جايلك يا واشنطن!!! عبد العزيز محمود

-شهل ياجدع منك له!! طيارة الوفد الامريكاني خلاص على وصول!!!
هكذا شخط معالي الوزير "فلة الفللي" وزير البنية التحتانية الشرق اوسطي في العمال الذين كانوا يفرشون السجاد الاحمر على ارضية المطار فهمس احدهم لزميله:
-هوه فيه ايه يا حسنين؟ ماله سيادة الوزير كده عصبي ومش طايق نفسه ؟!
-انت مش شايف يا محمدين الزفة اللي في المطار؟! دا وفد امريكاني يا عم الحاج !! فاهم يعني ايه امريكاني؟؟
وفور نزول الوفد الامريكي من الطائرة استقبله الوزير فلة الفللي بالورود ثم عزفت الفرقة الموسيقية السلامين الوطنيين الامريكي والشرق اوسطي
-اهلا وسهلا!! شرفتو الشرق الاوسط يا بهوات ! نورت يا معالي الوزير!!
-شكرا جزيلا! بس انا في الحقيقة مش وزير! انا سكرتير رئيس هيئة الصرف الصحي الامريكية! ودول مش بهوات ولا حاجة دول خبراء جايين يتعرفوا على أوضاع المجاري في المنطقة !!
-يا تلتميت مرحب!! ياربعميت اهلا وسهلا!! اتفضل يا جناب الباشا الامريكاني الوزير!! تفضلوا يا باشوات!!!
وباشارة من صباع الوزير الصغير هرع عدد من الرجال لحمل حقائب الوفد لكن أعضائه رفضوا تسليم حقائبهم:
-ازاي بس يا باشاوات!! دا انتو ضيوفنا ولازم نشيل شنطكم!!
-متشكرين يا مستر فللي !! بس احنا بنشيل شنطنا بنفسنا!!
-يا عيب الشوم!! امال "الشحوطة" دول جايين يعملوا ايه!!؟ شيل يا ااااااااد ياشحط منك له شنط الباشوات الامريكان الوزرا!!
وفي دقائق غادر الوفد الامريكي المطار في موكب من السيارات المرسيدس متوجها الى مقر اقامته بفندق "السلامو عليكم" تشيعهم نظرات باقي الركاب الذين وقفوا في طوابير لإنهاء اجراءات دخولهم الى الشرق الاوسط!!
وفي الفندق قدم الوزير فلة الفللي باقات أخرى من الورد لأعضاء الوفد قائلا:
-عليا النعمة يا باشاوات انتو فعلا نورتو المنطقة !!
-المنطقة منورة بناسها يا مستر فللي!!! ومتشكرين قوي على الاستقبال الحافل ده !!
-ازاي بقى!؟ ده اقل واجب !! يا بهوات انا عاملكم بروجرام انما ايه؟ ..تحفة!! بس الاول تخلصوا موضوع المجاري اللي دمه تقيل ده!! وبعدين نخش ع الفرفشة !!!
-احنا فعلا يا مستر فللي نفسنا نهيص وننبسط !! خصوصا اننا بنعتبر زيارتنا للشرق الاوسط نوع من السفر عبر الزمن!! وده حقيقي بيعمل لنا زغزغة في الدماغ وفرفشة مالهاش حدود !!
-وحياة ولادي انا عارف كده كويس!! وموضب لكم بروجرام آخر أنتكة !!
-شكرا يا مستر فللي !! بس ياريت البروجرام يكون فيه رقص شرق اوسطي من بتاعكم !! ويكون فيه رقاصات روس !!!
-وشرف امي لامنجهكم آخر منجهة!! هوه احنا عندنا في المنطقة اغلى من ماما امريكا!!
وفي ختام الزيارة التي وصفتها وسائل الاعلام الشرق اوسطية بالناجحة وجه الوفد الامريكي الدعوة للوزير فلة الفللي لزيارة واشنطن لاستكمال المشاورات حول تطوير شبكات المجاري ومحطات الشفط !!
-والله وصبرت ونلت يافللي !! الله يرحمك يا امه !! ياما كان نفسي تشوفيني وانا مجعوص في مصلحة المجاري الامريكية !! جايلك يا واشنطن !! جايلك يا غالية !!
