هو مخنوق وهي مش طايقة

زنكلونى.. والأربع ستات!

زنكلونى.. والأربع ستات!
كتب :عمرو عكاشة- رانيا صالح
منذ 1 ساعة 24 دقيقة
سميرة.. أمانى.. تهانى.. أجمل هدية ادهانى زمانى.. أحلى 3 ستات فى حياتى.. بعد ما عرفتهم قلت يمكن أخيرا أرتاح من هم اللى ما تتسمى سنية..!
الحكاية ومافيها إنى كل يوم أشتكى من زمارة القطر اللى اسمها سنية فى الشغل... وزمايلى فى المصلحة مابقاش ليهم سيرة إلا حكاياتى مع سنية ...المهم صديقى الأنتيم الأستاذ سلكاوى ربنا يكتر من أمثاله نصحنى نصيحة...نفسى ومنى عينى أردهاله !!!!
قالى إيه الموكوس على عينه؟..."الشرع بيقول أربعة يازنكلونى ياخويا.. طالما مفيش عمار بينك وبين مراتك اللى قد الفيل وتتصر فى منديل"
رديت..." ازاى بس يا سلكاوى يا خويا...هو انا لاقى اكل...دانا بكمل لآخر الشهر بالعافية...راح باصص لى بصة لئيمة من تحت النضارة وقايل...مش هقولك الحل يا زنكلونى ياخويا إلا لما تجيب لى كباية شاى فى الخمسينة على حسابك ومعاها باكو بسكوت بالشوكلاتة!!
عرايس بالجملة
وافقت بسرعة قبل ما يسحب كلامه...بعد ما مسك كباية الشاى زى الأسد اللى بيفترس غزالة..شرب الشاى بصوت زى الحنفية المكسورة وقعد يقرقش فى البسكوت زى الحمار اللى بياكل فى العليقة "املأ املأ املأ"..وراح باصص لى وقايل..."أم عبده الخاطبة جارتى عندها 3 عرايس حكاية.. كاملين من مجاميعه...عاوزين راجل بشنطة هدومه.. حاكم يازنكلونى ياخويا الستات النهاردة مش لاقيين جواز.. وقبل ما تقولى أجيب منين.. التلاتة متريشين.. سميرة.. جوزها مات وساب لها شىء وشويات.. وأمانى وارثة من ابوها كذا مليون.. وتهانى عيلتها كلها تجار."
طبعا أنا وقعت من طولى.. ماصدقتش اللى بسمعه.. وقلت لسلكاوى حدد لى ميعاد أرجوك مع أى واحدة فيهم.. راح رادد بثقة.."النهاردة الساعة 8 مساء فى بيت أم عبده الخاطبة..!!".. جهزت نفسى ولبست الحتة اللى ع الحبل وحطيت كولونيا كنت محنطها بقالى سنين، وجيت أتسحب وأنزل لقيت أسد وقف بينى وبين باب الشقة.. وراح شاخط فيا شخطة وقعت سنانى وقال.."على فين ياروح خالتك بالشياكة والقيافة اللى انت فيها دى؟..وكمان حاطط كولونيا.. وقعتك هباب ولياليك عذاب"...
رديت عليها"يا سنية يا حياتى أنا رايح أصلح بين واحد ومراته... يرضيكى أحكم بين الناس وانا مش لابس كويس؟"
شخطت تانى وقالت: "عليا الكلام ده يا زنكونى؟..دانا خابزاك وعاجناك ومطلعاك من الفرن على قفاك...عامة...اذا كان اللى فى بالى...يبقى جنت على نفسها براقش!!"...طبعا نزلت جرى من السلم أول ما فتحت لى الباب.. وانا بقول"براقش؟ جابتها منين براقش دى..إلا ما عمرها قرت كتاب"..
