التنظيم السري ! عبد العزيز محمود

لم يكن اختيار العجلاتي أمينا للتنظيم السري في المصلحة محض صدفة... ولم يكن هذا التنظيم ارهابيا لا سمح الله أو خارجا على القانون وإنما كان الابن الشرعي لما كان يعرف زمان بالتنظيم الطليعي!
-مبروك يا عجلاتي انا جاتني الأوامر من فوق انك من النهاردة ح تبقى أمين عام التنظيم!!
-معقولة سعادتك؟؟ دي أكبر مفاجاة سمعتها في حياتي !!! يا سلام ياولاد فعلا دعا الوالدين مافيش أحسن منه!!!
-يا عجلاتي انت تستاهل الأمانة من زمان!!! وكفاية تقريرك الاخير في البدنجاني بيه ده كان حكاية!!!!!
-يا افندم ده تقرير عادي كتبته بصباع رجلي الصغير وأنا نايم!!! وحتى ساعتها ما كنتش متغطى!!!
-ما هي ثقتك بنفسك وقوة شخصيتك هي اللي أهلتك للموقع الجديد !! شد حيلك يا عجلاتي المستقبل بقا مفتوح ع الضرفتين قدامك!!!
وفي اليوم التالي عقد العجلاتي اجتماعا طارئا لأفراد التنظيم ..
-لازم تفهموا ان الشغل معايا غير الشغل مع ابو طويلة الله يرحمه!!! أنا محتاج لناس بتفهم مش حمير بتنهق!!
-كان فين الكلام ده من زمان!!! ربنا يكفيك يا عجلاتي بيه شر ولاد الحرام ويخليك للتنظيم!!....مين يصدق يارجالة اخيرا التنظيم مسكه واحد بيفهم مش حمار حصاوي!!
-مش عايز كلام كتير!! انا خلاص اخترت الخرتيت والدهل والسهن وابو شامة على جبينه يساعدوني في العمليات!!!
فقال الآخرون ومشاعر الغيرة تحرق أكبادهم.....
-خير ما اخترت ياعجلاتي بيه دول فعلا الخٌلاصة !!! ربنا يحميكم لشبابكم يارجالة ويخليكم لبعض!!!ياسلام يا ولاد تقولشي كمبيوترات ماشية ع الارض!!!!!
-من النهاردة وطالع انا عايز تقارير صاحية وبتلعلط !!! عايز البلاوي والموضوعات اللي انتو فاهمينها!!!!
فاقترح افراد التنظيم على العجلاتي توزيع تقرير نموذجي من تقاريره لدراسته والاستفادة منه....
-والله فكرة!!! وأهي فرصة تتعلموا حاجة مفيدة بدال ما انتو قاعدين تقطعوا في بعض !! جاتكم ستين نيلة تاخدكم!!!
وبعد توزيع التقرير المطلوب تطايرت التعليقات:
-وماله التقرير كده خطه زي نبش الفراخ!! ومش فاهمين منه ولا كلمة!!! ده زي ما يكون هيروغليفي!!
-معلهش يارجالة اصل أنا متعود أكتب تقاريري بالشكل ده عشان لو وقعت في ايد حد غريب ما يعرفش يقراها ولا يفهمها!!!!
-طيب امال احنا ح نقراه ازاي بس سعادتك؟؟؟
-بكرة تتعودوا علي الخط ده لأن كل التعليمات حتجيلكم بعد كده بنفس الخط!!! قوم يا خرتيت اقرا التقرير!! انت الوحيد اللي فاهمني!! فوقف الخرتيت يتهته..
-أنه في يوم الاربعاء الموافق 13 منه نما الى علمي ان البدنجاني بيه اتخانق مع الست مراته لأنه كان عايزها تطبخله محشي ورق عنب وهيه طبخت له محشي كوسة !!!وبعدين الخناقة كبرت والبدنجاني بيه بات ليلتها بره البيت!!!
-ايه الكلام الفارغ ده!! معقولة ده تقرير والا كلام مصاطب !!!
