كنباوى وكنباوية .. حلقة رقم (54) .. خوف ورعب الإخوان من حملة تمرد !!

كنباوية تضحك ضحكات عالية حين خروج كنباوى من الحمام بعد أن أخذ دشا ساخنا متجها نحوها مبتسما كالعادة مستفسرا عن سر هذه الضحكات العالية الرنانة التى رجت الشقة رجا حتى شك كنباوى أن الجيران قد سمعتها
كنباوى: ماتفرحينا معاكى وتضحكينا إيه اللى بيضحكك كده ياكنباوية؟
كنباوية: الإخوان هو فيه غيرهم .
كنباوى: مالهم ربنا ياخدهم ويريحنا منهم دول سعرانين سلطة وعندهم غباء سياسى ماحصلش؟
كنباوية: نفسى اغمض وافتح وما لاقيهمش فى البلد نفسى.
كنباوى: مش انتى بس البلد كلها مش طيقاهم.
كنباوية: أنا بضحك على قلقهم ورعبهم من حملة تمرد.
كنباوى: إيه حملة تمرد دى ياكنباوية؟
كنباوية: دى حملة قامت بيها حركة اسمها تمرد بتلف على محافظات مصر محافظة محافظة بتاخد توقيعات من المواطنين اللى رافضين حكم الإخوان ومحمد مرسى بسحب الثقة منه ولما العدد يوصل للملايين حيطالبوا مرسى بالتنازل عن حكم مصر.
كنباوى: وطبعا الإخوان مش عاجبهم الكلام ده وأكيد بيقولوا عليه كلام فاضى ولعب عيال؟
كنباوية: زى ما انت بتقول كده.
كنباوى: طيب الخوف بقى على مؤسس الحركة لايغتالوه أو يقبضوا عليه زى ما قبضوا على أحمد ماهر بتاع 6 إبريل والواد المفعوص ده اللى اسمه أحمد دومة.
كنباوية: لأ احمد ماهر خرجوه ولسه دومه
كنباوى: اسمه إيه الواد بتاع حركة تمرد ده؟
كنباوية: اسمه محمود بدر.
كنباوى: ربنا معاه ويعينه على مرسى والإخوان.
كنباوية: الإخوان بيقولوا إن اللى بيحصل ده عبارة عن شو إعلامى.
كنباوى: همه ده اللى فالحين فيه دايما تصغير الأمور مش رئيسهم وصف قبل كده إن اللى بيحصل فى مصر من مظاهرات واحتجاجات عبارة عن سفاسف أمور وإذا كان رب البيت بالأمور مهونا فشيمة أهل البيت يقولوا طظ.
كنباوية: والنبى ضحكتنى ياكنباوى، إيه الأمثال دى؟
كنباوى: ماهى حاجة تخلى الحجر ينطق ياكنباوية، دى بقت حاجة تقرف.
كنباوية: لأ اسمع بقى سى عاصم عبد الماجد بيقول إيه.
كنباوى: مين سى قطران ده كمان؟
كنباوية: ده مهندس كده عضو مجلس شورى الجماعة الإسلامية.
كنباوى: قال إيه بسلامته؟
كنباوية: قال إنهم بيرفضوا خلع مرسى قبل انتهاء مدة ولايته المحددة بالقانون.
كنباوى: دلوقتى الجماعات الإسلامية بتتكلم عن القانون!؟ كان فين القانون ده قبل كده لما كانوا بيستبيحوا قتل الأبرياء واغتيالهم وتكفيرهم؟ ولا القانون بيمشى على ناس وناس؟
كنباوية: أيوة زى ما انت قلت بالظبط القانون بيمشى على ناس وناس.
كنباوى: والحل إيه؟
كنباوية: الحل إن الواد محمود ده يكمل المشوار ويجمع التوقيعات وبعد كده يحلها ربنا من عنده.
كنباوى: إيه الدافع اللى دفع محمود ده إنه يعمل كده؟
كنباوية: بيقول إنه بيكفر عن غلطته لما عصر على نفسه ليمونة وراح انتخب مرسى.
كنباوى: المفروض بقه كل واحد نزل من بيتهم وراح انتخب مرسى هو كمان يروح يكفر عن غلطته ويمضى على ورق سحب الثقة بتاع حملة تمرد.
كنباوية: عندك حق ده لازم يحصل فعلا .
كنباوى: يلا نقوم ناكل لقمه علشان أنا جعان.
كنباوية: يلا ياكنباوى أنا النهارده عملالك مكرونة بشاميل وصنية رقاق باللحمة المفرومة.
كنباوى: يلا يامظبطانى ومشبعانى.
كنباوية: يلا يامروقنى ومدلعنى.