المهرتلاتي !! عبد العزيز محمود

-هوه ايه الموضوع!؟ انا مش فاهم حاجة!!!
هكذا قال المهرتلاتي بيه وهو راقد بملابسه الداخلية تحت جهاز الاشعة المقطعية للمخ فقلنا في نفس واحد:
-أبدا دي شوية فحوص بسيطة عشان نطمن على مخ سعادتك !!
-تطمنوا ايه وبتاع ايه!!! ما انا مخي زي الفل ويوزن بلد!!!والا هيه تلاكيك فاضية عشان تقولوا عليا مجنون؟؟؟
-يا جنابو احنا جبناك هنا بعد ما قعدت تهرتل جامد في الاجتماع وتمسك في دماغك وتصرخ وتقول آه يا دماغي ياني وبعدين دورت الضرب في البهوات اللي قاعدين جنبك!!!!!
-وايه يعني ما انا طول عمري باهرتل وأعمل حاجات غريبة ومافيش مشكلة؟!
-النوبة دي الحالة كانت صعبة قوي!!!! وجنابك قعدت ترفص بايديك ورجليك في أوضة الاجتماعات زي ما تكون الشر برة وبعيد بتطلع في الروح وبعدين رحت في غيبوبة !!!
-غيبوبة ايه وكلام فارغ ايه!!! انتو شاربين حاجة والا بتستهبلوا والا ايه الموضوع؟؟؟
فالتفتنا الى الطبيب وقلنا : ما تريحنا يا دكتور وتقول لنا المهرتلاتي بيه عنده ايه بالظبط ؟؟؟
-أبدا ما فيش حاجة!! بس مخ جنابه مش شغال !!!!
-يا دي المصيبة السودا!! المخ حتة واحدة!!! أهو ده اللي كنا خايفين منه وعاملين حسابه !! لطفك يارب!!!
وهنا أخرج جنابه رأسه من تحت جهاز الاشعة وقال:
-يعني ايه مخ؟؟؟؟!!! انا الكلمة دي زي ما تكون عدت عليا قبل كده!!!
-يا جنابو ماتتعبش مخك!! أكيد ده ارهاق من كتر الشغل !!!
-ارهاق ايه وبتاع ايه هوه انا باعمل حاجة؟؟؟ ده انا طول النهار بآكل وأنام والعب في صوابع رجليا!!!
وهنا قال الدكتور بانفعال:
-يا بهوات ما ينفعش كده!! الصراحة مطلوبة ولازم المهرتلاتي بيه يعرف اللي عنده عشان ده جزء من العلاج!!
-علاج ايه يا دكتور؟؟؟ ما تقوللي هوه ايه الموضوع بالظبط ؟؟انت كده قلقتني ووغوشتني وخليت عفاريت الدنيا كلها تتنطط قدام عينيا !!
-للاسف مخ جنابك واخد اجازة مفتوحة ونايم في العسل !! بس مافيش داعي للقلق لأن دي شوطة منتشرة في البلد اليومين دول!!!
-نايم في العسل ازاي ؟؟؟!! باظ يعني ...والا هنج ...والا الفيوزات بتاعته ضربت ؟!
-للاسف ده عيب خلقي مالكش يد فيه!! يعني مخك ولامؤاخذة في الطراوة من ساعة ما اتولدت!!!
-أمال انا عايش إزاي لغاية دلوقتي؟؟؟!!!
-واضح ان سعادتك عايش ببركة دعا الوالدين!!!
-الكلام ده مش داخل دماغي ابدا ومش مقتنع بيه بالمرة!!!
-وح يدخل دماغك ازاي اذا كان سعادتك أصلا ما عندكش دماغ !!
-أنا برضه اللي ما عنديش دماغ يا دكتور الغبرة يا اللي اهلك معرفوش يربوك!!! العيب مش عليك!!! العيب ع الحيوانات اللي جابوني عندك!! يااااالا بينا يارجالة!!
وفي اليوم التالي استدعانا المهرتلاتي بيه الي مكتبه ....
-الظاهر يا رجالة انا فعلا ما عنديش مخ!!! من امبارح وانا مهزوز وعمال اروح يمين وشمال وحالتي بالبلا!! و كل ما آخد قرار الحسه وآخد قرار غيره!! وقاعد اكلم نفسي زي المهبول !!!
-يا جنابو ما تقلقش!! ما انت طول عمرك مهزوز وبتهرتل ...ايه الجديد يعني ؟؟؟!!
-لاااااا أنا حاسس اني مش متظبط خالص!!! ولازم اروح عند دكتور تاني عشان أطمن على مخي!!
وهكذا ذهب سيادته الى دكتور آخر ...
-سايق عليك النبي يا دكتور تريحني انا عندي مخ والا لأ!؟
-طيب مش أفهم الاول سعادتك بتشتكي من ايه بالظبط !! يعني شاعر بعدم اتزان عقلي والا مخك مش مساعدك تاخد القرار الصحيح!!!
-والله ما انا عارف يا دكتور!!! بس انا ساعات بأعمل الحاجة وعكسها!! وساعات بأضحك وبعدين ابكي وبعدين أضحك تاني زي ما يكون اللهم احفظنا راكبني عفريت!!!
-وايه يعني ما فيه ناس كتير حالتهم زي حالتك وعايشين ومبسوطين وآخر حلاوة !!!
