حينما وقف "كنباوى" أمام المرآة ليحلق ذقنه وهو يدندن أغنية عبد الوهاب: "كل ده كان ليه لما شوفت عنيه حن قلبى إليه وانشغلت عليه قالى كام كلمة يشغلوا النسمة فى ليالى الصيف"، حتى سمعته "كنباوية" فبادرته بقولها: الله عليك يا "كنباوى" لما تكون رايق.. ربنا يروّق دمك ومزاجك كمان وكمان. "كنباوى": عبد الوهاب ده هرم وتاريخ وأسطورة، مش العيال السيس اللى بتغنى دلوقتى وبتتقصع وبتتمايل وبتسرسع.. فين أيام زمان وفن زمان؟ "كنباوية": كل حاجة زمان كانت حلوة يا "كنباوى"، حتى ناس زمان كانوا أحلى من ناس دلوقتى، ناس دلوقتى الطمع ملا قلوبهم ونفوسهم، ومابقوش يحبوا غير نفسهم، وبقوا حاقدين ومنفسنين، وبغل عبد الوهاب ده حته سكرة، وكل أغانيه حلوة، انت اللى حببتنى فيها زمان، أول ما اتجوزنا ماكناش بنسمع غيره هو وأم كلثوم. "كنباوى": فكرتينى بأحلى أيامنا إنتى غطسانة فين من ساعة؟ "كنباوية": كنت بتفقد الأخبار على المواقع الإخبارية على النت. "كنباوى": وإيه اللى شدك كده؟ "كنباوية": البرادعى ده راجل طيب وابن حلال وباين عليه بيحب البلد دى بجد وبإخلاص وبضمير. "كنباوى": إيه اللى خلاكى تقولى عليه كده دلوقتى؟ "كنباوية": باعت رسالة لمرسى بيقوله فيها: أنا مش عايز أشيلك، وقطاع كبير فى البلد مش عايز برضه يشيلك، بس بلاش عناد ومكابرة واسمع كلامى، وقول إنك عاوز تحل، وأنا معاك، وعلى أتم الاستعداد للخدمة والمشاركة من غير أى مناصب، أنا مش عاوز أكون رئيس جمهورية، ولا حتى رئيس وزرا، أنا كل اللى عاوزه هو مصلحة البلد دى، أنا ممكن أشور عليك بتشكيل الوزارة، وسيبك من أهل الثقة، وهات أهل الخبرة، خوفك حيضيع البلد، والبلد حتغرق، إلحق نفسك والبلد قبل فوات الأوان، أنا شايف إن فاروق العقدة هو الأصلح لرئاسة الوزرا أو هانى سرى الدين. "كنباوى": كل ده قاله البرادعى؟ "كنباوية": لأ مش كده وبس، ده قال كمان إنه يرفض رئاسة حكومة إنقاذ، وإنه أعلى طموحه إنه يساهم بالأفكار فقط، وقال إننا فاشلين سياحيًّا، وإن السائح اللى بييجى يزور مصر ده أكيد مضروب فى عقله ودماغه؛ لأن مصر مش أمان وإننا رابع أقل دوله استقطاب للسياحة بعد زامبيا وبوليفيا، وطلب من مرسى إنه يبطل حكاية أهلى وعشيرتى دى. "كنباوى": أنا كل ما بسمع حكاية أهلى وعشيرتى دى بقعد أضحك وأموت على نفسى من الضحك. "كنباوية": مش انت بس اللى بتضحك، ده كل المصريين بيضحكوا عليها. "كنباوى": قال حاجة تانى البرادعى؟ "كنباوية": قال لمرسى: الناس مش عايزه تاكل شريعة، الناس عايزة تاكل عيش، اللى هو من أساس الشريعة، وقال إنه ماعندهوش مانع إن الشاطر يكون رئيس وزرا، لو هو شايف نفسه يصلح لذلك، وحيقدر يخدم البلد؛ لأنه مايعرفهوش ولا يعرف إمكانياته ولا خبراته. "كنباوى": كل ده قاله البرادعى؟ والله راجل زى الفل، يا ريت مرسى يستعين بيه وياخد من أفكاره. "كنباوية": يا ريت.. بس مرسى عنيد ومكابر، وفاهم نفسه أبو العريف، وبيقاوح وبيسمع كلام الشاطر والمرشد وأعضاء مكتب الإرشاد. "كنباوى": خليه يعاند لحد ماتخرب، اللى بيشيل قربة مخرومة بتخر على دماغه. "كنباوية": بس دى مش حتخر على دماغ مرسى لوحده، دى حتخر على دماغنا كلنا، لو نشّف راسه وفضل يسمع كلام المرشد. "كنباوى": قريتى إيه تانى يا "كنباوية"؟ "كنباوية": قريت إن ترتيب مصر فى تعداد الدول الفاشلة رقم 31، وقريت وعرفت إن أيمن نور اتقولب وبقى يدافع عن الإخوان وعن قطر. "كنباوى": إزاى يا "كنباوية"؟ "كنباوية": أيمن نور بيقول إن ال5 مليار اللى قطر ساعدت بيهم مصر دول كانوا لمصر مش للإخوان المسلمين، وإنهم دخلوا خزينة مصر مش خزينة الإخوان، وإنهم وصلوا مصر قبل ما الإخوان يوصلوا للحكم، وإن الإعلام هو اللى مهيج الناس على قطر، رغم إنها الدولة الوحيدة اللى فى الخليج اللى بتساعدنا، وبدل مانشكرها بنهاجمها، وده من غيظنا من تقدمها ونجاحها. "كنباوى": وانتى إيه رأيك فى كلام أيمن نور ده؟ "كنباوية": ده مش كلام أيمن نور، ده الكلام اللى همه محفظينهوله وملقنينهوله فى الرئاسة وفى مكتب الإرشاد. "كنباوى": قصدك إن أيمن نور عميل؟ "كنباوية": وانت عندك رأى تانى؟ ماهيه باينة أهه زى الشمس. "كنباوى": أنا ماليش رأى، الرأى رأيك إنتى يا "كنباوية"، إنتى اللى فاهمة وعارفة أكتر منى. "كنباوية": يلا ما هى كلها بقت تتنطط على الحبل، كلها بقت أراجوزات، بقولك إيه، كفايه كلام فى السياسة وتعالى نسمع عبد الوهاب، أنا عملالك صنية كيكة بالزبادى حتاكل صوابعك وراها، يلا بينا قبل ما تبرد. "كنباوى": على قولك.. عبد الوهاب والكيكة أحسن من 100 مرسى واللى زيه.. يلا بينا. وراحا يستمعان إلى عبد الوهاب وهما يأكلان الكيك ويشربان الشاى
