من كان يتخيل ان بوحة بتاع الروبابكيا سوف يصبح نائبا ملو هدومه في البرلمان.... -ادعي لي يا أمه أنا رايح النهاردة أحلف اليمين!! ابنك خلاص بقا سيناتور يا ست الحبايب!! -روح يا ضنايا الهي وانت جاهي يجعل لك في كل خطوة سلامة!! ويعلي مراتبك وأشوفك وزير !!! -ايوه والنبي تدعي لي يا أمه عشان اجيب لك كل اللي نفسك فيه!!! -يحميك لشبابك يا حبيبي !!!مين يصدق يا اخواتي ؟! بوحة بياع الروبابكيا يبقا نايب في البرطمان!!! -يا أمه ده كله ببركة دعواتك ليا!!!! والنبي تدعي لي كمان وكمان !!!! وفي المجلس واثناء حلف اليمين.. -عليا الطلاق بالتلاتة سوف احافظ مخلصا ع النظام الجمهوري واحترم المستور والآنون!! -لحظة واحدة يا بوحة بيه!!! اليمين مش كده!!! وحياة والدك تقرا من الورقة اللي في ايدك!! -معلهش يا باشا أصل انا جاي متحمس قوي وسخن ع الاخر!!! وبعد يومين وفي اجتماع احدى اللجان افتعل بوحة خناقة مع نائب في المعارضة.. -قوم يا جدع من هنا!!! الكرسي ده بتاعي!!! -ما انت شايف يا بوحة بيه القاعة فاضية ومافيش حد غيرنا!!! -باقولك قوم من الكرسي ده أحسن ورحمة ابويا أخلى اللي مايشتري يتفرج !! -خلاص يا عم ما تزعلش!! اتفضل يا سيدي الكرسي !! وفي الجلسة التالية تعمد بوحة توجيه عبارات جارحة بأعلى صوته للمستقلين ... -عيب كده يا أخ بوحة!! ده احنا زملا!!!! -هوه انتو تعرفوا العيب يا عملا يا غجر يا بتوع التلات ورقات!!! -يرضيك الكلام ده يا ريس؟؟!! -لا طبعا ما يرضينيش!! قوم يا بوحة بوس على راس زمايلك وخد بخاطرهم!! -عليا الحرام من بيتي ما انا بايس!!! دول بيكرهوا مصر وانا كمان بأكرههم!!! وفي اليوم التالي لمح بوحة مسيرة سلمية امام المجلس فتوجه اليها خالعا فردة حذائه.... -يلااااااااااااا يااااد منك له!!! اتكلوا على الله وغوروا روَحوا على بيوتكم !!! -يا سيادة النايب احنا عمال غلابة اترفدنا من الشغل واترمينا ع الرصيف ومش لاقيين ناكل!! -انشا الله تتحرقوا بجاز!! ولما انتو تاكلوا أمال انا واللي زيي نعيش ازاي !!!؟؟ -سايق عليك النبي يا سعادة النايب تكلم لنا حد من البهوات الكبار !!! احنا نايمين ع الرصيف بقا لنا شهرين!!! -انشا الله تناموا ع الرصيف العمر كله!! هوه حد فاضليكم اليومين دول يا غجر !!!!!! وبعد ساعات تم استدعاء بوحة الى مكتب واحد مهم... -واضح يا بوحة انك واد جامد ....وييجي منك!! -سعادتك بس جربني!!! دا انا واد عترة واعجبك ع الآخر يا جنابو!!! -خلاص يا بوحة احنا ح نضمك لفرقة المصارعة الحرة اللي في المجلس!! وانشا الله تبيض وشنا !! -مش حا تندم سعادتك دا أنا واد لهلوبة!!!! وفي الجلسة التالية قاطع بوحة رئيس حزب معارض أثناء حديثه .... -ما تحترم نفسك يا جدع وتترزع مكانك !! والا هيه رزالة وبواخة وتلقيح جتت!! -ارجوك يا ريس تحميني من بوحة!!! ده لسه ضاربني النهاردة الصبح بكتفه بره القاعة!!!! -ما تهمد شوية يا بوحة !! انت كل يوم والتاني ح تعمل لنا غاغة في الجلسة؟؟!!! -يعني عاجبك ياريس كلام عجوة بيه؟؟؟ الراجل الضلالي عمال يشتم في مصر!! -يا سيدي الراجل بيتكلم عن سياسة الحكومة!! وده كلام عادي خالص وما فيهوش مشكلة !! -عادي ازاي؟؟؟ ده كلام واحد مأجور وعميل ولو سعادتك ما منعتوش من الكلام انا اللي ح امنعه !! -لالالالالالا دا انت زودتها خالص يا بوحة!!! انت فاكر نفسك قاعد فين؟؟؟....في المدبح ؟؟ ثم التفت رئيس المجلس الى شخصية بعينها في القاعة.. -يا جماعة ما تشوفوا لكم حل في الراجل بتاعكم ده!! انا لو استمر الوضع على كده ح ارفع الجلسة!!!! -معلهش ياريس!!! ده بوحة!!! وسعادتك عارفه!!... مخه على قده!!! وفي مكتب واحد ثان مهم ... -الظاهر الواد بوحة ده طلع حكاية وح ينفعنا في الخناقات!!! -ما خلاص سعادتك احنا ضميناه لفرقة المصارعة الحرة!! -لالالالالالالا مش كفاية!!! الواد ده ييجي منه جامد !!! انا بأفكر له في حاجة تانية !! -ح تديله ايه تاني سعادتك .. دا مستواه ما يجيبش اكتر من كده!!! -بالعكس ده واد كله مواهب!! وانا بأفكر أضمه للجنة الانتخابات!!! بعدها مباشرة وفي اجتماع كان يناقش ظاهرة الوقفات الاحتجاجية.... -احتجاجية ايه وملوخية ايه في سنتكم السودة دي!! عليا الطلاق بالتلاتة اللي ح يعمل وقفة احتجاجية لازم ينضرب بالنار!!! -يا بوحة بيه عيب كده انت نائب محترم مش بلطجي ولا عربجي!!! -انا برضه البلطجي يا بتوع المظاهرات يا عملا!!! انا با طالب من فوق هذا البانبرز بضرب اي مظاهرة بالرصاص الحي !!!! البلد مش ناقصة!! -بالذمة فيه نائب منتخب من الشعب يطالب بضرب الشعب بالنار!!؟؟ يا راجل اقعد جاتك داهية تاخدك هوه احنا عايشين في ايام الاحتلال الانجليزي؟؟؟!! ومع استمرار خناقاته في المجلس اصبح بوحة ضيفا دائما على كل القنوات الفضائية... -ممكن تقول لنا يا بوحة بية ليه سعادتك ضربت النائب مخيمر اللطخ بالبوكس في الشارع ؟؟؟ -أبدا ده نايب معارض وكان لازم يتربى !!! -ايوه..بس دا انت كسرت له ايده ورجله وطيرت له نص سنانه!! -وماله انا عملت كل ده عشان مصر اللي خيرها علينا كلنا!!! يا حبيبتي يا مصر يا مصر!!! -طيب وموقفك من المظاهرات وضرب النار !! -يا جماعة لازم تعرفوا ان ده مش رأيي لوحدي!!! فيه ناس كتير زيي شايفة ان ضرب النار هو الحل !!!! وفي اجتماع حزبي مغلق... -يا افندم بوحة ده عامل لنا فضايح مالهاش اول من آخر!! ولازم يتحول للتحقيق - بالعكس يا باشا!! ده واد جدع وعترة وييجي منه!! ويا ريت كل النواب بتوعنا يبقوا زيه!! فقال المسئول الحزبي الكبير... -يا بهوات الحزب مالوش دعوة بالعمايل السودة بتاعة بوحة!!! احنا خلاص اصدرنا بيان بنقول فيه اننا ضد ضرب المظاهرات بالنار!! وفي الجلسة التالية ادخل بوحة في صدام مع المنصة.. -ياريس انا طالب الكلمة بقا لي ساعتين وجنابك مش عايز تديهالي!! -يا بوحة لسه دورك ما جاش!! قدامك 250 عضوا طالبين الكلمة!!! -عليا الحرام من بيتي أنا لو ما اخدت الكلمة دلوقتي، برج من نافوخي ح يطير.. ومش عارف ممكن اعمل ايه؟؟!! -جرا ايه يا سي بوحة؟؟؟؟ انت نسيت نفسك والا ايه؟؟ انا ممكن اطلع قرار حالا بتحويلك للجنة القيم وأسقط عضويتك!!!! فانهار بوحة واخذ يبكي كالعيال : -سايق عليك النبي ياريس تسامحني!! انا مش عارف ازاي عملت كده!! انا عيل يارجالة ايوه انا عيل وراكبني الغلط من فوقي لتحتي !! وفي اليوم التالي وفي مكتب واحد آخر مهم دخل بوحة معركة جديدة... -ماهو انا ح اسافر يعني ح اسافر مع الوفد اللي رايح كوالالامبور !!! ازاي بعد كل اللي عملته ده مش عايزين تسفروني!! -ايوه يا بوحة بس انت لا بتعرف انجليزي ولا فرنساوي!!! ولا حتى عربي!!! -عليا الطلاق بالتلاتة أنا لو ما سافرت ح أقلع لكم ملط في المجلس واعمل مليون مصيبة!! -طيب اهدا وروق كده واوعدك انك ح تسافر في الرحلة اللي بعدها!!! بس بلاش الجلاليب الكحيانة دي ...وحاول تشتري لك كام بدلة!!!! وفي لقاء جماهيري بدائرته النائية تحدث بوحة بفخر عن خناقاته داخل المجلس... -يعني احنا انتخبناك يا بوحة بيه عشان تتخانق مع زمايلك والا عشان تجيب لنا حقوقنا؟؟؟ -امسكوا الواد العميل المأجور المندس ده!!! ..انا عايزكم توضبوهولي ع الآخر!!! وفي طريق عودته الى القاهرة بسيارته المرسيدس ..... -على يمينك يا اسطى برعي وقف عند اليافطة اللي جاية دي!! -خير يابوحة بيه سعادتك عايز ايه من اليافطة؟؟؟؟ -انزل يا برعي بلاش لماضة أحسن اقطع عيشك!!! وهات لي الشوالين الكبار وجركن الجاز اللي في شنطة العربية!! -ما تقولي بس سعادتك ناوي على ايه؟؟ -ابدا انا ح أولع في طلبات اهالي الدايرة لاني مش ناقص خوتة ووجع دماغ!!!! وفي مساء نفس اليوم بكباريه النجوم السهرانة .... -أمال البت سوسو الرقاصة ما بترقصش ليه النهاردة ؟؟! -أصلها تعبانة يا بوحة بيه وعندها صداع وقاعدة في اوضتها!! -تعبانة يعني ايه ؟؟؟ هيه مش عارفة اني بآجي الكباريه كل ليلة عشانها؟؟؟؟ قولها تبطل مياصة وتنزل ترقص احسن وشرف امي أقفل لكم الكباريه !!! وفي ساعة متاخرة من الليل .... -اطلع بينا يا اسطى برعي ع الباطنية!!! انا مصهلل الليلة ومش عايز أرَوح !!! -ماخلاص يا بوحة بيه سعادتك متظبط ع الآخر!! والباطنية خلاص ماعادش فيها ولا غرزة!! -ياااااااد اطلع ع الباطنية وما تبقاش غلباوي انا عندي اجتماع مهم بكرة ولازم اعمل دماغ!! وفي اليوم التالي دخل بوحة في خناقة جديدة تحت القبة بعد ان طالب نواب المعارضة بالتحقيق معه بتهمة اهانة الشعب المصري والتحريض على ضرب المصريين بالنار .. -لاااااااده انتو عملا بجد وخونة وشغالين لجهات اجنبية ولازم تنضربوا كلكم بالنار!!!! -احنا برضه اللي عملا يا بتاع الروباكيا يا بلطجي يا هربان من التجنيد ياحرامي !!! -عليا الطلاق بالتلاتة لأسيح دمكم واحد واحد!! انتو فاكرين نفسكم ايه؟!! ده الواحد فيكم ما يساويش تمن الرصاصة اللى ينطخ بيها!!! وهنا فوجئ الجميع ببوحة يخرج من جيب السديري مطواة قرن غزال ثم يجري بأقصى سرعة في اتجاه مقاعد المعارضة والشرر يتطاير من عينيه فهجم عليه نواب الاغلبية وخطفوا منه المطواة في آخر لحظة!!! وبعد اسبوع في بهو المجلس الموقر.... -سمعتوا آخر خبر يا بهوات!! السيناتور بوحة طلع مزدوج الجنسية ومزور شهاداته الدراسية وهربان من التجنيد!!!!
