كنباوى وكنباوية.. حلقة رقم (49).. انتقادات رئاسية واقتصادية بطعم ورائحة الملوخية !!

يدخل كنباوى على كنباوية حجرة معيشتهم، فيرى الكمبيوتر الشخصى الخاص بكنباوية مغلقا والتليفزيون أيضا، كذلك ويسمع أم كلثوم تصدح فى صوت خافت بأغنية أنت الحب، وكنباوية شاردة الذهن سارحة وبيدها كوب من الشاى، فراح يطنطن بالكوبليه الذى تغنيه أم كلثوم عله يجذب انتباه كنباوية..
كنباوى: أهواك فى قربك وفى بعدك وأشتاق لوصلك وأرضى جفاك وإن غبت أحافظ على عهدك وأفضل على ودى وياك..

كنباوية: (مبتسمة فى مرارة ) أنت جيت من إمتى؟ ..
كنباوى: لأ أنا لسه ماجتش، ده خيالى، طيفى، مالك ياسكر سارح وهيمان فى إيه؟..

كنباوية: فى حالنا ..
كنباوى: ماله حالنا؟ ماهو زى الفل والريس مرسى إدانا علاوة، ماكناش نحلم بيها 15 % ده غير..
كنباوية: مش حالنا إحنا كأسرة أنا أقصد حالنا إحنا كبلد..

كنباوى: ياشيخة خضتينى طول ما إحنا بخير يبقى ع الدنيا السلام.

كنباوية: ده منطق كله أنانية، وحب للذات ياكنباوى وأنا ما أحبكش تكون كده لازم تحب الخير لكل الناس..

كنباوى: ومين قال لك إنى بكره الناس دول أهلى وعشيرتى ..
كنباوية: ليه بتقفلنى منك ياكنباوى أنت عارف أن الكلمة دى بتقفلنى بلا أهلى بلا عشيرتى بلا زفت أنت مش لاقى غير كلمة مرسى وتستشهد بيها وأنت عارف أنها بتعفرتنى..

كنباوى: أنا قلت أضحكك..
كنباوية: لأ أنت قلت تغمنى وتفكرنى بأكبر عملية نصب حصلت على المصريين فى تاريخهم..

كنباوى: نصب إيه ياكنباوية؟..
كنباوية: نصب الإخوان علينا بأبو دقن، سى مرسى اللى قال إنه هيكون رئيس لينا كلنا وطلع خادع ولبسنا العمة، وعمل بعد ما فاز بالتزوير اللى هو والإخوان كانوا بيخططوا ليه وباع القضية وباع مصر والمصريين كلهم علشان خاطر فصيله.. الله يجحم فصيله..
كنباوى: محروقة كده ليه وصوتك منهم كله مرار وحرقة؟..

كنباوية: أسوء شيء فى الدنيا دى الغش والخداع.. آية المنافق ثلاث ياكنباوى إذا حدث كذب وإذا وعد أخلف وإذا اؤتمن خان.. ومرسى عمل الثلاثة عايزنى بعد كده أتكلم عنه وأنا فاشخة بؤى ومبتسمة ده أنا لما بفتكر أنى فى يوم اديته صوتى الدموع بتجرى فى عنيا وببكى على غباوتى هو إيه اللى خلانى أصر أنى أتعلم وأتثقف ماهو أنا انضحك عليا بجهلى ..
كنباوى: ياه ياكنباوية ده أنت معبية وممرورة..

كنباوية: والمرار شوية على اللى أنا فيه أنا بضحك معاكم علشان ما أشيلكمش الهم معايا أنتم مالكمش ذنب فى اللى أنا فيه..
كنباوى: الله يكون فى عونك ياكنباوية، ده على كده العلام ساعات بيوجع..
كنباوية: بيوجع لأنه بيخليك فاهم مين بيضحك عليك ومين بيكذب عليك ومين بينصب عليك..

كنباوى: يعنى الجهل نعمة..
كنباوية: لأ ماتقولش كده الجهل حتى لو كان بيريح هو نقمة ووبال على صاحبه لأنه بيعيشه حمار وبيموته حمار والبلد مش ناقصة حمير ياكنباوي..
كنباوى: حمير ياكنباوى! انتى بتلقحى عليا..

كنباوية: ينقطع لسانى أنا ما أقصدش كده، ضحكتنى وأنا حزينة..
كنباوى: ماعاش ولا كان اللى يخليكى تحزنى..
كنباوية: أنت عارف ياكنباوى أن الراجل ده أرعن..
كنباوى: ليه ياكنباوية أرعن مع أنى مش فاهم يعنى إيه أرعن إلا أنها شتيمه ناس مثقفين متعلمين..

كنباوية: أنت عارف أن المنحة دى اللى هو ضحك بيها على العمال منحة وعلاوة وهمية..

كنباوى: إزاى ؟ يعنى مش حيصرفوهالنا؟..

كنباوية: لأ ماتخفش حيصرفوهالك بس مش ده مربط الفرس مربط الفرس أنها هتزيد أسعار السلع والخدمات وهتزيد نسب التضخم فى الأسواق، الأسعار زادت 600% لبعض السلع والخدمات زى الطاقة والمياه والكهربا وتدبير العلاوة دى سيواجه عجز كبير بسبب عجز الموازنة اللى بلغ 5و197 مليار جنيه كمرحلة أولى ستصل إلى 300مليار جنيه فى القريب العاجل، باختصار ياكنباوى علشان تفهمنى بسرعة زيادة 15 % علاوة بتزيد الأسعار 50 % وبعدين هو كده ربك حسابات مصر قبل مايتشاور ويشوف الزياده دى هتتوفر للخزانة منين دى همجية فى اتخاذ القرارات..

كنباوى: ياه كل ده فهماه ياكنباوية؟ ..
كنباوية: وفاهمة أكتر من كده كمان بس كل حاجة بتطلع فى وقتها..

كنباوى: أخبار الغدا إيه؟..
كنباوية: حقوم أغرف لك حالا..
كنباوى: حاجة حلوة ؟..
كنباوية: هو أنا عمرى أكلتك حاجة وحشة؟..
كنباوى: الشهادة لله عمرها ماحصلت..

كنباوية: طيب لما هى عمرها ماحصلت بتسأل ليه؟، مش المفروض تكون مطمن دايما..

كنباوى: أنا بحب أناغشك
كنباوية: ماشى ياكنباوى غير هدومك عقبال ما الأكل يجهز..
كنباوى: حمامة..
كنباوية: والأكل كمان حمام..
كنباوى: الله عليكى يامغذيانى ومروقانى الله عليكى..
كنباوية: وعليك ياكنباوي...