زهرة البدنجان!! عبد العزيز محمود

-عليا الطلاق بالتلاتة لأستقيل!! انا راجل بشنب ولازم أشيل الشيلة !!!
هكذا قال سيادة الوزير لمعاونيه فصرخوا جميعا كأن عقربا لدغتهم:
-استقالة ايه وبتاع ايه ؟ ده كلام برضه سعادتك !!! هوه احنا عندنا - لا سمح الله - وزرا بيستقيلوا ؟؟؟
-يا جماعة انا المسئول عن اللوحة اللي اتسرقت ولازم استقيل زي الوزرا ما بيعملوا في بلاد بره !!
-هوه جنابك خواجة عشان تعمل زي المهابيل دول!! وبعدين ح تستقيل وتسيبنا لمين؟؟ دا احنا ح نسف تراب من بعدك!!
-يا رجالة انا لازم أتحمل المسئولية ! انا مش اقل من الوزير الياباني اللي استقال لما قطرين بضاعة خبطوا في بعض في هيروشيما!!!!
-يا باشا ده جدع مخه لاسع ومعندوش احساس بالمسئولية عن الرجالة بتوعه !!
-طيب ما هو انا كمان مش اقل من الوزير الانجليزي اللي استقال لما ظبطوه واخد فيللا بلوشي من رجل أعمال !!!
-يا افندم ده راجل عبيط وأهبل بدليل انه اتظبط !!
-خلاص انا مش اقل من الوزير الدنماركي اللي استقال لما كشفوه ماشي مع واحدة من إياهم وبيحكي لها أسرار الدولة!!
-يا باشا جنابك كوم!!! والعالم اللاسعة دي كوم تاني!! ومش معقولة يعني تكسر بقلوب حبايبك عشان لوحة بتلاتة تعريفة!!
-يا جماعة دي لوحة تمنها 150 مليون دولار!!! فاهمين يعني ايه 150 مليون دولار؟!!!
-انشا الله تكون بمليار دولار!! احنا مستعدين نعمل اكتتاب شعبي ونجمع تمن اللوحة!! المهم معاليك ما تستقلش!!
-طيب ويمين الطلاق اللي رميته!!! يعني يرضيكم أطلق الولية وأشحتف العيال!! انتو ازاي تخلوني اعمل حاجة زي كده بعد العمر الطويل ده!
-لا حول الله يا ولاد!! واضح ان الراجل مخه ضرب من الخضة!! يا جنابو هو انت متجوز أصلا عشان تطلق!! وبعدين همه فين العيال!؟؟؟ احنا مش شايفين حواليك ولا عيل!!!!!
-طيب والمسئولية السياسية!! يا رجالة انا مش ح اقدر أورى وشي لزمايلي في مجلس الوزرا!! ده انا فضيحتي بقت بجلاجل !!
-ولا فضيحة ولا دياولو !!! هوه حد فايق لحد النهاردة؟؟ ما كل الوزارات فيها بلاوي متلتلة وعمرنا ما شفنا وزير استقال من نفسه!!
-طيب والرأي العام؟!! يا جماعة انتو كده بتحرجوني قدام الرأي العام!
-يا باشا صلي ع اللي ح يشفع فيك!! هوه احنا عندنا رأي عام؟؟ ما جنابك عارف انه مولد وصاحبه غايب !
-أنا مش عارف أنا ليه بس بأضعف قدام كلامكم الناعم المدهون بزبدة ده!!! خلاص آدي الاستقالة وقطعناها !!!! مين بقا النوبة دي اللي ح نشيله القضية ؟؟!!!!!
-وهوه فيه غيره سعادتك!! رئيس قطاع اللوحات البدنجانية والرجالة بتوعه!! جنابك ح تروح النيابة وتقول انهم همه المسئولين عن سرقة اللوحة!!
-طيب ما انا كمان مسئول معاهم!! مش انا برضه الوزير!!
-يا ريت سعادتك تبطل تشوف افلام اجنبي!!! وبعدين هي دي اول قضية والا اول قضية!!! فاكر معاليك الجماعة اللي اتحرقوا بجاز في الندوة اياها !!! مش المسئولية اترمت يومها ع الماس الكهربائي؟؟
-تمام!! وانا فاكر كمان يومها اني اعتكفت في البيت وهددت بالاستقالة لغاية الماس الكهربائي ما اتقدم للمحاكمة واتحكم عليه بالاعدام!
-وفاكر جنابك الناس وقتها كانت زعلانة عليك ازاي وبتعيط بدل الدموع دم؟؟؟ وخصوصا لما قلنا انك مستهدف من الموساد !!!
-ايوه والله دي كانت حكاية ليها العجب!! دي حتى المظاهرات اللي طلعت كانت عايزاني ارجع عن الاستقالة ونسيت تماما الجماعة اللي اتحرقوا !!!
-شفت سعادتك ازاي احنا شعب طيب وعلى نياته وبينضحك عليه يوماتي؟؟؟ عشان كده لازم تنسي خالص موضوع الاستقالة عشان ربنا يكرمنا!!
-بس يا جماعة دي لوحة زهرة البدنجان ؟؟؟ والعالم كله مهتم بالحدوتة دي!!!
-وهوه العالم يقدر يعملنا ايه يعني؟؟؟! المهم القضية يشيلها رئيس القطاع ورجالته !! وجنابك تفضل في الامان عشان تقدر تدي !!!
-طيب ولو رئيس القطاع مالوش علاقة باللي حصل! أروح انا فين من ضميري؟؟!! يا اخوانا انا راجل متحضر وضميري بيوجعني وما اقدرش اعمل حاجة زي كده!!!
-يا باشا ما تقلقش!! الجدع مسئول عن اللوحة اللي اتسرقت زي جنابك بالظبط!! بس هوه اللي ح يشيل القضية وجنابك تفضل متربع ع الكرسي! واحنا نفضل قاعدين معاك نغرف من أنجر الفتة ده اللي مالوش صاحب !!!
-وتفتكروا الفيلم الهندي ده حد ح يصدقه ! يا رجالة دي خامس مرة اللوحة دي تتسرق وفي كل مرة نحط نسخة تقليد زيها بالظبط ونقول اننا رجعناها!!
-خلاص سعادتك النوبة دي نطلع إشاعة إن اللوحة اتحرقت عشان الصراعات الموجودة في قطاع اللوحات!!! وبكده العملية تهيص وما حدش ح يعرف ايه اللي حصل بالظبط!!!
-يا ولاد الأيه!! ده انتو طلعتوا حكاية!! بس انا برضه قلقان وخايف النوبة دي تكون غير كل مرة!!!
-يا جنابو جمد قلبك ودوس ولا يهمك!!! دي حتة لوحة مالهاش لازمة!!! والبلد مش ممكن تخسرك عشان حاجة تافهة زي كده !!!
-عندكم حق يا رجالة أنا مش ممكن أستقيل عشان حتة لوحة!!! أنا ح أعتكف في البيت وأقول اني زعلان ومكتئب ومنهار لغاية ما تعملوا الشويتين بتوع كل مرة!!!!!