-الحيوان اللي مش عاجبه التقرير بتاعي يقف ويوريني وشه!! هوه انت يا برعي يا وش المصايب!!! طيب اوقف ووشك في الحيط لغاية ما اقولك ترجع مطرحك!!!
فوقف الترباس وقال: يا افندم برعي عنده حق!! بذمتك تقرير زي كده ح يفيد التنظيم بايه؟؟؟!
-طيب اوقف يا ترباس جنب برعي وايديك لفوق..ربنا ياخدكم انتو الجوز ويريحني منكم!!
ثم التفت العجلاتي لأفراد التنظيم قائلا:
-شوفوا يارجالة اكبر غلطة بنقع فيها اننا نستهتر بالمعلومة!! لازم تعرفوا إن اي خبر مهما كان تافه وعبيط وأهبل ومالوش لازمة ممكن نحلله ونطلع منه بحاجات جامدة ما تخطرش على بال حد!!!
-ازاي يعني سعادتك!!!
-هوه انا فاتح مدرسة لمحو الامية !! ما تشغلوا مخكم شوية وتحاولوا تقروا اللي ورا السطور!!
فقال الخرتيت : واضح سعادتك من التقرير ان علاقة البدنجاني بيه بالست مراته مش ولابد!!
-برافو!!! طيب وليه علاقته بالست حفيظة مش تمام!!
فقال ابو شامة على جبينه: واضح سيادتك ان فيه واحدة تانية في حياته أو مزاجه مختل حبتين وماشي في سكة غلط او اتجنن وجات له حالة نفسية!!! ويمكن عيان ولامؤاخذة !!
-هايل!! طيب وايه تحليلكم لموضوع المحشي؟؟؟؟!!!!!
فقال السهن: واضح سعادتك ان الست مراته عايزة تجننه عشان كده ما طبختلوش ورق العنب اللي بيحبه!!! وعملت له الكوسة اللي مابيطقش ريحتها !!!!
-عظيم!!! طيب وتفسروا بايه.... بياته برة البيت !!
فقال الترباس: يمكن البدنجاني بيه جنابك واخد شقة في السر وعاملها استراحة او متجوز واحدة تانية عندها شقة او بات ليلتها عند حد من اصحابه او قرايبه أو راح لوكاندة!!!!
-عال قوي!! واضح اننا ح ننجز في الملف الهباب ده اللي اتفتح ومحدش عارف يقفله !!!
-ايوه سعادتك بس التقرير مش مدينا اي معلومة اضافية!!
-ما هي دي الغلطة التانية اللي كلنا بنقع فيها !! لازم تعرفوا يارجالة ان شغلنا في التنظيم جماعي مش فردي !! يعني ماينفعش اعتمد بس على تقرير كتبه ابو شامة على جبينه!! لازم كمان الخرتيت والدهل والسهن والتريللا وكل واحد فيكم يكمل بمعلومة جديدة لغاية ما تتضح الصورة!!!
-يا سلام سلم يا ولاد!!! أهو كده الشغل والا بلاش!!! ده احنا بعون الله ح نبقا أجدع من التنظيم الطليعي!!
-يا رجالة احنا صورة بالكربون من الطليعي!!! بس الفرق الوحيد ان الطليعي كان شغال يدوي واحنا شغالين اتوماتيك!!
وفي اليوم التالي صدرت الاوامر بنزول مهيطل والطربوش والبلطجي لاستكمال ملف البدنجاني بيه ميدانيا...
-يعني معقولة سعادتك نسيب مكاتبنا وننزل نشتغل في الجو الملهلب ده!! يعني ناس متدلعة وقاعدة في التكييف وبتاكل آيس كريم !!! وناس بتتنطط في الاتوبيسات والميكروباسات وماشية على رجليها في عز الولعة!!
-مين قال كده!؟؟ كله ح يشتغل في الولعة !! أنا ما عنديش خيار وكنتالوب!!!
-ماتشغلنا بالليل سعادتك وتاخد فينا ثواب أهو الجو بيكون أرحم شوية!!!!
