كنباوى وكنباوية.. حلقة رقم (26).. المقطم الذى صار مطبخا سياسيا لمصر الموكوسة!!

"كنباوية" تسير فى شقتها تحدث نفسها فى غل وهم وشجن: هى بقت كده؟ ده كده ما ينفعش أبدا، أنا قلت من زمان؛ مش من زمان أوى، من كام شهر يعنى كدة، أنه مفيش فايدة.
"كنباوى": إيه يا "كنباوية" انتى بتكلمى نفسك؟ انتى كده هيجرالك حاجة، استهدى بالله، كله بأمر الله واللى رايده ربنا هو اللى هيكون.
"كنباوية": ونعم بالله بس أنا حتجنن.
"كنباوى": إيه بس اللى جد وحيجننك؟ احنا عايزينك بعقلك احنا محتاجينلك أنا والعيال سلامة عقلك ألف سلامة عليكى ياغالية يا نوارة يا ست الكل.
"كنباوية": الناس فاهمة غلط.
كنباوي: أى ناس؟ وإيه اللى همه فاهمينه غلط؟ ما تنورينى ينوبك فيا ثواب.
"كنباوية": الناس اللى أنا أقصدهم همه الناس اللى بتقول أن مرسى معذور وأن الثوار والمتظاهرين وجبهة الإنقاذ والفلول والحالمين بالحكم همه اللى مش مديين مرسى فرصة يعرف يحكم ويدير البلد ويعالج الأمور الخربانة باللى بيعملوه كل يوم الناس دى موهومة ومخدوعة ومش فاهمة حاجة.
"كنباوى": ومين سمعك؟ ما أنا نفسى مش فاهم حاجة.
"كنباوية": أنا هفهمك بص ياسيدى عارف لو الناس دى هديت واتلمت مرسى مش هيتعدل ولا هيظهر جديد ولا هتتحقق حاجه خالص من اللى همه بيحلموا بيها دول لو هديوا هيدوله فرصة يكون أفظع من كده وهيعمل اللى هو عايزه أو بالأصح هيعمل اللى همه عايزينه.
"كنباوى": أيوه مين دول اللى أنتى تقصديهم بكلامك ده؟
"كنباوية": بص يا "كنباوى" يا زوجى العزيز.
"كنباوى": حلوة منك يا زوجتى العزيزة.
"كنباوية": اسمع يا "كنباوى" ومتقاطعنيش.
"كنباوى": حاضر يا "كنباوية" يا زوجتى العزيزة.
"كنباوية": يا راجل بطل هزار وما تنقطنيش خلى الهزار بالليل.
"كنباوى": ماشى يا حبى نخلى الهزار بالليل.
"كنباوية": مصر يا "كنباوى" دلوقتى بتتحكم من فوق.
"كنباوى": يعنى هى الأول كانت بتتحكم من تحت؟ وإيه تحت؟ وإيه فوق؟
"كنباوية": مصر قبل مرسى كانت بتتحكم من تحت الترابيزة من مخططات سيدة مصر الأولى سوزان وابنها جمال وفتحى سرور وأحمد عز وزكريا عزمى والشلة دى اللى أنت عارفها.
"كنباوى": دى فهمناها دى من تحت من فوق بقى تبقى إيه؟
"كنباوية": من فوق يعنى من المقطم يعنى من مكتب تنظيم الإرشاد فى المقطم.
"كنباوى": يعنى انتى قصدك أن مرسى مش هو اللى بيحكم مصر أمال مين اللى بيحكم؟
"كنباوية": أهه أنت ابتديت تفهمنى اللى بيحكم مصر مش المرشد الناس بتقول يسقط حكم المرشد والمرشد برىء من حكم مصر؛ لأن المرشد واجهة مشرفة ليهم مش أكتر، المرشد مسئول عن الدعوة والتربية فقط والنصح لا أكثر من ذلك.
"كنباوى": لأ أنا محتاج أفهمها دى واضحة يا "كنباوية" وحياة أبوكى الصرماتى.
"كنباوية": لم نفسك يا "كنباوى" ومالكش دعوه بأبويا وما تنساش أنه لولا وقفته جنبك ماكنتش قدرت تتجوزنى أنت عارف أن أمى ماكانتش بتطيقك ولا بتحب حتى تسمع سيرتك وكانت رافضة جوازى منك.
"كنباوى": فى دى عندك حق أبوكى كتر خيره عمرى ما هنسى فضله عليا ولا كرمه وطيبته معايا وأمك عمرى ما هنسى هى زلتنى إزاى زى ما أكون كنت قاتل لها قتيل الله يرحمها بقى ويسامحها.
