الارهابي ابو "سرنجة"..! عبد العزيز محمود

-الحق ياكابتن فيه واحد م الركاب مطلع سرنجة وعمال يحقن في روحه!!!!
قالتها المضيفة لكابتن الطائرة فشغل على الفور نظام الطيار الآلى ثم خرج من الكابينة مسرعا :
-هوه فين الحيوان ده؟؟؟
-هنا ياكابتن وسط الطيارة ...ايوه هوه دا اللي بينضرب من الركاب!
-دا باينه مدمن وعايز يعمل لنا مشاكل ع الطيارة..وشرف امي ماهاعتقه!!
وبحركة قوية من كلتا يديه ازاح الركاب المتجمعين حول ابوسرنجة وهو يصرخ:
-بس ياجدع منك له ...كفاية ضرب...انا عايزكم بس تمسكوهولي!
وعندما امسك الركاب في ابوسرنجة انهال الكابتن عليه صفعا وركلا وهو يقول:
-يامدمن يا ابن المدمن عايز تعمل لي مشاكل ع الطيارة بتاعتي....هوه انا ناقصك !!!
-ياجماعة حرام عليكم ...انا استويت...!!!
-حرمت عليك عيشتك ..وشرف امي لاسلمك ف اول مطار !!!
وهكذا تم تسليم ابوسرنجة للسلطات في اول مطار ومعه السرنجة اداة الجريمة حيث اقتيد الى جهة غير معلومة وهناك أخذ التحقيق مجراه:
-يعني عايز تفهمني ياروح امك انك كنت بتاخد حقنة السكر؟؟
-وغلاوتك ياباشا مافيه غير كده ..انا عيان بالسكر من ساعة ما اتجوزت! ..ولما جات لي الكومة ف الطيارة طلعت السرنجة من جيبي وقعدت احقن ف روحي !!
-وبتسرح باهلى كمان؟؟..يظهر انك مش عارف انا مين؟ ....انا يابني اللى بأنطَق الحجر!!!!
-ياباشا هوه معقول ح احقن نفسي بالمخدرات كده عيني عينك جوه الطيارة !!!!
-امال كنت ح تحقن نفسك فين يا مجرم يا ابن المجرم !!
-ياباشا ما انا قدامي تواليت الطيارة !
-لاااااااااااااااادا انت البعيد مش مدمن وبس، دا انت ارهابي وغلباوي عتيد الاجرام ...وضبوه!!
وهكذا انهال مجموعة من الرجال الاشداء ضربا وصفعا وركلا على ابوسرنجة حتى نطق:
-خلاص ح اعترف ..ايوه انا ارهابي ومجرم ومتخلف عقليا كمان!
-اهوه كده الكلام ..احكي واشجيني !!!
-انا ياباشا كنت ح افجر الطيارة بالسرنجة اللى قدام سعادتك دي!!
-اشرح لي العملية بالتفصيل الممل...وانت يابغل انت ..ايوه انت ..اتصل لي بالكومندان !!!
وفي اقل من خمس دقائق كان الكومندان يتلقى تقريرا شاملا باعترافات ابو سرنجة فأشعل سيجارا في حجم صباع الكفتة ثم قال:
-عفارم عليكم ...يعني الواد اعترف بسرعة وماساقش اللوع!!
-تلامذتك ياكومندان ...بس الواد سعادتك ما طلعش مدمن ....دا طلع ارهابي خطير كان عايز يفجر الطيارة!
-يفجرها بايه؟؟؟!
-بالسرنجة اللى ظبطناها معاه سعادتك!!
-يادي المصيبة السوداء...ده فعلا اسلوب جديد ومش معروف ...اتصلوا لي بالباشا الكبير!!!
وفور اتمام الاتصال كانت الاوامر قد صدرت بنقل ابو سرنجة الى مكتب الباشا الكبير الذي خاطبه بهدوء شديد:
-شوف يا ابو سرنجة لو اتعاونت معانا ح ندلعك ونجيبلك اللي نفسك فيه..ويمكن نسيبك تروَح لأمك ....ولو سقت العوج ح نفسحك!!
-ياباشا انا خدام جنابك ...بس وحياة اغلى حاجة عندك بلاش ضرب!
- ما حدش يا ابني ح يلمسك ...بس قول لنا ازاي دخلت بالمتفجرات جوه الطيارة ؟؟
-بصراحة يا باشا... أنا لفيتها في ملاية حوالين وسطي !!
-ياابن العفريتة ...طيب وازاي الكلاب في المطار مااتعرفتش ع المتفجرات؟
-لاني سعادتك كنت ناقعها في شيح مغلي ونفتالين بلية!!!
-طيب والسرنجة ...عديت بيها ازاي من البوابات الالكترونية ؟؟!!
-والله ياباشا ما انا فاكر ...بس متهيألي كده والله اعلم اني كنت لابس طاقية الاخفاء !!
-ياابن الايه!!! دا انت طلعت ارهابي خطير ونهار ابوك اسود....اتصلوا لي بجنابه !!!
وهكذا وفي مكتبه الابيضاوي جلس جنابه يستمع الى تقرير مفصل عن العملية بالفيديو كونفرنس ثم قال
-انا مش فاهم حاجة....ارهابي بسرنجة على طيارة من الطيارات بتاعتنا؟؟
-تمام معاليك..وكان لافف المتفجرات بملاية حوالين وسطه!!!!
-وازاي دخل الطيارة بالسرنجة ؟؟؟
-الواد معاليك كان لابس طاقية الاخفاء ..عشان كدة ولا بوابة من البوابات الالكترونية زمرت !!
-عفارم عليكم يارجالة ...العملية دي فعلا جات ف وقتها ..!
وعلى الفور عقد جنابه مؤتمرا صحفيا عالميا للكشف عن تفاصيل العملية الاجرامية وكالعادة انهال الصحفيون بالأسئلة
-محسوبك حمامة السرياقوسي من صحيفة "باحبك يا ستموني" ... انا باشجب واستنكر العملية الاجرامية بتاعت الارهابي ابو سرنجة وباطالب باعدامه فورا و ع الخازوق !!
-متشكرين يا اخ حمامة ..وصدقني احنا عارفينك حبيبنا من زمان !!
-زكي قدرة من مجلة "الدربكة" ...ممكن نعرف الارهابي ده من انهي داهية ؟؟!
-الواد يا اخ قدرة من بلد منتجة للجاز واحنا بعون الله ح نستولى على بلده والجاز اللي فيها !!
- حمودة الشنكوتي من برنامج "صباحو بانجو ": طيب ازاي المتفجرات ما انفجرتش رغم الحقن ده كله ؟؟؟
-دي فعلا معجزة يا اخ شنكوتي ..الواد قعد يحقن في المتفجرات بالسرنجة ييجي كده نص ساعة ...بس ربك اراد ان الركاب يعيشوا ويربوا عيالهم ..!!!
وهنا تدخل السكرتير الصحفي لجنابه قائلا : آخر سؤال...للاخ السٌهن اللي قاعد ورا وحاطط الميكروفون في بقه !!
-عنتر شايل سيفه من قناة "آه ياامه" ممكن جنابك تفهمنا ..ازاي ابوسرنجة عدى بالسرنجة والمتفجرات من البوابات الالكترونية ؟؟؟
-صدقني يا اخ عنتر ...الواد أبوسرنجة كان لابس طاقية الإخفاء !!!