كانت خناقة حامية في مكتب سيادته لدرجة أننا اعتقدنا أن الحرب قامت.... -عليا الطلاق بالتلاتة ما حد شايل شنطة سيادته إلا أنا!!! -طلاق على طلاقك ما حد شايلها غير أنا!! -ليه هو انا مت والا اتحرقت بجاز والا أكلني قطر!! ورحمة ابويا ما حد شايل الشنطة غيري!! -إيه؟؟؟ ما عدش فيه احترام للسن ولا الخبرة ولا الأقدمية ولا الكفاءة!!! امال انا واقف في مكتب سيادته اعمل ايه؟؟؟ خيال مآتة والا اشارة مرور والا يمكن واقف اصطاد سمك !!! فقال سيادته بصوت مبحوح من نزلة برد قديمة: -يا جماعة ما يصحش كده!! والله العظيم انتو فعلا بتحرجوني بالكلام ده !! أرجوكم مافيش داعي تتخانقوا زي العيال على حاجة هايفة زي كده!!!! وهنا دخل عوكل من الباب كالتور الهايج: -احراج ايه وبتاع ايه يا سعادة الريس!!!! طلاق تلاتة من بيتي ما حد شايل شنطة سيادتك غيري!!! ده انا متعين في الجورنال وحلم حياتي اشيل شنطة سعادتك!!! وهكذا اندلعت خناقة حامية على الشنطة التي امسك بها الجميع وكانهم عثروا على عيل تايه، فصرخ سيادته: -يا جماعة مش كده!! الشنطة ح تتقطع!!! يا جماعة على مهلكم شوية دي شنطة ما فيش منها في البلد!!! دي هدية من الله يرحمه الريس بورش!!! وقبل ان يكمل سيادته كلامه كانت الشنطة اتفرتكت خمسميت حتة وقفزت من بطنها اوراق وملفات وتقارير ورزم مبطرخة من الدولارات!!! -شفتوا اديكم قطعتوا شنطة الريس بورش الله يرحمه!!! ينفع يعني الكلام ده!!! اما انتوا شوية عيال بصحيح!!!! طيب لموا الدولارات واعملوا حسابكم اني عاددهم كويس!!! وفي اليوم الثاني احضر سيادته شنطة أخرى واعطى تعليمات مشددة بان الشنطة لن يحملها أحد غير قرني... -اشمعني يعني قرني اللي يشيل شنطة سيادته!!! هوه على راسه ريشة؟؟ والا على راسه ريشة!!والا يمكن على راسه ريشة؟؟؟ -اما طلع واد حلنجي بصحيح؟!! ازاي الكلام ده يحصل واحنا عايشين على وش الدنيا!!! -كله منك يا عوكل!!!! يعني كان لازم تدخل المكتب زي التريللا وتشد في الشنطة لغاية ما اتفرتكت!!! وهنا قال عوكل كالمجروح : -باقولكم ايه!!! هوه انا الحيطة الواطية اللي بتعلقوا عليها خيبتكم!! اتنيلوا على عينكم وشوفوا لكم حل بدال كلام العيال ده؟؟!! وهنا صرخ الفنطاس كالملدوغ: -ياخا ده بعده!!! وشرف امي لاشرحه واخرطه للوز!!!!هوه ايه فاكرها سايبة؟؟!! والا سايبة؟!! ثم اخرج من جيبه مطواة قرن غزال وفتح نصلها بسرعة فقال الباقون : -اعقل يا مجنون ح تودي روحك في داهية!!! وتضيعنا كلنا معاك!! -ما هو يا روح ما بعدك روح!!! يكون في معلومكم ما حدش ح يشيل شنطة سيادته في الجورنال ده غيري!!! واللي ح يقرب من الشنطة ح اصفيه !!! -اهدا يا فنطاس وصلي ع النبي!! اهدا يا جدع مش كده!!! احنا في جورنال مش في مدبح!! اهدا لغاية ما نلاقي حل للمصيبة دي!!!! -باقولكم ايه!! ده آخر كلام عندي !! وبلغوا الواد قرني لو ما بعدش عن شنطة سيادته يبقا هوه الجاني على روحه!! وفور ابلاغ الرسالة لقرني دخل الى مكتب سيادته باكيا فتم استدعاء الشحوطة على وجه السرعة: -ايه الكلام الفارغ ده؟؟؟ هوه انا قاعد طيشة في الجورنال !!؟؟ دا انا رئيس التحرير يا غجر!! فاهمين يعني ايه رئيس التحرير!!؟؟؟ اللي حيقرب من الواد قرني ح ارفده!! سامع يا فنطاس...ح ارفده!!! -ترفده يعني ايه يا ريس!!! ما هو مش معقول قرني يشيل شنطة سيادتك وانا لسه عايش على وش الدنيا!!! -انت تخرس خالص!! هي كلمة ومش ح اتنيها!!! الشنطة بتاعتي خلاص بقت مسئولية قرني!!!!! وح تفضل مسئوليته لغاية ما يقصر في الشغلانة أو يتعب أو أغير أنا رأيي !!! -ايوه يا رياسة بس ده ظلم وربنا ما يرضاش بكده!! عشان ايه يعني سيادتك تميزه عني !! وانا أقدم وأكفأ وأجدع وأرجل منه!!! والا عشان يعني هوه قرني!!!! -خلاص انتهينا!! اتفضلوا على مكاتبكم وكل واحد يشوف شغله!! وفي كانتين الجورنال جلس الشحوطة واجمين بينما أخذ الفنطاس يلمع نصل المطواة وهو يتلفت يمينا وشمالا ... -اعقل يا فنطاس وسيبك من اللي في مخك ده!!! العنف مش ح يجيب نتيجة!!