كنباوية تصرخ فى ابنها كنبة اللى وضعت يديها فى الشق منه وداقت الأمرين.. كنباوية: انت ياموكوس مش حتقولى إيه اخرتها معاك؟ كنبة: أخرتها فل إن شاء الله. كنباوية: منين الفل ياحيلة أمك لما انت نايم قايم واكل شارب ببلاش لا شغلة ولا مشغلة وطول النهار تتسكع على الجهادية إلهى يقيموا عليك حد الحرابة ونرتاح منك ده غير قعادك على القهوة طول الليل تلعب طاولة وكوتشينة على فلوس، انت ياواد بتجيب الفلوس اللى انت بتلعب بيها دى منين؟ ماتكونش بتسرق الفلوس منى ولا من ابوك ؟ كنبة: يا اما انتى فهمانى غلط انا مش حرامى وما بلعبش قمار وما بعاكسش بنات انا برضه ليه أخت واللى حعمله فى بنات الناس حيتعمل فى اختى. كنباوية: إيه يا واد الكلام الكبير ده؟ انت بتضحك عليا ولا عايز تاكل بعقلى حلاوة؟ كنبة: طيب اعملك إيه علشان تصدقينى؟ كنباوية: تشتغل ياروح امك، تدور على شغلانة بدل ما انت قاعد عواطلى كده. كنبة: إيدى على كتفك يا أما هو انا حضرب الأرض تطرح بطيخ؟ هو فين الشغل ده؟ ربنا يبعت . كنباوية: ربنا قال اسعى ياعبد وانا اسعى معاك مش قال نام ياعبد على السرير وكل الفطير وانا اجيبلك شغل لحد السرير. كنبة: انتى مستكترة عليا النوم والاكل انا باكل من خير ابويا. كنباوية: ياواد انت مابتفكرش زى بقية الشباب انك ييجى يوم وتتجوز ويبقالك بيت وأسرة زى مخاليق ربنا! كنبة: لأ مابفكرش علشان ما اتعبش، منين يا أمه كل ده؟ ده انا بحلم بس انى اكفى نفسى ومش عارف، عايزانى اقول يا أسرة وياجواز! ادينى أمارة يا أمه ده من يوم مرسى ما مسك البلد وحالها بقى أوسخ من الأول. كنباوية: يلا ياواد امشى انجر من قدامى نكدت عليا الله ينكد عليك انزل للصيع بتوعك وسبنى اعمل الاكل ابوك زمانه راجع من الشغل سقطان من الجوع. كنبة: حاضر يا امه انا نازل واطبخى انت لحبيب القلب. كنباوية: حبيب القلب غصب عنك وعن الحاسدين. كنبة: يا امه ماتخافيش مش ححسدك على حبك لأبويا دى حاجه تفرحنى مش احسن ماتكونوا متطلقين وانا واختى نتشرد. كنباوية: طلاق فى عينك يا بن الكلب ياوسخ انجر امشى من قدامى. كنبة: حاضر ياجولييت. يدخل كنباوي فى تلك اللحظة مبتسما.. كنباوي: ماتقوليش حاجة انا سمعت كل حاجة. كنباوية: انت هنا من بدري؟ كنباوي: أيوه من اول ما ابتديتى تتكلمى مع كنبة. كنباوية: طيب ادخل خد دش وغير هدومك والأكل حيجهز حالا. كنباوي: طيب بس قوليلى الأول الدنيا مقلوبة ليه فى الشارع على التغيير الوزارى الجديد انا مش فاهم حاجة خالص نورينى. كنباوية: مرسى عمله منيل بيضحك علينا مفيش فايدة فيه مش هو اللى بيفكر هو دماغه ماتوصلش لكده ده تفكير جهنمى. كنباوي: ليه عمل إيه؟ كنباوية: عين وزير عنده 35 سنة وزير للاستثمار اسمه يحيى حامد. كنباوي: ودى فيها إيه دي؟ ماهو الراجل بيشجع الشباب. كنباوية: شباب إيه ياكنباوى ده وزير إخوانى. كنباوي: مش جديدة عليه. كنباوية: الجديد ياكنباوى انه اداله وزارة الاستثمار. كنباوي: وحتفرق فى إيه وزارة الاستثمار عن غيرها ماهى كلها وزارات الحكومة. كنباوية: لأ تفرق وزارة الاستثمار هى المسئولة عن القنوات الفضائية ومراقبتها وإيقاف تراخيصها يعنى هو بيحكم قبضته وقبضة الإخوان على الإعلام علشان ماحدش يقدر يقوله تلت التلاتة كام. كنباوي: يابن اللعيبة والإعلاميين عملوا إيه؟ كنباوية: العمل عمل ربنا لسه الرؤية ما بانتش. كنباوي: علشان كده الناس زعلانة؟ كنباوية: واكتر من كده عين حاتم بجاتو وزير. كنباوي: مين بجاتو ده؟ كنباوية: ده كان فى لجنة الانتخابات الرئاسية وممنوع إن أى حد كان فى اللجنة دى يمسك منصب وزارى أو قيادى منعا للشك والقيل والقال وهو كبر دماغه وعينه والناس بقت قلقانة من تعيينه. كنباوي: هو مرسى ده مش ناوى يعقل ويجيبها لبر؟ كنباوية: لأ مش ناوى دبور وزن على خراب عشه . كنباوي: يبقى احسن علشان نرتاح منه ومن جماعته انا داخل اخد دش وانت جهزى الأكل بسرعهة. كنباوية: حاضر ياعنيا . كنباوي: تسلملى عنيكى وايديكى ياكنباوية. كنباوية: وتسلملى انت كمان ياكنباوى.