-انتو ح تشتغلوا ليل نهار زي ما أنا عايز!!! واللي مش عاجبه الشغل يوريني عرض كتافه ويبقا يشوف ح نعمل فيه ايه هوه واللي جابوه !!!
وهكذا انهمك الجميع في المتابعة دون اعتراض وانهالت المكالمات على موبايل العجلاتي بيه:
-الحق سعادتك !!! فيه ناس شافوا البدنجاني بيه ليلة خناقته مع مراته طالع بيت الست والدته في الخانكة وهوه شايل لفة فيها اتنين كيلو كباب وكفتة!!!!
-انت متأكد يااااالا !!
-اقطع دراعي سعادتك!!! ده حتى وهوه نازل تاني يوم -البواب بيقول -انه اتكعبل في صفيحة الزبالة بتاعت ام دنجل الخياطة وكان ح يقع من على سلالم العمارة!!
ثم جاءت مكالمة ثانية: الحق جنابك ! البدنجاني بيه طلع تاني يوم من بيت الست والدته ع الحسين وقعد يفطر هناك مع واحد مجذوب اسمه ابو شوال!! وفيه كلام ان المجذوب ده يبقا ابوه اللي مات من خمسين سنة !!!
ومكالمة ثالثة: تمام سعادتك!! البدنجاني بيه رجع من الحسين على بيتهم ورمى على مراته يمين الطلاق وهيه دلوقتي موجودة عند الست والدتها!!!
وخلال ساعات عقد العجلاتي بيه اجتماعا عاجلا لافراد التنظيم ....
-انا كان نفسي يارجالة نرتاح شوية من ملف البدنجاني لولا التقرير اللي جاني من عجوة الساعي بتاعه بيقول ان جنابه كلفه يشترى له من الاجزخانة سم فيران!!!
-طيب واحنا مالنا يا عجلاتي بيه!! ما يمكن الراجل عنده فيران مجنناه في البيت وعايز يخلص عليها!!!
وهنا دخل الشنكوتي بيه المشرف الفني على التنظيم الى القاعة وقال بسخرية مريرة...
-ما قلتلك ياعجلاتي ح يفضلوا طول عمرهم حمير ومش فاهمين حاجة!!
-معلهش سيادتك!! دول عيال جدعان بس يلزمهم شوية وقت وتمرين عشان يتودكو ويبقوا فراودة!!!
فقال الشنكوتي : يا غجر لما البدنجاني يشترى سم فيران يبقا ناوي على مصيبة سودة!!
-قصد سعادتك انه عايز يخلص من الست مراته أو الست حماته أو ينتحر او يسم حد في الشغل !!!
-شفتوا ازاي فيه مليون احتمال ورا الموضوع ده !!!
-يااااااااااه كل الاحتمالات دي؟؟؟ عشان البدنجاني بيه عايز يشتري سم فيران !!
-أمال انتو فاكرين الموضوع تهريج ؟؟؟؟ يا اساتذة انتو في تنظيم!!! ولازم تصحصحوا وتكونوا على مستوى المسئولية!!!
ورغم ان البدنجاني بيه لم يقتل احدا بسم الفئران لكن التنظيم ظل يرصد تحركاته على مدى شهور حتى صدرت الأوامر بالتوقف مؤقتا عن متابعته والتفرغ لمتابعة خناقة الحنجوري بيه وصديق عمره البلعاطي...
-دول اتنين طالعين ع المعاش سعادتك الشهر الجاي!! ح تفرق في ايه يتخانقوا والا يتصالحوا والا يولعوا بجاز؟؟؟!
-الخناقة دي عاملة قلق كبير فوق!! والتعليمات اللي عندي لازم نفهم الحدوتة!!؟؟
-طيب ما فيش سعادتك اي خيط صغير نقدر نمشى وراه !!؟؟
-انا جاني تقرير بالواقعة ع الايميل من أم بدوي سكرتيرة البلعاطي ، قوم يا خرتيت اقرا لنا التقرير وسمعنا صوتك اللي عامل زي صوت الحداية ..
