الجماعة ...!! عبد العزيز محمود

كان اجتماعا مغلقا لم يحضره سوى عبد الحفيظ بيه واربعة من كبار مساعديه ...
-انا عايز معلومات كاملة عن الواد دعبس السهن!!! كل فتفوتة مهما كانت تافهة وعبيطة من ساعة ما اتولد لغاية النهاردة!!! مش عايز ولا معلومة تفلت من ايدينا مهما كانت هبلة ...فاهمين والا لأه!!
-تمام سعادتك!! احنا ح نحط الواد ده تحت عينينا 96 ساعة كل يوم!! وحتى لو دخل الحمام ولا مؤاخذة عشان يعمل زي الناس ح نخش وراه!!
-مش كفاية!! الواد ده لو استخبا في بطن امه لازم تخشوا وراه!!! الموضوع خطير يا رجالة ولازم يتاخد بمنتهي الجدية!!! التقارير اللي جاياني عن السهن قلبت بطني!!!
وبعد 48 ساعة عقد عبد الحفيظ بيه اجتماعا جديدا ...
-ايه الكلام الفاضى اللي انتو كاتبينهولي ده!!! انتو بتستعبطوا والا الواد بيستهبل وسايق الهبل ع الشيطنة!!
-اكيد الواد بيستهبل سعادتك!! ده مية من تحت تبن!! وتصرفاته بتقول انه في منتهى الخطورة !
-ما هو ده اللي انا عايز افهمه!! الواد ده خطير في ايه بالظبط!!؟؟ وإيه مصدر خطورته؟؟ انا فعلا مش فاهم حاجة من نبش الفراخ اللي انتو كاتبينه!!!
-والله سعادتك احنا كمان مش فاهمين حاجة!! بس أول تقرير كتبهولنا حمؤة الزمبلاوي بيقول ان الواد ده مصيبة من مصايب الزمن!!! وادينا من ساعتها بنلف وندور حوالين نفس النقطة وكل مرة بنروح البحر ونرجع عطشانين!!!
وهنا أمر عبد الحفيظ بيه بتشكيل خلية متابعة على اعلى مستوى....
-انا عايزكم تصوروا لي الواد ده في كل الاوضاع اللي ربنا خلقها!! ما هو انا لازم افهم الواد الجبلة ده جنس اهله ايه وحكايته ايه!!
-كل الاوضاع سعادتك؟؟!!
-كل الاوضاع يا مرسي!!! وما فيش داعي تكرر كلامي زي البغبغان!! وياريت الدكتور عبد الستار بتاع علم النفس يتفرج لنا ع الافلام دي عشان يحلل لنا نفسية الواد.. ويقولنا لنا ازاي نجيب داغه ؟؟!!
وهكذا تم تصوير السهن في كل الاوضاع ....
-اظن يا دكتور عبد الستار انت قدرت تكون رأي حوالين المجرم الخطير دعبس السهن !!
-والله سعادتك ده فعلا مجرم عتيد الاجرام ويستاهل قطع رقبته!!!
-هايل يا عبده!! انا عايزك تقول لي الواد ده ممكن يكون مجرم في ايه؟؟! وايه مصدر خطورته!!! وياريتك تفهمني الحالة النفساوية بتاعته !!!وبالمرة حالته المعدنية.. قصدي المعنوية !!!
-والله سعادتك الواد كل تصرفاته عادية بس انا شامم بمناخيري دي اللي حياكلها الدود انه مجرم عتيد الاجرام !!! بصراحة كده سعادتك انا بجد مش فاهم حاجة!!!
وازاء هذا التخبط استدعي عبد الحفيظ بيه ذراعه اليمين زكي البرنجي...
-عايزك يا برنجي تصاحب الواد ده وتبلفه بالكلام الناعم المسهوك بتاعك وتعرف لنا ايه حكايته !!! انا بصراحة مش فاهم حاجة من الدكتور عبد الستار!! وواحد في خبرتك أكيد ح يخلص لنا الفيلم الهندي ده!!!
