كنباوى وكنباوية.. حلقة رقم (36).. حريق محكمة باب الخلق يا خلق

فوجئت "كنباوية" ب"كنباوى" نائمًا جوارها ليلا مشعلا سيجارة يدخن فى حجرة النوم متوترًا على غير عادته، ففتحت عينيها ونظرت نحوه قائلة مستفسرة:
"كنباوية": خير يا "كنباوى"، ما لك يا راجل بالك مشغول ليه وبإيه؟ مش عوايدك تولع سجاير فى أوضة النوم!!
"كنباوى": الديون كترت عليا أوى، ومصاريف البيت، والشغل زى ما هو لا بيزيد المرتب ولا بيقل، بس الحاجة بتغلى، وهو ماعدش مقضى، ومش عارف أعمل إيه؟ حاسس إنى غرقان.
"كنباوية": سلامتك من الغرق، وحّد الله، كل عقدة وليها حلّال، أنا حقلعلك حتتين صيغة من صيغتى، بيعهم وصرّف نفسك بيهم، ولما ربنا يفرجها ابقى هاتهملى، ولا تضايق نفسك وتقهر نفسك كده، إحنا عايزينك يا خويا.
"كنباوى": وانتى ذنبك إيه يا "كنباوية" تبيعى صيغتك.
"كنباوية": هو انا حبيعها لحد غريب؟ ده انا ماعنديش أعز ولا أغلى منك، وبعدين هو أنا جايباهم منين؟ ما انت اللى شاريهملى، بكره ربنا يفرجها وتجيبلى أحسن منهم.
"كنباوى": كتّر خيرك يا "كنباوية"، أصيلة من يومك.
"كنباوية": ده انا ماكنت صدقت نمت، كان عندى صداع من كتر الأخبار اللى سمعتها.
"كنباوى": هو فيه جديد يا "كنباوية"؟
"كنباوية": مفيش جديد غير حرق محكمة باب الخلق.
"كنباوى": ودى مين اللى حرقها؟
"كنباوية": بيقولوا الإخوان.
"كنباوى": وليه الإخوان؟ ومايكونش حد غيرهم؟!
"كنباوية": همه المستفيدين يا "كنباوى"؛ لأن اللى اتحرق كلها قضاياهم، وورق مجزرة بورسعيد، وبيقولوا إنهم ليهم دخل فى المجزرة دى.
"كنباوى": ما يمكن مظلومين!
"كنباوية": الله أعلم، بس اشمعنى قضاياهم همه بالذات اللى تتحرق!! غريبة دى، وتخلى الواحد يشك.
"كنباوى": عندك حق، عامة بكرة المستخبى يبان.
"كنباوية": بس مش بعيد عنهم إنهم يعملوا كده، دول ما يعلم بيهم غير ربنا.
"كنباوى": دول من عمايلهم خلوا الواحد ماعندهوش أى ثقة فيهم خلاص، دول اتحرقوا قبل ما تتحرق المحكمة.
"كنباوية": همه اللى جابوه لنفسهم، لو كانوا مشيوا بما يرضى الله ماكنش حصل كده، بس دول طمعوا فى كل حاجة فى البلد، وماحدش يجور على الناس ويطمع فى كل حاجة وربنا بينصفه.
"كنباوى": عندك حق، أنا ححاول أنام شوية، الساعة داخلة على تلاتة الفجر، علشان أعرف أصحى أروح شغلى.
"كنباوية": نام انت ياخويا، والصباح رباح، وبكره ترجع من الشغل تلاقينى بيعالك الدهب ومحضرالك فلوسه، وربنا يعوضها علينا بأحسن منه.
"كنباوى": تصبحى على خير يا "كنباوية".
"كنباوية": وانت من أهله ياخويا.