كنباوى وكنباوية.. حلقة رقم (28) .. دردشة سياسية فى يوم السعادة العالمية!

كنباوية تعمل على قدم وساق بكل حماس فى المطبخ، فيلاحظها كنباوى ويسألها: فيه إيه ياكنباويه؟ انتى حتقعدى اليوم كله فى المطبخ؟ وإيه الأكل ده كله احنا عندنا عزومة النهاردة؟ انتى عازمة حد وانا ما اعرفش؟
كنباوية: لا عزومة ولا حاجة الأكل ده كله ليكم هو انا عندى أعز منكم ده انتم حبايبى
كنباوى: بس ده كتير هو كده مش تبذير؟
كنباوية: لاتبذير ولا حاجة أنا بحتفل بيكم النهاردة وبحاول أعمل لكل واحد الأكل اللى بيحبه.
كنباوى: إيه المناسبة؟ واشمعنى النهاردة؟
كنباوية: "النهاردة يوم السعادة النهاردة 20 مارس
كنباوى: يوم السعادة، أنا أول مرة أسمع عن اليوم ده جه امته وإيه حكايته؟ أنا أعرف إن 21 مارس عيد الأم يعنى بكرة وعمالين نلف حول نفسنا أنا والعيال علشان نشوف حنشتريلك إيه؟ أو انتى محتاجة إيه؟ لكن يوم السعادة ده ماعندناش بيه أى خبر.
كنباوية: يوم عيد الأم حاجة ويوم السعادة حاجة تانية، اسمع ياسيدى يوم السعادة ده الأمم المتحدة خصصت يوم 20مارس من كل عام كيوم عالمى للسعادة وده حصل فى دورتها ال66 يوم 28 يونيه 2012 علشان يكون يوم دولى للسعادة.
كنباوى: هى الأمم المتحدة ليها دورة زى الستات؟
كنباويه: بطل طولة لسان ياراجل ولم نفسك.
كنباوى: طيب والناس المفروض تقضى اليوم ده ازاى؟
كنباوية: المفروض إن الناس فى اليوم ده تنسى همومها ومشاكلها وأحزانها وتفتكر كل شىء بيسعدها أو بيحقق لها قدر من السعادة أو تعمل الشىء اللى بيخليها سعيدة أو تقضى اليوم مع شخص بيدخل عليها السعادة والبهجة والفرحة، تاكل أكله حلوة بتحبها تروح مكان بترتاح فيه وبتلاقى سعادتها فيه كده يعنى.
كنباوى: وانتى ناوية تعملى إيه ياكنباويه النهاردة فى يوم السعادة ده ؟
كنباوية: أانا ناوية أفرحكم واعمل لكل واحد فيكم الأكلة اللى هو بيحبها انت الحمام المحشى والواد كنبة حعمل له الكرشة اللى بيحبها والبت شلته حعمل لها الممبار اللى هى بتحبه وأنا حعمل لنفسى الكوارع.
كنباوى: بس انت مش بتحبى الكوارع ده انا اللى بحبها
كنباوية: أنا بحب عواقب الكوارع واللى بيحصل من ورارها ياكنباوى
كنباوى: اه يا بنت اللئيمة انتى قصدك اللى انا فهمته؟
كنباوية: ايوه ياكنباوى أنا سعادتى فى كده
كنباوى: ماشى ياستى نسعدك النهاردة احنا مالناش بركة غيرك وغير سعادتك
كنباوية:أنا النهاردة قررت أنسى كل حاجة بتزعلنى وما افكرش فيها لأنى فعلا تعبت الأيام اللى فاتت من كتر التفكير والزعل على حال البلد والملاعين واللى بيعملوه فينا
كنباوى: بكرة أبوإسلام يطلع بفتوى يقول فيها إن كل اللى احتفل بيوم السعادة كافر
كنباوية: يقول ده راجل متخلف وبيخرف اللى خلاه قال إن عيد الأم حرام يقول بعد كده اللى هو عايز يقوله ماحدش حيسمع له.
كنباوى: طيب ياكنباوية أنا حدخل آخد دش واروق نفسى واستنى أكلك الحلو ياقمر .. كل سنة وانتى سعيدة
كنباوية: وانت سعيد ياكنباوى والسعادة بترفرف علينا كلنا..