كنباوى وكنباوية.. حلقة رقم (46) .. عن مرتضى منصور وبكره مين اللى عليه الدور؟

أوعى تكلمنى بابا جاى ورايا.. أحسن ياخد باله منى ويزعل ويايا، بهذه الكلمات راحت تتغنى كنباوية وهى تخرط الملوخية بالمخرطة على الطبلية، وهى تتمايل وتتراقص لحظة دخول كنباوى من باب الشقة عائدا من عمله، فيسمعها فيبتسم متوجها إليها..
كنباوى: يارب دايما غنا وأفراح وانشراح.
كنباوية (مكشرة عن أنيابها): انشراح مين ياراجل؟ انت بتغلط فى اسمى ولا بتعرف واحدة غيرى؟
كنباوى: هو أنا أقدر أغلط فى اسمك بعد العمر الطويل ده؟ ولا أنا أقدر أو استجرى أعرف واحدة تانية غيرك، ده أنا لا كنت ولا عشت.
كنباوية: بعد الشر عنك ياخويا الشر برة وبعيد ماتقولش على نفسك كدة إن شالله اللى يكرهك ياخده عدوك.
كنباوى: ياولية ما انتى كنتى رايقة قبل ما ادخل عليكى إيه اللى قلب حالك أول مادخلت عليكى؟
كنباوية : اهدا ياراجل، إيه ادخل عليكى، دخلت عليكى! مابلاش الكلام ده اللى بيجرى الريق وبيفتح مخى لحاجات كدة وكدة ولسه يوم الخميس بدرى عليه، فكرتنى بالذى مضى وليلة دخلتنا.
كنباوى: قصدك صباحية دخلتنا، انتى ناسية إنى دخلت عليكى الصبح؟!
كنباوية: يوه نسيت إنك نمت من التعب وأنا كمان نمت وعملنا الدخلة الصبح، كانت أيام عمرها ماتتنسى ياحبى.
كنباوى: ياه بقالك كتير ماقلتيش الكلمة دى.
كنباوية: إيه ياراجل هو أنا لازم أقولها ما اللى فى القلب فى القلب من غير كلام، وبعدين الحب مش بالكلام بالفعل وأنا كل يوم بثبتلك فيه حبى بشىء جديد يوم حلة بامية يوم حلة كوارع يوم حمام محشى فريك يوم محشى ورق عنب ولحمة محمرة ده غير الحلويات ايشى بسبوسة وايشى كنافة وايشى سد الحنك وايشى جلاش، ده أنا مدلعاك على الآخر ولا الكسكسى.
كنباوى: لأ كله كوم والكسكسى بتاعك كوم تانى، ما أقدرش أنكر حلاوته.
كنباوية: اختشى ياراجل وبطل تلعب بالألفاظ أنا عارفة انت تقصد إيه لم نفسك البت كنبة نايمة جوة.
كنباوى: انتى إيه اللى أخرك فى الأكل كدة النهاردة يا اللى بتعبرى عن حبك ليا بالأكل مش بالكلام؟
كنباوية: أصلى دخلت على النت شوية علشان أعرف إيه آخر الأخبار.
كنباوى: طيب وأنا ذنبى إيه النت ده فيه حاجة بتتاكل؟
كنباوية: تتاكل إيه ياراجل ده كله معرفة غذاء للروح.
كنباوى: طيب وغذاء المعدة البطن أنا أعمل فيه إيه؟ النت دة حيأكلنى ويشبعنى؟
كنباوية: انت على طول ياراجل همك على بطنك؟
كنباوى: أنا أهم حاجة عندى يا كنباوية بطنى والقعدة قربك ياغزال.
كنباوية: بأمارة نزولك كل يوم تلعب طاولة مع أصحابك على القهوة وتسبنى لوحدى.
كنباوى: ماتبقيش ظالمة أنا بسيبك وانزل أول ما ألاقيكيى دخلتى على النت بتغاظ وباخد بعضى وبنزل من قدامك.
كنباوية: يعنى فى الآخر طلعت أنا سبب قعادك على القهوة مش حبك للعب الطاولة؟
كنباوى: يا كنباوية انتى لازم تعرفى وتفهمى إنى بحبك أكتر من الطاولة ومن أى حاجة تانية فى الدنيا ده انتى الحب الأول والأخير على رأى محمود ياسين فى فيلم امرأة سيئة السمعة.