"كنباوية": لم نفسك يا "كنباوى" واذكروا محاسن موتاكم.
"كنباوى": هى أمك بذمتك كان ليها محاسن؟ .
"كنباوية": "كنباوى" وبعدين؟
"كنباوى": خلاص سكتنا كملى كلامك.
"كنباوية": اللى بيحكم مصر الأربعه الكبار خيرت الشاطر ومحمود عزت ومحمود غزلان ومحمود حسين رغم وجود المرشد محمد بديع ونائبيه جمعه أمين ورشاد البيومى أما عصام الحداد فده بقى مساعد الرئيس محمد مرسى ومحى حامد بقى مستشار الرئيس وهما الاثنان ما زالا عضوى مكتب الإرشاد وهمزه الوصل بين الرئاسه ومكتب الإرشاد.
"كنباوى": هى الحكاية كده؟
"كنباوية": وأكتر من كده الشاطر هو الرأس المدبر بصفته المسئول عن ملفين من أهم ملفات الإخوان ملف التمويل وملف الإعلام والرجل الثانى.
"كنباوى": أنا عارفة الرجل التانى رشدى أباظة أنا شوفت الفيلم بتاعه أكتر من مرة.
"كنباوية": لم نفسك يا "كنباوى" وبطل هزار غزالتك رايقة ليه النهارده كده؟
"كنباوى": أصل أنا دخلت المطبخ شفت الكوارع اللى أنتى عملاها عرفت أن مزاجك النهارده عنب وأنها طالبة معاكى دلع.
"كنباوية": الكوارع دى مش بتاعتنا
"كنباوى": مش بتاعتنا؟ امال بتاعه مين؟ إيه عملاها نتصور معاها صورتين 6×9 وحنرجعها لصحابها ولا عملاها للجيران؟
"كنباوية"؟ دى أم حماده أنبوبتها فضيت وجوزها نفسه فى الكوارع بعد ما حطتها على النار وغليت مالقتش حد يجيب لها أنبوبه والراجل بتاع الأنابيب ماعداش استسمحتنى أكمل سواها عندى.
"كنباوى": يا بختك يا أبو حمادة الليلة ليلتك حتظبط.
"كنباوية": يا راجل أنت حتبص للناس فى أكلهم بكرة أعملك كوارع؟
"كنباوى": وأنا اللى كنت فاكر.
"كنباوية": ما تفتكرش النهاردة من بكرة مش بعيد يا راجل ده أنا مزاجى متعكر يعنى ما كنتش حبقى فى المود وأنا معاك بكرة أكون رقت وأروقك.
"كنباوى": ماشى يا "كنباوية" نقضيها النهاردة أى حاجة أن شاء الله سالمون وبكره مش بعيد كملى كلامك.
"كنباوية": الراجل التانى محمود عزت ده الرجل الحديدى الراجل التالت محمود غزلان قريب الشاطر وجوز أخته والراجل الرابع محمود حسين أمين عام الإخوان دول ياسيدى اللى بيحكموا مصر وبيتحكموا فينا وما على مرسى إلا التنفيذ والأمر والطاعة عرفت دلوقتى أن مرسى رأيه وقراره مش من دماغه وهو لاحول ولا قوة.
"كنباوى": أيوه عرفت وفهمت واتنورت كتر خيرك يا "كنباوية".
"كنباوية": ما يجيش من بعد خيرك يا ساترنا أنا والعيال ومش حاوجنا لحد الناس بقى ماتستناش من مرسى يتعدل؛ لأن عمره ما هيتعدل؛ لأنه منفذ ليس إلا.
"كنباوى": يعنى الناس المفروض تقول يسقط حكم مين؟
"كنباوية": الناس المفروض تقول يسقط حكم الشاطر، الشاطر يا"كنباوى" لأن هو اللى بيحكم مصر مش مرسى.
كنباوي: يلا يا "كنباوية" قومى أكلينى علشان كلامك جوعنى
"كنباوية": من عنيا يا غالى دقايق والكوارع تكون قدامك.
"كنباوى": إيه يا ولية حتأكلينا كوارع الناس أنتى عايزة الناس تاكل وشنا.
"كنباوية": كوارع ناس مين دى كوارعنا أنا شاريهالك بإديا دول علشان عارفة إنك بتحبها بس قولتلك كده علشان أغيظك، زى ما بتغظنى وكل شوية تقاطعنى فى الكلام.
"كنباوى": ماشى يا "كنباوية" ماشى بهزارك التقيل ده.
"كنباوية": دقايق وأظبطك.
"كنباوى": ده أنا اللى هاكل الكوارع وأظبطك يا قمر أنتى يا قمر.