللى لابسين أسود فى أسود وحلّنى بقى عقبال ما تثبت إنك مش من ال"بلاك بلوك". - كنباوى: يا ولية خليها ع الله، والله ما انا مغيَّر هدومى، خليهم يقبضوا علىَّ، على الأقل ارتاح شوية من طلباتك وطلبات عيالك. كنباوية: يا راجل احنا بنطلب منك حاجة زيادة عن أكلنا وشربنا ومصاريف المدارس. - كنباوية: هو ده قُليّل، أيام المخلوع الله يمسيه بالخير كان الحال أحسن من دا الحال، كان فيه شغل وفلوس، لكن دلوقتى نشفت يا ولية والناس بتطلّع القرش بالعافية، وأنا باجيب القرش بطلوع الروح. كنباوية: معلش يا خويا بكرة تتعدل ويرحلوا عن البلد ويمسكها واحد عنده خبرة يعرف يدورها كويس. - كنباوى: يدوّرها دى كلمة يا ولية، هى مصر دى إيه عربية ميكروباص ولّا مشروع، نقّى ألفاظك يا كنباوية، وفى سرّه: عقبال ما تبقى فى عداد الموتى وارتاح منك. كنباوية: بتقول حاجة يا كنباوى. - كنباوى٬ باقول ربنا مايحرمنى منك ومن ثقافتك يا منورة بيتى ودنيتى يا فلة يا وردة يا شمعة منورة. كنباوية: يوه يا كنباوى ضحكتنى بقالك كتير ما قولتليش كلام حلو زى ده. - كنباوى: لا إذا كان على الكلام الحلو قده كتير وخدى منه كتير مش شوية عليكى هو أنا ليه بركة غيرك. كنباوية: يخليك لىَّ يا كنباوى. - كنباوى: ويخليلك ثقافتك السياسية اللى بتفكرنى بثقافة الإخوان السياسية، سلام يا كنباوية. كنباوية: سلام يا كنباوى ربنا معاك يا خويا. - كنباوى: إيه يا وليه هو انا رايح أحارب، ده أنا رايح شغلى، ماتتخانقيش مع الجيران، فوتِّك بعافية. كنباوية: يعافيك.