وبعد اسبوعين وصل الوزير فلة الفللي الى واشنطن على رأس وفد من الخبراء لكن الطائرة التي تقل سيادته تم ركنها ساعتين على ممر الهبوط لفحصها للتأكد من خلوها من اية متفجرات، وفورالسماح للركاب بالنزول احتجز الركاب الشرق اوسطيون في قاعة مغلقة لحين انهاء اجراءات خروج باقي الركاب
-انا مش فاهم لازمتها ايه العطلة دي كلها!! همه مش عارفين ان فيه وزير شرق اوسطي ع الطيارة؟؟ واضح ان الفاكس اللي بعتناه ما وصلش!! وشرف امي يا حنتيرة لأنفخك انت وطاقم السكرتارية!!
-هدي نفسك يا معالي الوزير!! اكيد فيه سوء تفاهم!!
-طلاق تلاتة من بيتي لأعمل أزمة دبلوماسية!! همه مش عارفين انا مين!!!؟؟
واخيرا ظهر ضابط جوازات امريكي ليطلب من الركاب المنتظرين الوقوف في طابور استعدادا للتفتيش:
-تفتيش ايه وبتاع ايه؟ يا جماعة انا وزير شرق اوسطي!! فاهمين يعني ايه وزير شرق اوسطي؟؟؟
-انشا الله جنابك تكون رئيس وزراء!! دي اجراءات جديدة لمكافحة الارهاب !! ومفيش هنا حد على راسه ريشة !!!
-هوه انتي شايفاني ارهابي ياولية ؟!!! ده انا وزير شرق اوسطي !!!
فقال اعضاء الوفد: معلش يا معالي الوزير تعالي على نفسك شوية!! وخللينا نخلص في اليوم الاسود ده!!
وهكذا وقف الوزير فلة الفللي صاغرا في طابور التفتيش وهو يلعن ابو اليوم الذي زار فيه امريكا:
-معلش يامستر فللي ممكن تطلع اللي في جيوبك!! وتقلع الجزمة والشراب!!
-حاضر!!
-ياريت كمان تقلع الجاكيت والكرافتة والقميص والبنطلون والفانلة والساعة وتدينا الموبايل ده!!!
-اللهم طولك يا روح!! حاضر!!!
-معلش بدون احراج!! ياريت تقلع باقي هدومك عشان الجهاز لسه بيزمر!!!
-مايزمر والا يتحرق بجاز!! ما انت شايف بنفسك أهو!! معدش فاضل غير الكلسون!!؟
-آسفين جدا!! بس سعادتك لازم تكمل قلع!!
فزعق الوزير فلة الفللي قائلا: وشرف امي اللي ح يقرب مني ح أشرحه!!!!
-أرجوك يا مستر فللي تنفذ التعليمات بالذوق!! عشان ح تخش بعد كده ع الاسكانر
-اسكانر ايه وبتاع ايه !!! انا ح اوديكم في داهية ! واضح انكم مش عارفين انا مين؟
فقال ضابط الجوازات الامريكي: ارجوك يا مستر فللي ما تخليناش نلجا للعنف ! نفذ التعليمات من فضلك وخش ع الاسكانر!!!
فارتفعت صيحات الركاب الشرق الاوسطيين: يا عم اقلع وخلصنا في يومك اللي مش فايت!! احنا ناقصين عطلة ووجع دماغ!!
فامتثل الوزير فلة الفللي صاغرا ودخل ع الاسكانر وهو يصرخ باعلى صوته: وشرف امي لاقدم مذكرة احتجاج رسمية في وزارة الخارجية!! وحياة ولادي لأقلب عاليها واطيها!!!
-انشا الله تشتكي في البيت الابيض ذات نفسه!! دي اجراءات لمكافحة الارهاب ولا مفر منها !!
وعقب تفتيش الركاب الشرق اوسطيين بالاسكانر صدرت الاوامر بتفتيشهم ذاتيا زيادة في الاحتياط قبل السماح لهم بانهاء باقي الاجراءات ومغادرة المطار
-الله!! هوه مافيش حد مستنينا من مصلحة المجاري الامريكية والا ايه!! عليا النعمة دي جليطة وقلة ادب!!
-مظبوط سعادتك!! دي فعلا جليطة مالهاش حدود !!
وهكذا اضطر اعضاء الوفد للذهاب الى الفندق المخصص لاقامتهم في سيارات تاكسي ومن هناك اجروا الاتصالات اللازمة فقيل لهم ان المباحثات سوف تبدأ على الفور في هيئة المجاري الامريكية وأعطوهم العنوان!!!
-مباحثات ايه وكلام فارغ ايه !؟ موش تسيبونا نرتاح م السفر!! ونرحرح لنا كده اسبوعين تلاتة!!
