صالة بلياردو !! عبد العزيز محمود

-أنا باقول نهدم الدور الأخير الآيل للسقوط في الملحق الإداري ....بصراحة انا خايف يتطربق على الموظفين والناس اللي فيه ويجيب لنا مصيبة!!!
هكذا قال لنا سيادته في اجتماع مجلس الأمناء فقلنا جميعا في نفس واحد:
-ياسلام سعادتك!! أهو ده القرار السليم والا بلاش!!..يا أفندم السقف مطقطق والحيطان كلها مشرخة ..والدور كله لازم له إزالة!!
لكن سيادته قاطعنا قائلا:
-ايوه بس لو هدمنا الدور الأخير... الموظفين اللي فيه ح يروحوا فين؟؟!..ما هو مش معقول نشردهم!!؟؟ ومش معقول كمان يقعدوا في البيت وياخدوا مرتبات حار ونار ف جتتهم!!
-تمام سعادتك!! دا الدور الأخير لوحده فيه ييجي ألفين موظف ..غير التلاتين ألف مواطن اللي بيترددوا عليه كل يوم!!!
-خلاص مافيش قدامنا غير اننا نرمم الحيطان المشرخة والسقف المطقطق !!
-اللهم صل ع النبي!! اهي كده القرارات والا بلاش!! ربنا يخلي لينا دماغك يا شلولح بيه!!!
لكن سيادته أجال النظر في عيوننا جميعا ثم قال:
-بس انتوا مش شايفين اننا لو هدمناه يكون احسن؟ّ! الترميم ح يكلفنا جامد ..والخزنة زي ما انتو عارفين فاضية!!!
-مظبوط سعادتك !! الأزمة العالمية نشفتها جامد !!!.. وواضح ان الإزالة هي الحل الوحيد..والله من غيرك يا شلولح بيه كانت الدنيا باظت من زمان!!!
فنظر سيادته الى عليوة اللطخ دراعه اليمين وقال:
-بس انا حاسس والله اعلم اننا لو رممناه يكون أحسن ..الدور ده يارجالة تراث من ايام الشفخانجي بيه الله يرحمه..وحرام اننا نهده ..شوفوا أنا باقول نرممه وخلاص !!!
-عداك العيب سعادتك!! ياسلام يا ولاد ع الوفاء والاخلاص !!..طبعا مش معقول ابدا نهد حاجة بناها الشفخانجي بيه !! ده تراث أصيل لازم كلنا نحافظ عليه !!!
-طيب ايه رأيكم كمان لو بنينا دورين فوق الدور الأخير بتاع الملحق الإداري.. عشان قاعة المؤتمرات ومركز الكمبيوتر والاستراحة بتاعت الضيوف؟؟!!
فقلنا: والله فكرة...دا احنا فعلا ماكناش لاقيين أرض نبني عليها الحواديت دي !!
-وبالمرة كمان نبني صالة بلياردو ع الروف ....عشان المواطنين الغلابة يلعبوا فيها برسوم بسيطة وهمه مستنيين طلباتهم تخلص !!! واهي فرصة يتسلوا وينشطوا الدورة الدموية بتاعتهم!!!
-طيب وسعادتك ح ندبر ميزانية منين للمشروع الكبير ده ؟!!
- بسيطة !! ناخد قرض من بنك التسليف بضمان حتة الارض اللي عليها الملحق ..وبعد كده رسوم صالة البلياردو تسدد القرض!!!
-يا سلام يا ولاد على الأفكار !! ربنا يحميك لشبابك ويخليك لينا يا شلولح بيه!!!
وفور انتهاء اعمال الترميم والبناء تم افتتاح قاعة المؤتمرات ومركز الكومبيوتر والاستراحة وصالة البلياردو في احتفال مهيب حضره اربعة وزراء ونص دستة محافظين..
-الف مبروك يا شلولح بيه!! ده فعلا مشروع تحفة ولازم نعممه في كل المصالح !!!
-جنابك تقصد قاعة المؤتمرات ومركز الكمبيوتر؟!!
-لأ طبعا !! قصدي صالة البلياردو!! ده مشروع القرن...انا مش فاهم احنا ليه ما فكرناش في الموضوع ده من زمان ....مفروض في كل مصلحة يكون فيه صالة بلياردو عشان المواطنين الغلابة يتسلوا!! وأهو كله بثوابه!!!!
-يعني جنابك مبسوط وراضي عني !؟؟
-يا شلولح انت طلعت دماغ بصحيح!!!!
وعقب الاحتفال كان الاقبال مذهلا على صالة البلياردو من المواطنين الغلابة الذين ينتظرون انهاء معاملاتهم والشباب الصايع اللي مش لاقي شغل لدرجة ان شلولح بيه أصدار قرارا باستمرار العمل في الصالة 24 ساعة يوميا وقال في حيثيات قراره:
-ياجماعة احنا محتاجين لكل مليم م الصالة عشان نسدد القرض !!
لكن اساسات مبنى الملحق لم تتحمل للأسف حمل الدورين الاضافيين وصالة البلياردو فانهارت ذات يوم مخلفة دويا هائلا وسحابة كثيفة من الغبار تخللتها اصوات استغاثة مرعبة، فخرج سيادته من مكتبه مفزوعا وهو يصرخ :
-هيه الحرب قامت يا رجالة والا ايه؟؟؟!!
-لا دا الملحق الإداري اتطربق على اللي فيه سعادتك !!!