المشهد الاول -الله مش ده زكي بيه قدرة اللي ماشي " يتمخطر" والدنيا مش سايعاه؟!! -هوه ياسيدي بشحمه ولحمه وجهله وغباوته!! -وماله منفوخ كده ع الآخر وبيخانق دبان وشه!!!؟؟؟ - أصلهم أنعموا عليه -عقبال عندك- بتاج الجزيرة !! - غريبة!!! ..مش دا التاج بتاع الخراباوي بيه؟!! - هوه تاج الزفت !! بس الخراباوي النهاردة بقى من المطاريد !! -ازاي ما كان الكل في الكل!! وما حدش قادر يهوب له !! -جنابه عمل عملة سودا ومهببة بعيد عنك!! عشان كده البهوات الكبار نفخوه هوه ورجالته !! -وتفتكر زكي بيه ح يكون ايه نظامه ؟؟ -والله سيادته مالوش نظام معين !! دا شغال على كل الأنظمة !!! المشهد الثاني -الله!!..مش دا ياجماعة الجعر بيه ؟؟!! -تمام هوه بعينه !! انتو مش شايفه بيتلفت حواليه إزاي زي الحرامية!!! -وماله منفوخ كده ع الآخر وماشي "يتمخطر" وبيخانق دبان وشه؟؟؟!!! -أصله ياسيدي خبط تاج الجزيرة من زكي بيه قدرة!!! -غريبة !! هوه زكي بيه استقال والا هاجر والا اتحرق بجاز ؟؟! -ابدا سيادته مابقاش يسمع الكلام !!!عشان كده البهوات الكبار حطوه ع الخازوق ولامؤاخذة!! -وهوه عامل ايه دلوقتي ؟؟!! - ابدا اتجنن وقاعد ف العزبة يكلم نفسه!! المشهد التالت -سمعتوا آخر خبر يارجالة!!! -خير يا معلم ؟!!! -بيقولك الجعر بيه طار في حركة امبارح!!! -ازاي!! ما سعادته كان ماشي زي الفل وآخر حلاوة؟؟!! -البهوات الكبار اكتشفوا انه حاطط نص مليار جنية تحت البلاطة من وراهم!!عشان كده حطوه ع الخازوق!!! -ومين اللي هبش التاج النوبة دي!!؟؟ -أبوكرتونة بيه!!! وهوه دلوقتي قاعد في مكتبه مع شلة الأنس بيستقبل المهنئين والأونطجية!! -طيب يلا نبارك له أحسن دا راجل مجنون ومكلكع وبيشك في صوابع ايديه ورجليه !!! المشهد الرابع -ايه اللي حصل ليلة امبارح؟!!..بيقولك كان فيه خناقة جامدة في مكتب أبو كرتونة بيه!!! -ايوه ياااابا ...امبارح جات له لجنة من فوق عشان تستلم التاج..لكن أبوشوال بيه راسه وألف سيف يتحال ع المعاش والتاج على راسه!!!! -وبعدين...حصل ايه !!؟؟؟ -ولا حاجة!!! البهوات أعضاء اللجنة ضربوه علقة سخنة !! وخبطوا منه التاج وادوه لخيشة بيه!!! -غريبة !! مش دا اللي كان بيشيل الشنطة للجعر بيه؟!! -تمام جنابك!!..وخيشة بيه مش مصدق نفسه وماسك في التاج بايديه ورجليه وسنانه!!! وعمال يعض في صحابه وزمايله والمجتمع والناس!!!! المشهد الخامس -سمعتوا آخر نكتة؟؟؟!! -قول وضحكنا!!! -خيشة بيه اتمسك النهاردة في قضية نصب واحتيال!!! انما ايه؟... ليها العجب!!!! -ياراجل قول كلام غير ده!! -عليا الطلاق بالتلاتة ده اللي حصل ...سيادته حاول ينصب على رقاصة ساكنة معاه ف العمارة قوم ايه لبسته قضية!! والتاج خلاص بقا من نصيب البدنجاني بيه!!! -ياادي المصيبة السودا!!! يعني خيشة بيه اتشال بسبب قضية النصب؟! -لأ طبعا!!! ..اتشال عشان طلع حمار واتمسك!! بعد ما الرقاصة سجلت له صوت وصورة!!! -وطبعا البدنجاني بيه فرحان في مصيبة خيشة بيه وطايح! -سعادته اتهبل رسمي !! وعمال يزغرد ويرقص ويغني وهوه مش لابس حاجة في مكتبه غير التاج!!..والواد زغلول الساعي واقف يطبل له !! المشهد السادس -انا مش فاهم!! ليه البهوات دول مقطعين روحهم كده على تاج الجزيرة!!؟؟! -عشان التاج ده "يغمة" كبيرة يا أستاذ !!..فاهم يعني ايه "يغمة"؟!!! -طيب وليه طالقين الألاضيش بتوعهم!! ينهشوا فينا كده زي الديابة !؟؟ -عشان يخلصوا من قرفنا !! ويدلعوا نفسهم بعيد عن وجع الدماغ بتاعنا !!! -واحنا إيه دورنا ف الفيلم الهندي ده ؟!! -احنا نشقى وندوخ السبع دوخات!! وفي الآخر ناخد على قفانا!!! المشهد السابع -الله..مين اللي جاي من بعيد ده في زفة...وشايل على راسه تاج الجزيرة ؟؟؟ -دا فطوطة بيه يا سيدي !! خلاص أنعموا عليه بالتاج عقبال عندك!!! -غريبة امال البدنجاني بيه راح فين!! هوه سيادته أخد شلوت لفوق والا شلوت لتحت !!؟؟ -لأ سيادته جاله شلل نصفي، ونايم على ضهره في البيت ..وبيقولك دلوقتي بيعملها على روحه!! -وايه اللي جرا له؟!..ما كان زي الخرتيت وبيتنطط في كل حتة زي القرد !!! -الهانم ظبطته في وضع مش ولابد مع الخدامة!! ولما اشتكت لباباها الباشا عينك ما تشوف اللي النور!! الباشا هزأه وضربه بالصرمة ، وهبش منه التاج واداه لفطوطة بيه !! -مش فاهم!! يعني البدنجاني بيه جاله شلل لما اتقفش مع الخدامة!؟.. والا لما انضرب بالصرمة !!؟؟ -لما التاج راح منه يا راجل يا طيب ..يا عديم المفهومية !! -عليا النعمة اللي حصل ده من حظ فطوطة بيه!! والله يا جماعة الراجل دا فعلا أمه داعيه له !! -مظبوط يا اسيادنا !! انتوا مش شايفينه منفوخ إزاي وماشي "يتمخطر" زي المرحوم زكي بيه قدرة الله يرحمه!!!!