فنجال قهوة..!! عبد العزيز محمود

كانت قعدة طويلة بذل فيها المعلم عتريس مجهودا فوق العادة للتوفيق بين الأطراف المتنازعة وفجأة وضع يده على جبهته وصرخ بأعلى صوته: آه يا دماغي ياني!! الصداع ح يفرتك نافوخي !!
فقفز الاسطى دكروري دراعه اليمين من وسط الرجالة قائلا: عليا الحرام من بيتي يا معلم انت يلزمك فنجال قهوة ع السريع!! وطلاق تلاتة من حريمي الأربعة ما حد ح يعملهولك غيرى!!!
-معقولة يا دكروري تعمللي القهوة بنفسك؟! امال مجيعص الطباخ راح فين!؟
-مجيعص مين وبتاع مين ياسيد الناس!!! ده انا فنجال القهوة بتاعي ح يخلليك بالصلاة ع النبي آخر حلاوة!!!
وفي المطبخ المجاور...
-ما تغور يااااااد يا مجيعص من وشي عشان أعمل قهوة المعلم على مزاجى!! وبراحة راحتي!! هوه انت ح تفضل واقف لي كده زي الصنم!!
-يا اسطى دكروري ما يصحش كده تشتغل قهوجي وانا موجود!! انت ناسي جنابك اني الطباخ الخصوصي بتاع المعلم!!
-يااااد باقولك غور من وشي الساعة دي أحسن أحدفك بالكنكة !! هوه انت البعيد بهيم والا ما بتفهمش عربي؟؟ يااااد انا حالف يمين طلاق ما حدش ح يعمل القهوة دي غيري!!
وبعد خمس دقائق دخل دكروري الى القاعة حاملا فنجال القهوة وهو يقول بصوت دافيء: مطرح ما يسري يمرى يا سيد المعلمين!!! فنجال قهوة إنما ايه ؟؟؟؟ آخر حلاوة ويستاهل بقكّ!!!
-بس كده كتير أوي يا دكروري !!! وكمان شايل الفنجال وجايبهولي بنفسك!! شايفين يا رجالة الصحوبية بتعمل ايه في البني آدم؟!!
فهمهم الحاضرون بصوت عال: اصيل يا دكروري!!! ودين النبي اصيل وراجل!!! يخلليكم لبعض يا سيد الناس ويكفيكم شر ولاد الحرام!!!
-يا رجالة انا ما عملتش حاجة!!! ده انا لحم كتافي من خير المعلم !! ولو ما خدمتوش بايديا أخدمه برموش عينيا!!! أي والله برموش عينيا!!!
وهنا نظر المعلم الى دراعه اليمين بامتنان وقال:
-أصيل والله يا دكروري !!! انا مش عارف من غيرك كنت عملت ايه!!صحيح يا رجالة صدق اللي قال رُب اخ لك لم تلده الست والدتك!!!
-ما تقولش كده يا تاج راسي !!!!! ده احنا كلنا من غيرك ما نسواش بصلة!!!! كفاية ان جنابك راعب الخلايق دي كلها !!! والدنيا كلها عاملة لك عشرين مليون حساب!!!!
وفي ثوان رشف المعلم فنجال القهوة حتى آخر قطرة ثم بدأ يلحوس فيه بلسانه واصابعه...
-يا سلام يا جدعان !! ده اعجب فنجال قهوة شربته في حياتي!! صحيح بُن أصلي إنما ايه؟؟ له العجب!!! هوه انت حاطط فيه ايه يا دكروري؟؟!!
-ابدا وغلاوتك يا معلم!! ده -فضلة خيرك- بن محوج جبته مخصوص معايا عشان جنابك!!
-غريبة أوي!! يعني انت جاي من بيتكم وانت ناوي تعمل لي فنجال قهوة؟؟!!!
-مش كده بالظبط يا سيد الناس!!! بس جنابك عارفني مزاجنجني قديم!!! ولا يمكن أخرج من بيتي إلا ومعايا كيس البن المحوج بتاعي!!!
وبعد ثلاثة ايام بالتمام والكمال وقف المعلم في محطة القطر يودع أولاد عمه وفجأة شعر بأعراض غريبة...
-انا مش عارف ليه ركبي مش شايلاني وجسمي بيترعش ومش قادر أصلب طولي!!
-ألف بعد الشر عليك يا معلم!! يمكن جنابك واخد لطشة برد والا مرهق حبتين!! ايوه اكيد ده ارهاق من اللت والعجن والمشاكل اللي ما لهاش اول من آخر!!!
-جايز يا رجالة!! عموما هاتوا لي دكروري صاحبي وحبيبي أتسند عليه شوية لغاية القطر ما يتحرك !!
وبعد وصول دكروري زادت الحالة سوءا...
-لااااااااده انا كده ح اقع من طولي وح تبقا فضيحة!! اجمد يا دكروري أمال أحسن انا كده ح اقع على رصيف المحطة!!!!
-ما تقلقش يا سيد المعلمين!!! بس وغلاوتك دي عين وصابتك!! اي والله عين!!! الهي وانت جاهي يحميك م العين يا سيد الناس!!!
ومع التدهور السريع في حالة المعلم تم استدعاء عربة حنطور نقلته الى منزله فورا...
-مالك يا عتريس وشك أصفر كده وحالتك بالبلا !!! سلامتك يا اخويا الف سلامة!!! مالك يا حبيبي ساكت كده؟؟ ما ترد عليا وتقول لي ...ايه اللي تاعبك؟؟!!!
-ابدا ما فيش حاجة يا روحية!! بس اطلب لي الدكاترة بتوعي بسرعة!! انا تعبان ع الآخر وشكلي كده ح أفيَص بدري بدري!!!!!
-ألف بعد الشر عليك يا غالي !! انا ح اطلبهم حالا!!!! مالك بترفع صوابعك كده لفوق زي ما تكون عايز تقول حاجة!!!
--ف..نجا...ل... .ق....هو...ة!!!!!!
-حاضر يا حبيبي ح اخلي مجيعص الطباخ يعمل لك فنجال القهوة اللي بتحبه!!!!! بس الصبر لغاية ما الدكاترة ييجوا ويطمنونا على حالتك !!! أنا مش عارفة البهوات دول اتأخروا كده ليه؟؟؟!!!!!!!
وفي غرفة نوم المعلم احاط به فريق من الاطباء ..
-هوه عتريس عنده ايه يا بهوات؟!! ده فقد النطق مرة واحدة وعمال يشخر بصوت عالي ويطلع ريم حوالين بقه !!
-والله يا هانم احنا نفسنا مش عارفين ايه الحكاية !!! دي فعلا حالة ما شفناش زيها أبدا!!!!! هوه جنابه أكل حاجة بره البيت؟؟؟!!!!
-ابدا يا اخويا ده عمره ما عملها!!! يووووه يقطعني نسيت!! ...دا من تلات ايام أخد فنجال قهوة عملهوله الاسطى دكروري !!!
-من تلات ايام!!! لااااااااااا دي فترة طويلة أوي!!! وما اظنش الحدوتة دي ليها علاقة بالحالة اللي هوه فيها!! يا خبر اسود ده المعلم وشه ازرق وعينيه برقت ونفسه راح !! الحقونا يا اخوانا بانبوبة الاوكسجين !!
وبعد محاولات اخرى محمومة ويائسة ....
-معلهشي يا هانم شدي حيلك!! احنا عملنا اللي علينا بس إرادة ربنا كانت أقوى مننا!!! البقية في حياتك يا ست الستات!!!!!