كنباوى وكنباوية .. حلقة رقم (60) .. اتغدينا واتعشينا على لمبة جاز وعيشة مرسى بقت نشاز

كنباوية تصرخ في المطبخ : دي عيشة إيه دي اللي تقرف الله يخرب بيت الإخوان على مرسي على السنة السودة اللي شوفناهم فيها ألطم ياناس؟ ولا أصوت؟ ولا أرمي الأكل في الزبالة ؟ ولا بلاش ناكل خالص ؟ دول خلوا عيشتنا مرار .
كنباوي : مالك ياكنباوية بتندبي ليه ؟
كنباوية : حتجنن ياكنباوي الأكل حيبوظ مني النور كل شوية يقطع وانت عارف إن البوتجاز بتاعي بالكهربا والأكل اللي في التلاجة حيبوظ ده كده خراب بيوت احنا بنجيب الأكل بالعافية وبطلوع الروح بعد كده نرميه علشان خاطر ولاد الكلب دول يرتاحوا .

كنباوي : يعني النور بيتقطع عند مرسي في التجمع الخامس ؟ ولا بيتقطع عند الشاطر ولا عند بديع ولا عند عصام العريان ولا عند البلتاجي ولا عند قنديل في المساحة في الدقي ؟
كنباوية : لا طبعًا مايتقطعش دول على راسهم ريشة دول إخوان ياكنباوي أصحاب السلطة والنفوذ لكن احنا يتقطع عندنا النور ونروح في داهية احنا الشعب الغلبان اللي مالهوش ضهر احنا اللي يتشال ويتحط علينا احنا الحيطة المايلة احنا اللي ننداس بالجزم ونتحدف بالطوب احنا اللي جار علينا الزمن لما الإخوان اتحكموا فينا الهبل ولاد ستين في تسعين .
كنباوي : دول عاملين زي الهبلة اللي مسكوها طبلة وعملت دوشة وإزعاج للناس وللي حواليها .
كنباوية : الميه بالماتور يعني لما النور يتقطع الميه بتتقطع يعني لا ميه ولا نور أصوت ياناس ؟
كنباوي : اهدي ياكنباوية اهدي ووحدي الله وماتعمليش في نفسك كدة .
كنباوية : لا الله إلا الله .
كنباوي : مش ضروري آكل النهاردة ناكل جبنة وأنا حنزل أشتري بطيخة ويبقي نتغدا جبنة وبطيخ .
كنباوي : وبالليل ناكل إيه جبنة وبطيخ برضه ؟ وبكره وبعده وكل يوم حنعيش على النواشف همه ناويين ينشفوا معدتنا كمان وبطننا ؟
كنباوي : معلش ياكنباوية أكيد حيحلوها كمان كام يوم .
كنباوية : كام يوم إيه ياكنباوي قول كام شهر كام سنة دي خربت ياكنباوي ومش حتتحل إلا لما الإخوان يغوروا في داهية .
كنباوي : ده رئيس بارد أنا مش فاهم هو مستني إيه علشان يسيب الحكم الناس كلها مش عايزاه برود متناهي هو مش مكسوف على دمه ؟

كنباوية : الإخوان مش وش كسوف دول باردين وهو مايعلم ببروده إلا ربنا عامل ودن من طين وودن من عجين وماشي بمبدأ الكلاب تعوي والقافلة تسير .

كنباوي : إحنا بقينا كلاب في نظره ياكنباوية ؟
كنباوية : أمال انت فاكر إيه ؟ كلاب ولاد ستين كلب مش احنا مش اخوان نبقى كلاب .
كنباوي : بيقولوا المحافظات مقلوبة بسبب انقطاع التيار والنور والطلبة نزلوا بمكاتبهم في الشارع يذاكروا .
كنباوية : دي حكومة مابتفهمش ومش مقدرة المسئولية تقطع النور أيام امتحانات الطلبة تعمل إيه ماتذاكرش ؟ ولا تسقط الله يخرب بيوتهم .

كنباوي : الناس ولعوا في كاوتش العربيات في المحافظات وحاصروا شركات الكهربا والأمن الوطني وقطعوا الطرق ومرسي ولا هو هنا ماهو عنده نور وتكييف ومش حاسس ببهدلة الشعب واحنا الحر مطلع لسانا من بقنا زي الكلاب العطشانة ولا عارفين نشرب شوية مية ساقعة ولا شوية عصير ساقعين .
كنباوية : ولا نغسل ولا نطبخ ولا نعمل أي حاجة ده أنا فاتحة كل الشبابيك من الحر حتي باب الشقة فتحاه علشان يجيب شوية هوا ويرحمنا من الصهد اللي احنا فيه ده .
كنباوي : الناس ماسكه ميكرفونات وبتطلب من بعضها انهم مايدفعوش فواتير النور .
كنباوية : ده اقل واجب نرد بيه على الحكومة ووزارة الكهربا نور إيه اللي حندفعه وهو مقطوع دول بيستعبطوا ولا إيه لما يستنوا مننا إننا ندفع فاتورة الكهربا اللي ما بتجيش والنور المقطوع ده اللي يدفع يستاهل قطع النور عنه .
كنباوي : ده السياحة انضربت بقطع النور السياح زهقوا ولغوا حجزهم والشركات بتصرخ السياح مش مستحملين أن النور يقطع كل شوية .

كنباوية : خليها تخرب من كل جانب .
كنباوي : وأصحاب المصانع الصغيرة والمحلات التجارية بتصرخ من قطع النور .

كنباوية : مرسي لازم يسيب الحكم لازم ياكنباوي .
كنباوي : ربنا يسهل لما نشوف حملة تمرد حتعمل ايه وحتوصل لفين مع مرسي
كنباوية : حملة تمرد طلعت ولا نزلت مالهاش أي سند قانوني ولا تشريعي ياكنباوي حتي المادة 150 من الدستور اللي بتنص على أن مرسي من حقه إنه يستفتي الشعب على أي شيء هو شايف أن من حق الشعب فيه إنه يتخذ قراره بنفسه ما بيندرجش تحته إنه يعمل استفتاء على شعبيته يعني ممكن بعد تعب الحملة ده كله يطلع نقبها على شونه وجريها كله قبض الريح يعني فشنك .

كنباوي : وهمه عارفين كده ؟
كنباوية : أكيد بس العيار اللي مابيصبش بيدوش ياكنباوي .
كنباوي : يلا أهه النور جه كملي أكلك بسرعه علشان ناكل في النور كفاية بقالنا يومين بنتغده ونتعشي على لمبه الجاز لما الأكل كله اللي بيدخل بقنا بقي ريحته جاز .
كنباوية : حاضر ياكنباوي حطبخ بسرعة .

كنباوي : وانا حنزل أشتري بطيخة تحسبًا لأي شيء واهه نطري بيها على قلبنا لو النور ماقطعش النهاردة تاني .
كنباوية : طيب بس اوعي الراجل يضحك عليك ويديك بطيخة قرعة زي حكم مرسي الأقرع .
كنباوي : ماتخافيش أنا بفهم في البطيخ زي ما انتي بتفهمي في السياسة ؟