فوقف الخرتيت يتهته: انه في يوم السبت الموافق 31 منه سمعت بوداني اللي حياكلها الدود الحنجوري بيه بيتخانق مع البلعاطي بيه في مكتبه وصوتهم جاب الدور العشرين وبعدين ضربوا بعض بالكراسي !!!
-يادي المصيبة السودة!! الاتنين العواجيز دول اللي عمرهم خمسة وستين سنة الا شهرين لسه فيهم صحة يضربوا بعض ...وبالكراسي !!!
-هوه ده اللي حصل بالظبط واحنا شاكين ان الموضوع وراه مصيبة كبيرة!!!
-واضح سعادتك ان فيه بينهم بيزنس او نهيبة او واحدة من اياهم!!!
-بصراحة يا رجالة انا وصلني طرطشة كلام من الكانتين بتاع المصلحة ان الاتنين مدمنين كلة وانهم بيحبوا فتكات سكرتيرة الشنكوتي بيه !!
-الشنكوتي بيه المشرف الفني ؟؟؟!!!
-هوه احنا عندنا شنكوتي غيره يا غجر!!! وطبعا الموضوع ده واخد اهمية قصوى!! والاتنين دول لازم يتربوا ويكونوا عبرة لمن لا يعتبر!!!
-يا عجلاتي بيه معقولة الاتنين العواجيز دول ح يبصوا لفتكات اللي وشها يقطع الخميرة من البيت!!؟؟؟
-انا مش عايز غباوة وكتر كلام !!! المعلومة واضحة واكيدة ونظرا لحساسية الموضوع عايزكم تتابعوه في منتهى السرية ومن غير فضايح!!!!
وقبل ان يبدأ التنظيم في متابعة الموضوع جاءت الأوامر بان الموضوع مجرد بلاغ كيدي وان الحنجوري والبلعاطي كانوا بيهزروا مع بعض بالكراسي!!!
بعدها توالت التعليمات بمتابعة الزعبلاوي بعد عودته من رحلة القطب الجنوبي ثم الست مرجانة التي اصبحت حاملا لأول مرة بعد عشرين سنة زواج ثم سمير وسميرة بعد فسخ خطوبتهما وحوكشة الذي ظهرت عليه علامات الثراء المفاجيء واصبح ياكل ساندوتشات جبنة رومي بدلا من الفول والطعمية!!
وذات يوم فوجئ العجلاتي بالشنكوتي بيه يستدعيه إلى مكتبه:
-انا الشغل بتاع اليومين دول مش عاجبني ومش داخل دماغي ببصلة!!! وحاسس كده ان التنظيم ماشي في سكة غلط وبيستلطخني!!
-ازاي بس جنابك!! ده العيال بتوع التنظيم مقطعين نفسهم تقارير لدرجة انهم ما بيناموش الليل!!!
-الكلام ده ما يلزمنيش !!! التنظيم محتاج هزة جامدة يا عجلاتي عشان العيال اللي فيه يصحصحوا ويحسوا انهم واقفين على ارض بتتهز وممكن تبلعهم في اي لحظة!!
-أؤمرني بس جنابك!! وانا اخليهم يمشوا يكلموا روحهم!!!
-انا عايزك يا عجلاتي تكلفهم يكتبوا تقارير في بعض!؟ هوه حد عارف الغجر دول بيعملوا ايه من ورا ضهرنا!!! ما يمكن بيبيعونا لحد تاني واحنا نايمين في العسل!!
-ايوه سعادتك بس الحكاية دي ممكن تعمل مشاكل جامدة جوه التنظيم!! وأكيد ح تكشف بلاوي!!!
-هوه ده بالظبط اللي انا عايزه!!! انا لازم اعرف اللي بيحصل جوه التنظيم والا العيال دي ممكن تعمل لي مليون مصيبة وأنا نايم على وداني!!
-خلاص سعادتك اللي تؤمر بيه!!! بس وحياة الننوس الصغير توافق لهم ع التلاتين لحلوح الاضافي عشان يكتبوا تقارير في بعض ونفسهم مفتوحة!!!!!!