"كنباوية" تتحدث مع ابنتها "شلتة" عن الزواج والأحوال الاقتصادية السيئة وظروف "كنباوى" المادية. "كنباوية": الواد ده حيفضل قارى فاتحة كده وطالع داخل علينا إيد ورا وإيد قدام؟ إنتى عارفة إنه قارى فاتحتك من سنة؟ "شلتة": يا ماما طيب هو يعمل ايه؟ ما هو كل مايحوش قرشين علشان يشتريلى بيهم دهب الدهب يغلا، إنتى عارفه يا ماما الدهب النهارده بكام؟ "كنباوية": عارفة يا حيلة أمك، عيار 18 وصل 171 جنيه من غير الدمغة والمصنعية، يعنى الجرام شرا يقف كده بمصنعيته بأكتر من 300 جنيه، كل ده علشان الدولار عِلِى وارتفع. "شلتة": أديكى قولتى بنفسك، هو يقطّع نفسه؟ "كنباوية": يتلحلح شوية.. يشتغل شغلانة تانية.. يركب ميكروباص بعد الضهر.. يعمل أى حاجة ولّا هو استحلا طلوعه ودخوله وخروجه معاكى وخلاص؟! "شلتة": حكلمه يا ماما.. حكلمه. "كنباوية": لو ماكلمتيهوش حكلمه أنا. "شلتة": حاضر يا ماما أنا قايمه انام شوية. "كنباوية": نامى ماهو انتى ماوراكيش غير النوم، لما اقوم أشوف أبوكى بيعمل إيه؟ "كنباوى": أنا سايبك ترغى مع البنت من بدرى ماتضايقيهاش كده، الواد خطيبها معذور، أنا مش عارف الشباب حيعملوا إيه فى الغلا ده؟ "كنباوية": ده اللى زوّد الطينة بلّة إن الدمغة بتاعة الدهب اترفعت أكتر علشان يوفروا 15 مليون جنيه كل سنة يزودوا بيهم مرتبات موظفى مصلحة الدمغة والموازين وسك العملة، ويطوّروا الأجهزة شوية، والجواهرجية زعلانين؛ لأن ده حيساعد على الركود والحالة نايمة أصلا، ولا فيه بيع ولا شِرَا. "كنباوى": ماحدش بيشترى دهب دلوقتى إلا المضطر علشان يتجوز، سيبى العريس ماتضغطيش عليه، الواد شارينا وبيحب البت، وانا حاسس إنه حيسعدها. "كنباوية": حاضر، والله لا انا ساكتة، ومش متكلمة فى حاجة. "كنباوى": إيه أخبار السياسة عندك؟. "كنباوية": 3 عربيات أمن مركزى لحراسة مكتب الإرشاد، شوفت الدلع اللى مرسى مدلّعه للمرشد وللجماعة. "كنباوى": أنا سمعت واحد اسمه ثروت الخرباوى بيقول: إن مرسى ترتيبه السادس فى الجماعة، وإن المسئول عنه اسمه محمود عزت، ومرسى بياخد أوامره منه مباشرة، وإنه بينفذ من غير تفكير. "كنباوية": طيب يبقى كده مين اللى بيمَشّى مصر، مش محمود عزت؟ "كنباوى": لأ يا"كنباوية".. اللى بيمشى مصر خيرت الشاطر مش محمود عزت، مع إنهم بيقولوا إن عقليته جامدة وأروبة. "كنباوية": لو كلامك صحيح كان مرسى حكم مصر كويس. "كنباوى": مش كده.. المشكلة مش فى حكم مصر، همّه مش بيحكموا مصر، همّه بيحكموا الجماعة ومصالحها اللى لو تعارضت مصالحها مع مصالح مصر بيختاروا مصلحة الجماعة، "كنباوية": ماهى هى دى المشكلة، لازم اللى يحكم مصر تكون مصر جواه لوحدها مفيش معاها شريك، وعلشان كده الإخوان مايصلحوش لحكم مصر، والمفروض الشعب يفهم كده كويس، وماينتظرش خير من الإخوان. "كنباوى": عندك حق، مفيش حاجة حلوة النهاردة؟ "كنباوية": مفيش حلو غيرى.. أنفع؟ "كنباوى": يا خراابى.. تنفعى؟!! وده سؤال تسأليه ليا؟! طبعًا تنفعى، هو انا احلم بحلو غيرك؟!! ده انتى أحلى من أى حاجة حلوة. "كنباوية": يعنى .......؟ "كنباوى": يعنى وألف يعنى. "كنباوية": طيب أنا حسبقك على الأوضة وحروّق نفسى. "كنباوى": وانا حدخل آخد دش بسرعة وأحصلك. "كنباوية": وانا مستنياك يا عنيّة. "كنباوى": تسلملى عيونك.. وانا مش حتأخر عليكى.
