كنباوى وكنباوية.. حلقة (18) ..دولة النسوة الإخوانية

كنباوية امرأة لا تحب الطهى فى المطبخ قدر ما تحب أن تطهى كل طعامها بالصالة وهى جالسة أمام التليفزيون ويعلم هذا كل من يعرفها فهى لا تدخل المطبخ إلا لحظة وضع الأطعمة على النار فقط، إنها لاتبرح صالة شقتها إلا ساعات النوم فقط ويناغشها كنباوى أحيانًا بقوله لها إيه رأيك لو نمنا فى الصالة؟ وتقول له لو الأولاد مش هنا كنت وافقتك إننا ننام فى الصالة .
كنباوية تعد اليوم ممبارًا لكنباوى وتفترش الأرض وتحشيه وهى تتابع برنامج البرنامج لباسم يوسف وتحدث نفسها يسمعها كنباوى ..
كنباوى : بتبرطمى بتقولى إيه ؟
كنباوية : مش عاجبنى حال النسوان اللى مالهاش رأى ولا كلمة دول اللى بيتحركوا زى البهايم حسب مايقول اجوازهم .
كنباوى : انتى عاوزة تحرضى الستات على اجوازهم ؟
كنباوية : لا ياكنباوى أنا أقصد ستات جماعة الإخوان المسلمين انت لو تعرف أنا كلمة الإخوان المسلمين دى بتنقطنى قد إيه زى مايكون أعضاء الجماعة دول همه بس اللى مسلمين واحنا كفرة مش مسلمين ولا حاجة .
كنباوى : مالهم ستاتهم ؟
كنباوية : كان المرشد مجتمع بيهم لما سمع من رجالتهم أعضاء الجماعة إنهم مابقوش على العهد بالسمع والطاعة وإنهم مش عاجبهم حال البلد فقرر المرشد إنه يعمل لهم اجتماع على مستوى القاعدة وينورهم فيه ويبصرهم ويعرفهم خطأهم .
كنباوى : وبعدين ياكنباوية حصل إيه فى الاجتماع ده ؟
كنباوية : المرشد قعد يكلمهم عن صلح الحديبية وبيعة العقبة الثانية وازاى جه للنبى عليه الصلاة وأفضل السلام 73رجلًا وامرأتان من قبيلتى الأوس والخزرج وجلسوا معه واتفقوا على تأييده فى دعوته وبايعوا الرسول على أن يحموه وأن لهم الجنة والمرشد كمان اتكلم عن أهل يثرب وإنهم وجدوا فى هذه البيعة حلفًا سياسيًا ضد اليهود وخفف العداوة بين أهل يثرب والأوس والخزرج ووعد المرشد بأن من يحمى جماعة الإخوان المسلمين له الجنة .

كنباوى : الجنة ودخولها دلوقتى بقت بإيد المرشد ؟ ده قمة السفه والنفاق والضحك على الناس ده كفر وتطاول حسبى الله ونعم الوكيل فى المرشد والإخوان ومرسى .
كنباوية : وقال كمان إن الإخوان لازم يتحملوا إساءة الشارع المصرى لهم وأن سيدنا محمد اتحمل فى بداية دعواه الكثير من الأذى ممن حوله من الكفار وقد صبر وإن اللى بيحصل لمرسى ده أقل من اللى حصل للرسول صلى الله عليه وسلم الراجل كبر وخرف بيشبه مرسى بالرسول وقال زى ما النبى قبل صلح الحديبية لازم احنا كمان نقبل رغمًا عنا التفاوض مع القوى المدنية وكلم الستات عن أهمية السمع والطاعة لأن أعضاء الجماعة يرون مالا يراه غيرهم وحثهم على سمع وطاعة القيادات حتى لو مارأيتموه كان من وجهة نظركم خطًأ معللًا ذلك بأن القيادات تعرف الصواب أكثر من أى شخص آخر وقال لهم كمان إن الانتخابات القادمة معركة فاصلة ولازم الإخوان يكسبوها انت عارف ياكنباوى بسلامته سمى الجلسات دى إيه ؟

كنباوى : إيه ياكنباوية ؟
كنباوية : سماها جلسات وضوح الرؤية
كنباوى : رؤية إيه ؟ ده ضباب وشبورة وعمى ألوان
كنباوية : عرفت بقى ياكنباوى ايه اللى مخلينى أبرطم وأتنرفز
كنباوى : عرفت الله يكون فى عونك حناكل النهاردة ولا المرشد حينكد علينا ؟
كنباوية : النكد عليه هو وأهله وعشيرته حناكل ياخويا ونتهنى وجاتهم القرف يغوروا فى داهية نص ساعة والممبار يكون جاهز ياعنيا .
كنباوى : تسلملى عنيكى ياكنباوية تسلملى .