حلم ولا علم
المهم.. وصلت للست أم عبده لقيت البيه سلكاوى قاعد معاها ومعاهم 3 قمرات.. التلاتة أول ما شافونى راحوا موشوشين الخاطبة وسألوها.."هو ده؟".. بعدها ابتسمولى كلهم مرة واحدة!!.. انا مادريتش بنفسى إلا والست ام عبده الخاطبة بتفوقنى ببصلة وسلكاوى بيقول.."فوق يا زنكلونى ياخويا.. فوق.. إنت فى علم.. مش فى حلم!!"...أول ما فقت لقيت سميرة بتقولى"ألف سلامة عليك..ان شالله انا بدالك".. وأمانى قالت"ان شالله العدوين".. بعدها تهانى قالت "ألف سلامة ع الحلوين..اللى عاملين زى الفل والياسمين!!"..
وقبل ما أتكلم لقيت التلاتة بيقولوا فى نفس واحد.."قبل ماتقول أى حاجة..احنا التلاتة اتفقنا على كل حاجة...إحنا راضيين.. وهنقسم أيام الأسبوع بينا ..وعارفين انك متجوز...شوف هتقعد فى بيتك كام يوم.. والأيام الباقية هنقسمها علينا احنا التلاتة..إحنا مش عاوزين حاجة من الدنيا غير ضل راجل.. وان كان ع الفلوس ..كل واحدة فينا عندها اللى يكفيها وزيادة.. مش عاوزين بس غير العشرة الحلوة الطيبة.."!!
طبعا بعد ماسمعت الكلام ده كنت هموت...مش هيغم عليا !!...لكن مفيش حاجة عكننت عليا غير الأستاذ سلكاوى صاحبى اللى اكتشفت انه لئيم بعد مالقيت كل واحدة طلعت ظرف منفوخ فيه فلوس كتير..وقالوله...حلاوتك يا أستاذ سلكاوى...
المهم ..حددنا ميعاد كتب الكتاب وهربت من زمارة القطر اللى اسمها سنية كالعادة...وأول ماوصلت للمأذون لقيته بيقول .."يابختك ياعم..3 مرة واحدة... دانا نفسى مش لاقى اتجوز"..بعدها جه سلكاوى وهو مبسوط وقال..."يللا يا جماعة فين الشربات..وفين الأكل والشرب والجاتوهات...يللا عاوزين ناكل بقى"...
مش عارف إيه اللى حصل بعد كده..كل اللى فاكره إنى مربوط بالشاش فى المستشفى أنا وزنكلونى وال3 عرايس والمأذون.. ولما فوقت سألت الدكتور هو إيه اللى حصل لنا ؟...رد عليا الدكتور.."والله ماعارف يا أستاذ..إحنا جات لنا إشارة إن فيه بيت اتهد.. بيقولوا فيه بلدوزر جه وكسر البيت ع اللى فيه.. وكان فيه واحد بيصرخ جوة وبيقول...مييييين...سنية؟"
بقلم: عمرو عكاشة
المحروس هيتجوز!!
شكيت ان في حياته واحدة ست.. تصرفاته مريبة اليومين دول.. بيقف قدام المرايا أكتر مني.. يلمع صلعته ويحط جل على الشعرتين اللي فاضلين.. وبعدين ياخد المازوره ويقيس دوران كرشه قصدي دوران وسطه.. دا غير انه ساعات يحط أغلاها برفان وهو نازل.. واللي زاد وغطى إن الموبايل ما بيفارقهوش لحظة حتى وهو في الحمام.. وكل شويه يجيله ميسد كول وساعات وراها إس إم إس..لا وإيه حجز عند دكتور تخسيس وبقى ليه نظام غذائي يمشي عليه وكل يوم الصبح يديها شوية رياضة في البلكونه بالشورت والفانله.. والعيال في الشارع وهما رايحين المدرسة يتريقوا عليه ويقولوله "هتبرد يا عمو"!
