الحواوشي!! عبد العزيز محمود

كانت ضربة في الصميم حين استغني النادي الشهير عن معظم اللاعبين القدامي استعدادا لمرحلة جديدة تعتمد فقط على اللاعبين العيال ....
-انا خلاص مخي ضرب وبرج من نافوخي ح يطير!! ازاي يستبعدوني من النادي بعد كل المباريات اللي لعبتها!!؟
-قلة اصل بعيد عنك يا حواوشي يا اخويا !! ح تقول ايه بس في قلة المرجلة وشغل العيال ؟!!
-لااااااا انا لا يمكن اسكت ع الموضوع ده ابدا !! ده انا ح اقلب لهم الدنيا!!! الظاهر انهم نسيوا انا مين؟؟! ده انا اللي جبت لهم كاس الامم الافريقية وكاس مصر وكاس اللي يحب النبي يزق!!!
بلاش تهور يا حواوشي وامسك نفسك!! انت مش أد الناس دول!! وياريتك تحاول معاهم بالسياسة!!-
وهكذا سافر الحواوشي الى المقر الرئيسي للنادي بحثا عن حل ...
-يعني يرضي سعادتك يا عتريس بيه تكون دي نهايتي؟!! معقولة يعني بعد البطولات دي كلها آخد شلوت وقلمين على صداغي؟!!
ماتقولشي كده يا حواوشي!! انت برضة الراجل بتاعنا وح تفضل بتاعنا!! بس انت فاهم السحلاوي بيه وألاعيبه!!-
-لأأأأأأأأأأأأ يا عتريس بيه ماهو انا ما اتاكلش اونطة ابدا !! سعادتك لازم تشوفلي حل في المصيبة دي!!! انا لا يمكن أعتزل وانضرب على قفايا بعد العمر ده كله !!!
-ح نشوف يا حواوشي!!!! بس انا عايزك تهدا كده وتحاول مع السحلاوي بيه!! صحيح هوه شراني وقتال قتلة بس قلبه ابيض ومخه كبير ولو اقتنع بكلامك ح يريحك ع الآخر !!!
وفي مكتب السحلاوي ....
-هوه انا لا سمح الله قصرت في حاجة يا باشا عشان اخد الشلوت المتين ده؟؟ ده انا مقطع روحي عشان خاطر النادي والكبار اللي في النادي !!!
-انا عارف يا حواوشي!! انت فعلا طول عمرك من الفراودة بتوعنا!! ويااااما اعتمدنا عليك في المباريات الصعبة !! ويااااااااما جبت لنا اجوان!!!!
امال ايه اللي حصل بس يا باشا عشان تدوني في الآخر على قفايا ؟؟!!-
-ح اقولك ايه يا حواوشي؟؟؟ صدقني اللي حصل ده أنا ماكنتش عايزه يحصل أبدا!!! بس انت فاهم الندغاني بيه غاوي عيال!! عشان يجدد بيهم الدم بتاع النادي !!! عموما انا ح اكلمهولك وشد حيلك معاه وفتح مخك!!!!
وفي مكتب الندغاني....
-للدرجة دي جنابك شايف اني ماليش لازمة عشان كده استبدلتني بعيل صغير مالوش اصل ولا فصل ولا حد عارف عنه حاجة!!! يعني معقولة يا ندغاني باشا ترميني للكلاب عشان واااااد عبيط وتافه زي ده؟؟؟
-من غير لت ولا عجن يا حواوشي!! انت عايز ايه دلوقتي؟!! ايوه انا رميتك للكلاب عشان خاطر عيون الواد ده !!!! ولو فتحت بقك بكلمة ح ارميك للديابة!!! وح اخليك عبرة لمن لا يعتبر!!!
-يا جنابو ما يصحش كده!! ده انا طول عمري من فراودة النادي ومن محاسيب الباشا الكبير الله يرحمه!!! والا خلاص يعني بعد الباشا ما سلم النمر ح ابقا ملطشة للي يسوا واللي ما يسواش!!!