-ايوه يا دكتور بس انا حالتي صعبة قوي !! وبقيت مهزوز ومتلخبط آخر لخبطة وماعدتش عارف راسي من رجليا!!
-خلاص انا ح اعمل لك فحص بالرنين المغناطيسي عشان أحدد إيه المشكلة!!!
وبعد ظهور نتيجة الفحص ......
-فعلا المخ مش شغال نهائي !!
-طيب يا دكتور مافيش طريقة تخليه يرجع يشتغل!!
-وح يرجع يشتغل ازاي اذا كان أصلا مش شغال !؟؟؟
-طيب والحل يا دكتور!!!
-للاسف الحالة جاتني متأخرة قوي ! عشان كده مش حاينفع معاها الأدوية ولا جلسات الكهرباء ومافيش قدامنا غير جلسات التدليك!
-طيب أروح لمين عشان يدلك لي مخي ؟؟؟
-ما فيش قدامك غير حلامبوحة المدلكاتي!!! هوه ده الوحيد اللي ح يظبطك!!!!
وفي اول جلسة تدليك...
-هيهي هي هي انت كده بتزغزغني يا عم حلامبوحة مش بتدلك مخي ..هييي هيههيي ..لا بلاش كده عشان انا بأغير!!!
-يا باشا اجمد أمال وخليك راجل !!! ما هو أنا لازم ادلكلك نافوخك جامد عشان يشتغل!!
-ايوه بس انا حاسس وانت بتدلكني ان فيه نمل وصراصير وفيران ماشية في نافوخي!!
-مش باقولك يا باشا محدش ح يشغلك نافوخك غيري !!! ده انا حلامبوحة والاجر على الله!!
لكن حالة المهرتلاتي بيه لم تتحسن ....
- للاسف الحالة زي ما هيه ويمكن اتنيلت بنيلة!!! واضح ان المخ ما استجبش للتدليك !!
-ما استجبش ازاي يا دكتور؟؟؟ ده انا عملت 400 جلسة لغاية دلوقتي وحاسس بتحسن كبير!!!!
-بكل أسف ده احساس كاذب زي الحمل الكاذب عشان جنابك اتعلقت جامد بجلسات التدليك!! بس الاشعة اللي قدامي بتقول ان مخك لسه نايم في العسل وبيشخر!!!!
-طيب ما تزرع لي يا دكتور مخ بداله أبوس ايدك ! انا ما اقدرش اعيش كده من غير مخ!!!!
-يا جنابو الطب اتقدم صحيح وممكن نزرع لك قلب وكبد وكلي وايدين ورجلين وشعر....بس زراعة المخ دي لسه بدري عليها!!!
-عليا الطلاق بالتلاتة انت دكتور نص كم!! وانا لازم اعرض مخي على دكتور تالت !!!
وفي عيادة الدكتور الثالث كانت المفاجأة....
-مين المغفل اللي قال لسعادتك ان مخك مش شغال!!
-كل الدكاترة اللي رحت لهم قالوا كده!! لدرجة اني يئست من حياتي وبافكر أدمر كل اللي حواليا!!!
-ابدا مخ سعادتك زي الفل وما فيهوش حاجة !! بس المشكلة ان الميكانيزم بتاعه مش مظبوط!! ويمكن عشان كده بيهنج!!
-ازاي يعني بيهنج يا دكتور ؟؟؟
-يعني بيشتغل خمس دقايق ويبطل اسبوعين قصادهم!! واضح انك بترهق دماغك جامد عشان كده بيهنج بشكل اتوماتيكي عشان يرتاح!!!
-طيب والحل يا دكتور ابوس رجلك !؟ انا نفسي مخي يشتغل طبيعي عشان ابطل هرتلة واحافظ على اليغمة اللي قاعد ألهط فيها !!
-شوف سعادتك انا ح اوصف لك علاج يخليك زي الكومبيوتر!! بس لازم تمشي عليه بانتظام وما تلخبطوش!!!
-قل لي عليه بسرعة يا دكتور اعمل معروف!! دا انا خلاص دماغي ح يطير من الزعل !!!
-أنا عايزك تقف كل يوم قدام المراية وتقول انا مش عبيط واهبل... انا مخي شغال وزي الفل ....مليون مرة !!!
-قدام المراية ...واقولها مليون مرة!!
-تمام!!! وبالشكل ده ح يبقا عندك ثقة كبيرة في روحك!!! وخلايا مخك ح تشتغل طبيعي ومش ح تهنج!! وياسلام كده لو شلت في ايدك مراية صغيرة و طول ما انت رايح وانت جاي تبص فيها وتقول الكلمتين دول!!!
-انا مش عبيط واهبل.... انا مخي شغال وزي الفل!!!
-برافو !!! بس لازم تستمر على العلاج ده عشرين سنة ع الأقل .. وبعدين ابقا قابلني!!!
وهكذا دخل المهرتلاتي بيه مرحلة مهمة من العلاج بالايحاء الذاتي المركزي لدعم ثقته في روحه وظللنا نراه حتى آخر يوم في حياته وهو يمشي حاملا مرآته الصغيرة في يده وهو ينظر اليها ويهرتل بأعلى صوته:
-انا مش عبيط وأهبل.... أنا مخي شغال وزي الفل ...وآخر حلاوة يا حلاوة!!