الدكانة...! عبد العزيز محمود

كان الشباك مفتوحا والصوت جايب آخر الحارة...
-ماهو أنا ح أورثك يعني ح أورثك! بالذوق بالعافية ح أورثك وأقعد مكانك في الدكانة!!
-ياواد عيب هو انا لسه مت عشان تورثني!! أما واد مش متربي بصحيح!! ما تقولي حاجة يا ست الستات!!!
وهنا تدخلت الام بشيء من السياسة :
-وماله يا اخويا لما تكتب له الدكانة وأنت حسك بالدنيا!!! مش احسن ما نخش في مشاكل وقضايا بكرة وبعده مع اللي يسوا واللي ما يسواش!!!
- يا ولية هيه الدكانة دي بتاعتي لوحدي عشان أمَسكهاله !! ما انتي فاهمة وأنا فاهم!
-خلاص يبقا تراضي الشركا بتوعك وتدي كل واحد قرشين عشان يغور لحال سبيله!! وبكده تبقا ريحتنا وريحت الواد وريحت الدنيا كلها!!
-يريح التعبان ربنا!! يلا اتكلوا على الله وسيبوني دلوقتي أحسن الضغط علي عليا!! ومش طايق اشوف حد قدامي!!
وفي اليوم التالي..
-يعني كان لازم تهب في ابوك كده زي وابور الطحين وتزعله!! مش كنت تكلمه بالراحة عشان تخلص الفيلم الهندي ده!!
-هوه الراجل عاد بيسمع لحد!! دا انا كل ما أجيب له سيرة الدكانة عفاريت الدنيا كلها بتتنطط قدامه وبيبقا عايز يولع فيا بجاز!!
-معلهش سايسه!! الراجل كبر وعايز اللي يسايسه عشان يكسبه!!
-والله حاولت ومش عارف آخد معاه حق والا باطل!! آجي له شمال آجي له يمين برضه ما فيش فايدة!!
وفي مساء نفس اليوم ذهب الشركاء لمقابلة المعلم في البيت الكبير...
-احنا سامعين يا معلم طراطيش كلام مش ولابد عن الدكانة!! واحنا عارفينك راجل تفهم في الاصول ومترضاش حد ياخد اكتر من نصيبه !
-يا رجالة اللي سمعتوه ده كلام مصاطب !! والدكانة ح تفضل ماشية زي ما هيه طول ما أنا عايش وبصحتي!!
-ما تآخذناش يا سيد الناس!! اللي يتكسف من بنت عمه ما يجيبش منها عيال!! واحنا بصراحة كده ما نقبلش ان عيل يقف بدالك في الدكانة وانت لسه زي الوتد وحسك في الدنيا !!
-يا جماعة اطمنوا وحطوا في بطنكم شادر بطيخ ! انا راجل كلمتي زي السيف وما فيش حاجة ح تتغير!!!
وفي اليوم اللي بعده جلس الابن مع اقرب اصدقائه وكاتم اسراره...
-يعني عاجبك الكلام ده !! اهم رجعوا الكبار يلعبوا في دماغ ابويا ويبرطعوا تاني في الدكانة!! وبكرة وبعده ح يدوني حقي ناشف واطلع من المولد بلا حمص!!
-فشر!!! ده انا ما ابقاش حمادة لو ما كنتش اقعدك في الدكانة واخليك تدلدل رجليك وتعمل ما بدالك!!
-صحيح يا حمادة!!! بجد أنا ممكن أقعد مكان أبويا!!!
-بكرة تشوف وتقول حمادة قال لي!!! المهم انك تسمع الكلام وتنفذ اللي ح اقول لك عليه بالحرف الواحد!
وفي مساء نفس اليوم فوجيء الشركاء بمجموعة من العوانتية يزيلون يافطة الدكانة...
-وقف يا جدع منك له !! هيه ايه وكالة من غير بواب؟!! مين قالكم تشيلوا اليافطة اللي مكتوب عليها اسم المعلم!!