-يا بني آدم افهم!!! احنا النهاردة محتاجين عيال مدقدقة عشان داخلين على تصفيات كاس العالم!!!! واحنا بصراحة كده لا يمكن ح ناخد الكاس الا بالعيال دول!!
-طيب ما أنا عيل من زمان وسعادتك عارف كده كويس!! والا اكمني يعني من رجالة الباشا الكبير الله يرحم ايامه!!!
-صحيح يا حواوشي انت عيل بس مشكلتك انك من رجالة الباشا الكبير الله يرحمه!!! والرجالة دول احنا خلاص قرينا فاتحتهم كلهم !!! يا حوواشي افهم احنا داخلين على مرحلة مالهاش علاقة بالفحت والردم بتاع زمان!!!!
-خلاص اللي تشوفه معاليك!! بس انا ليا طلب صغير اكراما للعيش والملح اني اقعد على دكة الاحتياطي !!! ما هو ما يرضيكش بعد العمر ده كله اني اعتزل وانا في قمة لياقتي !!!
- صدقني يا حواوشي انا ما اقدرش اوعدك !!! انت عارف طبعا اننا داخلين على مرحلة صعبة والدم ح يبقا فيها للركب!!! عشان كده لازم نكتر من العيال بتوعنا على أد ما نقدر!!!
وفي محاولة اخيرة لجأ الحواوشي للدحلاب ....
- سايق عليك النبي يا دحلاب بيه ما تكسفني!! دي حاجة بسيطة اوي عشان النادي !!! واوعد سعادتك بعد ما ارجع العب تاني في النادي وأجيب اجوان ح أتبرع بادهم!!!
- ودول كام بالصلاة ع النبي يا حواوشي؟؟
دا فضلة خيرك أرنب صغير انا جايبه معايا مخصوص عشان النادي والمشروعات الخيرية!!!! –
-وطلباتك؟؟!!
- تلاتة بالله العظيم ما عايز حاجة غير إني ألعب في النادي!!! عشان لما اموت يكتبوا في النعي بتاعي اني كنت لعيب في النادي!!! أظن سعادتك ما يرضيكش بعد العمر ده كله اني اموت طيشة!!
- ماكانش ينعز يا غالي!! التعليمات اللي عندي واضحة وصريحة.. النادي اليومين دول عايز عيال!!! عيال وبس!!!!
وفور عودته الى كفر المعيز .....
-مالك يا حواوشي راجع من السفر عمال تنفخ وتفش ووشك مقلوب زي مايكون ميت لك ميت؟! هوه الأرنب ما عملش حاجة والا ايه؟؟!!
- سيبيني ياولية في غلبي وانسدي جاتك ستين نصيبة تاخدك هوه انا كنت ناقصك؟؟!!
-يا اخويا احكي لي يمكن أفطمك وأنور لك طريقك!! ما هو يجعل سره في اضعف خلقه!!!
-ايوه يا ستي الارنب ما عملش حاجة!! والدحلاب اللي كنت باديله على قفاه طول عمري اداني على قفايا امبارح!!! وقال لي النادي يلزمه عيال مدقدقة مش عواجيز راحت عليهم !!
-خلاص تاهت ولقيناها!! انت ترمي لهم نص ارنب كمان!!! وترشح لهم الواد حوكشة ابننا يلعب بدالك في النادي !!! هوه فيه في الكفر أعيل منه؟؟!!
ايوه بس ده واد عبيط وأهبل ومخه ضارب وايده طويلة وح يعمل لنا فضايح مالهاش اول من آخر!!-
-يا اخويا ما هوه ده عز الطلب!!! همه ح يلاقوا أعيل من حوكشة عشان يلعب معاهم في النادي ويجيب لهم كاس العالم اللي همه عايزينه!!!