كنباوية: الملافظ سعد يا كنباوى مالقتش غير فيلم امرأة سيئة السمعة اللى تاخد تشبيهك منه دة حتى عيب فى حقك ياراجل.
كنباوى: ما اقصدشى خلاص ماتزعليش نفسك على رأى محمود ياسين فى فيلم الخيط الرفيع.
كنباوية: لم نفسك ياكنباوى انت بتتريق على طخنى؟
كنباوى: هو أنا أقدر ده طخنك ده أحلى مافيكى يافرشى وغطايا يامرتبة وملاية يالسبب دفايا.
كنباوية: خلاص مصدقاك بس قولى مين انشراح دى؟
كنباوى: انشراح تانى، انشراح يعنى حالة الرضا والسرور اللى دخلت لقيتك عليها افهمى بقى.
كنباوية: تانى دخلت ماكفاياك ونب التبى نبى ما أنا سيباك النهاردة ويبقى النهاردة والخميس.
كنباوى: وأنا موافق بس قوليلى قريتى إيه على النت؟
كنباوية: شوفتى إيه خلصينى علشان تقومى تحضرى الأكل طالما فيها اللى بالى بالك يبقى لازم آكل كويس.
كنباوية: ياراجل ما أنا كل يوم بأكلك كويس بطل حمرقة بقى عموما أنا عاملة النهاردة حمام على حظك الحلو وملوخية وورق عنب.
كنباوى: لأ كدة ماعنديش حجة كدة عال العال شوفتى إيه على النت خلصينى خلينى أدخل أغير هدومى وأريح شوية غقبال الأكل مايخلص؟
كنباوية: حاضر ياحبى شوفت النهاردة حوار مرتضى منصور مع توفيق عكاشة على قناة الفراعين.
كنباوى: وانتى من إمتة بتتفرجى على قناة الفراعين ولا على توفيق عكاشة ده؟
كنباوية: الضرورات تبيح المحذورات وأنا بحب اتفرج على مرتضى منصور وحواراته ولو كان الحوار ده فى قناة سبيس تون أو قناة البلاى بوى كنت برضه حشوفه واتفرج عليه وبطل غلبة ومتقاطعنيش وسبنى احكيلك.
كنباوى: حاضر اتفضلى احكى وخلصينى.
كنباوية: مرتضى قال بكل شجاعة إن دستور مصر الحالى دستور ابن حرام دستور سفاح، وقال إنه رفع دعوة بمحكمة القضاء الإدارى لإسقاط الدستور ده اللى أطلق عليه الدستور العبثى وقال إنه استند للمادة 60 من الإعلان الدستورى اللى بتنص على أن يجتمع أعضاء مجلسى الشعب والشورى لاختيار جمعية تأسيسية من خارجها لوضع الدستور وهو على أتم ثقة من بطلان تشكيل الجمعية التأسيسية ومخالفتها للإعلان الدستورى.
كنباوى: وبعدين قال إيه تانى بسلامته ماهى كلها دلوقتى بقت تتكلم؟
كنباوية: مرتضى عارف هو بيقول إيه مش بيهرتل زى الإخوان ده واعى وأروبة.
كنباوى: ماشى ياستى ما انتى لما بيعجبك حد بتطلعيه السما السابعة.
كنباوية: قال إن مجلس الشورى الحالى مالهوش أى اختصاصات فى الدستور الجديد ومايصلحش له مناقشة أى مشاريع قانونية أو إقرارها بعكس دستور 71 اللى نص على اختصاصات المجلس وقال كمان إن الدستور ده لازم يترمى فى الزبالة.
كنباوى: لأ طالما قال الدستور ده لازم يترمى فى صفيحة الزبالة يبقى راجل جامد وقالها عينى عينك ومابيخافش من حد لأ راجل مية مية، أخبار الأكل إيه؟
كنباوية: أدخل غير هدومك وأنا حخلص لك الأكل بإديا وسنانى ياحبى.
كنباوى: خلاص ياكنباوية فهمت حاضر طلبك مجاب بس بلاش ياحبى ياحبى كل شوية أحسن أفهم انها رشوة وأنا مش بحب الرشوة.
كنباوية: حاضر ياكنباوى بس دى مش رشوة دى إحساس.
كنباوى: ماشى ياكنباوية حصدقك يلا خلصى نفسك وأنا حروقك النهاردة علشان خاطر إحساسك المرهف ده.
كنباوية تزغرد فى فرح فتنده ابنتها شلتة عليها فيه إيه ياماما هو خطيبى لقى شقة نتجوز فيها؟