كنباوى وكنباوية ..حلقه رقم (24) .. مرسى رايح يبيع الأونطة لتجار الشنطة

كنباوية تضحك من قلبها وبصوت مسموع، وكنباوى يمر من أمامها مبتسمًا لضحكاتها
كنباوى: خير يا كنباوية ما تضحكينا معاكى
كنباوية: تعالى اقعد جنبى وانت تفطس على نفسك من الضحك
كنباوى: إيه بتتفرجى على الأراجوز ؟ ولا بتسمعى نكت حمادة سلطان ؟ ولا بتتفرجى على الواد الأهبل الجديد ده اللى اسمه زلطة ؟
كنباوية: اللى باشوفه اسخم من ده كله باتفرج على خطاب مرسى لشعب بورسعيد
كنباوى: وإيه اللى يضحك فى خطاب مرسى ؟
كنباوية: خطاب ماكانش ليه لازمة، خطاب لإحياء ماء الوجه بعدما حرجه قائد الجيش الميدانى ونزل اتكلم مع شعب بورسعيد، الشاطر وبديع قالوا له كده الراجل حرجك وخلى منظرك وحش الخطوة دى المفروض انت اللى كنت تقوم بيها مش قائد الجيش الميدانى ويكسب بيها الجيش بنط جديد عند الشعب المصرى وشعب بورسعيد علشان كده مرسى قال ووجه لهم خطابه الأهبل ده
كنباوى: أنا سامع الناس فى الشارع بتقول إن البورسعيدية لما رفضوا يقابلوا مرسى اتكسف وألقى الخطاب ده
كنباوية: هو ده بيتكسف ولا ده وش كسوف ده بارد هو خاف يروح بورسعيد والمصيبة إنه ما قالش جملة واحدة مفيدة
كنباوى: ياشيخة امال كان طالع يقول إيه ؟
كنباوية: طالع بعد 45 يومًا يقول للناس وللبورسعيدية حقكم علىّ وجميع الحقوق مكفولة ومطالبكم فى قلبى
كنباوى: هو الدم فيه حقكم علىّ ؟
كنباوية: اديك انت قلتها يقتل القتيل ويمشى فى جنازته ده مش واعى للى هو بيعمله أكيد
كنباوى: هو باين عليه اتعود انه يضحك الشعب المصرى عليه فى خطاباته ولو ماعملش كده المصريون مش حيصدقوا إن ده خطاب مرسى
كنباوية: على قولك ايش ياخد الريح من البلاط وعلى رأى المثل اللى بيقول: يامستنى الدهنة من بطن النملة عمرك ماتقلى تقلية
كنباوى: إيه ياكنباوية الأمثال البديعة دى ؟
كنباوية: بلاش كلمة بديعة دى والنبى لابديعة ولا بديع مش ناقصة تفكرنى بمكتب الإرشاد والمرشد
كنباوى: عندك حق هم كرهونا فى حاجات كتير
كنباوية: انت عارف البورسعيدية عملوا إيه ساعة الخطاب ؟
كنباوى: لأ ما اعرفش هم عملوا إيه بالحق يا كنباوية ؟
كنباوية: سابوا مرسى يلبلب ويهرتل وراحوا يسمعوا أم كلثوم
كنباوى: والنبى جدعان ورجالة صحيح لأ وعندهم ذوق وبيفهموا فى الطرب الأصيل
كنباوية: أم كلثوم ب100 مرسى وخطاب مرسى
كنباوى: ماتعرفيش سمعوا أغنية إيه ؟
كنباوية: للصبر حدود وخاصة الكوبليه اللى بتقول فيه: ماتصبرنيش بوعود وكلام معسول وعهود انا ياما صبرت زمان على نار وهوان واهه غلطة ومش حتعود وانما للصبر حدود للصبر حدود
كنباوى: الله على الست وجمال الست وأغانى الست
كنباوية: الست بتقول درر يا كنباوى درر
كنباوى: المفروض أقل واجب كان يعمله مع البورسعيدية انه يشيل وزير الداخلية
كنباوية: ده لو كان حد عاقل ورزين ومتنور وبيفهم لكن يعمل إيه وهو فهمه على قده الراجل حيقطع نفسه
كنباوى: عندك حق ده امكانياته كده محدودة إن الله لايكلف نفسا إلا وسعها
كنباوية: مانفسكش تاكل حاجة حلوة ؟
كنباوى: نفسى
كنباوية: انا عملالك زلابية بالسكر البدرة ولقمة القاضى بالشربات المعقود
كنباوى: تسلملى عمايل ايديكى يا كنباوية
كنباوية: يلا ندخل جوه ناكل الحلو ونسمع ام كلثوم حتغنى سيرة الحب
كنباوى: تبقى سيرتك انتى يا كنباوية ما انتى الحب يا قلبى
كنباوية: وانت حبيبى يا كنباوى
كنباوى: طيب يلا قبل العيال مايرجعوا من بره
كنباوية: يلا يا كنباوى هو انا اقدر اتأخر عنك فى حاجة زى كده ده انا مابصدق روقانك
كنباوى: طيب اسبقينى على الأوضة وأنا جاى وراكى
كنباوية: امرك يا كنباوى امرك