-شوف سعادتك انا بعون الله ح احطه في جيبي في 48 ساعة!!! بس بصراحة كده محتاج الفين جنية عشان اقدر اتحرك براحتي!!!!
وبعد اسبوعين قدم البرنجي تقريره ..
-هايل يا برنجي!! انت فعلا شارح كل حاجة عن الواد المجرم السهن!!! بس للاسف ماوضحتش ايه مصدر خطورته!! وممكن يكون مجرم في ايه؟؟:!!
-ازاي بس جنابك !!! ما انا قايل في التقرير انه عضو في جماعة خطيرة! وبعون الله ح اكشفها!!! بس يلزمني اربعتلاف وخمسميت جنية ومية خمسة وسبعين قرش مصاريف نثرية وتاكسيات وأكل وشرب وخلافه!!!!
-صدقني يا برنجي ح ندفع لك اللي انت عايزه!!! بس الاول تفهمنا الواد ده عضو في انهي جماعة اذا كان من بيته لشغله ومن شغله لبيته!!! وما بيروحش اي حتة من الحتت اياها!!!
-يا باشا اقطع دراعي من لغلوغه ان ماكان الواد ده عضو في جماعة !! ده كل يوم بيسيبني آخر النهار ويقوللي معلهش يا برنجي يا اخويا انا كده ح اتأخر ع الجماعة!!! وبعدين يروح!!!
خلاص يبقا انت تقب وتغطس وتعرف لنا ايه حكاية الجماعة دي؟؟ وايه علاقتها بالسهن!؟
وبعد 48 ساعة....
-الف مبروك جنابك!! انا خلاص جبت التايهة!!! وعرفت كل حاجة عن جماعة السهن وعنوان الوكر بتاعها !!
-هايل !!! بس مش ده برضه عنوان بيت المجرم الخطير دعبس السهن!!؟؟
-مش باقولك يا باشا الواد طلع في غاية الخطورة !! واخطر من كده مافيش!!!
-علي مهلك عليا شوية يابرنجي !!!وحاول تفهمني بالراحة !!! انا فعلا مش فاهم حاجة من كلامك!!!
-يا باشا السهن بذات نفسه هوه زعيم الجماعة!!! وبيته هوه الوكر بتاع الجماعة!! شفت ازاي سعادتك الواد كان بيلاعبنا ويأكلنا الاونطة طول المدة دي كلها!!!
وهكذا أمر عبد الحفيظ بيه باتخاذ اللازم ....
-طبعا انت عارف يا دعبس يا ابني احنا مين؟!! واكيد عارف احنا جايين لك بخصوص ايه؟؟!!
-طبعا يا باشا وهل يخفي القمر؟؟! انتو اكيد بتوع منظمة الصحة العالمية !!!
-عفارم عليك شاطر!!! احنا فعلا مندوبين المنظمة وبصراحة يا ابني احنا كنا شاكين فيك من زمان!!! بس المشكلة اننا ما كناش عارفين احنا شاكين فيك ليه!؟؟؟!
-يارب تجيب العواقب سليمة يارب!!! اتفضل جنابك اسأل عن ايتها حاجة!!! وانا تحت امركم وأمر المنظمة !!!
وعلى الفور تم فتح دفتر الاستبيان في ساعته وتاريخه....
سين :اسمك وسنك وعنوانك؟!
جيم :دعبس عليوة عبدالعال حسونة عبد العاطي متولي ابو اصبع السهن 45 سنة من كفر الدعابسة بحرية!!!
-كنت بتعمل ايه يا دعبس يا ابني في اوضة النوم ساعة ما ظبطناك؟؟؟!!!
-أبدا يا باشا ح اقولك ايه بس!!! ما هو الكدب في الحالات اللي زي دي خيبة!! انا يا باشا ولامؤاخذة كنت نايم مع الجماعة بتوعي!!