كنباوى ينظر باندهاش لكنباوية المنهمكة فى مشاهدة أحد البرامج على إحدى القنوات الفضائية وعدم شعورها بمجيئه من عمله.. كنباوى: إيه يا كنباوية للدرجة دى البرنامج ده واخدك بالشكل ده لدرجة إنك ماحستيش بيا وأنا راجع من الشغل؟ كنباوية: معلش يا خويا يقطعنى أصل الراجل ده حتت سكرة كنباوى: مين الراجل ده يا كنباوية؟ كنباوية: ده سى براهيم عيسى كنباوى: ومين سيكى إبراهيم عيسى ده؟ كنباوية: هو فيه حد فى مصر ما يعرفش سى براهيم عيسى؟ كنباوى: أنا يا ستى جاهل وماعرفهوش كنباوية: براهيم عيسى ده كاتب وصحفى معروف كان رئيس تحرير جريدة الدستور اللى السيد البدوى بتاع حزب الوفد اشتراها من صاحبها بأمر من مبارك وحكومته علشان يأمنوا شره أصله كان مابيخافش من حد ولسانه وقلمه كانوا عاملين زى الفرقلة ما كانش بيهمه لا مبارك ولا غيره كنباوى إيه ياكنباوية الكلام الكبير دة كله وعرفتى منين كل ده؟ كنباوية: عرفته من قعدتى قدام البرامج السياسية والتحليلات ودخولى ع النت كنباوى: طبعا مانتى فاضية ومش شايلة هم مصاريف العيال والأكل والشرب زيى خليكى انتى للسياسة والعلام وخلينى أنا أجرى زى التور على أكلكم وشربكم قوليلى بقى سى إبراهيم عيسى ده بيقول إيه؟ كنباوية: بيقول ياخويا إن الإخوان بيكدبوا علينا كنباوى: إزاى يا كنباوية ؟ كنباوية: أنا أقولك يا كنباوى، لما النظام سقط كان عندنا احتياطى نقدى 36 مليار دولار كنباوى: يعنى إيه يا كنباوية احتياطى نقدى؟ نورينى وأنا عامل زى الجاموس الأبيض كده كنباوية: يعنى الدولارات اللى بنصرف منها على الواردات يا كنباوى يعنى الحاجات اللى بنستوردها زى القمح والسولار وخلافه، فى حكم مرسى ال 36 دول وصلوا 13 مليار دولار فى 7 شهور بس سى براهيم بيقول إيه بقى بيقول إن الرقم ده غلط لأن الإخوان حسبوا فيها غطاء الدهب اللى تقديره 4 مليار دولار والمفروض الغطاء ده مايتحسبش لأنه زى مصاغ البيت بيتشال لوقت عوزة أو وقت ضيقة أو زنقة، ده غير إن الإخوان حسبوا فيهم 2مليار ودائع ودول برضه المفروض مايتحسبوش يعنى على حسبة سى براهيم عيسى يبقى اللى عندنا من احتياطى نقدى هو 7مليار دولار بس، ومرسى بيكدب علينا علشان الناس مش فاهمة حاجة، ده غير إن ديوننا وصلت ل 12 مليار جنيه مصرى و 20مليار دولار، يعنى الحياة فى مصر بقت طين يا كنباوى. كنباوى: احتياطى نقدى وغطاء دهب وديون وواردات إيه دة كلة إيه ده كله؟ ده الواد ابنك اللى معاه دبلون مايعرفش الكلام ده!ده أنا كده اتباهى بيكى ياككنباوية قدام صحابى يسلم مخك. كنباوية: العلام حلو ياخويا مش كفاية جهلنا خلانا ننتخب الإخوان فى الصناديق ولو كنا نعرف المستخبى كنا ادينا صوتنا لأى حد تانى غيرهم الكدابين دول بس إن عادت تعود غلطة وعدت دول لبسونا فى الحيطة يا كنباوى كنباوى: إية عندك تانى يا كنباوية؟ كنباوية: سى براهيم بيقول إن مرسى بيشحت علينا وأنه خد من قطر 4 مليار وخد كمان وديعة 2 مليار وماعملوش حاجة أصل قطر دى ياخويا الراعى الرسمى للإخوان ومرسى وبيقول كمان إن مصر محتاجة أول كل شهر 4 مليار دولار علشان نشترى رغيف العيش والأنبوبة بس يعنى بعد شهرين حنعوض فى الأرض ونلحس الحيطة ونكح تراب لو الحكومة دى ما اتصرفتش ومش حتتصرف لأنها ما بتفهمش حاجة حكومة على ما تفرج. كنباوى: لما يجى سى إبراهيم عيسى ده فى التليفزيون ابقى قوليلى علشان اقعد اتفرج معاكى ده باين عليه راجل قلبه على مصلحة البلد راجل جدع. كنباوية: أيوة يا خويا ده راجل العلام بيطق من ورا الكشافات بتاعته عامل زى الفيلسوف كده بحمالة البنطلون الحمرا اللى هو لابسها على طول دى ودمه كمان خفيف وزى العسل وبيقعد يشوط فيهم زى ماكان بيشوط فى مبارك ونظامه قبل كدة. كنباوى: الله ينور عليكى يا كنباوية يا رافعة راسى بعلمك وعلامك ابقى نورى الواد البجم ابنك الكبير ده اللى ماوراهوش حاجة غير معاكسة البنات فى الشارع وعمال يتسكع ع النواصى طول اليوم ويشرب فى سجاير انا اللى بدفع تمنها من شقايا وتعبى وعلى الله يفلح ونلاقيله شغلانة بدل ما هو قاعد عاطل كده بياكل فى اتة محلولة كنباوية: هو لوحده اللى كده يا سى كنباوى ما الشباب كلها زيه بكرة نشوف وش الإخوان النحس ده حيوصلنا لفين كنباوى: ربنا يسترها علينا وعلى البلد. كنباوية: يسمع منك ربنا يا كنباوى.