كنباوى وكنباوية.. حلقة رقم (27).. الريس مرسى لما كان قبل الرئاسة راعى غنم

أثناء مرور كنباوى من الصالة قاصدًا باب الشقة حيث كان عازمًا على النزول للجلوس على المقهى مع أصحابه فى الحى للعب الطاولة وشرب الشيشة والشاى والحلبة بالحليب سمع ضحكات زوجته كنباوية فاستوقفته ضحكاتها حتى أنه ابتسم وذهب إليها متعجبا ومستفسرا عن سر ضحكاتها الرنانه هكذا
كنباوى: خير الله ما اجعله خير يارب دايما اسمعك بتضحكى كده بس قوليلى ايه اللى بيضحكك كده ؟
كنباوية: هم يضحك وهم يبكى الجدع ده اللى اسمه أبو إسلام صاحب قناة الأمة الفضائية بيقول ان رغم النت اختراع صليبى الا انه مستمتع بيه
والجدع التانى المخبول ده اللى اسمه الشيخ جمال عبد الهادى هو اللى ضحكنى اكتر
كنباوى : ليه قال ايه ده كمان ؟
كنباوية : قال اللى ماحد ممكن يصدقه ولو حتى كان مجنون قال كلام مايدخلش عقل بنى ادمين ولو كانوا حتى عيال صغيره
كنباوى : النجزى يا كنباوية وقولى قال إيه المجنون ده خلينى انزل الحق عشرة الطاولة من أولها على القهوة
كنباوية : ياراجل أنت ماوراكش غير الطاولة ؟
كنباوى : آهه الواحد بيتسلى وبيفك عن نفسه وبيتساير مع اصحابه
كنباوية : طيب ايه رأيك فى اللى يسايرك ويسليك ويقك عنك ويلاعبك طاوله كمان هنا فى البيت ويدلعك ؟
كنباوى : هنا فى البيت ؟
كنباويه : ايوه هنا فى البيت ماتستغربش انا حلاعبك طاوله وادلعك وشوف طاولتى انا ولا طاولة صحابك على القهوة
كنباوى : حنلعبها فين ؟
كنباوية : على السرير
كنباوى : أنت متأكده أنها طاولة ؟
كنباوية : ايوه ياراجل وكل واحد وطاولته أنت مابتعرفش تلعب ؟
كنباوى : ما اعرفش العب ؟ انتى بتستعبطى ؟ ده انا حريف
كنباوية : طيب بعد ما اقولك على اللى مضحكنى ندخل الاوضه ألاعبك طاولة ونشوف مين فينا اللى حيغلب التانى
كنباوى : ماشى ياستى احكى وقولى إيه اللى بيضحكك
كنباوية : الشيخ جمال عبد الهادى اللى ما اعرفش بقى شيخ أمته وازاى ومين اللى قال ان ده شيخ بيقول
كنباوى : أيوه بيقول ايه الشيخ بلال ده ؟
.كنباوية : جمال مش بلال
كنباوى : ماتفرقش معايا الاسماء جمال بلال متقال أى حاجه والسلام
كنباوية : بيقول انه شاف رؤيا لمرسى شاف انه رأى مجلس والنبى محمد قاعد فيه والريس مرسى وبعض الصحابة والحضور وحان وقت الصلاه فقدم الناس النبى ليؤمهم لكن النبى قال للحضور وللصحابه: بل يصلى بكم الريس مرسى وقال انه حلم بالقحط والجدب فى الصحرا وان الابل عطشانه والناس ريقها ناشف وفجأة المطر انهطل
كنباوى : مطر ايه اللى انهطل ده الشيخ بتاعك ده هو اللى انهطل
كنباوية : سيبنى اكمل يامرسى ماتقاطعنيش
كنباوية : يوه انا قلتلك يامرسى ؟ يقطع مرسى واسمه انا مخى كله فى مرسى الريس مرسى اسفه ياكنباوى حقك عليا ياربى انا حلاقيها منين ولا منين هو مرسى ده ما وراهوش غير الخراب يخليك تحلف عليا بالطلاق مش بقولك من زمان انه نحس ويخرب البيوت العمرانه
كنباوى : ايوه كده ريحتى بالى بس ابقى خدى بالك بعد كده واوعى تغلطى فى اسمى تانى حتى لو كان الاسم ده اسم النبى دنيال مش الريس مرسى اللى انتى ندهتينى بيه
كنباويه : حاضر ياسبعى يا اللى بتغير عليا ياحمش يا رجوله اسمع بقى لما المطر نزل فى الصحرا الناس شربت وارتوت والابل كمان شربت وهو قال ايه سمع واحد بينده ويقول ارعوا ابل الريس مرسى
كنباوى : هو الريس مرسى كان بيشتغل قبل مايمسك الحكم راعى غنم ؟
كنباوية : وليه لأ ياخويا ما الاخوان مابيتكسفوش وممكن يشتغلو اى حاجه ويعملوا اى حاجه .
كنباوى : وبعدين ياكنباويه ؟ حصل ايه تانى ؟
كنباوية : وقال كمان انه حلم ان السما فيها حمام كتير اسود وقع على الارض وتساقط ولما بص الشيخ على كتف الريس مرسى لقى 8 حمامات خضرا واقفين على كتافه
كنباوى : 8 حمامات ولونها كمان اخضر وواقفين على كتاف مرسى بأماره ايه ؟ ده بومه غراب نوحى حيجى منين الحمام ده حتى الحمام غالى اليومين دول الجوز ب 36 جنيه
كنباويه : عرفت انا كنت بضحك ليه ؟
كنباوى : ايوه عرفت يلا حضرى نفسك للعب الطاوله ولا رجعتى فى كلامك ؟
كنباوية : فشر مين ده اللى يرجع فى كلامه ده مستبيعالك النهارده وحغلبك ياكنباوى
كنباوى : طيب يلا اسبقينى على الاوضه وورينى نفسك
كنباوية : بس كده دلوقتى اوريك نفسى
ودخلت كنباويه الاوضه وتبعها كنباوى وعلت ضحكات كنباويه
كنباوى : بقى هى دى طاولتك ابقى لاعبينى كل يوم بلا طاوله قهوه بلا زفت
كنباوية : حاضر حلاعبك كل يوم على المشاريب بس تبطل قرص وبالش تخمنى
كنباوى : هو انتى ياكنباويه حد يعرف يخمكم ده انتى تخمى بلد
كنباويه : اى اى اى اى ياراجل ما انا قايلالك بلاش قرص ومافيناش من قرص
كنباوى : معلش ياكنباويه اصله تعود وانا اتعودت على القرص بس اوعدك انى ابطل قرص