-معلهش يا رجالة دي أوامر المعلم بذات نفسه!!أصل جنابه عايز يعمل يافطة جديدة بدال القديمة اللي اجربت من الشمس!!
وهنا جري الشركاء على منزل المعلم لاحاطته علما بما يحدث فقيل لهم انه نايم وبيشخر!! فعادوا بسرعة الى الدكانة ليجدوا العوانتية يخرجون البضاعة القديمة ويستبدلونها باخرى جديدة...
-وقف يا بني آدم منك له!! هيه الدكانة دي ما لهاش اصحاب والا ايه!! رايحين فين بالبضاعة بتاعتنا؟؟؟؟
-معلهش يا رجالة دي اوامر المعلم!! الدكانة خلاص ح تبقا سوبر ماركت!! وح تبقا فيها تلاجات مليانة هامبورجر ولحم مدخن وديوك رومي وكافيار وجبنة مستوردة !!!
-ومالها بقا الجبنة القديمة والمش أبو دوده والبضاعة اللي كانت موجودة؟!
-ما خلاص يا اخوانا البضاعة دي اشتراها سي حمادة ودفع فيها الطاق طاقين!!! ونصيب كل واحد فيكم ح يوصله لحد بيته!!! وما تنسوش يا رجالة ان الدكانة متسجلة باسم المعلم ربنا يديله ويديكم الصحة وطولة العمر!!
وهنا تجمع الشركاء للتداول في المصيبة اللي طبلت على راسهم....
-ح تعملوا ايه يارجالة؟!!! اللي بيحصل ده تبديد عيني عينك!!! واحنا كلنا شركا في الدكانة ولازم نضمن حقوقنا وحقوق عيالنا!!!!!
-انا باقول ما عادش قدامنا غير اننا نرفع قضية!! ايوة احنا معانا عقد الشركة مع المعلم!! والمحكمة هي اللي ح تحكم لنا!! وح نطلب كمان تعويض ع البضاعة اللي اتنهبت!!
-ما انتو عارفين المحاكم حبالها طويلة!! عشان كده أنا باقول ناخد حقنا ناشف ونخلع!! وآديكم شايفين الواد معاه رجالة تاكل الظلط!!!
-ده مستحيل يحصل واحنا على وش الدنيا! احنا ح نفضل نناكف معاه لغاية ما نلاقي حل أو ربنا يقول كلمته!!
وبعد فترة من المناكفة ووقفان الحال فوجيء الجميع بالمعلم قادما في سيارته ال 128 الكحيانة يقودها بنفسه....
-ايه الكلام الفاضي ده وقلة الادب!! مين المتخلف اللي قال لكم تشيلوا اليافطة وتتصرفوا في البضاعة!! هيه ايه وكالة مالهاش صاحب والا انا مت بالحياة!!!
-الحقنا يا سيد الناس!!! الدكانة كانت خلاص ح تضيع مننا واحنا واقفين نتفرج ومش قادرين نعمل حاجة!!!
-رجع يا بني آدم منك له البضاعة القديمة وخدوا التلاجات والكراتين دي!! انا هنا المعلم وانا الكل في الكل واللي مش عاجبه كلامي يروح يشرب من الترعة!!!
-ايوه يا سيد المعلمين بس دي اوامر –ولامؤاخذة- المعلم الصغير !!!
-باقولك يا بني آدم شيل الكراتين دي ورجعوا اليافطة القديمة!! انا لسه حسي بالدنيا يا غجر وصحتي بمب وزي الفل !!! وما فيش حد بيدي اوامر غيري!!!!
وفي مكان قريب ع الرياح البحري..
-عاجبك اللي حصل؟!! أهو كسَر كلامي تاني وخلا رقبتي زي السمسمة!! ورجع اليافطة القديمة وراضي الرجالة!!!
-الصبر يا صاحبي!! كلها يومين وح نرجع اليافطة الجديدة ومعاها التلاجة والبضاعة ونحول الدكانة سوبر ماركت!! وح تشوف ابوك في الآخر ح يحن!! ده انت برضه ضناه يا جدع وعمر الدم ما يبقا مية!!!