اللي مجنني مش ان فيه واحده ست.. انا اللي مجنني على إيه؟.. إيه اللي هي شايفاه فيه أنا مش شايفاه.. وده اللي طير النوم من عنيا.. وفي يوم رن جرس الباب جيت افتح فاتسرعت.. المحروس قدامي بنيولوك.. لابس باروكه سوده شعرها مسبسب وبنطلون جينز وعليه قميص مشجر قصير ومحزق.. وبدل النظارة عدسات زرقا!
الدلوعة وام قويق
هنا ولعت وقررت اراقبه.. وفعلا اتنكرت ومشيت وراه لغاية ما دخل كازينو على النيل ولقيته قعد على ترابيزة لوحده.. أخدت الترابيزة اللي جنبه.. مفيش ربع ساعة وكانت هتجيلي سكتة قلبية.. لقيت بنت زي القمر تيجي حاجة وعشرين سنة بتسلم عليه وبتقول له بدلع ومياصة " اتأخرت عليك يا حبيبي؟".. وهو أول ما شافها راح واقف على حيله وهو بيقولها "ولا يهمك يا حبيبتي".. والأنقح لما قالت "انت بقيت واااااو..محدش قالك كدا..المدام ما خدتش بالها من التغيير الهايل ده".. راح المحروس نافش نفسه زي الديك الرومي وهو بيقولها "قصدك أم قويق.. يا شيخة افتكري لنا حاجة عدله"!.. شربت لي ييجي شفشق لمون وانا باسمع الحوار الهايل لما قلبت جد وهي بتسأله...
- "وعملت إيه في موضوعنا"
- "أنا اقدر ارفضلك طلب"
- "يعني هتكتبلي الفيلا باسمي"
- "من غير كلام"
- "والعربية"
- "آخر موديل وحياتك"
- "طب امتى؟"
- "بعد الجواز على طول"
- "لا.. أنا كده أزعل.. قبل الجواز"
- "مقدرش على زعلك.. بس بشرفي بعد كتب الكتاب"
- "امتى؟"
- "الخميس الجاي"
- "هايبقى أجمل يوم في حياتي"...
الصدمة خلتني مش شايفه قدامي.. بقى يبيعني أنا عشان دي!!.. هي حلوة صحيح بشكل يفرس بس هو أنا كنت ضربته على إيده.. خسيت لي في اليومين دول النص من كتر التفكير..أقلبها يمين أقلبها شمال مش نافعة وهو مابقاش يقوم تقريبا من قدام المرايا.. لغاية ما جه يوم الخميس.. لبس عريس وحط أغلاها برفان ونزل جري وانا ما نطقتش...
وصل ومعاه المأذون والشهود وشوية أصحاب.. وهي كانت على سنجة عشرة.. قالها "جاهزه يا حبيبتي".. راحت راده بدلع "جيبت الورق؟".. قالها وهو عمال يسبل بعنيه "كل حاجه مع المأذون يا روحي"..ردت عليه " أنا قصدي ورق الفيلا والعربية".. قعد يسبلها برده وهو بيقول "طبعا أول ما نكتب الكتاب"...
هنا اتقلبت سحنتها وصوتها فجأة وهي بتقوله: " لا يا حبيبي احنا ما اتفقناش على كده".. عنيه تقريبا هنجت وهو بيقولها " أصل الورق مش جاهز دلوقتي.. وبعدين هو انت مش واثقة في حبيبك"...هنا انفجرت في وشه ولا أنبوبة بوتاجاز وهي بتقوله "يا كداب يا خاين يا غشاش.. اتجوزك على إيه يا شحات.. ما تكونش صدقت نفسك يا روميو عصرك.. انت إيه مابتبصش في المرايا..مش لما تصرف على بيتك الأول تبقى تفتح بيت تاني.. كتر خيرها اللي فتحت عنيا على حقيقتك قبل ما تقع الفاس في الراس".. رد وهو مخضوض "هي مين دي؟"...هنا ظهرت قدامه وانا باقول "أم قويق"!!!
بقلم: رانيا صالح