وانت كده بتضيع حقك!!! ده لو كان لك حق!!! -هوه عاد فيها عقل!! وشرف امي لأشرَحه بس لما اشوفه!! انتوا لسه ح تكلموني عن الحق والمستحق!! ما انتوا عارفين كويس اني أنا الوحيد اللي بيشيل شنطة الريس!!! -ايوه بس انت النهاردة خلاص كبرت وعجزت وما عدتش تنفع في الشغلانة دي!! -فشر ده اللي يقول عليا كده اوديه ورا الشمس!! إنتو ناسيين اني أنا اللي كنت باشيل شنطة مخيمر بيه لما كان رئيس تحرير من 40 سنة!!!! -مظبوط والله !!! احنا كلنا شفناك وانت بتشيل شنطة مخيمر بيه وتمشي وراه -زي خياله- في الرايحة والجاية!! فواصل الفنطاس حديثه: -مش كده وبس!! وبعديها شلت شنطة عليوة بيه وبعدين شنطة الرايق بيه، وبعدين شنطة المزاجنجي بيه!!! وبعدين شنطة الزملوطي بيه!!!! ولغاية اول امبارح كنت الوحيد اللي بيشيل شنطة حلاوة بيه!!!!!! -عموما يا فنطاس انت مشكلتك الحقيقية قرني!!! ودي تقريبا مشكلة مالهاش حل!!! -اطلعوا انتو منها بس ...وسيبوا لي قرني اصفي حسابي معاه بطريقتي!!! وكان غريبا في اليوم التالي حين اختفى قرني من الجورنال ولم يظهر له اثر رغم ان حلاوة بيه سأل عنه في كل مكان واتصل باسرته واقسام الشرطة والاسعاف والمستشفيات والمشرحة لكنه فص ملح وداب!!! -ايه الكلام ده!! يعني قرني بلعته الارض والا ندهته النداهة!! ما كان معانا امبارح لغاية الطبعة التامنة!! -أي والله ده حتى -الله يرجعه بالسلامة -طلب ساندوتشين كبدة وازازة بيبسي!!! وبعدين أكل علبتين كشري وشرب خمس فناجيل قهوة ودخن عشر سجاير مارلبورو!!!! وقعد يهزر ويضحك مع حلاوة بيه وبعدين شال له شنطته ووصَله لغاية العربية بتاعته!!!! -امال يعني المنيل على عينه راح فين؟؟؟ يمكن عينيه زاغت كده والا كده !!! -يا راجل حرام عليك انت مالقتش غير قرني تقول عليه كده!!! ده قرني يا جدع!!!! -خلاص يبقا مافيش قدامنا غير اننا نبلغ البوليس!! واضح ان فيه مصيبة كبيرة ورا الموضوع ده !! وهكذا جاء البوليس وبعد سين وجيم وتحريات لا نهاية لها تم احتجاز الفنطاس على ذمة القضية بصفته المستفيد الرئيسي من اختفاء قرني... -غريبة ان الفنطاس مش عايز يعترف بحاجة !؟؟؟والاغرب من كده ان قرني ماظهرش لغاية دلوقتى!! -يا ابني هوه حد عارف الفنطاس اللي وراها والا حلاوة بيه والا مين بالظبط !! الموضوع غامض وملعبك وفيه كلام كتير وواضح ان وراه بلاوي سودا!!! -طيب تفتكروا يا جماعة قرني ممكن يرجع بعد الغيبة الطويلة دي؟؟!! -يرجع ازاي يا بني آدم!!! هوه اللى راح بالشكل ده ممكن يرجع تاني؟؟؟؟!!! وهنا خرج السهن عن صمته وقال: -ما تسيبكم من الكلام اللي مالوش لازمة ده وتركزوا شوية!! دلوقتي مين اللي ح يشيل شنطة الريس!!؟؟ -عليا الطلاق بالتلاتة ما حد ح يشيل شنطة سيادته الا انا!!! -طيب طلاق على طلاقك ما حد شايلها غيري!! -ليه هوه انا اختفيت زي قرني والا رحت في الكازوزة زي الفنطاس!! الشنطة ماحدش ح يشيلها غيري!! وهنا اخرج عوكل مطواة قرن غزال من جيبه شبيهة بمطواة الفنطاس –الله يفك سجنه- ثم اخذ يلوح بها في الهواء ولا اجدعها بلطجي وقال: -يكون في معلومكم اللي ح ينازعني ع الشنطة ح أفرتكه!!! وفي هذه اللحظة بالذات كانت المفاجأة الكبيرة حين دخل حلاوة بيه إلى صالة التحرير وخلفه شاب له نفس ملامح قرني -ربنا يرجعه بالسلامة- حاملا في يده اليمين شنطة !!!