الخناقة ..!! عبد العزيز محمود

لم يكن خلافا عاديا مثل كل مرة وإنما كانت خناقة حامية دوت اصدائها في جنبات البيت الكبير ....
-معقولة يا امه أبويا يكتب الغيط لأخويا الصغير ويطنشني مع اني الكبير والعاقل ؟؟!!
-معلهش يا ضنايا ما هو برضه أخوك والدم عمره ما يبقا ميه!! وبعدين ما تنساش إن ابوك كتب لك الطاحونة!!
-طاحونة ايه وبتاع إيه؟؟!! وهيه الطاحونة يا حاجة توازي الغيط اللي الدنيا كلها طمعانة فيه وعايزة تلهفه ؟؟!!
-يا حبيبي أكيد ابوك شايف المصلحة في كده!!!! وعموما لو مش عاجبك التقسيمة أهو الحاج نايم في أوضته جوه اُدخل وكلمه!!
وفي الأوضة......
-اصحا يا آبا أنا عايزك في كلمتين ضروري!! يا حاج اصحا اُمال دي الساعة داخلة على أربعة العصر!!
-يا فتاح يا عليم يارزاق يا كريم!! يعني الواحد ما يعرفش ينام ويرحرح في البيت المنيل ده!! نعم يا سيدي عايز ايه في يومك اللي مش فايت؟!
-الغيط يا آبا!!! مش معقولة يعني تكتبه لأخويا الصغير وتديني الطاحونة!!؟؟
-تاني ح تقول لي الغيط والطاحونة!! والطاحونة والغيط!!! احنا مش خلاص انتهينا من الموضوع الهباب ده!! وقرينا الفاتحة!!!؟؟؟
-بصراحة يا آبا انا وعيالي ونسايبي وأصحابي حاسين بالظلم !! وجنابك ما يرضيكش اني أتظلم وحسك في الدنيا!!
-يا ابني ما حدش يستجرى يظلمك!! بس انا كتبت لك الطاحونة حسب رغبتك عشان انت مش عايز وجع دماغ!!!! وصدقني أنت طلعت عاقل والطاحونة ح تخليك سلطان زمانك!!!
-معلهش يا حاج أنا غيرت رأيي وعايز الغيط!! ما هو مش معقولة أبقا الكبير وآخد صابونة!؟؟
وهنا دخل الابن الأصغر الى الغرفة ثائرا...
-عليا الطلاق بالتلاتة ما حد ح ياخد الغيط إلا على جثتي!! ما احنا خلاص اتفقنا وقسمنا كل حاجة والا هوه لعب عيال والا لعب عيال ؟؟
-طيب طلاق على طلاقك ماحد واخده غيري!! دا أنت حيالله الصغير!! ومش من حقك تاخد فتفوتة قبل اخوك الكبير ما ياخد نصيبه!!
-انشا الله يا شيخ أعدم عيالي لو سبت الغيط لحد ..حتى لو كان أبويا!! ايه؟؟... هوه أكل وبحلقة؟؟ ما انت خلاص اخترت الطاحونة وقرينا الفاتحة!!
-انا بقا يا معلم عيل ورجعت في كلامي!! ولا يمكن اسيبك تلهف الغيط لوحدك تبرطع فيه انت واصحابك!! وآخد انا الطاحونة دي اللي عاملة زي الخازوق!!
وهنا تدخلت الام في محاولة للتهدئة ...
-خلاص يا حاج اكتب لهم الغيط همه الاتنين وفض الاشكال!! وأهو الغيط كبير وواسع وممكن يتقسم عليهم !!
-غيط ايه يا ولية ده اللي يتقسم ؟!!! دي كل حاجة ممكن تتقسم على اتنين الا الغيط ما ينفعش يمسكه غير واحد!!!عشان المعاملات الرسمية والضرايب واللذي منه!!!!
-خلاص يا اخويا اعمل قرعة بينهم!! وكل واحد ياخد اللي ربنا كتبهوله!!! ايوه ..أنا بأقول ما فيش احسن من القرعة!!!
-قرعة ايه يا وليه ومصيبة ايه؟؟!! هيه جاموسة ح نقسمها؟!! يا حاجة ده غيط.. فاهمة يعني ايه غيط؟!!
وهنا اعترض الولدان على فكرة القرعة وامسكا في خناق بعضهما فصاح الاب بصوت كالرعد..
-انتو ح تتخانقوا قدامي من غير احترام ولا خشا!! جاتها ستين نيلة اللي عايزة خلف!! أنا خلاص قلت كلمتي والغيط ما حدش ح ياخده غير الواد الصغير!! وانت يا شحط كفاية عليك الطاحونة!!
-خلاص يا آبا ماتزعلش نفسك كده..صحتك بالدنيا!! بس سايق عليك النبي تقول لي بأمارة ايه تديله الغيط واطلع انا من المولد بلا حمص!!
-عشان أخوك يا فالح واخد دبلوم زراعة وبيعرف يتعامل مع البهايم والأنفار والحمير اللي في الغيط!!وانت ولامؤاخذة مالكش في الكلام ده بعد ما خبت واخدت دبلوم التجارة!!
-ما حصلش!!! انا كمان بأفهم في الزراعة وباعرف أزرع وأقلع ولا أي فلاح قراري!! ما تتكلمي يا امه وتقولي حاجة !
وهنا قالت الام للاب:
-خلاص يا حاج راضي الكبير بحاجة!! ما هوه كمان ضناك ومن لحمك ودمك!! خلينا نخلص في اليوم ده اللي مش فايت!! والا انت عايز تشمت العدوين فينا؟!!
-أراضيه بايه بس ؟؟؟!! هوه عاد فيه حاجة اديهاله بعد ما قسمنا كل حاجة!!
-ما تديله يا اخويا الساقية البحرية!! واهي الساقية ع الطاحونة ممكن يفتحوا له البيت ويدلعوا له العيال وامهم!
-عليا الحرام من بيتي ما انا مديله غير الطاحونة!! ولو مش عاجبه التقسيمة بتاعتي يضرب دماغه في الحيط!!! والباب يفوت جمل!!
وهنا صاح الابن الاكبر باكيا:
-ايوه قول كده يا حاج!!! ما انت من زمان بتفضله عليا وتدلعه وتهشكه وتجيب له حاجات حلوة من البندر وتديله اللي هوه عاوزه!! ايوه الحكاية واضحة زي الشمس والواد عرف ازاي يبلفك ويضحك على عقلك!!!
-اخص علي كده!! بقا انا يا اااااد حد يقدر يبلفني ويضحك على عقلي؟!! هأأأأأأأوو ده أنا يا مغفل أبلف مديرية!!
-سامحني يا آبا أنا مش عارف الكلام الدبش ده طلع من بُقي إزاي!! بس والله العظيم تلاتة ده حرام!! مين يقول الصغير يلهف كل حاجة والكبير ياخد الطاحونة!! في شرع مين الكلام ده يا عالم ؟؟؟ بالذمة ده مش ظلم وافترا؟؟؟
-أيوه ظلم وافترا بس أنا حر في الغيط بتاعي!! وبعدين تلاتة بالله العظيم لو ما بطلتوا تناكفوا مع بعض لأحرمكم انتو الاتنين من الميراث وأكتب الغيط والطاحونة لصاحب نصيبهم!!!