-آسفين جدا يا جماعة ! فيه وفود كتير جايه من الشرق الاوسط عشان موضوع المجاري!! والوقت هنا من دهب!!
وهكذا دخل الوفد الشرق اوسطي في دوامة من الاجتماعات والمقابلات والجولات حتى كادت روح اعضائه تطلع!!
-هوه ايه الحكاية؟ مباحثات واجتماعات ووجع دماغ !! أمال فين الملاهي الليلية والسهرات الامريكاني المعتبرة؟؟!!
-آسفين جدا يا جماعة!! انتو عارفين اننا بنتحاسب هنا على كل مليم احمر!! ولو عايزين تسهروا يبقا على حسابكم!!
وفي نهاية الزيارة قرر الوزير فلة الفللي ان يستقل طائرة امريكية في طريق العودة إلى الشرق الاوسط هو والوفد المرافق لسيادته متخيلا ان ذلك سيجنبه التفتيش لكنه تعرض لنفس المعاملة فأخذ يجز على اسنانه قائلا: وشرف ابويا لاوريكم ح اعمل ايه!!! بس اما اوصل الشرق الاوسط يا كاوبويز يا ولاد الكاوبويز!!
وفي اول اجتماع لمجلس الوزراء الشرق اوسطي طلب الوزير فلة الفللي الكلمة:
-يا معالي رئيس الوزراء انا اتبهدلت في أمريكا واتمسح بكرامتي الارض انا والوفد اللي معايا!! ولابد من اجراء صارم!!
-الوفد اللي معاك يتحرق بجاز يافللي بيه!! لكن كرامة سيادتك هيه دي اللي تهمنا !!!
-انا باطالب سيادتك بتطبيق مبدأ المعاملة بالمثل للرد ع الاهانة دي !!
وهنا انقسمت الاراء في مجلس الوزراء الشرق اوسطي:
-فعلا اللي حصل للفللي بيه ده غير مقبول بالمرة!!! واهانة كبيرة للكرامة الشرق اوسطية ولازم الجماعة الكاوبوي دول يعرفوا حدودهم !!
لكن فريقا من الوزراء اعترض : يعني عايزينا نقلع المسئولين الامريكان ملط لما يشرفونا في المنطقة ؟؟؟
وهنا قال رئيس الوزراء الشرق اوسطي : يا جماعة دي فعلا مسألة كرامة! وانا في مواضيع الكرامة ما أعرفش ابويا!! بس عموما التسامح برضه مافيش احسن منه خصوصا ان شمندورة بيه وزير المصاطب المحلية مسافر امريكا الاسبوع الجاي وأظن سيادته ما عندوش مشكلة من ناحية التفتيش والاسكانر..؟؟!!
فصاح وزير المصاطب المحلية: عليا الطلاق بالتلاتة ما عندي اي مشكلة!! هوه انا اطول اروح أمريكا ! دا اللي يروح هناك أكيد أمه داعية له!!
فقال رئيس الوزراء محاولا تهدئة وزير البنية التحتانية الغاضب: انا عارف يا فللي بيه ان كرامة سيادتك ناقحة عليك شوية!! وده طبيعي ومفهوم ما احنا كمان عندنا كرامة ومش جبلات !!! لكن المصالح العليا للشرق الاوسط بتقتضي شوية مرونة !
-أفهم من كده ان معاليك رافض تطبيق مبدأ المعاملة بالمثل ع الكابويز دول!!
-مين قال كده؟؟ احنا موافقين من حيث المبدأ على المعاملة بالمثل!! بس المشكلة في التوقيت المناسب!! عشان كده أنا بارجوك يا فللي بيه تمسحها فيا النوبة دي !! ويا بخت من بات مظلوم وماباتش ظالم!!!!
فأمن عدد من الوزراء على كلام رئيس الوزراء: روق يا فللي بيه وهدي نفسك !! فيها ايه يعني يا اكسلانس لما فتشوك ذاتيا وحطوك ع الاسكانر !! المهم انك سافرت امريكا وعملت شوبنج وهيصت!! بيقولوا السهرات في واشنطن بالليل تجنن!!
وهنا صاح شمندورة بيه وزير المصاطب المحلية الشرق اوسطي كمن اصابته حالة صرع ..
-جايلك يا واشنطن جايلك يا حبيبتي !!! انشا الله يقطعوني حتت ويقلوني ف الزيت !!جايلك يا غالية !!!