جلست كنباوية على جهاز الكمبيوتر الحاص بها عبر وصلة النت التى أخذتها من جارتها وفاء مقابل 40 جنيها شهريا، حيث تمتلك وفاء روتر ولديها اشتراك شهرى فى إحدى شركات الاتصالات وكانت كنباوية فى قمة الانشكاح وهى تتابع الأخبار على موقع مصراوى ناسية موعد غداء كنباوى وأولادها كنبة وشلتة، مما لفت هذا نظر زوجها كنباوى، وخاصة علو ضحكاتها التى كانت ترج الشقة رجًا. كنباوى: ربنا يفرحك ويبسطك كمان وكمان خير إن شا الله ماتضحكينا معاكى كنباوية: انا كنت بقرأ كده كام تكتة على مرسى فطسونى من الضحك عليه ده المصريين ألفوا عليه نكت أكتر من اللى ألفوها على مبارك كنباوى: مبارك مين ده أنا سامع ان فيه إحصائية اتعملت على اكتر شخصية اتألف عليها نكت من ايام ثورة عرابى لحد ثورة 25 يناير طلع الأول بجدارة فى الإحصائية دى محمد مرسى وتفوق على مبارك وعلى شخصية المواطن الصعيدى اللى كانت ثلاث أرباع نكت المصريين بتدور حواليه وعليه مرسى غلبه. كنباوية: ده بيقولوا عليه: ش ، ك ، ع مع مرتبة الشرف وفيه اللى بيقولوا عليه انه مضحوك عليه وانه مغيب وانه ساذج وانه على نياته وأنه طبيب جراح زى مابيقول هو على نفسه وعلشان كده بيقولوا ده اللى مزعل منه باسم يوسف، لأن باسم يوسف أصلا طبيب جراحه قلب مفتوح وعلشان كده باسم هاريه تريقة هو والإخوان وبيقولوا كمان ان محمد مرسى خلى رئاسه الجمهورية اشبه بدوار العمده اللى العمدة بيستقبل فيه شيخ الغفر اللى هو وزير الداخليه وبيستقبل فيه كمان شيخ البلد اللى هو رئيس الوزراء هشام قنديل وبيستقبل فيه كمان البركه شيخ المسجد اللى هو محمد بديع وبيستقبل فيه كمان الباشا ماهو كل بلد وفيها باشا أو سعاده البيه ومرسى البيه بتاعه والباشا هو خيرت الشاطر وبيستقبل فيه كمان الإخوان المسلمين أعضائه الكبار اللى على شاكله عصام العريان وسعد الكتاتنى وغيرهم وغيرهم ده غير الإخوة أولاد العم السلفيين من أمثال حازم أبوإسماعيل ومخيون وباقى اولاد العم وبيقعدوا كلهم يرحرحوا على النجياه بتاعة رئاسة الجمهورية ومش بعيد يكونوا فى البرد بيولعوا نار علشان يتدفوا ومش بعيد كمان يكونوا بيمصوا قصب وبيعملوا دورين تلاتة شاى ماهم قاعدين فى دوار العمدة محمد مرسى مش فى رئاسة الجمهورية الله يمسيك بالخير يابابا حسنى كنت فى الإتيكيت والبرتوكول فعلا رئيس مش سى مرسى او ابا العمدة مرسى. كنباوى: ده مش رئيس وهو حاسس بكده والدليل على كده انه كل شوية يقول للى معاه او فى أى حوار أنا رئيس الجمهورية الراجل نفسه مش مصدق انه رئيس الجمهورية وعاوز يصدق بس بينى وبينك هى ماتدخلش عقل أى حد ولا حتى مرسى نفسه فاعذرى الراجل ماهى أمله لاكانت على البال ولا على الخاطر وشبعه بعد جوعه ده كويس ان الراجل لسه بعقله وماجاتلوش لوسة ربتله الخفيف ده أكيد ساعات بيتهيأ له انه فى حلم وأنه نايم مش صاحى مرسى عقبال مايقتنع ويصدق انه رئيس حيكون الرئيس اللى بعده مسك الحكم ومرسى مش داريان كنباوية: عرفت بقى انا كنت بضحك ليه ياكنباوى كنباوى: ايوه عرفت وكويس ان احنا لقينا حسنة لمرسى انه قدر يضحكنا شويه رغم احزاننا كنباوية: كفايه كلام اما اقوم احطلك الأكل زمانك مت من الجوع كنباوى: ومين سمعك ده انا عصافير بطنى بتصوصو كنباوية: سامحنى ياكنباوى دقايق والأكل يكون قدام عنيك الحلوين دول كنباوى: عنيا انا اللى حلوين برضه ؟ أمال عنيكى انتى يتقال عليهم ايه كنباوية: انت بتعاكسنى ياكنباوى ولا بتجاملنى ولا ليك شوق فى حاجة ؟ كنباوى : أعاكسك آه أجاملك لا ليا شوق فى حاجة ليا كنباوية: طيب بعد الأكل اعمل اللى نفسك فيه ياحلالى واهو العيال مش هنا كنباوى: ربنا مايحرمنى من رضاكى ياكنبة ياحبى وأريكة أشواقى
